Dünyanın indiyədək gəlib-keçmiş ən aktiv diplomatı kimdir, bilirsinizmi?

Xeyr, bilmədiniz. Gözünüz müxtəlif ölkələrin diplomatiya tarixi kitablarını da axtarmasın. Diplomatiya tarixində bu adı qazanmağa layiq yeganə bir şəxs var, o da bizim lap yaxınlığımızda yaşayır. Bəlkə də bir çoxlarımız onunla Bakının müxtəlif marketlərində, küçələrində qarşılaşırıq. Amma bu gizli qəhrəman barədə heç nə bilmədiyimizdən onu tanıya bilmirik. Ürəyinizi çox sıxmadan adamın adını zikr edirəm: Naxçıvan MR-nin Bakıdakı nümayəndəsi Bəxtiyar Əsgərov.


Adam, demək olar ki, hər gününü bir səfirlə görüşə həsr etməklə dünya rekordu qırır. Sizi inandırım, dünyanın ən təcrübəli diplomatı sayılan, 1996-cı ildən 2006-cı ilə qədər BMT-nin Baş katibi vəzifəsini icra edən Kofi Annan belə, həyatı boyu bu performansı sərgiləyə bilməyib. Yəqin ki, Bəxtiyar Əsgərovun bu rekordunu qırmaq qiyamətə qədər də heç kimə nəsib olmayacaq.

Sual oluna bilər: Naxçıvanın Daimi Nümayəndəliyi nədir, hər gün bir səfirlə görüşmək nə? Axı Naxçıvanın Daimi Nümayəndəliyinin təyinatı Azərbaycan icra strukturları ilə Muxtar Respublikanın əlaqəsini yaratmaq, bəzi rəsmi prosedurları həyata keçirməkdirsə, Bəxtiyar Əsgərovun xarici ölkələrin səfirləri ilə nə işi ola bilər?

Açığı, 2020-ci il 7 yanvar tarixində bu sual bizi də xeyli maraqlandırdığından kiçik bir araşdırma aparıb istər Muxtar Respublika rəhbərliyindən, istərsə də rəsmi Bakıdan bu müəmmanın sirrini soruşmuşduq. Üzərindən hardasa 2 ilə yaxın vaxt keçməsinə baxmayaraq, hələ də sualımıza cavab gözləyirik. Görünən budur ki, sualımız xeyli qəliz olduğundan nə XİN, nə də Naxçıvan MR rəsmiləri hələ də məsələyə aydınlıq gətirə bilmir. Nə etməli, biz də eyni sualı təkrar gündəmə gətirib yenə bir neçə il təkrarən cavab gözləməyə məhkumuq.

Naxçıvan Daimi Nümayəndəsinin qeyri-adi diplomatik qabiliyyətindən bəhs edən həmin yazını təkrarən diqqətinizə çatdırırıq.

Bir müddət əvvəl xəbər vermişdik ki, 7 iyul 2018-ci il tarixində Naxçıvan Muxtar Respublikasının facebookdakı rəsmi səhifəsində Vasif Talibov Heydər Əliyevdən sonra dövlətçilik təcrübəsinə sahib ən bacarıqlı şəxsiyyət elan olunmuşdu. Statusda eynilə belə deyilirdi:
“Heyder Eliyevden sonra En bôyük İnsan Cenab Sedrimizdır !

Dôvletçilık mübarizesınde bacarıqlı, genış dünyagörüşe sahıb dövlet xadimi kımi formalaşan Cenab Vasif Talıbov - Muxtar Respublıkamızın GÔZÜDÜR.

Heydər Əliyevdən sonra Xalqını və Azərbaycanı Heydər Əliyev qədər sevən ən böyük İnsandır. Allah Cənab Sədrimizi bu Dövlətə və Millətə çox görməsin..”
Doğrusu, bu statusdakı təsnifata hazırkı ölkə başçısı İlham Əliyevin adının salınmaması bizə təəccüblü gəlmişdi. Axı necə ola bilər ki, YAP məntiqiylə yanaşanda Heydər Əliyevin ən böyük mirasçısı kimi qəbul olunan və 15 ildir (2018-ci ildə hakimiyyətə gəlişinin 15-ci ildönümü tamam oldu) ölkəni idarə edən İlham Əliyev Muxtar Respublika ideoloqlarının yadından çıxsın?

Beynimizi qurcalayan bu sualın cavabını axtarışımız uzun sürmədi. Əldə etdiyimiz dəqiq məlumatlara görə, bu status gəlişigözəl yazılmayıbmış. Sən demə, həmin dövrlərdə ölkə başçısının səhhətində problemlər yarandığı barədə hakimiyyət kluarlarında dedi-qodular yayılmağa başlayıbmış. Hətta bu şayiələt müxalif mediaya da ötürülmüş və cəmiyyət yeni dəyişikliklərə hazırlanırmış.

Sonradan yalan olduğu ortaya çıxan bu iddialar hakimiyyət dairələrində yeni lider axtarışına yol açıbmış. Ciddi müzakirələrin getdiyi həmin dövrdə Naxçıvan Muxtar Respublikasının isə, sözsüz ki, özünəməxsus namizədi olub – Naxçıvan Muxtar Respublikasının Ali Məclisinin sədri Vasif Talıbov.

Təsadüfi deyil ki, 2017-ci ilin sonlarından etibarən Naxçıvanın Daimi Nümayəndəliyinin də xeyli aktivləşdiyi müşahidə olunub. Məlumata görə, özünü hər yerdə “Heydər Əliyevin ən gənc dostu” kimi qələmə verən Naxçıvanın Bakıdakı Daimi Nümayəndəsi Bəxtiyar Əsgərov tez-tez xarici ölkələrin səfirləriylə görüşür və onların Naxçıvana səfərini təşkil edirmiş. Məlum statusun paylaşıldığı 2018-ci ildə Bəxtiyar Əsgərovun keçirdiyi diplomatik görüşləri də bu şübhələri artırır. Onlardan bəziləri.

