Tarix : 31-08-2015, 13:33
Elbəyi Cəlaloğlu
7-ci Elatdan qısa təəssüratlar
7-ci Elat bayramından sonra dincəlmək məqsədilə bir qədər ata yurdumda – Borçalıda qalmaq qərarına gəldim. 20 gündən çoxdur ki, borçalılılarla birbaşa təmasdayam. Kiçik və böyük məclislərdə, elarası, kəndarası irili-xırdalı yığıncaqlarda ən çox bəhs edilən mövzu Elat bayramı və onun mahiyyətidir. Bilməyənlərə anlatmağı borc bildiyimdən eyni söhbəti çeşidli toplantılarda söyləməkdən yorulmuram da. Elatın Haqq yolu olduğunu dərk edənlər isə belə bir yüksək əyarlı tədbirin təşəbbüskarı olan Zəlimxan Məmmədlinin Gürcüstana buraxılmamasının səbəbini soruşurlar. Açığı bu sualı cavablandırmağa bəzən çətinlik çəkdiyimdən, eyni zamanda ehtimalımın düzgünlüyünə şübhə edərək yozmağa da ehtiyat etdiyimdən, – bunu Gürcüstan rəhbərliyindən soruşmaq lazımdır, – deyib, müzakirəni öz üzərlərinə atıram.
Lakin qeyd etmək lazımdır ki, 7-ci Elat bayramı öz möhtəşəmliyi ilə yaddaşlara həkk olundu. “Borçalı” Cəmiyyətinin sədri Zəlimxan Məmmədlinin iştirak edə bilməməsinə baxmayaraq, “Borçalı” Cəmiyyətini dəstəkləyənlər və borçalısevərlər dünyanın çeşidli ölkələrindən gəlib bu bayrama qatıldılar.
İkinci cəhət bu idi ki, ilk dəfə olaraq Gürcüstanın hökumət rəsmiləri bayramda iştirak etdilər. Kvemo-Kartli qubernatoru, Dmanisi rayon İcra Başçısı (qamqebeli) öz müavinləri ilə birlikdə Elat bayramını şərəfləndirdilər və açılış nitqi söylədilər. Onların iştirakını Gürcüstan siyasi hökumətinin Borçalı türklərinin tarixinə, mədəniyyətinə və bütövlükdə mənəvi dəyərlərinə hörmətlə yanaşması kimi qiymətləndirirəm.
Üçüncü tərəfdən, Türkiyənin rəsmi dairələri, ayrı-ayrı təşkilat rəhbərlərinin bu bayrama könül verməsi və Fransalı, Rusiyalı qonaqların da iştirakı əvvəlki illərdə olduğu kimi sevincimizə sevinc qatdı. Azərbaycanın Millət Vəkili Fazil Mustafanın Elatda çıxışı borçalılıların qolunun qüvvəsini, dizinin taqətini bir az da artırdı, lakin Azərbaycan rəsmilərinin orada görünməməsi təəssüf doğurdu. Halbuki, Gürcüstan və Türkiyə dövlət rəsmilərindən öncə Azərbaycan siyasi hakimiyyəti Elata dəstək verməliydi. Necə ki, hər zaman bu bayrama dövlətlərimizin sahiblənməsinin tərəfdarı olmuşuq. Elə buradaca qeyd etmək yerinə düşər ki, Azərbaycan televiziyaları da bu il Elata münasibətdə özlərinin qeyri-müstəqil olduqlarını bir daha təsdiqlədilər. Ulu Tanrıdan onların təfəkkürünə demokratiklik, düşüncəsinə ziyalılıq və qəlbinə fədakarlıq arzulayıram. Bütövləşmə, inteqrasiya, tarixini, yaddaşını, mədəniyyətini qoruma və inkişaf etdirmənin başqa yolu da yoxdur.
