14-09-2025, 12:44
Nepalda iğtişaşlar: Ölənlərin sayı 70-i ötdü
Nepalda kütləvi iğtişaşlar zamanı 70-dən çox adam ölüb.
Bu barədə yerli hakimiyyət nümayəndələri məlumat yayıb.
"Ümumilikdə 72 nəfər ölüb. Daha 191 yaralı hazırda ölkənin müxtəlif xəstəxanalarında və səhiyyə müəssisələrində müalicə alır", - hökumət sözçüsü Eknarayan Aryal bildirib.
Onun sözlərinə görə, ölüm halları sentyabrın 8-də keçirilən etiraz aksiyaları zamanı, həmçinin sentyabrın 9-da baş verən yanğın və iğtişaşlar nəticəsində baş verib.
14-09-2025, 12:19
Türk dövlətlərinin sığortaçıları Şuşada birgə sənəd imzalayıb
Şuşada keçirilən Türk Dünyası Sığorta Birliyinin birinci Assambleyasında türk dövlətlərinin sığortaçıları arasında birgə "Proklamasiya sənədi" imzalanıb.
İmzalanan sənədə əsasən, Türk Dünyası Sığorta Birliyi Türk Dövlətləri Təşkikatının məqsəd və prinsiplərinə əsaslanaraq yenidən formalaşdırılib.
Belə ki, Birliyə 5 təsisçi üzvdən əlavə 3 ölkənin (Macarıstan, Türkmənistan və Şimali Kipr Türk Respublikası) sığorta assosiasiyaları müşahidəçi təşkilat qismində daxil olur.
Qeyd edək ki, Türk Dünyası Sığorta Birliyinin başlıca məqsədi Türk Dövlətləri Təşkilatına daxil olan üzv və müşahidəçi ölkələrin sığorta bazarları arasında qarşılıqlı təcrübə, kadr və məlumat mübadiləsi qurmaq, təkrarsığorta əlaqələrini sistemli formalaşdırmaq və qardaş ölkələrin sığorta bazarlarında davamlı və dayanıqlı inkişafa nail olmaqdır.
14-09-2025, 12:07
İrəvandan yekun sülh sazişinin imzalanma vaxtına dair AÇIQLAMA
Rəsmi İrəvan Ermənistan-Azərbaycan sülh sazişinin gələn ilin birinci yarısında imzalanacağı barədə yaılan məlumata münasibət bildirib.
Ermənistan xarici işlər nazirinin mətbuat katibi Ani Badalyan “Armenpress”ə bildirib ki, sülh sazişinin mümkün qədər tez imzalanması bərqərar olmuş sülhün institutlaşması istiqamətində ciddi addım olacaq.
“Bu il martın 13-də Ermənistan-Azərbaycan sülh sazişinin mətni üzrə razılaşma elan ediləndə Ermənistan tərəfi eyni vaxtda sənədi tez bir zamanda imzalamağa hazır olduğunu bildirdi. Sülhün bərqərar olmasına baxmayaraq, Ermənistanın imzalanma tarixinə prinsipial yanaşması dəyişməyib”, - deyə Ani Badalyan vurğulayıb.
Xatırladaq ki, Türkiyənin xarici işlər naziri Hakan Fidan Romada Beynəlxalq Münasibətlər İnstitutunda keçirilən konfransda bildirib ki, Ermənistan və Azərbaycan arasında yekun sülh sazişi imzalandıqdan sonra Türkiyə də Ermənistanla münasibətləri normallaşdırmaq üçün addımlar atmağa başlayacaq.
“Vaşinqtonda imzalanan sənəd yekun sənəd deyil, yekun sənədin imzalanması 2026-cı ilin birinci yarısında gözlənilir”, - deyə Fidan bildirib.
Qeyd edək ki, 8 avqust 2025-ci il tarixində Vaşinqtonda Azərbaycan və Ermənistan arasında normallaşma prosesi ilə əlaqədar bir sıra razılıq əldə olunub, sülh sazişi layihəsi paraflanıb. Bu razılıqlara uyğun olaraq 1 sentyabr 2025-ci il tarixindən etibarən ATƏT-in Minsk qrupunun ləğvinə dair qərar qəbul edilib.
Rəsmi Bakının tələbinə görə, yekun sülh süzişinin imzalanması üçün Ermənistan öz konstitusiyasına dəyişiklik etməli, onun preambula hissəsində Azərbaycana qarşı olan ərazi iddiası çıxarılmalıdır. Ermənistan hələ ki bu tələbi yerinə yetirməkdən yayınır...
