Bakı Dövlət Universitetinin (BDU) Qazax filialında 2021/2022-ci tədris ilinin yaz semestrinin imtahan sessiyası davam edir.

Butov.az xəbər verir ki, BDU-dan AZƏRTAC-a bildirilib ki, sessiya ərzində 17 ixtisas üzrə 54 qrupda imtahanlar keçirilir. Bakalavriat səviyyəsi üzrə 1204, magistratura pilləsi üzrə isə 11 tələbə imtahanlarda iştirak edir. Sessiya ərzində əyani şöbə üzrə 314 imtahanın keçirilməsi nəzərdə tutulub. İmtahanlar gün ərzində 2 növbədə keçirilir və başa çatdıqdan sonra onun nəticələri tələbələrə həmin gün elan olunur.

Filialda imtahanların şəffaf və obyektiv keçirilməsi üçün bütün şərait yaradılıb. İmtahan sessiyasında tələbələrin müraciətlərinin qəbulu və araşdırılması, tələbələrin biliyinin qiymətləndirilməsində obyektivliyin təmin olunması məqsədilə Operativ Qərargah və Apellyasiya Komissiyası yaradılıb. Eyni zamanda, filialda “Qaynar xətt” də fəaliyyət göstərir.

BDU-nun Qazax filialının direktoru Arif Rüstəmov imtahanların gedişinə nəzarət etmək üçün mütəmadi olaraq imtahan keçirilən auditoriyalarda olur, tələbələri maraqlandıran sualları cavablandırır.

Filialda iyunun 2-3-də buraxılış kursu tələbələrinin dövlət imtahanları da keçirilib. 264 tələbə öz biliklərini sınayıb və imtahanları yüksək səviyyədə başa vurub.

Qazax Rayon İcra Hakimiyyətinin başçısı Rəcəb Babaşov filialda imtahanların gedişatı ilə maraqlanıb. O, imtahanlarda yüksək nəticə göstərən tələbələri mükafatlandırıb.

Yaz sessiyası iyulun 1-dək davam edəcək.