30-03-2025, 18:35
İstanbuldakı aksiyalar: 268 nəfər həbs olundu
İstanbulda Böyükşəhər Bələdiyyəsinin sədri Əkrəm İmamoğlunun həbsindən sonra Türkiyədə keçirilən icazəsiz aksiyalarda indiyə kimi 268 nəfər həbs olunub.
Bu barədə Türkiyə KİV-i məlumat yayıb.
Saxlanılanların dəqiq sayı isə hələ məlum deyil.
Qeyd edək ki, martın 19-dan etibarən Türkiyənin müxtəlif şəhərlərində müxalifətin İmamoğluna dəstək məqsədilə mitinqləri və nümayişləri keçirilib. Aksiyalar xüsusilə İstanbul və Ankara şəhərlərini əhatə edib.
30-03-2025, 18:18
Rəqsanə Tapdıqlının Naxçıvan Şəhidlərinə həsr olunmuş şeirlərinin bir neçəsini oxucularımıza təqdim edirik:
(Culfa rayon şəhidi Məmmədov Sənanın xatirəsinə)
Qisas odu ürəyindən sönməyən,
Cəsarət hissini əldən verməyən,
Əfsanəyə dönüb, özü dönməyən,
Sənan, sənin şəhadətin mübarək!
Sənan, sənin bu mövlüdun mübarək!
Torpaq üçün məşəl kimi odlanan,
Hər çətinə sinə gərib, qatlanan,
Ölməz igid, ölməz şəhid adlanan,
Sənan, sənin şəhadətin mübarək!
Sənan, sənin bu mövludun mübarək!
Azadlığı şüar etdin dilində,
Sənə güvənirdi doğma elin də,
Qəhrəmansan, əbədisən elində,
Sənan, sənin şəhadətin mübarək!
Sənan sənin bu mövludun mübarək!
İnam ilə sən baş əydin Bayrağa,
Əyildi düşmənin, döndü qundağa,
Bayraqla qayıtdın, ana torpağa,
Sənan, sənin şəhadətin mübarək!
Sənan sənin bu mövludun mübarək!
Şəhid məqamı
(Culfa rayon şəhidi Nəcəfov Yaquba)
Ataya fəxarət, Vətənə qüdrət,
Elinə şöhrətdir, şəhid məqamı.
İgidə cəsarət, düşmənə nifrət,
Elinə şöhrətdir, şəhid məqamı.
Canından can verdi Xuraman ana.
Torpağa tapşırdı əmanətini.
Düşmənə sınmadı yansa da canı,
Qorudu qürurla dəyanətni,
İbrahim qazidir, Yaqubsa şəhid.
İsmayıl Vətənin keşiyindədir.
Hər üçü torpağın dərdinə şahid,
Hər üçü Şahintək göy üzündədir.
Bir elə sığmayan torpağa sığdı,
Yurdunun namını qazandı Yaqub.
"Şəhidlər ölməyir, həmişə sağdır!"
İnadla düşməni eylədi məğlub.
Qardaşın qisasın, qardaşlar aldı,
İntiqam hissiylə alovlandılar.
Gələn nəsillərə bir örnək oldu,
Hayları torpaqdan belə qovdular.
(Culfa rayon şəhidi Ceyhunun xatirəsinə)
Bir Vətən sevdası qəlblərə hopdu,
Bu haqq meydanında haqqımız çoxdur.
Ceyhun tək oğullar, haylara oxdur,
Bayrağı enməyə qoymadı Ceyhun.
Adın qızıl qanla tarixə yazdı,
Hər sözü şüardı, marşdı, avazdı.
Vətən bütövdürsə, ruhunda yazdı,
Qisas almayınca doymadı Ceyhun.
Üstündə gəzdirdi qeyrət rəmzini,
Hifz etdi namını, elin əzmini.
İnamla qorudu torpaq nəbzini,
Qarabağı darda qoymadı, Ceyhun.
