29-01-2024, 15:02
Nazirlik tələbələrlə bağlı mühüm qərar qəbul etdi
Nazirlər Kabinetinin müvafiq qərarına əsasən, ali və orta ixtisas təhsili müəssisələri tələbələrinin ixtisas üzrə təcrübə keçmə qaydalarında yeniliklər edilib.
Elm və Təhsil Nazirliyindən verilən məlumata görə, yeni qaydalar bu ilin sentyabr ayının 15-dən tətbiq olunacaq.
Qaydalara əsasən, təcrübənin təşkili zamanı tədris-öyrənmə və təcrübə arasında davamlı əlaqənin qurulması, tələbənin yaradıcılıq və tədqiqat işlərində iştirakının təmin edilməsi, tələbənin müasir texnologiyalarla, iş üsulları və digər yeniliklərlə tanış edilməsi, təcrübə bazasının infrastrukturunun əlilliyi olan tələbələr üçün müyəssər olması, tələbələrin təcrübə bazasında məşğulluq imkanlarının nəzərə alınması əsas öhdəliklər kimi müəyyən olunub.
Təcrübə təhsil müəssisəsindən kənarda keçirildiyi halda, təhsil müəssisəsi ilə təcrübə bazaları arasında müqavilə bağlanılacaq. Tələbənin əmək fəaliyyəti təcrübə komissiyası tərəfindən təcrübə kimi tanına bilər. Bu zaman əmək fəaliyyətinin hər bir həftəsi 1,5 kreditə bərabər tutulur. Tələbənin təcrübə müddətində beşgünlük iş rejimi üzrə həftəlik təcrübə keçməsi müddəti ən azı 20 saat olmalıdır. Bu müddət, ixtisasın profilindən asılı olaraq, təhsil müəssisəsi tərəfindən artırıla bilər.
Yeni qaydalara əsasən, təcrübənin qiymətləndirmə üsul və meyarlarının hazırlanması və təcrübə komissiyasının yaradılması ali və orta ixtisas təhsili müəssisələrinin səlahiyyətinə verilib. Təcrübə tələbənin təklifi əsasında təhsil müəssisəsinin yerləşdiyi şəhərdən (rayondan) kənarda və ya xarici ölkədə keçirildiyi halda, nəqliyyat və mehmanxana xərcləri onun tərəfindən ödənilir.
Qeyd edək ki, bu qaydalar xarici ölkə ali təhsil müəssisələrinin filiallarına şamil olunmur.
29-01-2024, 13:53
Füzulidəki təhsil ocağında şagirdlərin sayı 2 dəfə artdı
“Böyük qayıdış” proqramı çərçivəsində keçmiş məcburi köçkünlər öz yurdlarına dönür. İşğaldan azad edilən kəndlərə həyat qayıdır. O cümlədən təhsil də.
2023/2024-cü tədris ilində ilk dəfə zəngi çalınan, Özbəkistan Prezidenti Şavkat Mirziyoyevin özbək xalqı adından hədiyyəsi olaraq inşa edilən 960 yerlik Füzuli şəhəri Mirzə Uluqbəy adına 1 nömrəli tam orta məktəbdə bu tədris ilində 123 şagirddən ibarət 11 sinifdə 15 müəllimlə dərslərə başlanılıb. Tədris ilinin yarısı artıq arxada qalıb. Bəs, ikinci yarımilə məktəb necə başlayır?
II yarımilə 400 nəfərədək şagirdlə start verəcəklər
“Böyük qayıdış” proqramı çərçivəsində Füzuliyə keçmiş məcburi köçkünlərin köçürülməsi ilə məktəbdə şagirdlərin də sayı artıb. Məktəbin direktoru Həcər Mahmudova “Azərbaycan müəllimi” qəzetinə müsahibəsində deyib ki, artıq təhsil müəssisəsində şagirdlərin sayı 336 nəfərdir: "Birinci yarımilin son gününə olan məlumata görə, məktəbimizdə elektron sistemdə qeydiyyatdan keçən 336 şagird təhsil alır. Məktəbəhazırlıq qrupu da nəzərə alınmaqla 12 sinifdə tədris təşkil edilib. Lakin artıq 400-dək şagirdimiz var. Belə ki, Sy.edu.az portalında şagird yerdəyişməsi yanvarın 10-dan ölkə üzrə dayanıb, amma Füzuliyə həmin tarixdən sonra da köç olub və məktəbimizə şagirdlər gəlib, Onların məktəbə rəsmi qeydiyyatı portal açılan kimi həyata keçiriləcək".
