15-07-2024, 17:59
Azərbaycana çox önəm veririk - CHP-nin sədr müavinindən özəl müsahibə
Türkiyənin Cümhuriyyət Xalq Partiyasının (CHP) təhlükəsizlik məsələləri üzrə sədr müavini, admiral Yankı Bağcıoğlu müsahibə verib.
Sədr müavini Türk Dünyasının hərbi sahədəki mövqeyi, Azərbaycan-Türkiyə hərbi əməkdaşlığı və CHP-nin Türk Dünyasına olan baxışı barədə geniş danışıb. Bağcıoğlu Türk Dünyasının genetik kodlarında əsgərlik və silahlı qüvvələrin xüsusi yer tutduğunu vurğulayaraq, Azərbaycanla Türkiyə arasında imzalanan Şuşa Bəyannaməsinin əhəmiyyətindən söz açıb.
- Cənab Admiral, hazırda Türk dünyasının hərbi sahədəki vəziyyəti barədə bir hərbçi kimi nə deyə bilərsiniz?
- Türk dünyasının tarixən gələn genetik kodları içərisində əsgərlik və silahlı qüvvələr xüsusi yer tutur. “Hər türk əsgər doğar” ifadəsi cəmiyyətlərimizdə çox yayğın olaraq istifadə olunur. Bu baxımdan, xüsusilə Türkiyə və Azərbaycan başda olmaqla, bu genetik meylin texnoloji üstünlük ilə birləşdirilməsinə yönəlik səyləri böyük bir sevinclə izləyirik.
Həm Hərb Akademiyasında birlikdə təhsil aldığım, həm də peşə həyatımdakı fərqli mühitlərdə tanış olmaq fürsəti əldə etdiyim Azərbaycan hərbi personalının Vətən sevgisi, peşəkar biliyi və təcrübəsi, Türk Silahlı Qüvvələri personalı ilə olan dostluqdan daha çox qardaşlığı məni yaxşı mənada həddən artıq təsirləndirir.
Türk Müdafiə Sənayesinin istehsal və inkişafa yönəlik əldə etdiyi müsbət sürətin nəticəsi olaraq, orijinal və texnoloji cəhətdən üstün silah sistemlərinin Türk dünyası tərəfindən də seçildiyi və bir çox qardaş ölkənin silahlı qüvvələri tərəfindən də istifadə edildiyi gerçk olaraq ortadadır. Bu baxımdan, Türk Dünyasının hərbi sahəyə baxışının say üstünlüyündən daha çox texnoloji üstünlüyü hədəfləyən bir baxışa çevrildiyini demək doğru olar.
Bundan başqa, Türk Dünyası ölkələrinin ortaq təlimlər təşkil etməsi, hərbi sahədə bilgi və təcrübə paylaşımını artırmaq baxımından önəmlidir. Birlikdə işləmə qabiliyyəti yalnız texnologiya ilə deyil, eyni zamanda hərbi doktrin və təlimlərin də uyğunlaşdırılması ilə mümkün olacaq. Bu istiqamətdə Türk Dünyasının hərbi əməkdaşlıq çərçivəsində daha çox koordinasiya və ortaq layihələrə ehtiyacı olduğunu düşünürəm.
- Azərbaycanla Türkiyə Şuşa Bəyannaməsi imzalayıb. Bu sənədin əhəmiyyətini necə qiymətləndirirsiniz?
- Şuşa Bəyannaməsi Türkiyə və Azərbaycan arasında illərdir davam edən hərbi əlaqələrin əsas çərçivəsini ortaya qoyan və bu çərçivənin əsaslarını beynəlxalq aləmə bəyan edən çox önəmli bir sənəddir.
Önəmli olan sənəddə ümumi xətləri çəkilən fəaliyyətlərin real həyatda tətbiqi formasıdır. Türkiyə və Azərbaycan silahlı qüvvələri Şuşa Bəyannaməsində ifadə edilən hərbi fəaliyyətləri bir yerinə yetirirlər. Xüsusilə qarşılıqlı hərbi təlimlər və hərbi qabiliyyətləri artırmaya yönəlik fəaliyyətlərin davam etdiyini böyük sevinclə izləyirik.
Ancaq bu əlaqələr yönündə bəzi məqamlara ehtiyac olduğunu düşünürəm.
