21-05-2025, 14:51
"Ermənistana dedik ki, Kəlbəcər və Laçını saxlayın, 5 rayonu qaytarın” - Lavrov
“Ermənistanın ilk rəhbərlərindən heç biri Rusiyaya “Dağlıq Qarabağ”ın müstəqilliyini tanımaq təklifi etməyib”.
Bunu Rusiyanın xarici işlər naziri Sergey Lavrov mayın 21-də Ermənistan və Rusiya xarici işlər nazirləri arasında keçirilən birgə mətbuat konfransında deyib.
Azərbaycanın 44 günlük müharibədə istifadə etdiyi silahların əksəriyyətinin Rusiya və Belarus istehsalı olması ilə bağlı jurnalistin sualını cavablandıran Lavrov Ermənistanın müstəqillik əldə etdikdən sonra “Dağlıq Qarabağ”da 7 rayonu tutmaq üçün Rusiya silahlarından istifadə etdiyini vurğulayıb.
“Rusiya silahları Azərbaycanın 7 rayonunu şəksiz tutmaq və orada istehkamlar, hərbi xətlər qurmaq üçün istifadə olunub. Bu da hesablamanın həmin ərazilərin uzun müddət əldə saxlanılması üçün aparıldığını göstərir. Bəzi analitiklərin fikrincə, bu istehkamların xarakteri göstərir ki, onların heç vaxt Azərbaycana qaytarılması planlaşdırılmayıb”, - Lavrov bildirib.
O əlavə edib ki, Rusiya silahlarından Afrikada da istifadə olunur.
Lavrovun sözlərinə görə, müxtəlif ölkələrdə Rusiya silahları var, lakin bu o demək deyil ki, həmin silahlar hər yerdə hamını qane edəcək məqsədlər üçün istifadə olunur.
Rusiyadan Ermənistana reallaşdırılmamış silah tədarükünə gəlincə, Lavrovun sözlərinə görə, bu gün həmin məsələ müzakirə edilib, həll olunub və ödənişlər başqa məqsədlərə yönəldilib.
“Yeni təchizatla bağlı burada heç bir ziddiyyət yoxdur. İndi elə bir vəziyyətdəyik ki, tarixdə ilk dəfə deyil, faşist şüarları ilə Zelenski rejimini ön plana çıxaran bütün Avropaya qarşı mübarizə aparmaq məcburiyyətindəyik. Bu vəziyyətdə Ukraynaya böyük miqdarda müasir silahlar verilir və bu, bizim cavabımızı tələb edir”, - Lavrov bildirib.
O, əmindir ki, erməni tərəfdaşlar anlayırlar ki, bu vəziyyətdə bəzən bütün öhdəlikləri göstərilən müddətlərdə yerinə yetirmək mümkün olmur.
“Lakin müqavilədə nəzərdə tutulan bütün vəsaitlər Ermənistana verilir və proses davam edəcək”.
Başqa ölkələrdən silah alınmasına gəlincə, Lavrovun sözlərinə görə, onlar bunun əleyhinə deyillər, bu, Ermənistanın seçimidir.
Lavrov bir daha vurğulayıb ki, “Dağlıq Qarabağ” məsələsində heç kim Rusiyanı qınaya bilməz, çünki 20 ilə yaxındır ki, Rusiya liderləri Putin və Medvedev Ermənistan-Azərbaycan münasibətlərinin normallaşması üçün addımlar atıb, təkliflər veriblər.
Rusiya Xarici İşlər Nazirliyinin rəhbəri məsələnin yekun həllini sonraya buraxaraq, aralıq mərhələ kimi Ermənistan və Qarabağı birləşdirən Kəlbəcər və Laçın rayonlarını saxlamaqla 5 rayonun Azərbaycana qaytarılması ilə bağlı kompromis təklifini xatırladır. Rusiya xarici işlər nazirinin sözlərinə görə, Rusiyanın bu təklifi dəfələrlə rədd edilib.
21-05-2025, 14:40
Novruz Türk dünyasının ortaq bayramı oldu
Novruz bayramı Türk dünyasının ortaq bayramı statusunu alıb.
Qərar Türk Dövlətləri Təşkilatının Macarıstanın paytaxtı Budapeştdə keçirilən qeyri-rəsmi Zirvə görüşündə qəbul olunub.
Təklif Türkiyə Prezidenti Rəcəb Tayyib Ərdoğan tərəfindən irəli sürülüb və iştirakçı dövlət başçıları tərəfindən dəstəklənib.
