13-11-2022, 17:18
Şəhidlərimiz anıldı
Torpaqlarımızın ərazi bütövlüyü uğrunda şəhidlik zirvəsinə yüksələn Vüsal Məmmədov, Cahan Məmmədzadə və Vətən Müharibəsi Qəhrəmanı Fəqan Zalovun xatirəsinə həsr olunan anım mərasimləri keçirilib. Bu barədə Müdafiə Nazirliyindən bildirilib. Müdafiə Nazirliyinin və ictimaiyyətin nümayəndələri, rayon icra hakimiyyətlərinin əməkdaşları, şəhidlərin ailə üzvləri, yaxınları, eləcə də döyüş yoldaşlarının iştirak etdiyi tədbirlərdə xalqımızın ümummilli lideri Heydər Əliyevin, Azərbaycanın suverenliyi, müstəqilliyi və ərazi bütövlüyü uğrunda şəhid olanların xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib. Tədbirlərdə Vətən müharibəsi şəhidlərinin məzarları üzərinə əklillər qoyulub, tər çiçəklər düzülüb və ruhlarına dualar oxunub. Çıxış edənlər Müzəffər Ali Baş Komandanın rəhbərliyi ilə Azərbaycan Ordusunun qazandığı tarixi Qələbədən, bu Zəfərin qazanılmasında igid oğullarımızın göstərdikləri qəhrəmanlıq və şücaət nümunələrindən danışıblar. Şəhidlərin ailə üzvləri və yaxınları onlara göstərilən diqqət və qayğıya, eləcə də şəhidlərimizin xatirəsinin uca tutulduğuna görə Azərbaycan Respublikasının Prezidenti İlham Əliyevə və Müdafiə Nazirliyinin rəhbərliyinə minnətdarlıqlarını bildiriblər.
13-11-2022, 17:16
İranda sənaye şəhərciyi alovlandı
İranın sənaye şəhərciyində yanğın baş verib. İsfahan şəhərində 4 saatdan artıqdır yanğınsöndürənlər yanğını söndürməyə çalışır. Ərazidə kimyəvi və partlayıcı maddələr olduğu üçün davamlı olaraq partlayışlar baş verib. Yanğında 15 nəfər yaralanıb, 3 nəfərin vəziyyəti ağırdır. İsfahan Mübarəkə sənaye şəhərciyində 400-dən artıq kiçik zavod və fabriklər fəaliyyət göstərir. Yanğın kimyəvi maddələr istehsal edən zavodda baş verdiyi bildirilir.
13-11-2022, 17:13
Qlobal temperatur yüksələcək - Xəbərdarlıq
İqlimşünaslar havaya atılan zərərli qazların həcminin hazırkı səviyyədə qalacağı və ya artacağı halda Yer kürəsində temperaturun “Selsi” şkalası üzrə 1,5 dərəcə yüksəlməsi ehtimalını 50 faiz səviyyəsində proqnozlaşdırlar. Bu barədə Böyük Britaniyanın Ekseter Universitetinin mətbuat xidməti məlumat yayıb. “BMT-nin İqlim Konfransının iştirakçıları Yer kürəsində temperaturun 1,5 dərəcə və ya daha çox yüksəlməsinin qarşısını almaq üçün təcili tədbirlər görməlidir”, - universitetin mətbuat xidməti professor Pyer Fridlinqştaynın bu sözlərini sitat gətirib. 2015-ci ilin dekabrında qlobal istiləşmə ilə mübarizə üzrə imzalanmış Paris sazişi çərçivəsində iştirakçı ölkələr orta illik temperatur artımını hazırkı səviyyədə saxlamaq üçün yaxın onilliklər ərzində havaya atılan karbon qazının səviyyəsini azaltmağı öhdələrinə götürüb. Bundan əlavə, sazişdə iştirak edən ölkələr atmosferdən karbon qazını aktiv şəkildə udan meşələrin və digər təbii ekoloji sistemlərin sürətli bərpası üçün planlar hazırlayıb. Lakin iqlimşünaslar bu tədbirlərin kifayət etməyəcəyini düşünürlər. Onların fikrincə, bunun üçün bəşəriyyət havaya atılan zərərli qazları sıfıra endirməli və hətta atmosferdən karbon qazını çıxarmağa başlamalıdır. Tədqiqatçılar hesab edirlər ki, görülən bütün tədbirlərə baxmayaraq, artıq birinci onillikdə Paris sazişinin əsas məqsədi iflasa uğraya bilər. Onlar 2022-ci ildə havadakı istixana effekti yaradan qazların səviyyəsinin ölçərkən bu nəticəyə gəliblər. Məlum olub ki, həmin göstərici ötən ildən başlayaraq sürətlə artmağa davam edib. Belə ki, karbon qazının atmosferə atılma həcmi 40,6 milyard tona çatıb ki, bu da ötən illə müqayisədə bir faiz çoxdur. Eyni zamanda, mədən yanacağının yandırılması səbəbindən atmosferə atılan karbon qazının miqdarı 2020-ci illə müqayisədə təxminən 5,1 faiz artıb. Mövcud iqtisadi qeyri-sabitlik və epidemioloji vəziyyət sənaye və energetika sahəsində karbohidrogenlərdən istifadənin artmasına səbəb olub. Proqnozlara əsəsən, vəziyyətin belə davam edəcəyi təqdirdə 2030-cu ilə qədər qlobal temperatur 1,5 dərəcə yüksələ bilər.