Məsələn, bir Azərbaycan Dəniz Qüvvələri zabitinin Türk Dəniz Qüvvələri gəmilərində izləyici zabitlik etməsi (və ya əksinə) iki ölkənin silahlı qüvvələri arasındakı əlaqələri dərinləşdirəcək. Eyni şəkildə iki ölkənin hərbi təhsil qurumlarında uzun müddətli akademik personal dəyişmələrinin də bu əlaqələri artıracağını düşünürəm.
Bununla yanaşı, ortaq müdafiə sənayesi layihələrinin inkişaf etdirilməsi, iki ölkənin hərbi qabiliyyətlərini daha da gücləndirəcək. Xüsusilə pilotsuz uçuş aparatları, kiber təhlükəsizlik və elektron müharibə kimi texnologiyalara yönəlik əməkdaşlıqlar, hər iki ölkənin müdafiə qabiliyyətini artıracaq.
Bundan başqa, sayını artırmaqla birlikdə həyata keçiriləcək ortaq təlimlərə digər Türk Dövlətləri Təşkilatına üzv ölkələrin də daxil edilməsi, geniş miqyaslı bir hərbi əməkdaşlığın yaradılması baxımından önəmli addımlar olardı.
- Cənab admiral, Türk Dövlətləri Təşkilatı demişkən, Türk dövlətlərinin ortaq hərbi birliyinin yaradılması ilə bağlı düşüncə aktuallığını qoruyur. Bununla bağlı nə deyə bilərsiniz?
- Bu fikri önəmsəməklə yanaşı, deyə bilərəm ki, daha vacib olanı Türk Dövlətləri Silahlı Qüvvələri arasındakı qarşılıqlı fəaliyyətin inkişaf etdirilməsidir. Ortaq yaradılacaq bu birlik tam olaraq istədiyimiz nəticəni verə bilər. Bunun üçün digər birliklərin də qarşılıqlı çalışması vacibdir.
Vacibi Türk Dövlətləri Təşkilatının silahlı qüvvələri arasında tam bir uyğunluq və qarşılıqlı fəaliyyət mexanizmlərinin yaradılmasıdır.
Bundan başqa, prosesin sürətləndirilməsi üşün TDT üzvləri arasında müdafiə əməkdaşlığı müqaviləsinin imzalanmasıdır. Eyni zamanda mövcud müqavilələrin inkişaf etdirilməsi və genişləndirilməsi də faydalı olar. Bu müqavilələr ortaq təlimlərin planlanması, müdafiə sənayesi layihələrində əməkdaşlıq edilməsi və hərbi personal dəyişmə proqramlarının artırılmasını ehtiva edə bilər. Beləliklə, Türk Dövlətləri arasındakı hərbi inteqrasiya daha güclü şəkildə təmin edilə bilər və regional təhlükəsizlik yaranar.
- Dedikləriniz CHP-nin Türk dünyası ilə bağlı düşüncəsidir?
- CHP tarixi olaraq qurucu liderimiz Mustafa Kamal Atatürkün əmanət etdiyi siyasi baxışın nəticəsi olaraq Türk dövlətlərini, “İki Dövlət-Tək Millət” anlayışında ifadə edildiyi kimi eyni millətin fərqli coğrafiyalarda yaşayan parçaları olaraq görməkdədir. CHP olaraq, Türk Dünyası ilə iqtisadi, mədəni və sosial əlaqələri də inkişaf etdirmək üçün səylər göstəririk. Ortaq tarix və mədəniyyətimizi daha yaxşı tanıtmaq, təhsil sahəsində əməkdaşlıqları artırmaq və ortaq layihələr həyata keçirmək üçün addımlar atırıq. Türk Dünyası ilə olan əlaqələrimizi daha da gücləndirmək və ortaq gələcəyimizi formalaşdırmaq üçün üzərimizə düşən məsuliyyətləri yerinə yetirməyə qətiyyətliyik.
Azərbaycan ilə olan əlaqələrimizi daha da gücləndirmək üçün müxtəlif layihələr gerçəkləşdirir, əməkdaşlıqlar edirik. Ortaq mədəniyyət tədbirləri, iqtisadi əməkdaşlıqlar və təhsil sahəsində layihələrlə iki ölkə arasındakı əlaqələri daha da gücləndirməyi hədəfləyirik. Azərbaycan xalqı ilə olan qardaşlıq əlaqələrimizi gücləndirmək, qarşılıqlı anlayış və əməkdaşlığı artırmaq üçün hər cür səyi göstərməyə davam edəcəyik.