21-05-2025, 14:08
Əziz Sancar təltif edildi - Prezident mərasimdə iştirak edib
Mayın 21-də Budapeştdə Nobel mükafatı laureatı Əziz Sancarın Əlişir Nəvai Beynəlxalq Mükafatı ilə təltif olunması mərasimi keçirilib.
Azərbaycan Respublikasının Prezidenti İlham Əliyev tədbirdə iştirak edib.
21-05-2025, 13:51
3+3 formatında növbəti görüşlər İrəvan və Bakıda olacaq
3+3 formatında növbəti görüşlər İrəvan və Bakıda baş tuta bilər.
Bunu İrəvanda keçirdiyi mətbuat konfransında Rusiya Xarici İşlər Nazirliyinin rəhbəri Sergey Lavrov deyib.
Rusiyalı nazir razılaşmanın bağlanması, kommunikasiyaların açılması, sərhədin demarkasiyası və delimitasiyası vasitəsilə tam sülhə nail olmaq yolunda Moskvanın İrəvan və Bakıya dəstəyini təsdiqləyib. Onun sözlərinə görə, proseslər 2020-22-ci illərdə ən yüksək səviyyədə üçtərəfli sazişlər toplusuna əsaslanmalıdır.
Lavrov həmçinin bildirib ki, 3+3 formatının inkişafında kifayət qədər potensial görür. Artıq Tehran və İstanbulda iki görüş keçirilib. İlk iki görüşün nəticələrinə əsasən, regionda sülhün və sabitliyin, iqtisadi və nəqliyyat əlaqələrinin, zəngin mədəni ənənələrin möhkəmləndirilməsi üçün üçün bütün ilkin şərtlərə malik olan platformanın gələcəyi ilə bağlı müəyyən nikbinlik var.
“Ermənistan və Azərbaycan növbəti görüşlərə ev sahibliyi etmək istəyirlər. Onlar öz aralarında razılığa gələ bilərlər. Belə ki, növbəti iki tədbir Ermənistan və Azərbaycanın paytaxtlarında baş tutsun", - Lavrov qeyd edib.
21-05-2025, 13:43
Türk Dövlətləri liderlərinin Zirvə görüşü başa çatıb
Mayın 21-də Macarıstanın paytaxtı Budapeştdə Türk Dövlətləri Təşkilatının (TDT) Dövlət başçılarının qeyri-rəsmi Zirvə görüşü keçirilib.
Azərbaycan Respublikasının Prezidenti İlham Əliyev tədbirdə iştirak edib.
Macarıstanın Baş naziri Viktor Orban dövlət başçılarını qarşılayıb. Əvvəlcə birgə foto çəkdirilib.
Azərbaycan Prezidenti İlham Əliyev Zirvə görüşündə çıxış edib. Sonra Zirvə görüşündə sənədlər imzalanıb.
21-05-2025, 13:01
İlham Əliyev tarixə düşəcək - Ərdoğan
Türk dünyası üçün strateji əhəmiyyət daşıyan Cənubi Qafqazda baş verənləri yaxından izləyirik.
Bunu Türk Dövlətləri Təşkilatının (TDT) Dövlət Başçıları Şurasının qeyri-rəsmi iclasında Türkiyə Prezidenti Rəcəb Tayyib Ərdoğan bildirib.
"Can Azərbaycanın Ermənistanla sülh sazişinin layihəsinin mətni üzrə razılaşma əldə etməsindən məmnunuq. İki ölkə arasında davamlı sülh əldə ediləcəyi təqdirdə, bu vəziyyət Türk dünyası üçün bir çox fürsəti gətirəcək. Müzəffər Prezident İlham Əliyevin bölgəyə sülhü gətirəcək lider olaraq tarixə düşəcəyindən əminəm", - o qeyd edib.
21-05-2025, 12:56
İlham Əliyev liderlərin iclasında çıxış etdi - TAM MƏTN
Mayın 21-də Macarıstanın paytaxtı Budapeştdə Türk Dövlətləri Təşkilatının (TDT) Dövlət Başçıları Şurasının qeyri-rəsmi iclası başlayıb.
Azərbaycan Respublikasının Prezidenti İlham Əliyev tədbirdə iştirak edir.
Macarıstanın Baş naziri Viktor Orban dövlətimizin başçısını qarşılayıb. Prezident İlham Əliyev iclasda çıxış edib. Prezident İlham Əliyevin çıxışıni təqdim edirik:
- Hörmətli cənab Baş nazir.
Hörmətli dövlət başçıları.
İlk növbədə, qonaqpərvərliyə görə Baş nazir Viktor Orbana təşəkkürümü bildirirəm.