13-11-2022, 17:10
Ərdoğanın İndoneziya gündəliyi bəlli oldu
Türkiyə prezidenti Rəcəb Tayyib Ərdoğan İndoneziyanın ev sahibliyi ilə Bali adasında keçiriləcək 17-ci "G-20" Zirvə Toplantısında iştirak edəcək. Bu barədə Türkiyə Prezident Aparatının İctimaiyyətlə Əlaqələr Departamentindən bildirilib. Məlumata görə, 15-16 noyabr tarixlərində keçiriləcək sammitin əsas mövzusu “Birgə bərpa - daha güclü bərpa”dır. Bu çərçivədə G-20 liderləri “Ərzaq və enerji təhlükəsizliyi”, “Səhiyyə” və “Rəqəmsal transformasiya” adlı üç sessiyada fikir mübadiləsi aparacaqlar. Prezident Ərdoğan tədbirdən əvvəl - noyabrın 14-də İndoneziya prezidenti Coko Vidodo ilə ikitərəfli görüş keçirəcək. Görüş zamanı Türkiyə ilə İndoneziya arasındakı əlaqələrə nəzər salınacaq. Eyni zamanda, əməkdaşlığın daha da inkişaf etdirilməsi üçün atılacaq addımlar müzakirə olunacaq. Türkiyə prezidenti sammit çərçivəsində müxtəlif ölkələrin dövlət başçıları ilə də təkbətək görüşəcək.
13-11-2022, 17:08
Bu şəhərdən Rusiya bayrağı götürüldü
Ukraynanın işğal altındakı Melitopol şəhərində mərkəzi meydandan Rusiya bayrağı götürülüb. Bu barədə məlumatlar sosial şəbəkədə paylaşılıb. Bildirilir ki, ilk olaraq Rusiya bayraqları Xerson şəhərinin inzibati binaları və meydanlarından yığışdırılmağa başlayıb. Bölgədəki qondarma hakimiyyət bunun Rusiyanı şəhəri tərk etməsi ilə əlaqəli olmadığını bildirib.
13-11-2022, 17:05
Daşqınlar daha bir ölkəni cənginə aldı
Kolumbiyada aramsız yağan leysan yağışları daşqınlara səbəb olub. Daşqın nəticəsində Kolumbiyanın paytaxtı və digər şimal bölgələri iflic vəziyyətə düşüb. Rəsmi dairələr bildirib ki, aramsız leysan yağışları Kauka çayının daşması ilə nəticələnib. İnşalar canlarını qurtarmaq üçün evlərin damına və digər yüksək yerlərə çıxıblar. Ərazilərə helikopter vasitəsilə ərzaq paylanıldığı vurğulanır. Hadisə nəticəsində 1 nəfərin öldüyü, 2 nəfərin itkin düşdüyü qeyd olunur.
13-11-2022, 16:44
Saakaşvilinin partiyasına yeni sədr gətirilir
Saakaşvilinin partiyasına yeni sədr gətirilir
Gürcüstanda müxalif "Vahid Milli Hərəkat" partiyasının rəhbərinin seçilməsi ilə bağlı işçi qrupu yaradılıb. Bu barədə partiyanın aparıcı üzvlərindən olan Qiorqi Baramidze məlumat verib. Onun sözlərinə görə, işçi qrupu 7 nəfərdən ibarətdir və qrupun moderatoru Qiorqi Baramidze özü olacaq: “Qrupun bir çox məsələyə və meyarlara cavab verən qaydalar yaratmaq üçün çox çətin işi olacaq. Meyarlardan biri də odur ki, seçkilər, səsvermə proseduru ədalətli, şəffaf və hamı üçün başa düşülən olmalıdır. Seçkilərdə hakim rejimin və ya digər maraqlı tərəflərin nümayəndələri deyil, məhz Milli Hərəkat partiyasının üzvləri və dəstəkçiləri iştirak etməlidirlər. Həmçinin proseslərdə bizim xaricdə yaşayan emiqrantlarımızın iştirakı da çox arzu ediləndir. Onlar arasında çox sayda Vahid Milli Hərəkat dəstəkçiləri var. Proses elə baş tutmalıdır ki, onun ədalətsiz olduğuna dair heç kim şübhə etməməlidir. Nəticələr obyektiv olmalıdır və məhz bu məqsədlə qeyd etdiyimiz qrup şəxs yaradılıb. Ümid edirik ki, 22 noyabradək qeyd etdiyimiz qaydaları nizamlaya biləcəyik. Ümid edirəm ki, siyasi şura bunu müzakirə edərək təsdiqləyəcək, daha sonra isə Vahid Milli Hərəkatın sədri vəzifəsinə namizədlər təbliğat-təşviqat kompaniyasına başlayacaqlar. Seçkilərin tələsik yox, ancaq tez şəkildə keçirilməsi bizim marağımızdır". Qeyd edək ki, adıçəkilən partiya 19 il əvvəl Gürcüstanın keçmiş prezidenti Mixail Saakaşvili tərəfindən yaradılıb.