31.07.2018: İtaliya Respublikasının Azərbaycan Respublikasındakı Səfirinin müavini-Müvəqqəti İşlər Vəkili Umberto Boeri və İtaliyanın "Techno Alpin" şirkətinin export üzrə direktoru Benjamin Poetz Bakı şəhərində Naxçıvan Muxtar Respublikası daimi nümayəndəliyinin rəhbəri Bəxtiyar Əsgərovla görüşüb. Görüş Naxçıvan Muxtar Respublikasının Bakıdakı daimi nümayəndəliyində keçirilib.
23.07.2018: Avstriya Respublikasının Azərbaycan Respublikasında fövqəladə və səlahiyyətli Səfiri Axel Wech Bakı şəhərində Naxçıvan Muxtar Respublikası daimi nümayəndəliyinin rəhbəri Bəxtiyar Əsgərovla görüşüb.
20.07.2018: Naxçıvan Muxtar Respublikası daimi nümayəndəliyinin rəhbəri Bəxtiyar Əsgərov Belçika Krallığının milli bayramı-Müstəqilliyin 188-ci və Kral Filipin Taxt-taca çıxmasının 5-ci ildönümü ilə əlaqədar təşkil olunmuş tədbirdə iştirak edib.
04.07.2018: Sudan Respublikasının Azərbaycan Respublikasında fövqəladə və səlahiyyətli səfiri Abbas Mustafa Ahmed Abdalla Bakı şəhərində Naxçıvan Muxtar Respublikası daimi nümayəndəliyinin rəhbəri Bəxtiyar Əsgərovla görüşüb.
23 noyabr 2018-cı il tarixində Yaponiyanın Azərbaycan Respublikasında fövqəladə və səlahiyyətli Səfiri cənab Teruyuki Katorinin dəvətilə, Bakı şəhərində Naxçıvan Muxtar Respublikası daimi nümayəndəliyinin rəhbəri cənab Bəxtiyar Əsgərov bu ölkənin milli bayramı-İmperatorun Ad günü münasibətilə təşkil edilmiş rəsmi qəbulda iştirak edib.
22 noyabr 2018-cı il tarixində Bakı şəhərində Naxçıvan Muxtar Respublikası daimi nümayəndəliyinin rəhbəri cənab Bəxtiyar Əsgərov Çex Respublikasının Azərbaycan Respublikasında fövqəladə və səlahiyyətli Səfiri cənab Milan Ekert ilə görüşüb.
25 oktyabr 2018-cı il tarixində Avstriya Respublikasının Azərbaycan Respublikasında fövqəladə və səlahiyyətli Səfiri cənab Axel Wechin dəvətilə Bakı şəhərində Naxçıvan Muxtar Respublikası daimi nümayəndəliyinin rəhbəri cənab Bəxtiyar Əsgərov bu ölkənin Milli Günü münasibətilə təşkil olunmuş rəsmi qəbulda iştirak edib. Qeyd edək ki,"Landmark"da baş tutan tədbir həm də Səfir Axel Wechin səlahiyyət müddətinin başa çatması ilə əlaqədar təşkil edilib.
23 oktyabr 2018-cı il tarixində cənab Bəxtiyar Əsgərov Yunanıstanın Azərbaycandakı İqamətgahında təşkil edilmiş səhər yeməyində iştirak etmişdir.
22 oktyabr 2018-cı il tarixində cənab Bəxtiyar Əsgərov Sudan Respublikasının Azərbaycan Respublikasındakı Səfirliyində olub.
17 oktyabr 2018-cı il tarixində Türkmənistan Respublikasının Azərbaycan Respublikasında fövqəladə və səlahiyyətli Səfiri cənab Mekan İşanquliyevin dəvətilə, Bakı şəhərində Naxçıvan Muxtar Respublikası daimi nümayəndəliyinin rəhbəri cənab Bəxtiyar Əsgərov bu ölkənin Müstəqillik Günü münasibətilə təşkil edilmiş rəsmi qəbulda iştirak edib.
13 sentyabr 2018-cı il tarixində Gürcüstanın Azərbaycan Respublikasına yeni təyin olunmuş fövqəladə və səlahiyyətli Səfiri ilə görüş keçirilmişdir.
5 sentyabr 2018-cı il tarixində Çin Xalq Respublikasının Azərbaycan Respublikasındakı səfirliyində görüş keçirilmişdir.
19 iyul 2018-cı il tarixində Belçika Krallığının Azərbaycan Respublikasında fövqəladə və səlahiyyətli Səfiri cənab Bert Scooesun dəvətilə Bakı şəhərində Naxçıvan Muxtar Respublikası daimi nümayəndəliyinin rəhbəri cənab Bəxtiyar Əsgərov muxtar respublika adından bu ölkənin milli bayramı - Müstəqilliyin 188-ci və Kral Filipin Taxt-taca çıxmasının 5-ci ildönümü ilə əlaqədar təşkil edilmiş rəsmi qəbulda iştirak edib.
7 iyun 2018-cı il tarixində Rusiya Federasiyasının Azərbaycan Respublikasındakı Səfirliyində görüş keçirilmişdir.