14-09-2025, 11:30
Azərbaycan Prezidentinin sabiq mətbuat katibi vəfat etdi
Azərbaycan Prezidentinin sabiq mətbuat katibi, siyasi şərhçi Rasim Ağayev vəfat edib.
Bu barədə onun yaxınları məlumat yayıb.
R.Ağayev sentyabrın 14-də uzun sürən xəstəlikdən sonra 85 yaşında dünyasını dəyişib.
Rasim Hüseyn oğlu Ağayev 17 mart 1940-cı ildə anadan olub. O, ali təhsilli filoloqdur. Tarix elmləri namizədi olan Rasim Ağayev İraqda siyasi qüvvələrin problemlərinə dair dissertasiya müdafiə edib.
1974-ci ildən jurnalist kimi fəaliyyətə başlamış R.Ağayev rusdilli “Azradio” yayım agentliyinin müxbiri, redaktoru, ictimai-siyasi redaksiya şöbəsinin müdiri, “Novosti Press” agentliyinin, “Trud” qəzetinin xüsusi müxbiri işləyib, müxtəlif illərdə "Mayak" radiosunda çalışıb.
O, “Novosti Press” agentliyinin Azərbaycan üzrə departament rəhbəri, onun Liviya bürosunun rəhbəri kimi də fəaliyyət göstərib.
Rasim Ağayev vaxtilə Azərbaycan Kommunust Partiyası (KP) Mərkəzi Komitəsinin (MK) birinci katibinin köməkçisi, Azərbaycan KP MK-nın ideologiya şöbəsinin müdiri vəzifələrini də tutub.
1988-1991-ci illərdə Azərbaycan Kommunist Partiyası Mərkəzi Komitəsinin birinci katibi Əbdürrəhman Vəzirovun mətbuat katibi işləyib.
Rasim Ağayev 1991-1992-ci illərdə Azərbaycan Respublikasının ilk Prezidenti Ayaz Mütəllibovun mətbuat katibi vəzifəsində çalışıb. O,1994-cü ildə həbs edilib, bir müddət sonra azadlığa buraxılıb.
R.Ağayev politologiya tədqiqatlarının və bir sıra bədii kitabların müəllifidir. O, son illər Türkiyə, İran, İraq, MDB, Cənubi Qafqaz ölkələrində geosiyasətin müasir problemlərinə həsr olunmuş elmi konfranslarda iştirak edir, politoloq kimi cari siyasətlə bağlı məsələlərə dair mətbuata şərhlər verirdi. Bir müddət idi ki, xəstəliklə əlaqədar aktiv fəaliyyətini dayandırmışdı.
Allah rəhmət eləsin.
14-09-2025, 11:24
Rusiya Türkiyədən "S-400"ləri geri alır - SENSASİON İDDİA
Moskva Türkiyənin artıq aktiv istifadə etmədiyi “S-400” hava hücumundan müdafiə sistemlərini geri alıb başqa ölkələrə satmağı planlaşdırır. ABŞ sanksiyalarını aşmaq istəyən Ankara isə bu plana isti baxır.
Bu barədə Türkiyənin “Nefes” nəşri məlumat yayıb.
Nəşr yazır ki, dünya müharibə və böhranlarla mübarizə apararkən, hava hücumundan müdafiə sistemləri əldə etmək istəyən bir çox ölkə Rusiyaya üz tutub.
Lakin Moskvanın anbarında istifadə olunan sistemlərdən başqa hazır “S-400”ləri yoxdur. Məlumata görə, Rusiyanın 2019-cu ildə Türkiyəyə satdığı, lakin Ankara tərəfindən aktiv istifadə olunmayan “S-400” sistemlərini geri alaraq başqa ölkələrə satmağı düşündüyü bildirilir.
Öz imkanları ilə “Çelik Kubbe” hava hücumundan müdafiə sistemini inkişaf etdirən Türkiyənin isə “S-400”ə olan ehtiyacı hər keçən gün azalır. Üstəlik, “S-400” sistemi NATO-ya iteqrasiya edilə bilmirdi.
Bildirilir ki, sistemin ən vacib komponentlərindən olan raketlərin ömrü artıq yarıya çatıb və bəzi hallarda texniki baxım tələb olunur.
