14-03-2025, 14:58
Dünya Azərbaycan-Ermənistan razılaşmasını ALQIŞLAYIR
Azərbaycan və Ermənistan sülh sazişi layihəsinin mətni ilə bağlı danışıqlar prosesini yekunlaşdırıb. Xarici işlər naziri Ceyhun Bayramov bildirib ki, yaxın günlərdə Ermənistan tərəfi iki açıq maddə üzrə Azərbaycan tərəfinin təkliflərini qəbul etdiyini əlaqə kanalları vasitəsilə çatdırıb.
Məlumatı Ermənistan XİN də təsdiq edib. İrəvan sülh sazişinin imzalanması üçün tarix və məkanı müzakirə etməyə hazır olduğunu bəyan edib.
Eyni zamanda, ATƏT-in köhnəlmiş və qeyri-funksional Minsk Qrupunun və aidiyyəti strukturların rəsmi şəkildə ləğv olunmasının zəruriliyi vurğulanıb.
Rəsmi Bakı sazişin imzalanması üçün Ermənistan konstitusiyasının dəyişməsinin labüd olduğunu bildirib.
Bir çox xarici dövlət rəsmləri sülh sazişi ilə bağlı açıqlamara reaksiya verməyə davam edir.
Almaniyanın xarici işlər naziri Annalenna Berbok bəyan edib ki, Berlin Azərbaycan və Ermənistanın sülh sazişinin mətni üzrə danışıqların başa çatması ilə bağlı bəyanatını alqışlayır. “Sülh sazişi ilə bağlı əldə edilən razılaşma ümidvericidir”, – deyə Berbok qeyd edib.
İran da sülh sazişi üzrə əldə olunan anlaşmanı təqdir edir. Bu barədə İran Xarici İşlər Nazirliyinin sözçüsü İsmayıl Bəqai danışıb. O, İranın Ermənistan və Azərbaycan arasında sülh sazişinin müddəalarının razılaşdırılmasını təqdir etdiyini bildirib. Nazirlik rəsmisi bu addımı Cənubi Qafqazda uzunmüddətli sabitliyin və sülhün bərqərar olması yolunda mühüm addım kimi dəyərləndirib. "Ümid edirik ki, tərəflər fikir ayrılıqlarını dialoq və diplomatiya yolu ilə həll edərək tezliklə sülh sazişini imzalayacaq və bunun nəticəsində regionda davamlı sülh və sabitlik təmin olunacaq", – Bəqai vurğulayıb.
Braziliya Xarici İşlər Nazirliyi: “Braziliya hökuməti Ermənistan və Azərbaycan hökumətlərinin ölkələr arasında sülhü bərpa edəcək və ikitərəfli münasibətləri normallaşdıracaq saziş üzrə danışıqları başa çatdırdıqlarını elan etməsini alqışlayıb. Braziliya tərəfləri davamlı və dayanıqlı sülhə aparan yol kimi diplomatiya və dialoqa üstünlük verməyə davam etməyə çağırır və bu prosesin mümkün qədər tez başa çatacağına ümid etdiyini bildirir”.
İspaniya Xarici İşlər Nazirliyi: “Azərbaycan Respublikası ilə Ermənistan Respublikası arasında əldə olunmuş razılaşma xəbərini İspaniya məmnuniyyətlə qarşılayır və ümid edir ki, bu bəyanat hər iki ölkə arasında yekun sazişin bağlanmasına gətirib çıxaracaq”.
Avropa İttifaqı da Ermənistan və Azərbaycanın Sülh və Dövlətlərarası Münasibətlərin qurulması haqqında Saziş layihəsi üzrə danışıqların yekunlaşması ilə bağlı verdiyi müvafiq bəyanatları alqışlayır. "Biz hər iki tərəfi son bir neçə ildə bu istiqamətdə həm ikitərəfli yolda, həm də beynəlxalq ictimaiyyətin iştirakı ilə apardıqları əzmkar işlərə görə alqışlayırıq", - bəyanatda qeyd edilib.