O bir and içmişdi, ondan dönmədi,
Qəlbində azadlıq odu sönmədi.
Məğlub etməyincə, kini dinmədi,
Vandallara boyun əymədi Ceyhun.
Qamətini dik tut, ucadır başın!
Gülnarə anamız, sən sil göz yaşın!
Zəfərə ucaldı hər vətəndaşın,
Zəfərsiz geriyə dönmədi, Ceyhun.
Məbədim Ramal
(Ərəfsə şəhidi Məmmədov Ramalın xatirəsinə)
Nə vaxtdır gözlərim qalmışdı yolda,
Təsəvvür etməzdin anan nə halda,
Axtarırdım səni sağda gah solda,
Səsimə səs verib, gəlmədin, Ramal.
Dedilər yaxşıdır, sağ-salamatdır,
Vətən xidmətində, hər an sayaqdır.
Sizlərə uzaqdan salamı vardır,
Mən nələr yaşadım görmədin, Ramal.
Hər sözə inandım, ölməyinə yox,
Yurda şəhid kimi dönməyinə yox,
O uca məqamı sevməyinə yox.
Dedim sağ gələrsən, gəlmədin, Ramal.
Demək yanılmışam özüm bilmədən
Köçdün bu dünyadan, bizi görmədən,
Doyunca bağrıma sıxıb, öpmədən,
Dərdini sən kimə söylədin, Ramal?!
Sənin məzarına qurban olaram,
Gül olub qəbrinin üstə solaram.
Ağlayıb, kiriyib yenə dolaram.
İndi sən olmusan məbədim, Ramal.
(Naxçıvan şəhidi Bağır Ələkbərovun xatirəsinə)
Daha bir payız da döydü qapını,
Yenə də fəsillər yerin dəyişdi.
Nə tez çapıb getdi ömür, atını,
Bu necə taledir, bu necə işdir.
Övladın hər gecə səni soruşur,
Sənin yoxluğuna inanmır, o da.
Hərdən şəkilinlə gülüb, danışır.
Mənsə alışıram alovsuz oda.
Ürək tab etməyir bu dərdə, Bağır!
O da üsyan edir, göz yaşlarımdan.
Nə olar bircə yol sən ata çağır.
Bilim seçilmədin yoldaşlarından.
Yuxuma gəlirsən, əlində Bayraq.
Yuxumda mənimlə söhbət edirsən.
Cibindən çıxarıb mənə bir vərəq,
Ürək sözlərimdir, deyib- gedirsən.
Ayıldım yuxudan, o da yox oldu.
Sənə qovuşmaqçün yumdum gözümü.
Bir yuxu nə idi, mənə çox oldu,
Söyləyə bilmədim sənə sözümü.
Bir ana dayanıb heykəl önündə
Bir ana dayanıb heykəl önündə,
Yerini dəyişib, əsgər salamı.
Qəhrəman əsgərə salam verəndə,
Qürurla yad edir şəhid İslamı.
Bir ana dayanıb heykəl önündə,
Oğul dəyanəti güc verib ona.
Üçrəngli Bayrağı tutub əlində,
Düşünür İslam da, and içib ona.
Bir ana dayanıb heykəl önündə,
Ruhundan ruh verir, danışan Daşa.
Canlanır xəyalı, onun gözündə,
Söhbəti bitməmiş, qayıdır başa.
Bir ana dayanıb heykəl önündə
Onu al Bayrağa əmanət edib.
Unudub dərdini, kədər, qəmin də,
Fəxr edir, Vətənə o qurban gedib.
Bir ana dayanıb, heykəl önündə,
Duruşu çatladır namərd bağrını.
Bəlkə də boğulur büllur gölündə,
Qürurdan, içində çəkir ağrını.
Bir ana dayanıb, heykəl önündə.
Dik tutub başını, qəhrəman ana.
