11-12-2024, 17:43
Ermənistanda daha bir qalmaqallı istefa
Ermənistan parlamentinin deputatı istefa verib.
Hakim “Mülki müqavilə” partiyasının deputatı Davit Aruşanyan deputat mandatından imtina edib.
Bu barədə məlumatı Milli Assambleyadan təsdiqləyiblər.
11-12-2024, 16:38
Qadının ölümünə görə həkimə cinayət işi açıldı
Bakıda qadının ölümünə səbəb olmaqda təqsirləndirilən həkim-anestezioloq Babək Mahmudova cinayət işi başlanılıb.
29 yaşlı Aybəniz Almuradova bu ilin iyunun 11-də qadın liposaksiya əməliyyatı üçün “Reo-Med” klinikasına müraciət edib və iyulun 2-də ölüb.
Onun ölümü ilə bağlı Binəqədi rayon Prokurorluğunda araşdırmalara başlanılıb. Araşdırmaların nəticəsində həkim-anestezioloq Babək Mahmudova Cinayət Məcəlləsinin 124.1-ci (ehtiyatsızlıqdan adam öldürmə) maddəsi ilə ittiham verilib.
Babək Mahmudov barəsində aparılan cinayət işinin istintaqı başa çatıb və baxılması üçün Binəqədi rayon Məhkəməsinə göndərilib.
11-12-2024, 16:22
Suriya hakimiyyətinə lazımi kəşfiyyat məlumatları vermişdik - Xamenei
İran İslam Respublikasının ali rəhbəri Ayətullah Xamenei Tehranın Suriyaya kömək edib-etmədiyi məsələsindən danışıb.
İmam Xomeyni Hüseyniyyəsində müxtəlif təbəqələrdən olan vətəndaşla görüşdə Xamanei deyib:
“Biz Suriya hökumətinə kömək etdik, lakin Suriya hökumətinə kömək etməmişdən əvvəl Suriya hökuməti bizə kritik anda həyati yardım göstərdi. Çoxu bunu bilmir. Hamının Səddam üçün və bizə qarşı çalışdığı bir vaxtda Suriya hökuməti gəlib bizim xeyrimizə və Səddamın əleyhinə böyük və qətiyyətli addım atdı. Aralıq dənizinə, oradan da Avropaya neft daşıyan, pulu Səddamın cibinə gedən neft borusunu kəsdi. Suriya hökuməti özü bu neft tranzitindən faydalanacaq və pul alacaqdı. Lakin o, bu puldan imtina etdi. Təbii ki, İslam Respublikası bu xidməti mükafatsız qoymadı. Bir neçə ay əvvəl Suriya hakimiyyətinə lazımi xəbərdarlıq və kəşfiyyat məlumatları vermişdik. Bilmirəm həmin məlumatlar yüksək ünvanına çatdı, ya çatmadı. Amma bütün bunların ola biləcəyini qabaqcadan demişdik!”.
Ayətullah Suriyadakı hadisələrdən dərs çıxarmaq lazım olduğunu vurğulayıb.
“Düşmənə etinasız yanaşmaq olmaz. Düşməni kiçik hesab etmək olmaz, düşmənin təbəssümünə də güvənmək olmaz, çünki düşmən bəzən təbəssümlə danışır, ancaq kürəyində xəncərlə hücuma keçmək üçün fürsət gözləyir”, - deyə o bildirib.
Ayətullah Xamenei çıxışının sonunda İran xalqını hazırlıqlı olmağa çağıraraq, bölgədə İsrailin və Qərbin əl-qlunun kəsiləcəyini vurlayıb..
11-12-2024, 16:04
Ceyhun Bayramovla Hakan Fidan Suriyanı müzakirə etdi
Bu gün Azərbaycan xarici işlər naziri Ceyhun Bayramov ilə Türkiyə xarici işlər naziri Hakan Fidan arasında telefon danışığı baş tutub.