Həmin dövrlərdə Azərbaycandakı xarici səfirlər Naxçıvana da tez-tez səfər ediblər. Bu səfərlər içərisində ən diqqəti cəlb edənlər isə Asiyanın ən əzazil dövləri Şimali Koreya ilə müqayisə olunan Naxçıvan şəhərində keçirilən “Avropa günləri” çərçivəsində bir sıra Qərb diplmatlarının səfətləridir. Naxçıvanın rəsmi saytları bu səfəri belə xatırlayır:
“Sentyabrın 22-də (2018) Naxçıvan Muxtar Respublikası Ali Məclisinin Sədri Vasif Talıbov Naxçıvan şəhərində keçirilən “Avropa günləri”ndə iştirak etmək üçün muxtar respublikaya gələn Avropa İttifaqının ölkəmizdəki nümayəndəliyinin rəhbəri Kestutis Yankauskas və Avropa İttifaqına üzv ölkələrin Azərbaycandakı səfirləri ilə görüşüb.

Finlandiyanın səfiri xanım Arya Makkonen, Danimarkanın səfiri Svend Olinq, Yunanıstanın səfiri Nikolas Kanellos, Macarıstanın səfiri Viktor Szederkenyi, Bolqarıstanın səfiri Nikolay Yankov və Belçika Krallığının səfiri Bert Skufs Naxçıvanda olmaqdan məmnunluqlarını bildirib və əməkdaşlıq imkanlarını diqqətə çatdırıblar”.
Digər diqqət çəkən görüş 8 Noyabr 2018-ci il tarixində Naxçıvan Muxtar Respublikası Ali Məclisinin sədri Vasif Talıbovun Rusiya Federasiyasının ölkəmizdəki fövqəladə və səlahiyyətli səfiri Mixail Boçarnikovla bir araya gəlməsidir.

Maraqlıdır ki, Naxçıvan Daimi Nümayəndəsinin 2019-cu ildə də ölkəmizdəki səfirlərlə görüşlərini davam etdirib. Həm də diplomatik görüşlərin intensivliyini bir az da artırıb. Onun sadəcə bir ay ərzində keçirdiyi diplomatik görüşləri sadalasaq, hətta dünyanın ən dahi diplomatları belə Naxçıvanın Daimi nümayəndəsinin daxili enerjisinə qibtə ilə yanaşarlar. Biz də artıq heç nəyə təəccüblənməyən Azərbaycan oxucularını “Heydər Əliyevin ən gənc dostu”nun qeyri-adi diplomatik məharətilə heyrətləndirmək istəyirik:

31.10.2019: Bakı şəhərində Naxçıvan Muxtar Respublikası Daimi nümayəndəliyinin rəhbəri Bəxtiyar Əsgərov Qazaxıstan Respublikasının Azərbaycan Respublikasında yeni təyin olunmuş fövqəladə və səlahiyyətli səfiri Serjan Abdıkərimovla görüşüb.
01.11.2019: Bakı şəhərində Naxçıvan Muxtar Respublikası Daimi nümayəndəliyinin rəhbəri Bəxtiyar Əsgərov Braziliya Federativ Respublikasının Azərbaycan Respublikasında fövqəladə və səlahiyyətli səfiri Manuel A.C.Montenegro L.Da Cruzla görüşüb.
04.11.2019: Bakı şəhərində Naxçıvan Muxtar Respublikası Daimi nümayəndəliyinin rəhbəri Bəxtiyar Əsgərov İran İslam Respublikasının Azərbaycan Respublikasındakı səfirliyinin Hərbi Attaşesi Polkovnik Əli Seyfi ilə görüşüb.
05.11.2019: Bakı şəhərində Naxçıvan Muxtar Respublikası Daimi nümayəndəliyinin rəhbəri Bəxtiyar Əsgərov Çin Xalq Respublikasının Azərbaycan Respublikasında yeni təyin olunan fövqəladə və səlahiyyətli səfiri xanım Guo Minlə görüşüb.
07.11.2019: Bakı şəhərində Naxçıvan Muxtar Respublikası Daimi nümayəndəliyinin rəhbəri Bəxtiyar Əsgərov Fransanın Azərbaycanda yeni təyin olunan fövqəladə və səlahiyyətli səfiri Zakari Qrosla görüşüb.
13.11.2019: Bəxtiyar Əsgərov Latviyanın Azərbaycandakı fövqəladə və səlahiyyətli səfiri Dainis Qarançsın dəvətilə Avropa İttifaqının "Süd çayı" layihəsi çərçivəsində həyata keçirilən, Latviya Süd Komitəsinin İdarə Heyətinin sədri cənab Yanis Solks və bu ölkənin Qida və Baytarlıq Xidmətinin rəisi cənab Janis Balodisin iştirakı ilə Bakıda təşkil edilmiş Latviyanın süd məhsulları Sərgisində iştirak edib.
19.11.2019: Bakı şəhərində Naxçıvan Muxtar Respublikası Daimi nümayəndəliyinin rəhbəri Bəxtiyar Əsgərov Malaziyanın Azərbaycan Respublikasında yeni təyin olunan fövqəladə və səlahiyyətli səfiri Dato Yubazlan Yusofla görüşüb..
20.11.2019: Bakı şəhərində Naxçıvan Muxtar Respublikası Daimi nümayəndəliyinin rəhbəri Bəxtiyar Əsgərov Belarus Respublikasının Azərbaycan Respublikasında fövqəladə və səlahiyyətli səfiri Gennadi Axramoviçin dəvətilə, bu ölkənin Bakıdakı Səfirliyinə gəlib.
22.11.2019: Bakı şəhərində Naxçıvan Muxtar Respublikası daimi nümayəndəliyinin rəhbəri Bəxtiyar Əsgərov İsrail Dövlətinin Azərbaycan Respublikasında fövqəladə və səlahiyyətli səfiri Dan Stavın dəvətilə, səfirin səlahiyyət müddətinin bitməsi ilə əlaqədar Bakıda təşkil olunan ziyafətdə iştirak edib.
28.11.2019: Bakı şəhərində Naxçıvan Muxtar Respublikası daimi nümayəndəliyinin rəhbəri Bəxtiyar Əsgərov Slovakiya Respublikasının Azərbaycan Respublikasında yeni təyin olunan fövqəladə və səlahiyyətli səfiri Peter Priputenin dəvəti ilə bu ölkənin respublikamızda fəaliyyət göstərəcək səfirliyinin rəsmi açılış mərasimində iştirak edib.
29.11.2019: Bakı şəhərində Naxçıvan Muxtar Respublikası daimi nümayəndəliyinin rəhbəri Bəxtiyar Əsgərov Fransanın Azərbaycandakı fövqəladə və səlahiyyətli səfiri Zakari Qrosun dəvəti ilə, 28 noyabr- Beynəlxalq Fransız dili müəllimləri günü münasibətilə Azərbaycan Dillər Universitetində keçirilən "İnnovasiya və yaradıcılıq" adlı konfransda iştirak edib.

