25-02-2025, 16:31
[b]Ukrayna üçün ağır gün: BMT-də "səsvermə savaşı"[/b]
Ötən gün Birləşmiş Millətlər Təşkilatının (BMT) Baş Assambleyasında Ukrayna ilə bağlı gərgin müzakirələr aparılıb.
ABŞ-nin yeni administrasiyası gözlənilməz addım ataraq Avropa müttəfiqləri ilə eyni mövqedə durmayıb.
Vaşinqton Çinlə Rusiya tərəfindən dəstəklənən neytral qətnaməni irəli sürüb. Bu qətnamə BMT Təhlükəsizlik Şurasında qəbul edilsə də, Baş Assambley Avropa ölkələrinin düzəlişləri ilə sənədin alternativ versiyasını qəbul edib. Həmin düzəlişlərdə baş verənlərə görə məsuliyyətin Rusiyanın üzərinə qoyulması tələb olunurdu. ABŞ isə bu dəyişikliklərə qarşı çıxmayaraq səsvermədən çəkinib.
Baş Assambleyada Ukrayna və Avropa ölkələri tərəfindən təqdim edilən və Qərbin standart mövqeyini əks etdirən qətnaməni qəbul edib.
BMT-də Ukrayna münaqişəsi ilə bağlı eyni gündə iki qətnamə müzakirəyə çıxarılıb. Birinci qətnamə Ukrayna tərəfindən irəli sürülüb və Avropa ölkələri tərəfindən dəstəklənib. Sənəddə Rusiyaya qarşı sərt ifadələr yer alıb və Ukraynada ədalətli və davamlı sülhün təmin olunmasına çağırış edilib.
Ukrayna qətnaməsi üç səhifədən ibarət olub və burada Rusiyanın Ukraynaya genişmiqyaslı hərbi müdaxiləsinin üç ildir davam etdiyi və bunun təkcə Ukrayna üçün deyil, digər regionlar və qlobal sabitlik üçün də dağıdıcı nəticələr doğurduğu vurğulanıb.
ABŞ-ın nümayəndəsi Doroti Şi isə Ukrayna qətnaməsini "söz müharibəsi" kimi qiymətləndirərək onun səsvermədən çıxarılmasını istəyib. ABŞ öz növbəsində "sülhə aparan yol" adlı alternativ qətnamə təqdim edib. Sənəddə münaqişənin tez bir zamanda dayandırılmasına və Ukrayna ilə Rusiya arasında davamlı sülhə çağırış edilib. Avropa İttifaqı ölkələri bu qətnaməyə düzəlişlər təqdim edərək, Rusiyanın məsuliyyətini vurğulamağa çalışıblar.
BMT Baş Assambleyasında Ukrayna tərəfindən təqdim edilən qətnamə 93 lehinə, 18 əleyhinə və 65 bitərəf səslə qəbul olunub. Qətnaməyə qarşı çıxan ölkələr arasında ABŞ, Rusiya, İsrail, Macarıstan və Şimali Koreya da olub.
ABŞ-ın təklif etdiyi qətnamə də qəbul edilib, lakin Avropa ölkələrinin düzəlişlərindən sonra ilkin versiyasından fərqli olub. Səsvermə zamanı 93 ölkə lehinə, 8 ölkə əleyhinə səs verib, 73 ölkə isə bitərəf qalıb. Avropa düzəlişləri səbəbindən ABŞ öz sənədinə səs verməkdən çəkinib.
Təhlükəsizlik Şurasında isə fərqli bir vəziyyət yaranıb. ABŞ qətnaməsinin ilkin versiyası qəbul edilib və Rusiya, Çin, Pakistan, Əlcəzair, Panama və digər ölkələrin dəstəyini qazanıb. Böyük Britaniya, Fransa, Yunanıstan və Danimarka isə bitərəf qalıb. Bu, 2022-ci ildən bəri Ukrayna məsələsində ABŞ, Rusiya və Çinin ilk dəfə konsensusa gəlməsi olub.