Üzü Tiflisə
Bu ilki Borçalı müşahidəlrim mübarək Elat bayramının mənə bəxş etdiyi ruhun üzərinə daha bir neçə xoş ovqat gətirdi. Bunlardan biri, Borçalı camaatının bir zamanlar nicatı əsasən Bakıdan gözlədiyi halda, indi üzlərini daha çox Tiflisə tutmalarıdır. El-obada hər kəs Gürcüstanda gedən ictimai-siyasi prosesləri müzakirə edir, öz düşüncə tərzinə uyğun olaraq Gürcüstan dövlətində görmək istədiyini – subyektiv mövqeyini ifadə edir. Bu, “Borçalı” Cəmiyyətinin artıq özünü doğrultmaqda olan çoxdankı arzularındandır. Hər zaman yazılarımız, çıxışlarımız və tezislərimiz vasitəsilə “Üzünüzü Tiflisə tutun, Gürcüstanı milli dövlətiniz olaraq sevin!” demişik. Təbii ki, bundan xoşlanmayanlar, bunu düzgün anlamayanlar da olurdu. Bu, “millət” və “etnos” ifadələrinin fərqini bilməyən, millətləşmə, bütövləşməni, birgəyaşayışın mahiyyətini dərk edə bilməyənlərin mövqeyi idi. “Borçalı” Cəmiyyətinin “Gürcüstan hər bir gürcünün olduğu kimi, Borçalı türklərinin də milli dövlətidir” tezisini oxuyub qarnını-başını qaşıyanlar başa düşmürdülər ki, ta qədimdən üzü bəri bütün zamanlarda müxtəlif etnik qruplar və tayfalar bir ideya ətrafında birləşərək bir milləti formalaşdırıb, bu millət də öz növbəsində dövlətini qurub. İndiki zamanda hər hansı bir millətin, yaxud da dövlətin yalnız bir etnosdan ibarət olduğunu söyləmək naşılıq olar. Bu mənada dövlət onun hər bir vətəndaşının milli dövləti hesab olunur. Hər hansı bir etnik qrup vətəndaşı olduğu dövləti bilərəkdən özünün milli dövləti hesab etmirsə, demək orada separatçılıq meylləri var. “Borçalı” Cəmiyyəti də bunları dərk edərək Borçalı gənclərini Gürcüstanı milli dövləti olaraq sevməyə səslədi. Bütün bunların fonunda “Borçalı” Cəmiyyəti hər zaman Borçalı gənclərini Gürcüstanın ictimai-siyasi həyatının yaxından iştirakçısı olmağa dəvət edib, ana dilində olan məktəblərin statusunu qorumaq şərti ilə gürcü dilini mükəmməl öyrənməyi təlqin edib. Əlbəttə, hər bir insan vətəndaşı olduğu ölkənin dövlət dilini bilməyi özünə borc bilməlidir və onu da anlamalıdır ki, dövlət dilini bilmədən bu ölkədə fəhləlikdən başqa bir şeyə nail olmaq mümkünsüzdür. “Borçalı” Cəmiyyəti və onun sədri Zəlimxan Məmmədlinin bu mövqedə olmasını Gürcüstana olan sonsuz sevgilərlə, onun dövlətçilik ənənəsini, konstitusiyasını, bayrağını, gerbini, himnini, mədəniyyətini sevmək və bu dövlətin taleyini öz müqəddaratı saymaqla izah etmək olar.
Gürcüstanın ictimai-siyasi həyatının, yaxud taleyinin borçalılıları əvvəlki illərlə müqayisədə daha çox düşündürdüyünü müşahidə etmək elə də çətin deyil. Kəndlərdə maddi çətinlik üzündən doğan bilgisayar azlığı informasiya qıtlığı yaratdığına baxmayaraq, əhalidə aktivlik müşahidə olunur. Amma onlar istəklərinin parlamentdə səsləndirilmə çətinliyindən narahat olduqlarını söyləyirlər, bunun səbəbini də Gürcüstan türklərindən ibarət deputatların son dərəcə azlığı və ya yetərsay olmadığı ilə izah edirlər. Doğrudan da, ölkədə əhalinin sayına görə Gürcüstan türklərinin gürcü millətindən sonra 2-ci yerdə durduğunu nəzərə alsaq, o zaman parlamentdə heç olmasa 20 deputatla təmsil edilməli olduqları halda, onlar cəmi 3 deputatla kifayətləniblər. Bu da əhalinin son parlament seçkilərinə qədərki dövrdə fəaliyyətsizliyinin, ya da seçki ədalətsizliyinin nəticəsidir. Lakin Borçalı əhalisinin bugünkü oyanıqlığı gələcək seçkilərdə Gürcüstan türklərindən ibarət deputatların xeyli artacağını güman etməyə əsas verir. Hesab edirəm ki, bu məsələni Azərbaycan hökuməti də özünün Gürcüstanla bağlı xarici siyasətinə daxil etməli və bu işdə maraqlı olmalıdır.