Təsəvvür edirsinizmi, 1 ay ərzində 10-dan artıq görüş. Biz hələ Bəxtiyar müəllimin ölkəmizin tanınmış adamları ilə görüşlərini bu siyahıya əlavə etmirik. Hər gün bir neçə dəfə müxtəlif adamlarla görüşlər keçirən Naxçıvan Nümayəndəliyinin bu aktivliyi həqiqətən heyrət doğurur. Xüsusilə də səfirlərlə görüşlər onun nəyinə lazım idi? Bu görüşlərdə nələr müzakirə edilirdi? Bəxtiyar müəllimi yenə başa düşmək olar; adam xarici dövlətlərin ölkəmizdəki ən yüksək səlahiyyətliləri ilə görüşürdü. Bəs səfirlər niyə onun dəvətini dərhal qəbul edib, hüzuruna tələsirdilər? Ümidvarıq ki, bu sualların cavabı təkcə Azərbaycan hakimiyyətini yox, həm də həmin səfirlərin təmsil etdikləri dövlətləri də maraqlandırmalıdır.
Daimi nümayəndənin işi sadəcə səfirlərlə görüşüb Naxçıvan MR-nın Ali Məclisinin sədrinin salamlarını onlara və təmsil etdikləri dövlətlərin rəhbərliyinə çatdırmaqdan ibarət olmayıb. O, həmçinin Azərbaycanın tanınmış ziyalıları, dövlət adamları və deputatları ilə də tez-tez bir araya gəlir və Naxçıvandan onlara sovqatlar çatdırırmış. Bu sovqatların içərisində təkcə Muxtar Respublikada istehsal olunmuş məhsullar deyil, həm də pul və dəyərli əşyalar da yer alırmış. Həmin görüşlərin tarixləri və iştirakçıları barədə gələcək yazılarımızda məlumat verəcəyik. Hələlik isə onu vurğulamaqda fayda görürük ki, Naxçıvan Muxtar Respublikası hökuməti Azərbaycan ziyalılarına və tanınmış adamlarına xüsusi diqqətlə yanaşırmış.

Məlumata görə, Naxçıvan rəhbərliyi ölkə birinciliyi yarışında öz namizədinə daxili dəstək almaq üçün Azərbaycanın bəzi vəzifəli şəxslərini Muxtar Respublikaya dəvət edir və onlara bu diyarda villalar tikmək üçün şərait yaradırmış. Bu təklifə biganə yanaşanlara isə özləri villalar tikib hədiyə edirmişlər.

Sözsüz ki, bu işdə Vasif Talıbovun lobbiçiliyini edən başqaları da olub. Əks halda təkcə “Heydər Əliyevin ən gənc dostu” ilə bu qədər genişmiqyaslı lobbiçilik fəaliyyəti yürütmək mümkün deyildi. Daxili lobbiçilik fəaliyyətini isə əsasən iki nəfər yürüdürmüş. Bunlardan biri Azərbaycan Milli Elmlər Akademiyasının vitse-prezidenti və MM deputatı İsa Həbibbəyli, digəri isə Azərbaycan Həmkarlar İttifaqları Konfederasiyasının sədri, Azərbaycan Respublikası Milli Məclisinin deputatı Səttar Mehbalıyev imiş. Zaman-zaman Milli Məclisin deputatı Eldar İbrahimov da bu lobbiçilik fəaliyyətinə qoşulsa da, deyilənlərə görə, intellektual səviyyəsini bəyənmədiyindən Vasif müəllim ona çox böyük missiyalar tapşırmırmış. Naxçıvanın digər deputatı Siyavuş Novruzovdan isə zəndeyi-zəhləsi getdiyindən onu öz müqəddəs lobbiçiliyinə ümumiyyətlə yaxın buraxmırmış.
(Ovqat.com)

Bütöv.az

Son günlər Qax rayonunda Şəhid ailələri və Qazilərə qarşı hörmətsizlik pik həddə çatıb. Ötən gün Şəhid polkovnik-leytenant Sadiq Məmmədovun ailəsinə olan hörmətsizlik – icra başçısı Musa Şəkiliyevin Şəhid ailəsinə kobud davranması, Qax Bələdiyyəsinin sədri Eyvaz Orucovun Şəhid ailəsindən 3500 manat rüşvət tələb etməsi Qaxda sosial narazılığı artırıb.

DİA.AZ-a daxil olan şikayət məktubunda da sakinlər icra başçısının özbaşınalıqlarından cana doyduqlarını və hüquq-mühafizə orqanlarının Qaxda tədbir görməli olduğunu bildirirlər.

Narazı sakinlər dia.az-a yazır: “Qaxın İcra başçısı Musa Şəkiliyev Qax camaatına dəyər vermir, Elə bil Qaxın icra başçısı yoxdur. Şikayətlərimizi kimsə eşitmir. İcra başçısı problemlərimizi həll etmir, əvəzində şəhidin ailəsinə, qazilərə qənim kəsilib. Elə bil bu adama deyiblər ki, sənin işinin adı yalnız və
yalnız Qaxda narazılıq yaratmaqdır.