Oğul da şad olur öz cənnətində,
Ana əsgər sözü vermişdi ona.
Rəqsanə Tapdıqlı
AYB-nin üzvü
"Bütöv Azərbaycan" qəzeti
14 mart 2025ci il
30-03-2025, 17:43
ABŞ nüvə silahı arsenalını modernləşdirməlidir - Nazir
ABŞ-nin energetika naziri Kris Rayt hesab edir ki, Vaşinqton nüvə silahı arsenalını modernləşdirməlidir.
O, bu fikri “Fox News” telekanalına müsahibəsində bildirib.
"ABŞ İkinci Dünya Müharibəsi zamanı Manhetten Layihəsi vasitəsilə inanılmaz nailiyyət əldə etdi: dünyanın ilk atom silahını yaratdı. Bu, İkinci Dünya Müharibəsinin erkən başa çatmasına, on və ya yüz minlərlə amerikalının həyatını xilas etməyə imkan verdi. Sonra yeni nüvə silahlarının inkişafı olmadan üç onillik bir dövr gəldi və bütün arsenalımız köhnəldi. İndi bizə lazım olan nüvə ehtiyatlarını artırmaq deyil, silahları modernləşdirməkdir", - o söyləyib.
Nazir həmçinin bildirib ki, nüvə silahı ilə bağlı əsas məsələ ondan istifadə etməməkdir.
30-03-2025, 17:12
İsraildən Qəzza ilə bağlı təklif
İsrail vasitəçilərdən Qəzza zolağı ilə bağlı təklif aldıqdan sonra cavab təklifi irəli sürüb.
Bu barədə İsrail hökumətinin başçısının dəftərxanası məlumat yayıb.
“Baş nazir Binyamin Netanyahu vasitəçilərdən alınmış təklifdən sonra bir sıra məsləhətləşmələr keçirib. Son saatlarda İsrail Birləşmiş Ştatlarla tam əməkdaşlıq şəraitində vasitəçilərə öz qarşı təklifini təqdim edib”, – bəyanatda deyilir.
Daha əvvəl HƏMAS hərəkatı Qəzza zolağında atəşkəslə bağlı Misir və Qətərin şərtlərini qəbul edib. Bu ölkələr radikallar və İsrail arasında danışıqlarda vasitəçi kimi çıxış edirlər.
30-03-2025, 16:54
Məscidi Cənnətə bənzədən mələk
Bibiheybət ziyarətində olarkən balaca qızın sevincək halda anasına "- Ana, bura Cənnətə oxşayır" dediyini eşitdim...
Məscidi Cənnətə bənzədən mələk
Burada insanlar qəlbin açıbdır...
Duayla isinən nə qədər ürək,
Allah hüzurunda əlin açıbdır...
Sənin gözlərində fərqlidir dünya
Təbiət donunda rəngli görülür..
Üzündə gülüşlə, işıqla, nurla,
Ümiddən özünə çələng hörülür...
Şirin arzularla, xoş dualarla
Cənnəti məscidə oxşadan mələk...
Nağıla boyanan sənin dünyanda,
Məscidin özü də Cənnətmiş demək...
2023
Aytac Mübarizqızı (Babayeva)
UNEC-in I kurs MBA magistr tələbəsi
30-03-2025, 16:53
Türkiyə Azərbaycanın haqlı mübarizəsinə dəstək verməyə davam edir - Yaşar Gülər
Türkiyə Azərbaycanın haqlı mübarizəsinə dəstək verməyə davam edir.
Bunu Türkiyənin milli müdafiə naziri Yaşar Gülər Çanaqqalada Amfibiya Korpusu Komandanlığında bayram namazını qıldıqdan sonra müraciətində deyib.
O bildirib ki, Türkiyə Azərbaycan, Şimali Kipr, Liviya, Qətər, Somali, Kosovo, Bosniya-Herseqovinada, habelə bir sıra bölgələrdə qardaş, dost və müttəfiq ölkələrin haqlı mübarizələrinə dəstək verməyə davam edir: “Beləliklə, Türkiyə qlobal sülh və sabitliyə töhfə verir”.