Doroti Şi qətnamənin "sülhə aparan ilk addım" olduğunu vurğulayıb. O bildirib ki, bu sənəd BMT Nizamnaməsinin ruhunu əks etdirir və müharibənin dayandırılmasına kömək edə bilər.
Təhlükəsizlik Şurasında müzakirələr gərgin keçib. Böyük Britaniya, Fransa və digər Avropa ölkələri səsverməni fevralın 25-nə qədər təxirə salmağa çalışsalar da, ABŞ buna qarşı çıxıb və nəticədə təklif rədd edilib.
Böyük Britaniya, Fransa, Yunanıstan və Danimarka tərəfindən təqdim olunan və Rusiyanın təcavüzkar adlandırılmasını nəzərdə tutan düzəlişlər ya kifayət qədər səs toplamayıb, ya da Rusiya tərəfindən bloklanıb. Həmçinin, Rusiyanın münaqişəni "Ukrayna ətrafında münaqişə" adlandırmaq və onun "köklü səbəblərinin" araşdırılmasını tələb edən düzəlişləri də qəbul edilməyib.
Fransa və Böyük Britaniya qətnaməni veto etməsə də, səsvermədə bitərəf qalıb və nəticədə sənəd qəbul edilib.
Böyük Britaniyanın BMT-dəki daimi nümayəndəsi Barbara Vudvord bildirib ki, "ədalətli və BMT Nizamnaməsinə uyğun bir sülh" olmadan münaqişənin dayandırılması mümkün deyil. O vurğulayıb ki, "Rusiya ilə Ukrayna eyni tutulmamalıdır və münaqişənin köklü səbəbləri müəyyən edilməlidir".
Rusiyanın BMT-dəki daimi nümayəndəsi Vasili Nebenziya isə Avropa ölkələrini "hərbi ritorikanı gücləndirməkdə" ittiham edib və qəbul edilən qətnaməni "sülhə yönələn ilk real addım" kimi qiymətləndirib. O, "Avropa ölkələrinin münaqişənin həllində deyil, onun uzadılmasında maraqlı olduğunu" iddia edib.
Çinin BMT-dəki daimi nümayəndəsi Fu Tsun isə qətnaməni dəstəklədiklərini və beynəlxalq ictimaiyyəti Ukrayna məsələsində dialoqun bərpasına töhfə verməyə çağırdıqlarını bildirib.
Doroti Şi isə qəbul edilən qətnamənin BMT Təhlükəsizlik Şurasının üç il ərzində Ukrayna ilə bağlı qəbul etdiyi ilk sənəd olduğunu vurğulayıb və onun "sülhə aparan yol" açacağına ümid etdiyini bildirib.
25-02-2025, 15:50
Qar yağdı, qiymətlər artdı
Son günlər ölkə ərazisində müşahidə olunan şaxtalı və qarlı hava şəraiti bazarlarda bəzi məhsulların qiymətinə təsirsiz ötüşməyib.
Xüsusilə meyvə-tərəvəz və süd məhsullarında qiymət artımı müşahidə edilir.
Satıcıların sözlərinə görə, şaxtalı hava səbəbindən məhsulların daşınması çətinləşib, bəzi kənd yollarında hərəkət məhdudlaşdığından təchizat gecikir.
Bakı bazarlarında satıcılar bildirirlər ki, məhsulların bir hissəsi şəhərətrafı ərazilərdən, digərləri isə bölgələrdən gətirilir. Ancaq son günlər yolların buz bağlaması və nəqliyyatın hərəkətinin məhdudlaşması səbəbindən təchizatda problemlər yaranıb. Bu da qiymət artımına gətirib çıxarıb.
Xüsusilə kartof, soğan, pomidor və göyərti kimi məhsulların qiymətində bahalaşma hiss olunur.