Biz də Qax sakinləri olaraq dia.az vasitəsilə ölkə rəhbərliyinə müraciət edirik: Gəlin, Şəkiliyevə 2022-ci ildə şans verməyək. O, düzəlməyəcək... Kim olursa-olsun, amma Şəkiliyev olmasın!

Bax, Qax camaatı bu qədər yorulub..."

İddia olunanlarla bağlı dia.az olaraq bütün maraqlı tərəfləri dinləməyə hazırıq...

Bütöv.az

Zəngilan rayon prokuroru Lalə Hüseynova tutduğu vəzifədən azad olunaraq Hacıqabul rayon prokuroru vəzifəsinə təyin edilib.

Bütöv.az-ın əldə etdiyi məlumata görə, Baş prokuror Kamran Əliyevin digər əmri ilə Baş Prokurorluğun müvafiq idarəsinin böyük prokuroru Qibləli Kərimov tutduğu vəzifədən azad olunaraq Zəngilan rayon prokuroru vəzifəsinə təyin edilib.

Məlumatı Baş Prokurorluğun Mətbuat xidməti təsdiqləyib.

Gənclər və İdman Nazirliyində vəzifəli şəxslərin qrant siyasəti tənqidlərə və ittihamların səslənməsinə səbəb olub. Artıq iqtidaryönlü gənclər təşkilatlarının sədrləri Nazirlikdə ayrı-ayrı şəxslərin qrant müsabiqələri ilə bağl yol verdikləri maxinasiyaları dilə gətirməyə başlayıblar. Belə məlum olur ki, GİN məmurları böyük bir qrant mafiyası formalaşdırıblar və gənclər siyasəti üzrə ayrılan vəsaitlər mənimsəmələrin qurbanı olur.

Tia.az-ın araşdırması nəticəsində yüksək qrant alan təşkilatların əksəriyyətinin fəaliyyətsiz olduğu, bəzilərinin isə qrantdan-qranta fəaliyyət göstərdikləri üzə çıxıb. Məsələn, “Gənc Psixoloqlar” İctimai Birliyinin bu günə qədər külli miqdarda qrant layihələri aldığı, lakin heç bir effektiv iş görmədiyi aydınlaşıb. Həmçinin, “Gənclər İntellektual” İB, “Dünya Azərbaycan Gənclər Beynəlxalq Həmrəylik” İB və “Fəal Gənclər” İB, “Yeni Yol Maarifləndirməsi” İB və digərlərinə yüksək məbləğlərdə qrantlar ayrılıb. Amma indiyədək hər hansı fəaliyyətləri diqqət çəkməyib. Ən yaxşı halda kosmetik tədbirlər keçirməklə qrantları mənimsəyiblər.

Gənclərin İnkişaf Mərkəzin rəhbəri Kamil Həmidov da sosial media hesabında tənqidlərini bölüşüb. Onun sözlərinə görə, Gənclər və İdman Nazirliyi yenə bizi görməzlikdən gəlir: “Davamlı olaraq 2018-ci ildən bəri hər həftə dayanmadan qrant, gəlir niyyəti güdmədən, məkanı dost obyektlərdən, proyektoru digərlərindən, kofe breyk üçün ləvazimatları imkanlı dost təşkilatlardan alaraq gənclərə töhfə veririk, nazirlik bizi görmür. Kimi görür, şou-biznes ulduzlarını xatırladan təşkilatları.

Rayonlarda kitabxanası olmayan, ömründə kitaba toxunmayan, kitab qoxusunun nə olduğunu bilməyən saysız-hesabsız gənclərə kitab oxutmağın, maarifləndirməyin nə olduğunun, necə çətin olduğunun fərqindəsinizmi?


2003-cü ilin dekabrında ümummilli lider mərhum Heydər Əliyevin vəfatı ilə əlaqədar NAYORA-da keçirilən iclasda adın əbədiləşdirilməsi ilə bağlı Heydər Əliyev adına Fondun yaradılması təşəbbüsünü irəli sürmüşdük. İndiki əməkdaşlarınızın bir xeyli hissəsi orda iştirak ediridi. Cənab Fuad Muradovun rəhbərliyi dövrü idi. O zaman Azərbaycanda milli donor olmadığından Amerika prezidentlərinin adına olan fondların analoqları variantı təklifini verdik, daha yüksək mərhələlərdə təklif səsləndirilsin.

Fuad Babayev siz ki, o zaman orada iştirak edirdiz. Bəs indi niyə bizi görmürsüz. 4-ildir sərasər hər həftə Don Kixot kimi qolumuzu çırmalayıb kitabdan uzaq millətin gənclərinə Kitabla Terapiya layihəsini heç kim görməsə də siz ki görmək zorundasız. Monitorinq edərək görmək, dəyərləndirmək və dəstəkləmək istənilən dövlətlərdə məgər istənilən nazirliyin əsas funksiyaları deyilmi? Məhz bu funksiyaların işləkliyi sayəsində də o sahə üzrə cənab prezidentin admnistrasiyası tərəfindən siyasi proqram (Gənclər Siyasəti proqramı) hazırlanır”.

K.Həmidov deyib ki, görməyin, dəstəkləməyin, eybi yoxdur, amma biz dəstəkləyəcəyik: “Dövlətimizi, ordumuzu, prezidentimizi, gənclərimizin inkişafını”.

AzToday.az xəbər verir ki, K.Həmidovun adını çəkdiyi Fuad Babayev isə Nazirlikdə qrant müsabiqələrinin monopolistidir. K.Həmidovun tənqid etdiyi Fuad Babayev vəzifəsindən azad olunan İntiqam Babayevin komandasında yer alan və adı bir sıra qalmaqallarda, maxinasiyalarda hallanan şəxlərdəndir.