Azərbaycan ilə Macarıstan arasında əlaqələrin inkişafı məmnunluq doğurur. Bu, mənim Macarıstana 6-cı səfərimdir. Cənab Orban isə Azərbaycana 7 dəfə səfər etmişdir. Macarıstan Azərbaycanın etibarlı strateji tərəfdaşıdır.
Macarıstan müstəqil siyasət aparan ölkədir və beynəlxalq nüfuzu daim artmaqdadır. Bütün əldə edilmiş uğurlar münasibətilə Baş nazir Viktor Orbanı təbrik edirəm.
Türk Dövlətləri Təşkilatının Dövlət başçılarının keçən il Azərbaycanın təşəbbüsü ilə Şuşada ilk qeyri-rəsmi Zirvə görüşü keçirilmişdir. Şadam ki, bu təşəbbüsün davamı olaraq ikinci qeyri-rəsmi Zirvə görüşü təşkil olunur.
Prezident Sadır Japarovu Qırğızıstanın hazırda təşkilata uğurlu sədrliyinə görə təbrik edirəm.
Bu il Azərbaycan Türk Dövlətləri Təşkilatının rəsmi Zirvə görüşünə ev sahibliyi edəcək və Sizi Zirvə görüşündə iştirak etmək üçün Azərbaycana dəvət edirəm.
Azərbaycan ümumilikdə təşkilatın üzv ölkələrinə 20 milyard ABŞ dollarından çox sərmayə qoymuşdur.
Bu il Türk İnvestisiya Fondunun rəsmi olaraq fəaliyyətə başlaması nəzərdə tutulur.
Türk dövlətləri ilə nəqliyyat sahəsində əməkdaşlığımız güclənir. Son illər ərzində Azərbaycanda nəqliyyat infrastrukturuna - avtomobil yollarına, dəmir yolu xətlərinə, dəniz limanına, gəmiqayırma zavoduna, hava nəqliyyatına böyük həcmdə sərmayələr qoyulmuşdur. Nəticədə, açıq dənizlərə çıxışı olmasa da, Azərbaycan Avrasiyanın nəqliyyat-logistika mərkəzlərindən birinə çevrilmişdir.
Türkiyә vә Mәrkәzi Asiya dövlәtlәrinin Azәrbaycan üzәrindәn tranzit keçәn daşımalarının hәcmi 2024-cü ildә 11 milyon ton təşkil etmişdir.
Qonşu ölkələrlə yeni əməkdaşlıq formatları yaratmış, müştərək müəssisələr qurmuşuq. Orta Dəhlizin bir hissəsi olan Bakı-Tbilisi-Qars dəmir yolunun daşıma qabiliyyəti keçən il Azərbaycanın vəsaiti hesabına 5 milyon tona çatdırılmışdır.
Orta Dəhlizin rəqəmsallaşdırılmasına böyük önəm veririk. Hazırda Xəzər dənizi limanları arasında nəqliyyat əməliyyatlarının və ticarətin sadələşdirilməsini nəzərdə tutan vahid rəqəmsal platformanın yaradılması layihəsi üzərində işlər davam etdirilir.
Xəzər dənizində 50-dən çox ticarət gəmisi olan Azərbaycan Türk dövlətləri üçün önəmli tranzit xidmətləri göstərir. Hazırda Bakı gəmiqayırma zavodunda 10 yeni gəmi inşa edilir.
Ələt Beynəlxalq Dəniz Ticarət Limanının yükaşırma qabiliyyəti 15 milyon tondan 25 milyon tona çatacaq.
Azərbaycanda 8 beynəlxalq hava limanı fəaliyyət göstərir. Sayca 9-cu hava limanı yaxın zamanlarda istifadəyə veriləcək. 9 beynəlxalq hava limanından 3-ü Azərbaycanın erməni işğalından azad edilmiş ərazisindədir. Həmçinin, 1, 5 milyon ton yük qəbuletmə imkanı olan karqo terminalı inşa edilir.
Hörmətli həmkarlar, bildiyiniz kimi, təxminən 200 ölkənin yekdil qərarı ilə 2024-cü ilin noyabr ayında Azərbaycanda COP29 kimi mötəbər konfrans keçirilmişdir. Hazırlıq üçün cəmi 11 ay vaxt olmasına baxmayaraq, COP29-u yüksək səviyyədə təşkil etməyə nail olduq.
Qeydiyyatdan keçmiş 77 min iştirakçı 197 ölkəni təmsil edirdi. Konfransda 70 dövlət və hökumət başçısı iştirak etmişdir.
Azərbaycan COP29-da Qlobal Cənubla Qlobal Şimal arasında körpü qurmağa müvəffəq oldu. Bakıda qlobal iqlim gündəliyi ilə bağlı ciddi qərarlar qəbul edildi.