XİN-dən verilən xəbərə görə, telefon danışığı zamanı Azərbaycan-Türkiyə müttəfiqliyindən irəli gələn məsələlər, post-münaqişə dövründə bölgədə vəziyyət, Yaxın Şərqdə, xüsusilə Suriyada mövcud vəziyyət, habelə digər regional və beynəlxalq təhlükəsizlik məsələləri müzakirə olunub.
Tərəflər ATƏT-in Nazirlər Şurasının Maltada keçirilən 31-ci iclası çərçivəsində aparılan danışıqlar və müzakirələr ətrafında fikir mübadiləsi aparıblar.
Nazir Ceyhun Bayramov təcrübəli türk diplomatı olan Feridun Sinirlioğlunun ATƏT Nazirlər Şurasının 31-ci iclası çərçivəsində Təşkilatın baş katibi vəzifəsinə təyinatı münasibətilə Türkiyə tərəfini təbrik edib, bu böyük nailiyyətin tərəfimizdən böyük sevinclə qarşılandığını diqqətə çatdırıb. ATƏT-in baş katibi Sinirlioğluna məsuliyyətli fəaliyyətində uğurlar arzulanıb.
Telefon danışığı çərçivəsində tərəflər, həmçinin regional məsələlər, Suriyada son vəziyyəti ətraflı müzakirə ediblər.
Azərbaycanın Suriyanın ərazi bütövlüyü və suverenliyinə dəstəyi, habelə yaranmış böhranlı vəziyyətin tezliklə Suriya xalqının maraq və iradəsinə əsaslanan həllini tapmasına dair ümidvarlıq ifadə olunub.
Telefon danışığı zamanı, həmçinin qarşılıqlı maraq doğuran digər ikitərəfli və çoxtərəfli məsələlər ətrafında fikir mübadiləsi aparılıb.
11-12-2024, 15:50
Məşhur müğənninin 3 mərtəbəli binası çökdü - FOTO
Ötən gün axşam saatlarında Türkiyənin İstanbul şəhərində 3 mərtəbəli binada qismən çökmə baş verib.
Bu barədə DHA məlumat yayıb.
Balat məhəlləsində baş verən çökmədən sonra ətrafdakı insanlar əraziyə polis və təcili yardım çağırıb.
Sahibsiz binanın yanındakı üç binanın sakinləri ehtiyat tədbiri olaraq təxliyyə edilib. Binanın yerləşdiyi yolun bir hissəsi də uçub.
Türkiyə mətbuatı yazıb ki, çökən bina məşhur müğənni Gökhan Özoğuza (Athena) məxsusdur.
11-12-2024, 15:35
Əsəd Suriyadan necə qaçıb? - Şok detallar AÇIQLANDI
Suriya Prezidenti Bəşər Əsədin ölkəsindən necə qaçması ilə bağlı bir sıra detallar açıqlanıb.
Bu barədə "Bloomberg" informasiya agentliyi anonim mənbələrə istinadən yazıb.
Nəşr yazır ki, Rusiya kəşfiyyatı Əsədi müxalifətə məğlub olduğuna inandırıb. Onun ölkədən qaçması Suriyadakı Rusiya aviabazasından təşkil edib. Bildirilir ki, Əsəd Rusiya kəşfiyyatçılarının köməyi ilə ölkədən qaça bilib.
Əsədin təyyarəsinin izlənilməməsi üçün transponder söndürülüb. Mənbələr deyir ki, Əsədə ölkəni tərk etmək üçün təhlükəsiz yol təklif edilib.
Rusiya xarici işlər nazirinin müavini Ryabkov eks-prezidentin hazırda təhlükəsiz yerdə olduğunu açıqlayıb.
Xatırladaq ki, noyabrın sonunda Suriyada hökumət əleyhinə qüvvələrin hücumu başlayıb. Dekabrın 8-nə keçən gecə onlar paytaxt Dəməşqə daxil olublar. Bəşər Əsəd prezident postunu tərk edib və Suriyadan qaçıb.
Rusiya Xarici İşlər Nazirliyinin məlumatına görə, Əsəd Suriya Ərəb Respublikası ərazisində silahlı münaqişənin bir sıra iştirakçıları ilə danışıqlardan sonra prezident postunu tərk etmək qərarına gəlib. Moskva danışıqlarda iştirak etməyib.