Gürcüstan Xarici İşlər Nazirliyi: "Ermənistan və Azərbaycan arasında sülh sazişi mətninin bütün 17 maddəsi üzrə danışıqların başa çatmasını alqışlayırıq. Bu, regionda dayanıqlı sülh və sabitliyə doğru tarixi addımdır!"
Çin Ermənistan və Azərbaycan arasında sülh prosesində əldə olunan müsbət irəliləyişi alqışlayır. Bu barədə Çin Xarici İşlər Nazirliyinin sözçüsü Mao Ninq mətbuat konfransında bildirib. “Çin səmimi qəlbdən ümid edir ki, iki ölkə münaqişə və fikir ayrılıqlarını dialoq və məsləhətləşmələr yolu ilə həll edə və regionda davamlı sülh, inkişaf və rifaha töhfə verə bilər”, - diplomat vurğulayıb.
Qazaxıstan Azərbaycan və Ermənistanın sülh sazişinin mətni üzrə danışıqların başa çatması ilə bağlı bəyanatlarını alqışlayır. Bu barədə Qazaxıstan Xarici İşlər Nazirliyinin (XİN) bəyanatında bildirilib. "Əminik ki, əldə edilmiş razılaşmalar və bu tarixi sənədin imzalanması Azərbaycan Respublikası ilə Ermənistan Respublikası arasında münasibətlərin normallaşması, həmçinin bütün Cənubi Qafqaz regionunda sabitliyin, təhlükəsizliyin və rifahın təmin edilməsi yolunda mühüm addım olacaq", - bəyanatda qeyd olunub. Nazirlikdən həmçinin bildirilib ki, Qazaxıstan möhkəm və uzunmüddətli sülhün təmin edilməsi üçün Bakı və İrəvan arasında konstruktiv dialoqun davam etdirilməsinə yönəlmiş səyləri dəstəkləyir.
Avropa Şurasının Baş katibi Alain Berset Ermənistan və Azərbaycanın Sülh və Dövlətlərarası Münasibətlərin qurulması haqqında Saziş layihəsi üzrə danışıqların yekunlaşdırılması ilə bağlı açıqlamalarını alqışlayır: "Avropa Şurası Ermənistan və Azərbaycan arasında münasibətlərin normallaşdırılmasını tam dəstəkləyir və xüsusilə insan hüquqlarına, demokratiyaya və qanunun aliliyinə tam hörmətin təmin edilməsi məqsədi ilə hər iki üzv dövlətə öz dəstəyini və yardımını göstərməyə davam edəcəkdir".
Polşa Xarici İşlər Nazirliyi: "Varşava Azərbaycan və Ermənistan arasında sülh sazişinin mətni üzrə danışıqların başa çatmasını alqışlayır".
14-03-2025, 14:53
Trampın nümayəndəsi Putinlə nələr danışıb? - Peskovdan AÇIQLAMA
Rusiya prezidenti Vladimir Putin martın 14-də gecə saatlarında ABŞ prezidenti Donald Trampın xüsusi nümayəndəsi Stiv Uitkofu Kremlə qəbul edib.
Bu barədə Kremlin sözçüsü Dmitri Peskov məlumat verib.
Görüş zamanı ABŞ tərəfindən əlavə məlumatlar təqdim edilib və Putin Uitkofun köməyilə prezident Donald Trampa xüsusi mesajlar göndərib. Bununla bağlı detalları açıqlamayan Peskov Moskva və Vaşinqton arasında gələcək telefon danışığının gözlənildiyini bildirib.
Uitkofun Moskvaya səfəri əvvəlcədən rəsmi şəkildə elan olunmayıb. Görüşdən sonra xüsusi elçinin təyyarəsinin gecə saat 01:54-də “Vnukovo” hava limanından ayrıldığı qeyd olunub.