CHP-dəki son dəyişikliyin memarı başqanımız Özgür Özəl vəzifəni təhvil almasının ardından ilk rəsmi ziyarətini Şimali Kipr Türk Cümhuriyyəti, ikinci ziyarətini isə Azərbaycana etməyi hədəflədiyini açıqlayıb.
CHP olaraq can Azərbaycan ilə əlaqələrə çox önəm verdiyimizi bir daha vurğulamaq istərdim. Sədrimiz Özgür Özəl tərəfindən uyğun bir tarixdə Azərbaycanı, Azərbaycanın liderini ziyarət etmək arzusunda olduğumuzu da bildirirəm.
15-07-2024, 17:40
Baxımsız vəziyyətdə qalmış 15 günlük körpənin həyatı xilas edildi
İaşə obyektində köməksiz vəziyyətdə olan 15 günlük körpə xilas edilib.
Bununla bağlı Ailə Qadın və Uşaq məsələləri üzrə Dövlət Komitəsi məlumat yayıb.
Qeyd edilib ki, dövlət komitəsinə daxil olan telefon zəngi operativ olaraq aidiyyatı qurumlarla birlikdə araşdırılıb.
Nəticədə Nəsimi rayonu ərazisində iaşə obyektində köməksiz vəziyyətdə olan 15 günlük körpənin həyatı xilas olunub.
Araşdırmalar davam etdirilir.
15-07-2024, 17:28
Trampa qarşı sui-qəsdi Bayden sifariş edib - İddia
Səkkiz respublikaçı konqresmen ABŞ prezidenti Co Baydenin Donald Trampa qarşı sui-qəsd cəhdinə görə məsuliyyət daşıdığını iddia edib.
Nümayəndələr Palatasının üzvü, respublikaçı Maykl Kollinzin sözlərinə görə, Bayden Trampı öldürmək sifarişi verib.
Sosial şəbəkələrdə sensasiyalı açıqlamaları ilə tanınan konqresmen Kollinz deyib ki, prokuror dərhal Co Baydeni qətlə təhrikdə ittiham etməlidir.
15-07-2024, 16:58
Məcburi köçkünlərin yaşadığı yataqxanada yanğın
Şəmkirdə yanğın hadisəsi baş verib.
Hadisə rayon ərazisində yerləşən peşə məktəbinin yataqxanası, hazırda Kəlbəcərdən olan məcburi köçkünlərin yaşadığı 2 mərtəbəli binanın 1-ci mərtəbəsində qeydə alınıb. Belə ki, sözügedən yataqxanada olan otaqların birində anidən yanğın olub. Dərhal əraziyə FHN əməkdaşları cəlb olunub. Yanğın söndürülüb, yataqxananın qalan hissəsi yanğından mühafizə edilib.
Hadisənin baş vermə səbəbləri araşdırılır.
15-07-2024, 16:25
"Pezeşkianın seçilməsi münasibətlərin istiləşməsinə təsir edə bilər" - Sabiq səfir
Azərbaycan Respublikasının İran İslam Respublikasındakı Səfirliyi yeni ünvanda fəaliyyətini bərpa edib. Səfir və səfirliyin hal-hazırkı heyəti İrana geri dönüb. Səfirlik ötən ilin əvvəli bağlanıb. 27 yanvar 2023-cü ildə Azərbaycanın Tehrandakı səfirliyinə silahlı basqın nəticəsində 1 nəfər ölüb, 2 nəfər yaralanıb. Bundan sonra ölkəmizin Tehrandakı səfirliyinin fəaliyyəti dayandırılıb.