Deputat məsələsində son zamanlar nədənsə Gürcüstan kökənli Azərbaycan vətəndaşlarının bəxti Azərbaycanda keçirilən seçkilərdə də gətirmir. SSRİ zamanında və ondan sonrakı dövrlərdə müxtəlif səbəblərlə Azərbaycana köçmüş Gürcüstan türklərinin içindən çıxmış və Azərbaycanın elm, siyasət, iqtisadiyyat və eləcə də, digər sahələrində fəal olan yüzlərlə, bəlkə də minlərlə ziyalının olduğunu söyləsək, bugünkü Milli Məclisdə onların təmsil olunmaması təəssüf, hətta təəccüb doğurur. Borçalılıların problemlərini ara-sıra Milli Məclisdə qaldıran Millət Vəkillərimiz var, buna sözüm yox, lakin bu xalqın psixologiyasını, dərd-sərini daha dərindən bilən Gürcüstan kökənli Millət Vəkillərinin olmasına nə mane olur? İdarəetmənin qaydalarına görə də, ölkə parlamenti və idarəçi komanda ölkə coğrafiyasının müxtəlif bölgələrindən əhalinin etimad göstərdiyi şəxslərdən ibarət olmalıdır. O zaman necə oldu ki, Milli Məclisdə təmsil olunması üçün borçalılıların içərisindən 5 nəfər nümunəvi, fədakar şəxs tapılmadı? Məncə bu şəxslər yetərincədir, lakin kimlərəsə sərf edən, kimlərinsə şəxsi maraqlarına mane olmayacaq kadrların seçilməsi müşküldür. Bu da olmasın ki, vaxtilə Zəlimxan Məmmədlinin “dimdiyindən” mandatını saldırdılar.
Qarşıdan növbəti parlament seçkiləri gəlir. Xalqımıza, dövlətimizə xeyirli-uğurlu olsun, deyib seçiciləri daha diqqətli, kimi seçəcəklərinin fərqində olmağa və bütünlüklə seçkilərə qatılaraq, saxtakarlığa çalışanların qarşısını birmənalı olaraq kəsməyə dəvət edirəm. Belə olan halda 5 ildə bir dəfə də olsun Milli Məclisdə səsini eşitmədiyimiz, parlamenti özünə “mürgüləmə yeri” seçmiş deputatların sayının heç olmasa minimuma endiyinin şahidi ola biləcəyik.
Borçalı türkləri ilə gürcü xalqının ortaq dəyərləri
Tarixi mənbələr göstərir ki, millətin yaranmasında etnik qruplar arasındakı irq və əcdad qohumluğu, dil və din birliyi, ortaq iqtisadi həyatın olması, ortaq mədəniyyət nümunələrinin mövcudluğu, siyasi keçmiş yaxınlığı, ortaq tarix və yaddaşın olması, bəlli bir ana Vətənə olan sevgi, keçmişin eyni hadisələrinə münasibətdə ortaq qürur və məyusluq hissələri mühüm rol oynayırlar. Sadaladığımız amillərin hamısı olmasa da, böyük bir hissəsini gürcü xalqı ilə Gürcüstan türklərinin ortaq dəyərləri sırasına qatmaq mümkündür. Lakin tarixi faktdır ki, minillərdir öz aralarında heç bir coğrafi sərhəd tanımayan bu iki xalq dost-qardaş münasibətilə ortaq tarix yaşamalarına, qarşılıqlı mədəni inteqrasiya etmələrinə baxmayaraq, heç bir quru sərhədi olmayan Şimal və Baltik dənizlərinin suları kimi bir-birinə qarışmamış, bir-birinin içində assimilyasiya olmamışlar. Hesab edirəm ki, buna öncə millətləşmə prosesində aparıcı meyarlardan sayılan əcdad, dil və din birliyinin iki xalq arasında olmaması, ikincisi isə, hər iki millətin öz keçmişi, mədəniyyəti, dili və inanc sistemininin sədaqətlə keşiyində durmağı bacarması, öz dəyərləri uğrunda qəhrəmanlıq tarixini yazması, həmçinin dostluq münasibətlərinə rəğmən mərdanəlik nümayiş etdirmələri səbəb olmuşdur.