Məktəbin kollektivi Füzuliyə köçən əhali ilə görüşlər keçirir, uşaqları məktəbə cəlb edir və qeydiyyat prosesində hər birinə yaxından kömək göstərirlər. Füzulidə əhalinin artmasıyla əlaqədar məktəbdə şagirdlərin sayı da gündən- günə çoxalır. Şagirdlərin sayının artdığını nəzərə alaraq şagird sıxlığının qarşısını almaq üçün sinif sayları artırılıb: “Fevralın 1-dən ikinci yarım il başlayır. Bu yarımildə 400-ə yaxın şagirdə 1 məktəbəhazırlıq qrupu olmaqla, 20 sinifdə tədris təşkil ediləcək”.
H.Mahmudovanın sözlərinə görə, tədris prosesi 45 nəfər işçi heyəti ilə qurulub: “35 nəfər pedaqoji heyət, 10 nəfər isə texniki heyətdir. İkinci yarım ildən şagirdlərin sayının artması fənn müəllimlərinə tələbatı artırıb. Məktəbimizə yeni müəllimlər də qəbul olunacaq. “Böyük qayıdış” proqramı çərçivəsində əhalinin rayona köçü davam edir. Odur ki, biz də artan tələbi Füzuliyə qayıdan müəllimlərlə ödəyəcəyik. Onların arasında savadlı, peşəkar müəllimlər çoxdur. Sevinirik ki, məktəbimizin müəllim və şagird kontingenti genişlənir”.
Füzuli məktəblisi regionda liderdir
Məktəb artıq ilk uğurlarını qazanıb: “Ötən yarımildə məktəbin müəllimləri də, şagirdləri də fəal olub. Müəllimlərimiz "eTwinning" layihəsi çərçivəsində uğurla çıxış edirlər. Beynəlxalq əməkdaşlığı özündə ehtiva edən bu layihədə Füzuli müəllimləri çox fəaldır”.
Füzulinin ilk məktəbi Respublika Fənn Olimpiadasında uğura iddialıdır: “Respublika Fənn Olimpiadasında 3 şagirdimiz iştirak edərək ilk mərhələdə yüksək nəticə göstərib və növbəti mərhələyə vəsiqə qazanıblar. Onlardan 2 nəfər informatika, 1 nəfər tarix, 1 nəfər isə biologiya fənni üzrə bilik yarışında uğur qazanıb. Hətta İnformatika fənni üzrə yarışan şagirdlərimizdən biri Qarabağ regionu üzrə ən yüksək nəticə göstərib, nəinki məktəbimizin, bütövlükdə regionun lideridir. Şagirdlərimizə böyük ümidlərimiz var. Növbəti mərhələdə də uğur qazanmaları üçün müəllimlərimiz onlarla xüsusi məşğul olur”.
Məktəb “Rəqəmsal bacarıqlar” layihəsinə də qoşulub: “Bu həftə, yəni yanvarın 22-də layihə çərçivəsində Məktəbəqədər və ümumi təhsilin təşkili üzrə Dövlət Agentliyinin təşkilatçılığı ilə məktəbdə “Kod saatı” keçirildi və şagirdlərimiz tədbirdə fəal iştirak etdilər. Ümumiyyətlə, məktəbimizdə müxtəlif səpkili tədbirlər təşkil edilir və hər birində şagirdlərimiz maraqla iştirak edirlər”.