Görüş Ukraynada münaqişənin davam etdiyi və Putinlə Lukaşenkonun birgə bəyanat verdiyi gün baş tutub. Rusiya lideri atəşkəslə bağlı ABŞ və Kiyevin təkliflərinə ehtiyatla yanaşdığını və bu məsələdə çoxsaylı suallarının olduğunu bildirib.
ABŞ və Rusiya liderləri arasında birbaşa əlaqənin yaxın vaxtlarda baş tutacağı gözlənilir. Kreml danışıqların baş tutmasının hər iki tərəf üçün zəruri olduğunu vurğulayıb.
14-03-2025, 14:24
Ballıcaya köç edən ailələrə mənzillərin açarı təqdim edilib- FOTO
Bu gün “Böyük Qayıdış” proqramı çərçivəsində Xocalı rayonunun Ballıca kəndinə 98 nəfərdən ibarət 24 ailənin növbəti köçü baş tutub.
Xankəndi şəhərində, Ağdərə və Xocalı rayonlarında Bərpa, Tikinti və İdarəetmə xidmətinin ictimaiyyətlə əlaqələr şöbəsindən verilən məlumata görə, ölkənin müxtəlif şəhər və rayonlarından yola salınan keçmiş məcburi köçkünləri doğma ata-baba yurdlarında Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəliyinin əməkdaşları qarşılayıb. Qaçqınların və Məcburi Köçkünlərin İşləri üzrə Dövlət Komitəsinin və mətbuat nümayəndələrinin iştirakı ilə onlara mənzillərin açarı təqdim edilib və ailələr yeni evlərində yerləşiblər.Bununla da bugünədək Xocalı rayonunun Ballıca kəndinə ümumilikdə 136 ailə, 660 nəfər köçürülüb.
14-03-2025, 14:10
Tərtərdə ata oğlunu bıçaqladı
Tərtərdə ata oğlunu bıçaqlayıb.
Hadisə rayonun Kəngərli kəndində baş verib.
1968-ci il təvəllüdlü Muğan Həsənov oğlu 1991-ci təvəllüdlü Emin Həsənzadəni bıçaqlayıb.
Hadisəni törətməkdə şübhəli bilinən şəxs polis əməkdaşları tərəfindən saxlanılıb.
Faktla bağlı araşdırma aparılır.
14-03-2025, 13:33
11-ci sinif şagirdi intihar etdi
Tovuzda məktəbli oğlan intihar edib.
Hadisə rayonun Aşağı Quşçu kəndində qeydə alınıb.
11-ci sinif şagirdi Ə.S. yaşadığı evdə özünü asıb.
Faktla bağlı araşdırma başlanılıb.
14-03-2025, 13:27
Ballıcaya köçən ailələrə mənzillərin açarı təqdim edildi - FOTO
Bu gün “Böyük Qayıdış” proqramı çərçivəsində Xocalı rayonunun Ballıca kəndinə 98 nəfərdən ibarət 24 ailənin növbəti köçü baş tutub.
Xankəndi şəhərində, Ağdərə və Xocalı rayonlarında Bərpa, Tikinti və İdarəetmə xidmətinin ictimaiyyətlə əlaqələr şöbəsindən verilən məlumata görə, ölkənin müxtəlif şəhər və rayonlarından yola salınan keçmiş məcburi köçkünləri doğma ata-baba yurdlarında Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəliyinin əməkdaşları qarşılayıb. Qaçqınların və Məcburi Köçkünlərin İşləri üzrə Dövlət Komitəsinin və mətbuat nümayəndələrinin iştirakı ilə onlara mənzillərin açarı təqdim edilib və ailələr yeni evlərində yerləşiblər.Bununla da bugünədək Xocalı rayonunun Ballıca kəndinə ümumilikdə 136 ailə, 660 nəfər köçürülüb.
Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsinin müavini Səbuhi Qəhramanov bildirib ki, köçürülən ailələrin işlə təmin edilməsi xüsusi diqqətdə saxlanılır.Kəndə köç edən sakinlər müvafiq qurumlar tərəfindən peşə ixtisaslarına və bacarıqlarına uyğun şəkildə işlə təmin ediləcək, müxtəlif dövlət qurumlarında, ictimai iaşə obyektlərində, tikinti şirkətlərində, tikiş fabrikində və digər yerlərdə çalışacaqlar. Köçürülmüş əhali üçün bütün infrastruktur, şərait - dövlət xidmətləri mərkəzi, məktəb, bağça, ictimai iaşə obyektləri və s. imkanlar mövcuddur.
Qeyd edək ki, Ballıca kəndinə köç bundan sonra da mərhələli şəkildə davam edəcək. Bunun üçün kənddə təmir və bərpa tikinti işləri davam etdirilir.
14-03-2025, 13:24
“Ermənistan sülh sazişi imzalamasa, dərin bataqlıqda boğulacaq!” - Mirzoyan
“Düşünürəm ki, belə taleyüklü məsələlərdən danışarkən tələblərin sayına görə mühakimə yürütmək yəqin ki, yersizdir”.
Bunu Ermənistanın xarici işlər naziri Ararat Mirzoyan erməni deputatların Azərbaycanın danışıqlar prosesində hansı güzəştlərə getməsi ilə bağlı sualını cavablandırarkən deyib.
O, bu barədə geniş danışmaq istəmədiyini vurğulayıb.
Xarici işlər naziri bəyan etdi ki, sülhün bərqərar olması ilə Ermənistan böyük və dərin bataqlıqdan çıxacaq, əks halda batıb orada qalacaq.
“Mən diqqəti başqa bir şeyə yönəltməyi təklif edirəm. Məhz sülhün bərqərar olması ilə Ermənistan böyük və dərin bataqlıqdan çıxacaq, oradan çıxmasaq, boğularaq basdırılacağıq. Burada biz beş, siz isə dörd güzəştə getdiniz söyləmək düzgün olmazdı”, - Mirzoyan bildirib.
Nazir bildirib ki, Ermənistanın mövcud olmağının yeganə yolu sülhdür.
“Azərbaycanla sülh və münasibətlərin normallaşması Ermənistanın maraqlarına uyğundur”.
Mirzoyanın sözlərinə görə, hələ də həllini tapmayan məsələlər var, Azərbaycan bu məsələlərə başqa, Ermənistan başqa cür baxır.
“Onların tələbləri var ki, biz bölüşmürük, bizim gözləntilərimiz var ki, onlar bölüşmür, tam həll olunmayan məsələlər var, məsələn, itkin düşənlərin taleyinə aydınlıq gətirmək və s. Böyük dolaşıq saplar, bir qrup mürəkkəblik var, sülh asan proses deyil”, - deyə o vurğulayıb.
14-03-2025, 13:13
Bu şəxslərin də müavinət alması təklif edildi
Məcburi köçkün düşdükdən sonra məcburi köçkün statusu olmayan şəxsə ərə getmiş, həmçinin sonradan boşanmış qadınlara da vahid aylıq müavinətin verilməsi təklif olunur.
Bununla bağlı Nazirlər Kabinetinin 2024-cü ildəki fəaliyyəti haqqında hesabatında əks olunub.
Milli Məclisin bugünkü plenar iclasında müzakirəyə çıxarılan hesabata əsasən, bu təkliflə Ədliyyə Nazirliyi çıxış edib və Konstitusiya Məhkəməsinə məktub ünvanlayıb.
Belə ki, “Azərbaycan Respublikasında məcburi köçkünlərə (ölkə daxilində köçürülmüş şəxslərə) “məcburi köçkün” statusu və onu təsdiq edən vəsiqənin verilməsinə dair” Qaydanın 2.4-cü bəndinə görə qadınlar məcburi köçkün düşdükdən sonra məcburi köçkün statusu olmayan şəxsə ərə getdikdə, həmçinin sonradan boşandıqda onlar məcburi köçkün statusunu, habelə həmin şəxslər üçün nəzərdə tutulmuş vahid aylıq müavinətdən istifadə hüquqlarını itirirlər.