Əsas nailiyyət inkişaf etməkdə olan ölkələrə maliyyə yardımının 100 milyarddan 300 milyard ABŞ dollarına qədər artırılmasını nəzərdə tutan yeni maliyyə hədəfi barədə razılaşmadır. Bundan başqa, 10 il ərzində razılıq əldə edilməsi mümkün olmayan karbon bazarlarının tənzimlənməsi barədə konsensusa nail olundu, İtki və Zərər Fondu işlək vəziyyətə gətirildi.
COP29 böyük uğurlara imza atmış və tarixə “Bakı sıçrayışı” kimi daxil olmuşdur.
COP29 zamanı Azərbaycan, Qazaxıstan və Özbəkistan dövlət başçıları tərəfindən yaşıl enerjinin inkişafı və ötürülməsi sahəsində strateji tərəfdaşlıq sazişi imzalanmışdır. Bu saziş ölkələrimizdə istehsal edilən yaşıl enerjinin Xəzər-Qara dəniz marşrutu ilə dünya bazarlarına ixracı üçün geniş imkanlar yaradır.
Çıxışımın sonunda Macarıstanı qeyri-rəsmi Zirvə görüşünün uğurlu təşkilinə görə təbrik edir, Türk Dövlətləri Təşkilatının fəaliyyətinə uğurlar arzulayıram.
Sağ olun.
21-05-2025, 12:51
9-cu hava limanı yaxın zamanlarda istifadəyə veriləcək
Azərbaycanda 8 beynəlxalq hava limanı fəaliyyət göstərir. Sayca 9-cu hava limanı yaxın zamanlarda istifadəyə veriləcək.
Bu barədə Prezident İlham Əliyev Türk Dövlətləri Təşkilatının Dövlət başçıları Şurasının qeyri-rəsmi iclasında çıxışında bildirib.
Dövlətimizin başçısı vurğulayıb ki, 9 beynəlxalq hava limanından 3-ü Azərbaycanın erməni işğalından azad edilmiş ərazisindədir. Həmçinin 1,5 milyon ton yük qəbuletmə imkanı olan karqo terminalı inşa edilir.
21-05-2025, 12:48
Türk İnvestisiya Fondu fəaliyyətə başlayır
Azərbaycan ümumilikdə təşkilatın üzv ölkələrinə 20 milyard ABŞ dollarından çox sərmayə qoymuşdur.
Bu barədə Prezident İlham Əliyev Türk Dövlətləri Təşkilatının Dövlət başçıları Şurasının qeyri-rəsmi iclasında çıxışı zamanı bildirib.
Dövlət başçısı qeyd edib ki, Türk İnvestisiya Fondunun rəsmi olaraq bu il fəaliyyətə başlaması nəzərdə tutulur.
21-05-2025, 12:28
"İrəvanla Bakıya sülh sazişini imzalamaqda kömək etməyə hazırıq” - Lavrov
Rusiya Ermənistanla Azərbaycan arasında münasibətlərin normallaşmasına fəal dəstək verməkdə davam edir.
Bunu Rusiyanın xarici işlər naziri Sergey Lavrov İrəvanda Ermənistanın xarici işlər naziri Ararat Mirzoyanla geniş tərkibdə görüşü zamanı deyib.
Lavrov vurğulayıb ki, Moskva sülhün bərqərar olmasında və ikitərəfli münasibətlərin tam normallaşdırılmasında səmimi maraqlıdır. Onun sözlərinə görə, bu prosesin möhkəm təməli 2020 və 2022-ci illərdə Rusiya və Azərbaycan prezidentləri ilə Ermənistanın baş naziri arasında imzalanmış üçtərəfli sazişlərdir.
"Biz Ermənistan və Azərbaycan arasında sülh müqaviləsinin mətni üzrə razılaşmanı alqışlayırıq və sənədin yekun imzalanması üçün qalan məsələlərin həllini dəstəkləməyə hazırıq", - Lavrov qeyd edib.
O vurğulayıb ki, İrəvan həm nəqliyyat və iqtisadi marşrutların açılmasında, həm də sərhəd və humanitar məsələlərin həllində Moskvanın dəstəyinə tam arxalana bilər.
Rusiya XİN rəhbəri həmçinin qeyd edib ki, Rusiya 3+3 regional əməkdaşlıq formatına önəm verir və onun potensialına inanır. O, artıq həmin formatda üçüncü foruma hazırlıq işlərinin getdiyini qeyd edərək, bugünkü müzakirələr çərçivəsində tərəflərin də bu məsələləri həll edəcəyinə ümidvar olduğunu bildirib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!