Məsələ ilə bağlı saytımıza açıqlamasında iqtisadçı ekspert Emin Qəribli də bildirib ki, qarlı havanın davam etməsi bəzi meyvələrin bazarlara gətirilməsində problemlər yaradıb.
"Bu da müvəqqəti qiymətlərin artmasına gətirib çıxarır. Lakin, burada bəzi işbazların da vəziyyətdən sui-istifadə etməsinə səbəb ola bilər. Alıcılar bilməlidir ki, qiymət artımı müvəqqətidir", - o deyib.
Alıcılar bahalaşmadan narazılıq edirlər. Onların sözlərinə görə, hava şəraitinin müvəqqəti olduğunu nəzərə alsaq, qiymətlərin süni şəkildə artırılmasının qarşısı alınmalıdır.
25-02-2025, 14:49
Lavrov Tehrandadır
Rusiyanın xarici işlər naziri Sergey Lavrov İranın xarici işlər naziri Abbas Arakçinin dəvəti ilə Tehrana səfər edib.
Sergey Lavrov Tehranda rəsmi danışıqlar aparacaq.
Lavrovun iranlı həmkarı Abbas Arakçi ilə görüşəcəyi bildirilib.
Nazirlərin Tehran-Moskva münasibətlərini müzakirə edəcəyi qeyd olunub və əlavə edilib ki, “danışıqlar zamanı enerji və nəqliyyat sahələrində əsas birgə layihələrin həyata keçirilməsi kontekstində qarşılıqlı faydalı ticari-iqtisadi əməkdaşlığın daha da inkişaf etdirilməsi xüsusi vurğulanacaq.
Məlumata görə, iki nazir həmçinin Suriya, Cənubi Qafqaz, Əfqanıstan, Yəmən və Körfəzdəki vəziyyət, Fələstin və Xəzər məsələləri, İranın nüvə proqramı üzrə Birgə Hərtərəfli Fəaliyyət Planı ətrafında vəziyyət də daxil olmaqla bir sıra aktual beynəlxalq məsələlər ətrafında fikir mübadiləsi aparacaqlar.
Sergey Lavrov fevralın 23-24-də Ankaraya gedib və danışıqlar aparıb.
Ukrayna müharibəsinin 3-cü ildönümündə Ankaraya səfər edən Lavrov Türkiyə prezidenti Rəcəb Tayyib Ərdoğan və xarici işlər naziri Hakan Fidanla görüşüb.
25-02-2025, 14:42
Azərbaycanda su tarifləri xərcləri tam qarşılamır - AÇIQLAMA
Gələcəkdə Azərbaycanda suyun istifadəsi ilə bağlı fərqli tarif modellərinin tətbiqi istisna edilmir.
Bunu Azərbaycan Dövlət Su Ehtiyatları Agentliyinin (ADSEA) İri Şəhərlərin Birləşmiş Su Təchizatı Xidmətinin İdarə Heyətinin sədrinin müşaviri Aydın Abbasov jurnalistlərə açıqlamasında bildirib.
"Hazırda Azərbaycanda su tarifləri Xidmətin faktiki xərclərini tam qarşılamır. Bu da su təchizatı sahəsində sürətli inkişafı çətinləşdirir. Bu səbəbdən tarif sisteminin diferensiallaşdırılması məsələsi gündəmə gələ bilər", - A.Abbasov qeyd edib.
Onun sözlərinə görə, hazırda bu istiqamətdə konkret təkliflər hələ ki, müzakirə olunmur.
25-02-2025, 14:33
Çökən yolla bağlı daha bir açıqlama: "Təbii qəza hesab olunur"
Ötən gün Bakının Nizami rayonunda yolun bir hissəsi çöküb. Azərbaycan Avtomobil Yolları Dövlət Agentliyi (AAYDA) bildirib ki, hadisəyə səbəb prospektin altından keçən su borusunda qəzanın baş verməsi olub.