Bu məktəbdə əsas şagird-müəllim münasibətləridir
Uzun sözün qısası, birinci yarımilin sonunda məktəbin şagirdləri çoxalıb, ilk uğurlar qazanılıb. Hədəflər böyük, planlar isə çoxdur: “Növbəti ildən məktəbimiz yeni layihələrə qoşulacaq. “Rəqəmsal bacarıqlar”dan sonra şagirdlərimizin mühəndislik bacarıqlarının inkişafına yönələn STEAM layihəsinə də qoşulacağıq. Çalışırıq ki, şagirdlərimiz buraxılış imtahanlarında yüksək nəticə göstərsin, fənn müsabiqələrində layiqli yer tutsunlar. Amma başlıca hədəfimiz, əsas olan odur ki, məktəbimizdə şagird-müəllim münasibətlərini düzgün tənzimləyək, məktəb şagirdin sevərək getdiyi bir yer olsun”.
Beləliklə, Füzuli 2023/2024-cü tədris ilinə Füzuli şəhəri Mirzə Uluqbəy adına 1 nömrəli tam orta məktəblə başladı. O gün Füzulidə zəng çalınan, sadəcə 1 məktəb vardı. Hazırda ötən il əsası qoyulan daha iki məktəbin - Qoçəhmədli kəndində 264, Cuvarlıda 312 şagird yerlik məktəblərin tikintisinin davam etdiyini nəzərə alsaq, görünən odur ki, növbəti tədris ilində Mirzə Uluqbəy adına 1 nömrəli tam orta məktəb Füzulidə yeganə məktəb olaraq qalmayacaq.
26-01-2024, 17:35
Keçirilən iclaslarda məktəb direktorlarına tapşırıqlar verildi
Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil müəssisələrində ikinci yarımilə hazırlıq məqsədilə Pedaqoji şuraların iclaslarının keçirilməsinə başlanıb.
Bu barədə BŞTİ-dən bildirilib.
İlk olaraq paxtaxtdakı 317, 188 nömrəli tam orta məktəblərdə və Məktəb-Lisey Kompleksində keçirilən iclaslarda Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin (MÜTDA) direktor müavini, Agentliyin Bakı Şəhəri üzrə Təhsil İdarəsinin müdiri vəzifəsini müvəqqəti icra edən Mehriban Vəliyeva, MÜTDA-nın direktor müavini Orxan Abbasov, BŞTİ-nin müdir müavinləri Xəyalə Əhmədzadə, Anar Məmmədov, Elm və Təhsil Nazirliyi yanında İctimai Şuranın üzvü Pərvanə Məmmədova, Azərbaycan Uşaqları İctimai Birliyinin sədri Kəmalə Ağazadə, MÜTDA-nın baş məsləhətçisi Heyran Səfərova, BŞTİ-nin Təlimə Dəstək Mərkəzinin psixoloq-metodisti Aysel Novruzova, müəllimlər, valideynlər, məktəb-icma birliyinin nümayəndələri iştirak ediblər.
İclaslarda ümumi təhsil müəssisələrində uşaqların təhlükəsizliyinə və şagird davranış qaydalarına nəzarətin gücləndirilməsi, müəllimlərin etik davranış qaydalarına əməl olunması vəziyyəti, məktəblərdə psixoloji xidmətin təşkili, ümumi təhsil müəssisələrində valideynlərlə işin səmərəliliyinin artırılması və digər vacib məsələlər müzakirə olunub, məktəb psixoloqlarının altı aylıq hesabatı dinlənilib.
Pedaqoji şura iclaslarında ümumi təhsil müəssisəsində təhlükəsizliyin təminatı və sağlam mənəvi-psixoloji mühitin formalaşmasına diqqətin artırılması, təhsilalanlar arasında risk qrupuna daxil olanların müəyyənləşdirilməsi və məktəb psixoloqunun onlarla apardığı sistemli işin gücləndirilməsi, məktəb-valideyn əməkdaşlığının genişləndirilməsinin və təhsil müəssisələrinə ictimai dəstəyin əhəmiyyətindən danışılıb.
İclaslarda müzakirə edilən məsələlərlə bağlı müvafiq qərarlar qəbul edilib, müəllimləri maraqlandıran suallar cavablandırılıb.
Qeyd edək ki, MÜTDA tərəfindən ümumi təhsil müəssisələrinə sağlam mənəvi-psixoloji mühitin daha da yaxşılaşdırılması məqsədilə xüsusi təlimatlar göndərilib, məktəb rəhbərlərinə idarəetmədə səmərəliliyin artırılması istiqamətində müvafiq tapşırıqlar verilib.