13-11-2022, 16:37
Pandemiya Fondu yaradılır: Razılıq əldə olundu
G20 ölkələrinin maliyyə nazirlikləri yeni pandemiyalarla mübarizə üçün nəzərdə tutulan fondun yaradılması barədə razılıq əldə ediblər. Bu barədə İndoneziyanın səhiyyə naziri Budi Qunadi Sadiki məlumat verib. O bildirib ki, 24 ölkə və təşkilat qlobal fondun inkişafı üçün 1,4 milyard dollar sərmayə qoymağı öhdəsinə götürüb. İndoneziya Səhiyyə Nazirliyinin rəhbərinin sözlərinə görə, yaxın 5-10 ildə bu məbləğ 10 milyarda qədər arta bilər.
13-11-2022, 16:33
Lavrov NATO-nu ittiham etdi
"ABŞ və Şimali Atlantika Alyansı Asiya-Sakit Okean regionunu hərbiləşdirməyə çalışır, NATO isə bu regionda aparıcı rol almaq istəyir". Bunu Rusiya Federasiyasının xarici işlər naziri Sergey Lavrov deyib: "Birləşmiş Ştatlar və onun müttəfiqləri və Şimali Atlantika Alyansı indi bu məkanı mənimsəməyə çalışırlar". O, Hind-Sakit Okean Strategiyasının konsepsiyasını xatırladıb: "Onun çərçivəsində “bütün istəyənlər üçün açıq olmayan, əslində ASEAN ətrafında yaradılmış inklüziv strukturlarla rəqabət aparan və bu regionun hərbiləşdirilməsini açıq şəkildə nəzərdə tutan formatlar irəli sürülür. Asiya-Sakit Okean Bölgəsində Rusiyanın Maraqlarını ehtiva edən Çini ehtiva edir. Yəni NATO əslində burada aparıcı rol oynayacaqlarını iddia edirlər və sözdə müdafiə xətti artıq Cənubi Çin dənizinə keçirilir”, - Lavrov vurğulayıb.
13-11-2022, 16:29
7 boksçumuz finala yüksəldi
Polşanın Keltse şəhərində boks üzrə keçirilən beynəlxalq turnirdə yarımfinal mərhələsinə yekun vurulub. Boks Federasiyasından verilən məlumata görə, Azərbaycan milli komandasının daha 2 üzvü finalda iştirak hüququ qazanıb. 1/4 final mərhələsində ermənistanlı Armen Quşçiyanın rinqə çıxmaması səbəbindən qalib elan olunan Məsud Yusifzadə (51 kq) yarımfinalda macarıstanlı İştvan Qerzennı ilə üz-üzə gəlib. Görüş təmsilçimizin qələbəsi ilə yekunlaşıb. 57 kq-da döyüşən Ümid Rüstəmov Tirzoman Eysebyunun (Rumıniya) ardınca Şon Persellə (İrlandiya) də gücünü göstərib. Rəqibini məğlub edən boksçumuz adını finala yazdırıb. Ruslan Qədirov (54 kq) yarımfinalda Yakub Krjpeytlə (Polşa) münasibətinə aydınlıq gətirib. Rəqib mərhələ adladığından Avropa çempionatının finalçısı bürünc medalla kifayətlənib. Digər boksçumuz Sərxan Əliyev də turniri 3-cü pillədə bitirib. 71 kq-da gücünü yoxlayan idmançı yarımfinalda polşalı Damyan Durkajla döyüşüb və rəqib qələbə qazanıb. Nəticədə Azərbaycan yığmasının heyətində finalda mübarizə aparacaq boksçularının sayı 7-yə, bürünc medal qazananlar isə 4-ə çatıb. Bu gün baş tutacaq final mərhələsində Məsud Yusifzadə (51 kq) Yakub Slominskini (Polşa), Ümid Rüstəmov (57 kq) Patrik Adamusu (İrlandiya), Malik Həsənov (63,5 kq) Roman Samueli (Rumıniya), Nəbi İsgəndərov (67 kq) Pavel Suleçkini (Polşa), Murad Allahverdiyev (80 kq) Andrey Çiryasovu (Moldova), Alfonso Dominqes (86 kq) Klemens Şepanyakı (Polşa) və Məhəmməd Abdullayev (+92 kq) Radoslav Kavjakı (Polşa) sınağa çəkəcək. Qeyd edək ki, komandamızın heyətində Qədirov və Əliyevdən öncə Eldar Quliyevlə (86 kq) Rauf Rəhimov (92 kq) da bürünc medal qazanıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!