Açıqlamada deyilir ki, Heydər Əliyev prospektinin "Koroğlu" metro stansiyası istiqamətində olan əsas yol üzrə hərəkət müvəqqəti məhdudlaşdırılaraq köməkçi yola yönləndirilib.
Azərbaycan Dövlət Su Ehtiyatları Agentliyinin (ADSEA) İri Şəhərlərin Birləşmiş Su Təchizatı Xidmətinin mətbuat katibi Ceyhun Musaoğlu da məsələyə münasibət bildirib.
Ceyhun Musaoğlu qeyd edib ki, su borusunda baş verən qəzanın dəqiq səbəbini müəyyənləşdirmək çətindir.
O deyib ki, su borusuna kənar müdaxilə qeydə alınmayıb və bu, təbii qəza hesab olunur: "Bu, müxtəlif amillərlə bağlı ola bilər. Havaların şaxtalı keçməsi və temperatur dəyişiklikləri boruya təsir edir. Ümumilikdə Bakıda və regionlarda bu kimi qəzalar baş verə bilər və onlar operativ şəkildə aradan qaldırılır".
C. Musaoğlu qeyd edib ki, Heydər Əliyev prospektində yeraltı su borusunda baş verən qəza aradan qaldırılıb: “Hazırda həmin ərazidə asfaltlama işləri yekunlaşmaq üzrədir və fasilə yaranan ərazilərə suyun verilməsinə başlanılıb".
25-02-2025, 14:09
Əfv Komissiyasının növbəti iclasının vaxtı məlum oldu
Prezident yanında Əfv Məsələləri Komissiyasının növbəti iclasının vaxtı məlum olub.
Bu barədə Komissiyanın üzvü, “Konstitusiya” Araşdırmalar Fondunun rəhbəri Əliməmməd Nuriyev məlumat verib.
O bildirib ki, iclasın fevralın 27-də keçirilməsi planlaşdırılır.
Qeyd edək ki, indiyədək Azərbaycanda 70 əfv sərəncamı və 12 amnistiya aktı imzalanıb. Bu humanist addımlar nəticəsində minlərlə şəxs azadlığa qovuşub.
Sonuncu əfv sərəncamı isə ötən ilin may ayında imzalanıb. Sərəcamla 154 nəfər əfv edilib, onlardan 63-ü cəzasının çəkilməmiş hissəsindən azad edilib, 52 nəfərin cəzasının çəkilməmiş hissəsi yarıyadək azaldılıb.
71-ci əfv sərəncamının neçə nəfəri əhatə edəcəyi hələlik məlum deyil.
25-02-2025, 14:03
Ukrayna Ali Radası Zelenskiyə dəstək bəyanatını təsdiqlədi
Ukrayna Ali Radası “Rusiya Federasiyasının təcavüzü kontekstində Ukraynada demokratiyaya dəstək haqqında Bəyanat”ı dəstəkləyib.
Bu barədə Telegram-da Ukraynanın xalq deputatı Yaroslav Jeleznyak bildirib.
"Ali Rada bu gün ikinci cəhddə demokratiya haqqında qətnamənin (və Zelenskiyə və qarşıdan gələn seçkilərə dəstək) lehinə səs verdi".
Onun sözlərinə görə, sənədi Ukrayna parlamengtinin 268 xalq deputatı dəstəkləyib.
25-02-2025, 13:21
Sabahın hava proqnozu
Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.
Bu barədə Milli Hidrometeorologiya Xidmətindən məlumat verilib.
Lakin axşam bəzi yerlərdə sulu qar yağacağı ehtimalı var. Mülayim şimal-qərb küləyi əsəcək.
Havanın temperaturu gecə 0-3° şaxta, gündüz 1-3° isti olacaq. Atmosfer təzyiqi 762 mm civə sütunundan 768 mm civə sütununa yüksələcək. Nisbi rütubət gecə və gündüz 65-75 % olacaq.