Paytaxtın digər ümumi təhsil müəssisələrində də müvafiq mövzular üzrə Pedaqoji şura iclaslarının keçirilməsi nəzərdə tutulur.
25-01-2024, 13:05
Qəbul imtahanlarının tarixləri yaxın günlərdə açıqlanacaq
Ali təhsil müəssisələrinə qəbul imtahanlarının tarixləri yaxın günlərdə ictimaiyyətə təqdim olunacaq.
Bunu jurnalistlərə müsahibəsində Dövlət İmtahan Mərkəzinin (DİM) Direktorlar Şurasının sədri Məleykə Abbaszadə söyləyib.
O bildirib ki, bunun üçün müxtəlif dövlət qurumları ilə müzakirələr aparılır, ölkədə keçirilən mühüm tədbirlər, hava şəraiti və digər məsələlər nəzərə alınır.
23-01-2024, 17:26
Magistratura üzrə keçirilmiş sınaq imtahanının nəticələri açıqlandı
Dövlət İmtahan Mərkəzi magistratura səviyyəsi üzrə 14 yanvar 2024-cü il tarixində keçirilmiş sınaq imtahanının nəticələrini elan edib.
Bu barədə DİM-dən xəbər verilib.
Hər bir iştirakçı DİM-in internet saytına daxil olaraq imtahan nəticəsi, cavab kartı və cavab vərəqinin qrafik təsviri ilə tanış ola bilər.
Bakalavrlar imtahan nəticələri barədə məlumatı, iş nömrələrini mobil telefonla 7727 nömrəsinə göndərməklə də öyrənə bilərlər.
22-01-2024, 18:58
Elm və Təhsil Nazirliyinin kollegiyasının yeni tərkibi təsdiqləndi
Elm və Təhsil Nazirliyinin kollegiyasının yeni tərkibi təsdiqlənib.
Nazirlər Kabineti bununla bağlı müvafiq qərar verib.
Qərara əsasən, Elm və Təhsil Nazirliyinin kollegiya üzvlərinin sayı 11 nəfərdən ibarət müəyyənləşdirilib və aşağıdakı tərkibdə təsdiq edilib:
Kollegiyanın sədri
elm və təhsil naziri
Kollegiyanın üzvləri:
Azərbaycan Respublikası elm və təhsil nazirinin müavinləri
Naxçıvan Muxtar Respublikasının təhsil naziri
Azərbaycan Respublikası Elm və Təhsil Nazirliyi Aparatının rəhbəri
Azərbaycan Respublikasının Elm və Təhsil Nazirliyi yanında Elm
və Ali Təhsil üzrə Dövlət Agentliyinin direktoru
Azərbaycan Respublikasının Elm və Təhsil Nazirliyi yanında Peşə
Təhsili üzrə Dövlət Agentliyinin direktoru
Azərbaycan Respublikasının Elm və Təhsil Nazirliyi yanında
Məktəbəqədər və Ümumi Təhsil üzrə Dövlət Agentliyinin direktoru
Azərbaycan Respublikası Təhsil İnstitutunun direktoru”.
13-01-2024, 14:07
Təbrik edirik!
Globalinfo.az saytının təsisçisi və baş redaktoru Azər Ayxanın qızı Ayan Abbaslı London Queen Mary Universitetinin magistraturasından məzun olaraq diplomunu alıb. Həmkarımızı bu münasibətlə təbrik edirik. Onun balasının timsalında təhsildə uğur qazanan, ölkəmizi dünyada layiqincə təmsil edən bütün gənclərə uğur diləyirik. Gənclər dövlətimizin və gələcəyimizin sahibləridir.
11-01-2024, 21:00
Bakının mərkəzindəki universitetlər kənar ərazilərə köçürülə bilər - ViDEO
Bakıda sıxlığı azaltmaq üçün şəhərin mərkəzi hissələrində yerləşən universitetlər kənar ərazilərə köçürülə bilər.
Baş Planda Bakıda bir neçə universitetin ixtisaslaşmış vahid bir şəhərcikdə yerləşdirilməsi və yaxud mövcud ali məktəblərdən birinin tamamilə yeni bir yerə köçürülməsi nəzərdə tutulur.