Məsələ ilə bağlı danışan Azərbaycanın İrandakı sabiq səfiri Nəsib Nəsibli bildirib ki, səfriliyin uzun müddət bağlı qalması Azərbaycanın ziyanına idi:
"İranın Azərbaycanın İrandakı səfriliyimizin uzun müddət bağlı qalması bizim ziyanımıza idi. Bəli, səfirliyin fəaliyyətinin dayandırılması bir diplomatik demarş idi. Lakin hər baxımdan bu bizim ziyanımızaydı. Çünki diplomatik nümayəndəliyin olması ölkənin ehtiyacıdır. Səfirliyimiz bağlananda da deyirdim, indi də deyirəm ki, bizim orada səfirliyimiz olmalıdır. Amma o vaxtda dediyim kimi, uyğun təhlükəsizlik sistemi qurulmalıdır. Əvvəlki kimi əlini-qolunu sallaya-sallaya səfirliyə giriş olmamalıdır. Bütün ölkələrdəki səfriliklərimizdə təhlükəsizlik sistemi yüksək səviyyədə qurulmalıdır".
Sabiq səfir vurğulayıb ki, İranda yeni prezidentin seçilməsi ilə səfirliyimizin fəaliyyətə başlamasının üst-üstə düşməsi xoş bir hadisədir:
"Məsələyə bu nöqteyi-nəzərdən baxmaq olar. Bütün hallarda bizim İranda böyük maraqlarımız var. Bu maraqları qorumaq üçün də səfirliyə, diplomatik nümayəndəliklərə ehtiyacımız var. Quru sərhədlərinin açılmasına da ehtiyac var. Çünki iki Azərbaycan arasındakı əlaqələrin daha da genişlənməsinə quru sərədlərinin bağlı qalması mane olur. Bundan sonrakı əlaqələrimizin necə olacağını indidən demək elə də asan deyil. Əlaqələrin necə olacağı beynəlxalq və regional faktorlardan asılı olacaq. Pezeşkianın seçilməsi münasibətlərin istiləşməsinə təsir edə bilər".
15-07-2024, 16:21
Deputat olmaq istəyən 261 nəfərin müraciəti təsdiqlənib - RƏSMİ
2024-cü il sentyabrın 1-nə təyin edilmiş növbədənkənar parlament seçkilərində iştirak etmək üçün 431 nəfər müraciət edib.
Bunu Mərkəzi Seçki Komissiyasının (MSK) bu gün keçirilən iclasında MSK sədri Məzahir Pənahov qeyd edib.
O bildirib ki, onlardan 261 nəfərin müraciəti təsdiqlənib. Onların 213-nə imza vərəqələri verilib. 9 nəfər imza vərəqələrini dolduraraq geri qaytarıb.
15-07-2024, 16:17
Qan çıxarmaq əvəzinə, qan verək! - Deputatdan Aşura çağırışı
“Aşura hadisəsi dünya tarixində böyük faciələrdən biri olmaqla yanaşı, İslam tarixində dönüm nöqtəsi və bir qəhrəmanlıq salnaməsidir. İnsanların ali dəyərlər uğrunda özünü qurban verməsinin ən bariz nümunələrindən biridir. Heç şübhəsiz ki, İslam Peyğəmbəri Həzrət Məhəmmədin (s) nəvəsi Həzrət Hüseynin (ə) övladları və yaxınları ilə birlikdə şəhid olmaları İslam tarixində dərin iz buraxmışdır”.
Bunu açıqlamasında VI çağırış Milli Məclisin deputatı Ceyhun Məmmədov Məhərrəm ayının 10-cu günü – Aşuradan danışarkən bildirib.
“Aşura eyni zamanda, Azərbaycan tarixi, mədəniyyəti, poeziyası və musiqisinin formalaşmasında mühüm yer tutub, klassik ədəbiyyata ciddi təsir göstərib. Bu mənada Aşura sıradan bir dini-tarixi hadisə deyil, müsəlman dünyasında, xüsusən də Azərbaycan tarixində müstəsna yeri olan fenomendir.
Azərbaycan tarixində Məhərrəm ayının və Aşuranın xüsusi yeri var. Azərbaycan xalqı hər il bu hadisələrin ildönümünü yüksək səviyyədə keçirir. Bu ənənələr Azərbaycanda xalqımız tərəfindən daim yaşadılıb. Xalqımızın tarixində, ədəbiyyatında, mədəniyyətində bu hadisələr xüsusi qeyd edilib”, - C.Məmmədov əlavə edib.
Deputat xatırladıb ki, İmam Hüseynin (ə) mübarizəsi ədalətin bərpası üçün idi:
“Burada bizim alacağımız bir çox dərslər var. Bu, Vətən, haqq, ədalət uğrunda canından belə keçməyə hazır olmaq mesajıdır.