Suriyanın Moskvadakı səfiri Bəşər Cəfəri Əsədin Rusiyaya getməsini biabırçı qaçış adlandırıb. O, həmçinin prezidentin devrilməsinin səbəbləri kimi korrupsiyaya uğramış sistemin qeyri-populyarlığını, cəmiyyətdə və orduda dəstəyin olmamassı sadalayıb. Üsyançılar Suriyanın keçmiş liderinin tutulmasına görə 10 milyon dollar mükafat təklif ediblər.
Onu da qeyd edək ki, Rusiya hərbçiləri Suriyanın qərbindəki Tartusdakı Xmeymim aviabazasında və logistika mərkəzində yerləşdirilib. Moskva ilə Dəməşq arasında 49 il müddətinə imzalanan müvafiq razılaşmalar 2017-ci ildə əldə olunub.
10-12-2024, 21:50
“Bəzən güclü qızlar da məğlub olur…”
REKVİEM
Həsənli Təhminə Vəkil qızı 26 yaşında, ömrünün gənclik illərində bizimlə vidalaşdı. İxtisasca tərcüməçi olan Təhminə 620 balla qəbul olunduğu Qafqaz Universitetinin bakalavr pilləsini qırmızı diplomla bitirib. Aspiranturada təhsili üçün Moskvaya yollanır, amma gözlənilməz qan xərçəngi onun arzusunu yarımçıq qoyur. Maariflənmək həvəsi yolunu bu dəfə Bakı Slavyan Universitetində magistratura pilləsinə salır.
İlk dəfə 2021-ci ildə, hələ 23 yaşında yaşıdlarından seçilən, şən, savadlı, qayğıkeş Təhminəyə “kəskin leykoz xəstəliyi” diaqnozu qoyulur. Gənc qız bu xəbər qarşısında o qədər güclü dayanır ki, sadəcə özünü yox, bütün sevənlərini sağalacağına inandırır. Müalicələr alır, vəziyyəti nisbətən yaxşılaşanda sevib-seçdiyi ilə 2023-cü ildə ailə həyatı qurur. Həyatının növbəti xoşbəxt illərinin başlanğıcına hazırlaşdığı zamanda 2024-cü ilin may ayı Təhminə üçün yeni çətinliklər gətirir. Xəstəlik yenidən baş qaldırır, ailəsi onun üçün ümid qapısı taparaq Türkiyənin Ankara şəhərinə üz tutur.Təhminə ailənin ilk övladı və yeganə qızıdır. Böyük qardaşı Təbriz, daha sonra kiçik qardaşı Təhmasib sevimli bacıları üçün donor olurlar. Təhminə üçün xeyli mübarizə aparılır, müxtəlif müalicə üsullarına cəhd edilir. Onu həyatda tutmağı özünə borc bilən ailə mübarizədə tək deyildi, hamının sevimlisi olan Təhminənin qohumları, yoldaşları, onu yaxından tanımasa da öz köməyini, qayğısını əsirgəməyən Azərbaycan xalqı həm maddi, həm mənəvi dəstəyini əsirgəməyib. Amma bütün səylərə baxmayaraq, dekabrın altısında Təhminəmizin bədəni ağır müalicəyə tab gətirə bilmir, o bizimlə vidalaşır…
Ailəsi, onu tanıyanların hamısı Təhminəni çox mehriban, pozitiv, səmimi, hamının könlündə özünə əziz yer tapan biri kimi qiymətləndirir. Getdiyi hər yerdə, hər işdə seçilib. Həyat eşqi ilə yaşayan qız uşaq yaşlarından kitab sevgisi ilə tanınıb. O, maariflənməyi hamıya məsləhət görüb, öz bildiklərini, oxuduqlarını ətrafı, tələbələri ilə həvəslə paylaşıb, kitablarını dəfələrlə xeyriyyə cəmiyyətlərinə bağışlayıb, son gününə qədər özünü yaxşı hiss etdiyi hər an yenə yazıb, oxuyub. Bir an belə başının üstündən ayrılmayan valideynlərinə bildirib ki, həkimlərin dediklərinə baxmasınlar, o sağalacaq, yazdığı kitabı tamamlayacaq, qarşıda onu çox gözəl günlər gözləyir. Qalib olacağından tərəddüd etdiyi heç vaxt hiss olunmayıb. Ondan sevgisini əsirgəməyən ailəsinə, qohumlarına, yoldaşlarına həmişə minnətdar olub, çox şanslı olduğunu dilə gətirib. Sağalacağını, bütün xəstələrə motivasiya mənbəyi olacağını xəyal edib.