Gecə və səhər bəzi yollar buz bağlayacaq.
Azərbaycanın rayonlarında havanın əsasən yağmursuz keçəcəyi, lakin səhər dağlıq ərazilərdən başlayaraq bəzi yerlərdə arabir yağıntılı olacağı, qar yağacağı gözlənilir. Ayrı-ayrı yerlərdə intensivləşəcəyi ehtimalı var. Bəzi yerlərdə arabir duman olacaq. Qərb küləyi bəzi yerlərdə arabir güclənəcək.
Havanın temperaturu gecə 1-6° şaxta, gündüz 3-7° isti, dağlarda gecə 8-13° şaxta, yüksək dağlıq ərazilərdə 18-23° şaxta, gündüz 3-8° şaxta olacaq.
Yolların buz bağlaması davam edəcək.
25-02-2025, 13:11
Dəniz Limanı "Dəmir Yolları"na birləşdirildi - FƏRMAN
Prezident İlham Əliyev “Azərbaycan Dəmir Yolları” Qapalı Səhmdar Cəmiyyətinin yenidən təşkili haqqında Fərman imzalayıb.
Fərmana əsasən “Bakı Beynəlxalq Dəniz Ticarət Limanı” Qapalı Səhmdar Cəmiyyəti “Azərbaycan Dəmir Yolları” Qapalı Səhmdar Cəmiyyətinə birləşdirilib. Cəmiyyətin ümumi yığıncağının səlahiyyətlərinin həyata keçirilməsi aşağıdakılara həvalə edilib:
Prezidentə:
- Cəmiyyətin yenidən təşkili və ləğvi;
- Cəmiyyətin icra orqanının rəhbərinin və üzvlərinin vəzifəyə təyin və vəzifədən azad edilməsi.
Azərbaycan Nəqliyyat və Kommunikasiya Holdinqinə (AZCON−a):
- Mülki Məcəlləyə uyğun olaraq ali idarəetmə orqanının müstəsna səlahiyyətinə aid edilmiş məsələlərin dövlət başçısı ilə razılaşdırmaqla həyata keçirilməsi;
- Normativ hüquqi aktlar, eləcə də Cəmiyyətin nizamnaməsi ilə ümumi yığıncağa həvalə edilən digər səlahiyyətlərin həyata keçirilməsi.
Limanın Azərbaycanın tərəfdar çıxdığı beynəlxalq müqavilələri və yerli normativ hüquqi aktlarla müəyyən edilmiş hüquqları və öhdəlikləri, habelə əmlakı Cəmiyyətə keçir.
Nazirlər Kabineti normativ hüquqi aktların təkmilləşdirilməsi ilə bağlı təkliflərini üç ay müddətində hazırlayıb Prezidentə təqdim etməli, fərmandan irəli gələn digər məsələləri həll etməli, AZCON isə Cəmiyyətin yeni nizamnaməsini və strukturunu üç ay müddətində dövlət başçısı ilə razılaşdırmaqla təsdiq etməli, fərmandan irəli gələn digər məsələləri həll etməlidir.
25-02-2025, 13:00
Pakistanın Baş naziri Bakıdan getdi
Pakistan İslam Respublikasının Baş naziri Məhəmməd Şahbaz Şərifin Azərbaycan Respublikasına dövlət səfəri fevralın 25-də başa çatıb.
Hər iki ölkənin Dövlət bayraqlarının dalğalandığı Heydər Əliyev Beynəlxalq Aeroportunda ali qonağın şərəfinə fəxri qarovul dəstəsi düzülmüşdü.
Pakistanın Baş naziri Məhəmməd Şahbaz Şərifi hava limanında Azərbaycan Respublikası Baş nazirinin birinci müavini Yaqub Eyyubov, xarici işlər nazirinin müavini Yalçın Rəfiyev və digər rəsmi şəxslər yola saldılar.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!