Biz o dövrdə baş verən hadisələrdən nəticə çıxararaq, Vətənimizin, torpaqlarımızın bütövlüyü və müstəqilliyi uğrunda hər an canımızdan keçməyə hazır olmalıyıq. Necə ki, bunu Vətən müharibəsi zamanı etdik.
Bu gün ayrı-ayrı ölkələrdə bu mərasimlər baş yarmaq və qan çıxarmaqla qeyd edilir. Azərbaycanda isə bununla bağlı nümunəvi modeli ortaya qoyularaq, hər il qanvermə aksiyaları keçirilir. Yəni insanlar qan çıxarmaq əvəzinə, qan verməklə bu aksiyalarda iştirak edirlər.
İnanırıq ki, hər il olduğu kimi, bu il də insanlarımız Məhərrəmliyi və Aşura mərasimlərini onun həqiqi ruhuna uyğun keçirəcəklər”.
15-07-2024, 15:34
Bir həftədə 147 mina aşkarlanıb
Azad olunan ərazilərdə iyulun 8-14-də 68 tank əleyhinə mina, 79 piyada əleyhinə mina, 397 partlamamış hərbi sursat (PHS) aşkarlanıb və zərərsizləşdirilib.
Bu barədə Azərbaycan Minatəmizləmə Agentliyinin (ANAMA) azad edilmiş ərazilərdə həyata keçirilən humanitar minatəmizləmə əməliyyatları ilə bağlı həftəlik məlumatında qeyd olunub.
Bildirilib ki, 1284,4 hektar ərazi minalardan təmizlənib.
Qeyd edək ki, minatəmizləmə əməliyyatlarını ANAMA, Müdafiə Nazirliyi, Fövqəladə Hallar Nazirliyi (FHN) və Dövlət Sərhəd Xidməti (DSX) həyata keçirib.
15-07-2024, 15:30
Erməni-amerikan birgə hərbi təlimi başladı
İyulun 15-də Ermənistan Müdafiə Nazirliyinin Vazgen Sarkisyan adına Hərbi Akademiyasında erməni-amerikan birgə hərbi təlimi elan edilib.
Təlimin açılış mərasimində erməni müdafiə naziri Suren Papikyan, ABŞ-ın İrəvandakı səfiri Kristina Kuin və başqaları iştirak ediblər.
Müdafiə naziri Suren Papikyan və ABŞ səfiri Kristina Kuin təlimlərdə iştirak edən hərbçilərə müraciət ediblər.
Açılış mərasimi təntənəli yürüşlə başa çatıb.
Xatırladaq ki, beynəlxalq sülhməramlı missiyalarda iştiraka hazırlıq çərçivəsində iyulun 15-24-də Ermənistanda birgə erməni-amerikan təlimi keçiriləcək.
Təlimdə Ermənistan Silahlı Qüvvələrinin sülhməramlı briqadasının, ABŞ-ın Avropa və Afrikadakı quru qüvvələrinin və Kanzas Milli Qvardiyasının əsgərləri iştirak edir.
Təlim sülhməramlı missiyalar zamanı münaqişə tərəfləri arasında sabitləşdirmə əməliyyatlarını əhatə edir.
Təlimin məqsədi sülhməramlı əməliyyatlar çərçivəsində beynəlxalq missiyalarda iştirak edən bölmələrin qarşılıqlı fəaliyyət səviyyəsini yüksəltmək, idarəetmə və taktiki rabitə üzrə qabaqcıl təcrübələri mübadilə etmək, o cümlədən erməni bölməsinin hazırlığını artırmaqdır.
15-07-2024, 15:19
XİN Türkiyəni təbrik etdi
Azərbaycan Xarici İlər Nazirliyi (XİN) 15 iyul - Demokratiya və Milli Birlik Günü münasibətilə Türkiyəni təbrik edib.
Bu barədə Azərbaycan XİN-in "X" hesabında paylaşım edilib.
"Qardaş Türkiyənin demokratik təsisatlarını və konstitusiya quruluşunu hədəf alan çevriliş cəhdinin qarşısını alarkən canlarından keçən şəhidlərimizin əziz xatirəsini hörmət və minnətdarlıqla anırıq. 15 iyul - Demokratiya və Milli Birlik Gününüz mübarək!",-məlumatda qeyd edilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!