Nazir söyləyib ki, Türkiyə Silahlı Qüvvələri bu fəaliyyətlərlə yanaşı, həm də genişmiqyaslı təlimlər keçirir.
30-03-2025, 16:39
Tehran Vaşinqtonla birbaşa danışıqları rədd etdi
Tehran ABŞ Prezidenti Donald Trampa cavab məktubunda Vaşinqtonla birbaşa danışıqlardan imtina edib, yalnız vasitəçilik üçün pəncərə açılıb.
Bunu İran Prezidenti Məsud Pezeşkian Nazirlər Kabinetinin iclasında deyib.
Pezeşkian qeyd edib ki, İran amerikalı həmkarının məktubuna cavabı Oman vasitəsilə göndərib.
“İran vasitəçilik yolu ilə danışıqlara açıq olduğunu bəyan edir və heç vaxt danışıqlardan yayınmadığını vurğulayır", - Pezeşkian bildirib.
İran Prezidenti əlavə edib ki, yerinə yetirilməmiş vədlər İran və ABŞ arasında etimadın bərpası ilə bağlı problemlərə gətirib çıxarıb, danışıqların taleyini Vaşinqtonun davranışı müəyyənləşdirir.
30-03-2025, 16:27
Türkiyə Azərbaycanda sülhə və təhlükəsizliyə önəmli töhfə verir - Ərdoğan
Türkiyə Azərbaycanda sülhə və təhlükəsizliyə önəmli töhfə verir.
Bunu Türkiyə Prezidenti Rəcəb Tayyib Ərdoğan Çanaqqalada Amfibiya Korpusu Komandanlığının şəxsi heyətinə müraciətində deyib.
O bildirib ki, Türkiyə Suriya və İraqda terrorla mübarizə aparır: “Eyni zamanda biz Albaniya, Liviya, Azərbaycan, Qətərdə sülh və təhlükəsizliyin təsis olunmasına töhfə veririk”.
30-03-2025, 15:30
Ermənistandan növbəti təxribat
Martın 29-u axşam və 30-u səhər saatlarında Ermənistan silahlı qüvvələri pilotsuz uçuş aparatı və dronlar vasitəsilə Qerenzur yaşayış məntəqəsi istiqamətində yerləşən mövqeləri ilə üzbəüz istiqamətdəki Azərbaycan Ordusunun mövqeləri üzərində 3 dəfə kəşfiyyat xarakterli uçuş həyata keçirməyə cəhd edib.
Bu barədə Müdafiə Nazirliyindən bildirilib.
Bölmələrimizin sayıqlığı nəticəsində Ermənistanın təxribatçı cəhdlərinin qarşısı alınmışdır.
Eyni zamanda, Ermənistan silahlı qüvvələrinin bölmələri Gorus, Basarkeçər və Çəmbərək rayonları istiqamətlərindən Azərbaycan Ordusunun mövqelərini bir neçə dəfə atıcı silahlardan fasilələrlə atəşə tutub.
30-03-2025, 15:10
Ermənistanda seçki pozuntuları
Ermənistanda yerli özünüidarəetmə orqanlarına seçkilərdə iki qanun pozuntusu qeydə alınıb.
Bu barədə ölkənin Daxili İşlər Nazirliyinə məlumat daxil olub.
Hər iki pozuntu ilə bağlı araşdırma aparılır. Nəticələrlə bağlı məlumat veriləcək.
Xatırladaq ki, bu gün Ermənistanda yerli özünüidarəetmə orqanlarına seçkilər keçirilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Təqvim
| « Noyabr 2026 » | ||||||
|---|---|---|---|---|---|---|
| Be | Ça | Ç | Ca | C | Ş | B |
| 1 | ||||||
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | ||||||
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!