Lakin bu hal ailə vəziyyətini dəyişən kişilərə münasibətdə nəzərdə tutulmayıb.
Sənəddə qeyd edilib ki, məsələ ilə bağlı Konstitusiya Məhkəməsinə çoxsaylı şikayətlər daxil olub. Həmin şikayətlərin tam araşdırılması və sözügedən bəndin Konstitusiyanın 25-ci maddəsinə uyğunluğunun müəyyənləşdirilməsi məqsədilə Ədliyyə Nazirliyindən müvafiq məsələyə dair mülahizələrin təqdim edilməsi xahiş olunub.
Nəticədə Ədliyyə Nazirliyi tərəfindən Konstitusiya Məhkəməsinə ünvanlanan 2024-cü il 18 noyabr tarixli məktubda Konstitusiyanın 25-ci maddəsinin tələblərinə zidd olduğundan Qaydanın 2.4-cü bəndinin ləğv edilməsi təklif olunub.
14-03-2025, 12:57
Ceyhun Bayramov bolqarıstanlı həmkarı ilə görüşdü
Azərbaycan xarici işlər naziri Ceyhun Bayramov və Bolqarıstanın xarici işlər naziri Georgi Georgiev arasında təkbətək görüş başlayıb.
Bu barədə Azərbaycan XİN-in sosial mediada paylaşımında bildirilib.
14-03-2025, 12:48
Qarabağda qəbristanlıqlar üçün torpaq ayrılıb
Azad edilən ərazilər üzrə qəbiristanlıqlara ayrılan torpaq sahələrinin həcmi açıqlanıb.
2022-2026-cı illər ərzində müvafiq ərazilər üzrə şəhərlərdə və qəsəbələrdə qəbiristanlıqların tikintisi nəzərdə tutulub.
Hesabata əsasən, bu istiqamətdə aidiyyəti qurumlar müvafiq işlərin icrasını davam etdirir.
Bildirilib ki, işğaldan azad olunmuş ərazilər üzrə qəbiristanlıqlara Ağdam şəhərində 25,11 ha, Füzuli şəhərində 26 ha, Şuşa şəhərində 5,5 ha torpaq sahəsi ayrılıb və qeyd olunan şəhərlərin Baş Planında təsbit olunub.
Zəngilan şəhərində 3,9 ha, Cəbrayıl şəhərində 3,5 ha, Qubadlı şəhərində 3,42 ha, Laçın şəhərində 4,33 ha, Kəlbəcər şəhərində 3,5 ha torpağın qeyd olunan məqsəd üçün ayrılması istiqamətində torpaqayırma icraatı davam edir.
Həmçinin Ağdam, Füzuli və Xocavənd rayonlarında Bərpa, Tikinti və İdarəetmə Xidməti tərəfindən Ağdam rayonu ərazisində yerləşən Qarağacı qəbiristanlığı (56,86 hektar) üçün müvafiq qaydada müraciət edilib, lakin məsələyə dair Mədəniyyət Nazirliyinin və Əmlak Məsələləri Dövlət Xidmətinin rəyi olduğundan icraat başa çatdırılmayıb.
Bundan başqa, azad olunan ərazilərdə qəbiristanlıqların bərpası və dünyasını dəyişmiş məcburi köçkünlərin mərhələli şəkildə öz doğma yurdlarında minalardan təmizlənmiş ərazilərdə dəfn edilməsinə şəraitin yaradılması istiqamətində müvafiq işlər aparılır.
Məlumat üçün bildiririk ki, ötən dövrdə Füzuli şəhərində mövcud köhnə qəbiristanlıqda 15 nəfər, Laçın şəhərində 2 nəfər və Şuşa şəhərində 4 nəfər dəfn edilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!