Təhsil eksperti Kamran Əsədov deyir ki, ölkədə olan ali təhsil müəssisələrinin əksəriyyəti paytaxtda fəaliyyət göstərir. Tələbə sayının çoxluğu ictimai nəqliyyatın yükünü birə-beş artırır.
Ekspert bildirib ki, sıxlığa səbəb olan əsas amillərdən biri də metrostansiyaların ətrafında bir neçə universitetin yerləşməsidir.
Kamran Əsədov digər ərazilərə köçürülməsi ehtimal edilən ali təhsil müəssisələrinin adlarını da açıqlayıb.
Daha ətraflı aşağıdakı videomaterialda:
[media=https://youtu.be/KMI9H8zOg3o]
9-01-2024, 17:05
DİM sınaq imtahanı verən bakalavrlara müraciət etdi
Dövlət İmtahan Mərkəzi (DİM) tərəfindən yanvarın 14-də magistratura səviyyəsi üzrə sınaq imtahanı keçiriləcək.
DİM-dən bildirilib ki, iştirakçılar “İmtahana buraxılış vərəqəsi” və "Yaddaş kitabçası"nı DİM-in saytından çap edə bilərlər.
Bakalavrlar özləri ilə şəxsiyyəti təsdiq edən sənədin əslini və “İmtahana buraxılış vərəqəsi”ni mütləq gətirməlidirlər. Göstərilən sənədlərdən hər hansı biri olmazsa və ya sənədlər arasında uyğunsuzluq olarsa, bakalavr imtahana buraxılmır.
Qeyd edək ki, sınaq imtahanında iştirakçılara sual kitabçalarını imtahanın sonunda özləri ilə aparmağa icazə veriləcək.
Bundan əlavə, imtahandan sonra saat 17:00-da DİM-in youtube kanalında canlı yayımda Mərkəzin məsul əməkdaşları və ekspertlər tərəfindən imtahanda istifadə olunmuş test tapşırıqları ilə bağlı geniş izahat veriləcək.
8-01-2024, 19:20
Ləğv edilən və ya birləşdirilən ümumtəhsil məktəbləri olmayıb - Rəsmi
Cari tədris ilində ləğv edilən və ya birləşdirilən ümumtəhsil məktəbləri olmayıb.
Bu barədə Məktəbəqədər və Ümumtəhsil üzrə Dövlət Agentliyindən bildirilib.
“2023-2024-cü tədris ilinin əvvəlində işğaldan azad olunmuş ərazilərdə məskunlaşma ilə əlaqədar yeni ümumi təhsil məktəbləri açılıb.
Belə ki, Füzuli şəhərində Mirzə Uluqbəy adına bir, Laçın şəhərində iki, Şuşa şəhərində bir nömrəli və Laçın rayonunun Zabux kəndində tam orta məktəblət fəaliyyətə başlayıb, Bakı şəhərində fəaliyyət göstərən eyni adlı məktəblər isə ləğv edilib. Eyni zamanda Abşeron rayonunun Masazır kəndində yeni altı nömrəli tam orta məktəb açılıb”, - deyə əlavə edilib.
Qeyd edək ki, bir müddət öncə Məktəbəqədər və Ümumtəhsil üzrə Dövlət Agentliyinin rəhbəri Eşqi Bağırov şagird sayı az olan məktəblərin uşaqlarının yaxın ərazidə yerləşən digər təhsil müəssisələrinə daşınmasının nəzərdə tutulduğunu bildirmişdi.
“Belə təcrübə hazırda da var. Lakin bəzi hallarda biz çalışırıq ki, bu tip hallar minimum sayda olsun. Məsələn, məktəblər əgər təmirə bağlanırsa, biz daşınmanı təmin edirik. Bu tipli məsələlərdə də həmin vəsaitlərin daha səmərəli istifadəsi məqsədilə uşaqların daşınmasını təmin etmək şərtilə onların daha yaxın ərazidə yerləşən məktəblərə cəlbini məqsədəmüvafiq hesab edirik”, - deyə o, əlavə edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!