Onun ünvanına indiyədək yaxın ətrafının adına təşkilatlar yaradaraq külli-miqdarda qrant mənimsəmə, gənclər üçün nəzərdə tutulan dövlət mükafatlarının ədalətsiz bölgüsü kimi mövzularda ağır ittihamlar səslənib.

İntiqam Babayevin vəzifədən gedişindən sonra Fuad Babayevin də postu ilə vidalaşacağı gözlənilsə də, əksi baş verdi. İctimaiyyətə bəlli olmayan səbəblərdən şöbə müdiri təyin edilib.

Həmçinin, iqtidaryönlü “İslahatçı Gənclər” İctimai Birliyinin sədri Fərid Şahbazlı da qrant siyasətini sərt ittiham edib. Ehtimal olunur ki, bu ittihamlar Gənclər və İdman Nazirliyinə yönəlib.

Çünki F.Şahbazlı bu ittihamları Gənclər və İdman Nazirliyinin qrant müsabiqəsinin nəticələrini açıqlandığı gün səsləndirib.

Sitat: “Müxtəlif qrant müsabiqələri çərçivəsində QHT-lərə qrant ayrılarkən görəsən onların fəaliyyət sferalarına, nizamnamələrinə, bundan əvvəl icra etdiyi layihələrə, heç olmasa təşkilatın adına diqqət edilir, araşdırılırmı?! Buna ciddi şübhəm var.


Yoxsa, məsələn “Azərbaycan- X ölkə Gəncləri” İctimai Birliyinə niyə kompyuter biliklərinin tədrisi, məşğulluq problemlərinin həlli, ətraf mühitin mühafizəsi kimi mövzularda qrant verilsin ki?!

Bu formada necə müəyyən olunmuş hədəflərə, layihənin məqsədlərinə çatmaq olar?! Axı bu atamızın, babamızın pulu deyil. Bütün xalqın payı olar büdcə vəsaitidir”.

Qeyd edək ki, bundan öncə də F.Şahbazlı Nazirliyin bır sıra vəzifəli şəxslərini tənqid atəşinə tutmuşdu.

Bütöv.az

2021-ci ilin başa çatmasına sayılı günlər qalıb. Başa çatmaqda olan il ərzində bir sıra siyasətçilər, məşhurlar, məmurlar müzakirələrə səbəb olan açıqlamaları ilə yadda qaldılar.

“Qafqazinfo” onlardan bir neçəsini təqdim edir:

Sözsüz ki, ictimaiyyətdə ən çox müzakirələrə səbəb olan açıqlama Allahşükür Paşazadəyə məxsusdur. Şeyxin “Ayətullah Xameneyinin “Qarabağ torpağı İslam torpağıdır” deyərək fətva verməsi qələbənin carçısı idi və bizi qələbəyə apardı” deməsi günlərlə sosial şəbəkələrdə müzakirə edildi, mediada bununla bağlı yazılar dərc olundu, ona qarşı əks fikirlər səsləndirildi.

2021-ci ildə Milli Məclisin Əmək və sosial siyasət komitəsinin sədri Musa Quliyev də müzakirələrə səbəb olan açıqlama ilə yadda qaldı.

Millət vəkilinin “Ev işlərinin, ailə üzvlərinə qulluqla bağlı haqqı ödənilməyən iş saatlarının 77%-i qadınların payına düşür. Bu haqqı zəhmət çəkib kişi ödəməlidir. Çünki əgər evdə qadın olmasa, kişi bu işi görmək üçün kimisə tutmalıdır” deməsi qadınların ürəyincə olsa da, bəzi kişilər deputatın bu fikri ilə razılaşmadı.

Teleaparıcı Lalə Azərtaşın isə təbii qazın qiymətlərinin qalxması ilə bağlı efirdə səsləndirdiyi fikirlər geniş müzakirələrə yol açdı:

“Günahkar bəllidir. Bu, koronavirusdur. Son bir ildə bütün dünya bazarlarında ərzaq məhsulları davamlı şəkildə artdı. İndi soruşuram: qazın qiyməti niyə artmasın? Qoyun, artsın. Hələ qazın gecə və gündüz tarifi də müəyyən edilsin. Yaydır, qaz ən çox mürəbbə bişirməyə gedir. Bunları gecə edərsiniz ki, ağzınız kimi, cibiniz də dada gəlsin”.

Təndiqlərdən sonra aparıcı açıqlama yayaraq, qalmaqallı çıxışına “sarkazm” dedi.

Deputat Tahir Kərimli isə Milli Məclisdə Eldəniz Səlimovun deputat toxunulmazlığına xitam verilməsi haqqında layihənin müzakirəsi zamanı səsləndirdiyi fikirlə gündəm oldu:

“Hər birimizin içində kədər var. Bu, onunla bağlı deyil ki, öz həmkarımızın qələmini qırırıq. Burada hər bir deputatın nüfuzu üçün zərbə görürük. Mən də hiss edirəm ki, xalqımızın gözündə kiçildik. İntizam Komissiyasının qərarını alqışlayıram. Çünki o iclasda ancaq xəsarət yetirmədən danışılıb. Polisin həddində idimi ki, deputatın səlahiyyət həddini aşıb-aşmadığını qiymətləndirsin? Niyə polis gedib öz rəhbərinə məlumat vermədi? Deməli, polisin yiyəsi var, ancaq deputatın yiyəsi yoxdur”.

Spiker Sahibə Qafarova isə deputata sərt reaksiya verərək, “Bu nə deməkdir ki, deputatın, Milli Məclisin yiyəsi yoxdur? Milli Məclisin yiyəsi xalqdır” demişdi.