Qeyd edək ki, vaxtilə Təhminə rəfiqəsi Gülnurəyə eyni xəstəliklə mübarizədə dəstək olub, amansız xəstəlik o gənc qıza da qıyıb. Güclü mübarizəsində məğlub olan Təhminənin gedişi bütün sevənləri üçün sarsıdıcıdır. Gənc qızımız doğmaların, tanıyanların qəlbində həmişə yaşayacaq. Ailəsinə, sevənlərinə səbir diləyirik…
Aysu Həsənli,
BDU Jurnalistika fakültəsinin 2-ci kurs tələbəsi,
Təhminənin doğmalarından biri
10-12-2024, 21:15
Azərbaycanlı tələbələr Romada toplanıblar
Azərbaycan Respublikasının İtaliyadakı Səfirliyi, Azərbaycan Respublikası Gənclər Fondunun dəstəyi, Azərbaycanlı Tələbələr və Məzunlar Platforması (ASAP) və Azərbaycan İtaliya Məzunlar Assosiasiyasının (AZİAA) birgə təşkilatçılığı iləİtaliyanın paytaxtı Roma şəhərində azərbaycanlı tələbə vəməzunlarla ilk görüş keçirilib.
Görüş zamanı Ümummilli Lider Heydər Əliyevin əziz xatirəsi yad olunaraq, həyatı və zəngin dövlətçilik irsi ilə bağlı çıxışlar edilib.
Prezident Administrasiyasının Gənclər siyasəti və idman məsələləri şöbəsinin sektor müdiri Tural Məmmədov Ulu Öndər Heydər Əliyevin əsasını qoyduğu xaricdə təhsil ənənəsinin Prezident İlham Əliyev tərəfindən uğurla davam etdirilməsi vəbu siyasətin ölkənin qlobal arenadakı mövqeyinin gücləndirilməsindəki müstəsna rolundan danışıb. Vurğulanıb ki, gənclərin sosial, sağlamlıq və təhsillə bağlı problemlərinin həllinə yönəldilən, onların öz qabiliyyətlərinin inkişaf etdirmələrinə kömək edən fərman və sərəncamlar, dövlət proqramları dövlətin gənclərə olan qayğısının təcəssümüdür. Müasir Azərbaycanın varlığı bilavasitə Heydər Əliyevin ideallarının və amalının nəticəsidir.
Azərbaycan Respublikası Gənclər Fondunun icraçı direktoru vəzifəsini icra edən Qədir Xəlilov çıxış edərək bildirib ki, Ulu Öndər Heydər Əliyev cəmiyyətin bütün sahələrində olduğu kimi gənclər siyasətinin uğurla həyata keçirilməsi məqsədi ilə gənclər sahəsinin zəruri qanunvericilik bazasının formalaşdırılmasını təmin etdi. O, həmçinin, Gənclər Fondu tərəfindən gənclər üçün yaradılan şərait, onların innovativ ideyalarının reallaşdırılması, beynəlxalq layihələrdə iştirakının təmin edilməsi və xaricdətəhsil alan gənclərin dəstəklənməsi istiqamətində görülən işlərdən danışıb.
