Azərbaycan idman tarixi ərzində ən nüfuzlu beynəlxalq yarışlara ev sahibliyi etməyə hazırlaşır. 2015-ci ildə şahmat üzrə Dünya Kuboku və 2016-cı ildə Ümumdünya Şahmat Olimpiadası paytaxt Bakıda keçiriləcək. ANS PRESS-in Azərbaycan Gənclər və İdman Nazirliyinin mətbuat xidmətinə istinadən verdiyi xəbərə görə, artıq hazırlıq işlərinə başlanılıb.

Bakının bu möhtəşəm yarışı layiqli şəkildə qarşılaması üçün Şahmat Sarayı tikilir. Şahmat sarayında turnirlər və məşqlər üçün zallar, üzgüçülük hovuzu, kort, yeməkxana və b. nəzərdə tutulub. Bu sarayın şahmatçılar üçün ikinci evə çevrilməli olduğu bildirilir.

Möhtəşəm Olimpiadanın Bakıda keçirilməsi ilə bağlı Beynəlxalq Şahmat Federasiyasının Türkiyənin İstanbul şəhərində keçirilən 83-cü konqresində qəbul olunan qərarından sonra bu ilin fevralın 14-də Azərbaycan Respublikasının Prezidenti İlham Əliyev Təşkilat Komitəsinin yaradılması haqqında sərəncam imzalayıb. Baş nazirin birinci müavini Yaqub Eyyubov Təşkilat Komitəsinin sədri təyin olunub.

Təşkilat Komitəsinə nazirlər, komitə, xidmət sədrləri, Şahmat Federasiyasının prezidenti və vitse-prezidentləri daxildir. Komitəyə beynəlxalq yarışaların keçirilməsi ilə bağlı xüsusi Tədbirlər Planını hazırlayıb icrasını təmin etmək tapşırılıb.

Yüksək səviyyədə təşkil olunacaq Olimpiadaya dövlət səviyyəsində təminat veriləcək. Gənclər və idman naziri Azad Rəhimov mətbuata açıqlamasında dövlətin Şahmat Olimpiadası üçün 1 milyon avronu ödəmək imkanı olduğunu bildirib.

Olimpiya Oyunlarının keçirilməsi ilə bağlı Olimpiya şəhərciyinin tikilməsinə də başlanılıb. Burada ölkəyə gələn qonaqların rahatlığı üçün hər cür şərait yaradılacaq. Dövlət həmçinin bütün iştirakçılara vizaların veriləcəyi ilə bağlı təminat verir.

Məlumat üçün bildirək ki, Azərbaycan FİDE-nin üzvü olan 180-ə yaxın ölkə arasında şahmatın inkişaf etdirilməsi üzrə xüsusi Dövlət Proqramı qəbul etmiş yeganə dövlətdir.

Qeyd edək ki, Olimpiada miqyasına görə dünyada ikinci və ya üçüncü yarışmadır.