Aparıcı İlqar Mikayıloğlun isə Avro-2020-nin qrup mərhələsi çərçivəsində keçirilən Belçika - Rusiya matçı zamanı şərhi müzakirələrə səbəb olmuşdu. Şərhçinin matç zamanı Rusiya komandasının əvəzedici heyəti ilə bağlı ardıcıl dediyi “kimimiz var hücumçulardan”, “ehtiyatda yarımmüdafiədə kimlərimiz var orda” ifadəsi birmənalı qarşılanmamışdı.

Hətta sosial şəbəkələrdə onun Rusiya millisinə xitabən “bizimkilər” ifadəsi işlətməsi barədə məlumatlar yayıldı. Telekanal isə açıqlama yayaraq, şərhdə “bizimkilər” sözünü tapana İTV-dən hədiyyə vəd etdi.

Deputat Siyavuş Novruzovun isə suyun vedrəylə ölçülməsi barədə dediyi fikirlər müzakirə olundu:

“Naxçıvan dövrü idi. Mövqesiz adamlardan biri Heydər Əliyevə yaxınlaşdı. Ondan soruşdu ki, hər şeyin ölçüsü var. Məsələn işıq amperlə, su vedrəylə ölçülür. Litrlə də yəni. O biri kiloyla, tonla ölçülür. Bəs bu sədaqətin, vəfalılığın da ölçüsü varmı? Özü sədaqətsiz adam idi. Heydər Əliyev dedi var ki var, o zamandır. Zaman göstərir ki, kim sədaqətlidir, kim sədaqətsiz”.

Müzakirədə iştirak edənlər deputatın dilindən belə bir yanlış fikrin səsləndirilməsini tənqid etdilər.

Milli Məclisin deputatı Eldar Quliyevin isə feministlərlə bağlı səsləndirdiyi fikirlər müzakirələrə yol açdı:

“Bakıda qadınlar aksiyası keçirməklə dünyada bizi biabır edirlər. Ayıb deyil zınqırovları da bağlayıb deyirlər ki, bizim namusumuzu küçəyə qoyublar, qadınların öldürülməsi siyasidir?! Heç görmüsünüz, hansısa qadın siyasi səbəbdən öldürülsün?! Bu yaşa gəlmişəm, Azərbaycanda hansısa qadının siyasi motivlə öldürülməsi faktı ilə rastlaşmamışam. Belə hadisələr qeyrət-namus üstündə, məişət problemləri zəminində, təəssüf ki, baş verə bilir, amma siyasi olduğunun şahidi olmamışam. Bilirsiniz ki, əslən Bakı kəndindənəm, bizim tərəflərdə bunun üstündə adam öldürürlər. Bəs haradadır bunların valideynləri, ailə tərbiyəsi?! Mənim 70 yaşım var, 2 nəfər arasında söhbət edəndə qızarıram, bunlar necə utanmırlar?!”.

Eldar Quliyevin müzakirələrə səbəb olan daha bir açıqlaması isə benzinin bahalaşması ilə bağlı idi:

“Hazırda ölkə iqtisadi cəhətdən ciddi bir dövrünü yaşayır. Həm COVID-19 pandemiyası, həm də Vətən müharibəsi ilə əlaqədar olaraq xərclərimiz çoxdur. Həmçinin dövlət son illər hərbiyə də olduqca çox vəsait ayırır. Doğrudur, Azərbaycan kifayət qədər iqtisadi gücə malikdir, amma bizim ABŞ-da olduğu qədər milyardlarımız yoxdur. Nəzərə almaq lazımdır ki, 15 qəpiklə heç kim kasıblamaz ,amma dövlətin digər xərclərini ödəmək mümkündür”.

Bütöv.az

“Fövqəladə hallar naziri Kəmaləddin Heydərov mülk sahiblərinə müraciət edib”.

“Report”un xəbərinə görə, nazir bildirib ki, mülk sahibləri, sahibkarlar öz istifadələrində olan mülklərini sığortamalıdırlar.

“Ölkəmizdə bir neçə sığorta şirkəti var. Onların sığorta ilə bağlı məbləği də o qədər yüksək deyil. Dünya praktikası var. Buna hər bir vətəndaş əməl etsə, heç bir problemimiz olmayacaq”, - o vurğulayıb.

Bütöv.az

Dekabrın 14-də Brüsseldə Azərbaycan Prezidenti İlham Əliyevin Avropa İttifaqı Şurasının Prezidenti Şarl Mişel və Ermənistanın baş naziri Nikol Paşinyan ilə birgə görüşü keçirilib. Görüşdə bir sıra önəmli məsələlər müzakirə olunub.

Sabiq xarici işlər naziri Tofiq Zülfüqarov Modern.az -a açıqlamasında bildirib ki, Azərbaycanın dəstəklədiyi postkonfilikt gündəm artıq aktualdır.
Onun sözlərinə görə, Brüssel görüşündə səslənən fikir və təkliflər onu göstərdi ki, artıq Azərbaycanın yanaşması öz yerini tapıb və dəstəklənir.
“Görüşdə nə ATƏT-in adı çəkildi, nə də onun gündəmə gətirmək istədiyi digər məsələlər müzakirə olundu. Sadəcə olaraq, postkonfilikt mövzusuna aid reabilitasiya proseslərinə dair bəyanatlar verildi, mövqelər səsləndirildi”.
Sabiq nazir bildirib ki, Azərbaycan uzun müddətdir ki, azad olunmuş bölgələrə lazımi şəkildə humanitar yardım göstərilməməsindən narahat idi:
“Avropa Birliyi artıq bu məsələlərdə öz iştirakı haqqında bəyanatlar verdi. Hesab edirəm bu, Azərbaycan üçün böyük irəliləyiş və naliyyətdir”.
Zəngəzur dəhlizi ilə bağlı Ermənistan və Azərbaycan tərəfindən fikirlərin fərqli olduğunu qeyd edən T.Zülfüqarov bildirib ki, bu sahədə müzakirələrin hələ də davam etdiyini müşahidə edirik:
“Amma istənilən halda bu yol bərpa olunmalıdır. Burada Avropa İttifaqı tərəfindən maliyyə köməkliyinin olunması hesab edirəm ki, faydalı məsələdir”.
Sabiq nazir sonda bu görüşün Azərbaycan üçün uğurlu olduğunu bildirib.