Daha sonra ASAP-ın icraçı direktoru Sevda Mansurova Ulu Öndər Heydər Əliyevin gənclərə göstərdiyi diqqət və qayğıdan danışıb. Eyni zamanda, xaricdə təhsil alan azərbaycanlı gənclərin həmrəyliyinin önəmini vurğulayaraq, ASAP-ın əsas fəaliyyət istiqamətləri, missiyası, məqsədləri, gənclərin beynəlxalq arenada təmsilçiliyi ilə bağlı görülən işlər vəİtaliyada nümayəndəliyin qurulması ilə bağlı təqdimat edib.
Tədbirin şəbəkələşmə hissəsində İtaliyada fəaliyyət göstərən təşkilatlar, universitetlər və qurumlarla əməkdaşlıq, Azərbaycanın İtaliyadakı səfirliyi ilə birgə azərbaycanlı gənclər arasında fəallığın və iştirakın artırılması, İtaliyada yaşayan azərbaycanlı gənclərin maraq və ehtiyaclarına uyğun sahələrin müəyyən edilməsi, gənclərin şəxsi, eləcə də karyera inkişafına yönələn tədbir və layihələr haqqında fikir mübadiləsi aparılaraq, bu istiqamətdə təkliflər dinlənilib.
10-12-2024, 20:50
Türkiyə ordusu Suriyaya girdi
Türkiyə kəşfiyyatı (MİT) Suriyada terrorçulara qarşı əməliyyata keçirib.
MİT PKK terrorçularının Suriyadakı vəziyyətdən sui-istifadə etmək istədiyini müəyyənləşdirib. Bundan sonra əməliyyata başlanılıb. Nəticədə raket və ağır silahlarla dolu 12 yük maşını, iki tank və iki sursat anbarı məhv edilib.
Məlumata görə, terrorçular həmin silahlardan Türkiyə Silahlı Qüvvələrinə qarşı istifadə etmək istəyib.
Qeyd olunur ki, regionda terrorçulara qarşı mübarizə davam edəcək.
10-12-2024, 20:45
Nobel Sülh Mükafatı sahiblərinə verildi
2024-cü il Nobel Sülh Mükafatının təqdimetmə mərasimi keçirilib.
Mərasim Osloda baş tutub.
Qeyd edək ki, bu il Xirosima və Naqasaki partlayışlarından sağ çıxanları birləşdirən Yaponiyanın "Nihon Hidankyo" təşkilatına Nobel Sülh mükafatı verilib.
Mərasim ənənəvi olaraq Alfred Nobelin vəfatının ildönümündə - dekabrın 10-da Norveç kral ailəsi və Norveç hökuməti üzvlərinin iştirakı ilə bələdiyyə binasında keçirilib.
Norveç Nobel Komitəsinin sədri Yorgen Vatne Fridnes "Nihon Hidankyo"nun üç nümayəndəsinə Alfred Nobelin qızıl medalı təqdim edib. Mükafat "nüvə silahlarından azad bir dünyaya nail olmaq səylərinə və nüvə silahının bir daha heç vaxt istifadə edilməməsinin sübutunu nümayiş etdirməsinə" görə verilib.
“Mükafat laureatlarının işi nüvə silahı təhlükəsinin azaldılmasına öz töhfəsini verdi. Bu cür sülhməramlı fəaliyyətlərə görə ümumilikdə və ya qismən 13 sülh mükafatı verilib. Norveç Nobel Komitəsi də bu fürsətdən istifadə edərək nüvə silahına qarşı xəbərdarlıq edib. Bu il bu xəbərdarlıq həmişəkindən daha vacibdir”, - deyə Yorgen Vatne Fridnes bildirib.
Mərasimdə Xirosima və Naqasaki bombardmanlarından sağ çıxan 17 yapon iştirak edib. Təşkilatın 92 yaşlı həmsədri Terumi Tanaka nüvə silahlarının aradan qaldırılması üçün lazımi addımların birgə müəyyən edilməsinə çağırıb. 1956-cı ildə yaradılan təşkilat bu illər ərzində müntəzəm olaraq BMT-yə və sülh konfranslarına nüvə silahından tam imtinanı müdafiə edən müxtəlif qətnamə və müraciətlər göndərib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!