Sözgəlişi, bu məsələylə bağlı çox da uzağa getmədən, XII əsrdə Səlcuqlulara qarşı dirəniş göstərmək üçün Qurucu Davidin dəvətilə şimaldan Gürcüstana gələrək yerli türklərlə qarışmış Qarapapaq-Qıpçaq türkləri ilə gürcü xalqının birgə mübarizəsindən üzü bəri yaşanan, torpaqlar uğrundakı mücadilələri, II İrakli dövründə Gürcüstana qarşı hücumlarda 300 araqvili ilə çiyin-çiyinə Borçalı Xudu bəyin başçılığı altında vuruşan 150 nəfər Borçalı türklərindən ibarət döyüşçüləri, II İraklinin yaxın dostları, xanəndə və səriştəli döyüşçü Allahverdi, sərkərdə Sadıq Yadigarov oğulları Ağacan və Allahverdi ilə, eləcə də Şəmsəddinli Əli Sultan kimi qəhrəmanların birgə apardıqları mübarizələri nümunə üçün qeyd etmək olar. Bundan başqa, XIX əsrin əvvəlində Rus imperiyası tərəfindən işğala məruz qalan Cənubi Qafqaz uğrunda aparılan savaşlar, 1918 və 1990-cı illərdə müstəqillik uğrunda aparılan mübarizələr, XIX-XX əsrlərdə rus-erməni birləşmələri və daşnak-bolşevik separatçılarına qarşı aparılan mübarizələr bu iki xalqın ortaq problemi, ortaq ölüm-dirim savaşıydı. Çağdaş zamanımızda da ortaq dərdlərimizdən biri hər iki ölkə ərazisinin bir hissəsinin mahiyyət etibarı ilə eyni qüvvə tərəfindən işğal altında olması faktı, təhdid və təhlükənin eyni yerdən gözlənilməsindədir. Eynilə məfkurə birliyi olaraq, hər iki xalqın demokratik dövlət quruculuğu, müstəqilliyinin möhkəmləndirilməsi, iqtisadiyyatının inkişafı yolunda göstərdiyi çabaları göz önünə gətirsək, onların həm də eyni yolun yolçuları olduğunu söyləmək olar. Bu mənada hər iki xalq bu tarixi məsuliyyətini dərk etməli, birgəyaşayışa pozuculuq gətirən, ona mane olan hər cürə siyasi və mənəvi vasitələrə nəinki yol verməməli, hətta bu şeytani hissləri ağlına belə gətirməməlidir. Bir çox yerləri terrorla üz-üzə qalmış və ya müharibə meydanına çevrilmiş dünyada ayaqüstə qalmağın, Cənubi Qafqazda sülhün qorunması, təhlükəsizliyin təmin edilməsinin yeganə yolu Azərbaycan və Gürcüstan xalqlarının tarixi dostluq ənənəsini yaşatmaq və birgəyaşayışı təmin etməkdir. “Borçalı” Cəmiyyətinin Azərbaycan, Gürcastan və Türkiyə dövlətlərini strateji əməkdaşlığa, yaxın dostluğa, mehriban qonşuluğa dəvət etməsinin kökündə də elə bu inandırıcı amillər dayanır.
Hər il Elatdan sonra dünyanın müxtəlif ölkələrində yayınlanan məqalələr, TV və digər video paylaşmalardan da gördüyümüz kimi, bu bayrama gələnlər Gürcüstanı, eləcə də tarixi Borçalını daha dərindən tanımağa və tanıtmağa çalışır, Gürcüstanda yaşayan xalqların mədəniyyətini ölkələrinə daşıyır, onları nümayiş etdirməyə can atırlar. Bu minvalla da mədəniyyətlərarası dialoqun miqyası genişlənir. Bütün bunların nəticəsidir ki, 7-ci Elatda çıxış edən Türkiyəli işadamları bu bölgədə infrastrukturlar yaratmaq, biznes qurmaq istəklərindən söz açdılar. Bundan başqa, gələcək Elat bayramlarına Gürcüstan hökuməti birbaşa əl qoyarsa və bu bayram bütün parametrləri ilə daha mükəmməl təşkil və təbliğ olunarsa, bundan dövlət büdcəsi də yararlana bilər. Buna misal olaraq, hər iki ildən bir Macarıstanda “Atilla günləri” adı altında keçirilən oxşar tədbiri göstərmək olar. Əldə etdiyim qeyri-rəsmi məlumatlara görə, təqribən 350 min nəfərin qaqtıldığı bu tədbir zamanı ölkə büdcəsinə külli miqdarda vəsait daxil olduğundan, hökumət hər dəfə tədbirin təşkili üçün 15 milyon pul ayırır. Bu gəlir ortalama bir həftə ərzində keçirilən tədbir zamanı satışa çıxarılan yeyinti məhsulları, simvolik məna daşıyan mallar və digər çeşidli ticarət işlərindən əldə olunur.
Paylaş
Bölmə: Borçalı / Manşet / Slayd / Xəbər lenti
Başqa xəbərlər
- "Borçalı" İctimai Cəmiyyətinin sədri Zəlimxan Məmmədlinin müraciəti
- “Borçalı” İctimai Cəmiyyətinin müraciəti
- ““Borçalı” Cəmiyyəti digərlərindən daha aktivdir”
- Gürcüstanda “Borçalı harayı” kitabı nəşr olunub
- “Borçalı”Cəmiyyəti İdarə heyətinin müşavirəsi keçirilib
Fikirlər
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Təqvim
| « Noyabr 2026 » | ||||||
|---|---|---|---|---|---|---|
| Be | Ça | Ç | Ca | C | Ş | B |
| 1 | ||||||
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | ||||||
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!