Bütöv.az

Ermənistanın hərbi-siyası rəhbərliyi özünün təcəvüzkar mahiyyətini növbəti dəfə nümayiş etdirməklə milli ədavət və düşmənçilik niyyəti ilə beynəlxalq hüququn fundamental norma və prinsiplərini kobud şəkildə pozmaqla ölkəmizə qarşı təxribat yönümlü hərəkətləri davam etdirir.

Baş Prokurorluqdan Modern.az-a verilən məlumata görə, bəzi kütləvi informasiya vasitələrində və müxtəlif sosial media səhifələrində erməni futbolçularının Azərbaycan Respublikasının Dövlət bayrağı barədə təhqiredici hərəkətlər etmələrini əks etdirən videogörüntülər yayılıb.
Qeyd edilən faktla bağlı Azərbaycan Respublikası Baş prokuroru tərəfindən Cinayət Məcəlləsinin 283.2.3 (Milli, irqi, sosial və ya dini nifrət və düşmənçiliyin salınması mütəşəkkil dəstə tərəfindən törədildikdə) və 324-cü (Azərbaycan Respublikasının Dövlət bayrağı və ya Azərbaycan Respublikasının Dövlət gerbi barədə təhqiredici hərəkətlər) maddəsi ilə cinayət işi başlanmaqla istintaqın aparılması Baş Prokurorluğun İstintaq İdarəsinə həvalə olunub.
İş üzrə hüquqi yardım haqqında vəsatətlər göndərilməklə digər ölkələrin prokurorluq orqanları, o cümlədən aidiyyəti dövlət qurumları ilə birgə cinayət törətmiş şəxslərin müəyyən edilərək məsuliyyətə cəlb edilmələri istiqamətində zəruri tədbirlərin görülməsi təmin ediləcək.

Bütöv.az

Bu gün Nəsimi Rayon Məhkəməsində hədə-qorxu ilə tələb etməkdə təqsirləndirilən “Azadinfo.az” MMC-nin təsisçisi Mahir Ələkbərovun (Xəttab) cinayət işi üzrə məhkəmənin hazırlıq iclası davam etdirilib.

Bu barədə “Report”a M.Ələkbərovun vəkili Araz Nurməmmədov məlumat verib.

Vəkil bildirib ki, hakim Azər Tağıyevin sədrliyi ilə keçirilən prosesdə prokuror ittiham aktını elan edib:

“Daha sonra təqsirləndirilən şəxs ifadə verib. O, ifadəsində özünü təqsirli bilməyib. Mahir Ələkbərov dindirilən zaman Ramiz Göyüşova hədə-qorxu gəlmədiyini, bu yolla ondan pul tələb etmədiyini deyib”.

A.Nurməmmədovun sözlərinə görə, prosesdə zərərçəkmiş Ramiz Göyüşov da ifadə verib:

“Ramiz Göyüşovun ibtidai istintaq zamanı verdiyi ifadəsi ilə məhkəmədə verdiyi ifadə arasında ziddiyyətlər oldu. Daha sonra onun istintaqa verdiyi ifadəsi elan edilib”.

Növbəti proses dekabrın 24-də davam etdiriləcək.

Qeyd edək ki, Baş prokuror yanında Korrupsiyaya qarşı Mübarizə Baş İdarəsində aparılan əməliyyat-istintaq tədbirləri ilə M.Ələkbərovun həmin dövrdə Yeni Azərbaycan Partiyasının Binəqədi rayon təşkilatının sədri vəzifəsini icra edən Ramiz Göyüşov barəsində qeyri-etik videogörüntüləri “Azadinfo.az” xəbər paylaşım platformasında və digər xəbər saytlarında qəsdən yaydıqdan sonra həmin məlumatların yayılmasının qarşısının alınması üçün sonuncunun özü ilə görüşməsinə nail olaraq, bu görüntülərin qeyd edilən səhifədən silinməsi məqsədilə ondan ümumilikdə 2 min manat məbləğində pul vəsaitini hədə-qorxu ilə tələb edib almasına əsaslı şübhələr müəyyən edilib.

İş üzrə toplanan kifayət qədər sübutlar əsasında M.Ələkbərova Cinayət Məcəlləsinin 182.1 (hədə-qorxu ilə tələb etmə) maddəsi ilə ittiham elan edilərək məhkəmənin qərarı ilə barəsində həbs qətimkan tədbiri seçilmiş və cinayət işi baxılması üçün Nəsimi Rayon Məhkəməsinə göndərilib.

Bütöv.az

Son vaxtlar azad edilmiş ərazilərimizdə minaya düşən insanlarla bağlı xəbərləri tez-tez eşidirik.

Bunun səbəbi nədir?! İnsanlarımız nəyi bilmir və nəyi düz etmirlər? Bununla bağlı ANAMA-nın Maarifləndirmə İşləri Şöbəsinin müdiri Ramil Əzizovla söhbət etmişik. O, bir sıra digər vacib suallara da aydınlıq gətirib: Ətrafda minanın olduğundan hansı əlamətlərə əsasən şübhələnə bilərik? Minalar necə miqrasiya edir? İmprovizə olunmuş minalar nədir? Kustar minalar necə düzəldilir?

Bunları bilmək və yaymaq həyatları xilas edə bilər!(Azvision.az)



Bütöv.az