Qeyd edək ki, ABŞ Rusiyadan hava hücumundan müdafiə sistemi aldığı üçün Türkiyəyə CAATSA sanksiyaları tətbiq edib və Ankara “F-35” proqramından çıxarılıb. Bu vəziyyətdə, Türkiyənin “S-400”ləri geri qaytarmağa maraqlı ola biləcəyi qeyd edilir. Çünki Ankara “F-16” tədarükü ilə bağlı ABŞ-la danışıqları davam etdirir və eyni zamanda “F-35” layihəsinə də qayıtmaq niyyətindədir.
Xatırladaq ki, 2017-ci ildə Türkiyə Rusiyadan 2,5 milyard dollar qarşılığında iki “S-400” sistemi almaq üçün müqavilə imzalayıb, sistemlərin çatdırılması isə 2019-cu ildə həyata keçirilib. ABŞ isə CAATSA (Sanksiyalar Yoluyla Amerikanın Düşmənlərinə Qarşı Mübarizə Aktı) çərçivəsində Türkiyəni “F-35” proqramından çıxarıb.
14-09-2025, 11:12
İranda güclü zəlzələ
İranın Fars əyalətində 4,7 bal gücündə zəlzələ baş verib.
Yeraltı təkanlar səhər saatlarında Kənartəxte şəhərində, 16 kilometr dərinlikdə qeydə alınıb.
Xatırladaq ki, dünən də Fars əyalətinin Xeşt şəhərində eyni gücdə zəlzələ baş vermişdi.
Hazırda dağıntılar və mümkün itkilərlə bağlı məlumat açıqlanmayıb.
14-09-2025, 10:49
Xəzər dənizində tornado
Dünən Dağıstanın Kaspiysk şəhərində dəniz üzərində nəhəng su burulğanı (tornado) əmələ gəlib.
Bu barədə görüntüləri "Komsomolskaya pravda" Telegram kanalı yayıb.
Yerli sakinlərin sözlərinə görə, burulğanı hətta evlərin pəncərəsindən də görmək mümkün olub.
14-09-2025, 10:33
Türk Dünyası Sığorta Birliyinin ilk Assambleyası Şuşada keçirilir
Türk Dünyası Sığorta Birliyinin ilk Assambleyası Azərbaycan Mərkəzi Bankının strateji dəstəyi, "Azərbaycan Sığortaçılar Assosiasiyası" İctimai Birliyinin təşkilatçılığı və Türk Dövlətləri Təşkilatının (TDT) iştirakı ilə Şuşada işinə başlayıb.
Tədbirdə Azərbaycan, Qazaxıstan, Qırğızıstan, Türkiyə, Özbəkistan, Macarıstan, Türkmənistan və Şimali Kiprdən dövlət rəsmiləri, maliyyə requlyatorları, sığorta assosiasiyalarının nümayəndələri, eləcə də TDT-nın rəhbərliyi iştirak edir.
Assambleya çərçivəsində Türk Dünyası Sığorta Birliyinin TDT-nın məqsəd və prinsiplərinə əsaslanaraq yenidən formalaşdırılmasına dair "Proklamasiya sənədi"nin imzalanması nəzərdə tutulub.
Qeyd edək ki, Türk Dünyası Sığorta Birliyi 24 may 2022-ci ildə Azərbaycan ilə Türkiyənin sığorta assosiasiyalarının ortaq razılığı və birgə təşəbbüsü ilə İstanbulda təsis edilib. Quruma Azərbaycan, Qazaxıstan, Qırğızıstan, Türkiyə və Özbəkistanın sığorta assosiasiyaları üzv olub. Daha sonra Macarıstan, Türkmənistan və Şimali Kiprin sığorta assosiasiyaları müşahidəçi qismində qoşulublar.
Birliyin ilk Assambleyası təşkilatın "Yol xəritəsi"nə uyğun olaraq, alfabetik ardıcıllıq əsasında Azərbaycanda keçirilir.
14-09-2025, 10:22
Gəncədə qəza - 4 nəfər yaralandı
Gəncədə yol nəqliyyat hadisəsi baş verib.
Hadisə şəhər ərazisində qeydə alınıb.
Hərəkətdə olan iki minik avtomobilinin toqquşması nəticəsində 4 nəfər xəsarət alaraq xəstəxanaya yerəşdirilib.
Xəsarət alanlar 2006-ci il təvəllüdlü S.Ələkbərov, 2006-cı il təvəllüdlü N.Həsənova, 2008-ci il təvəllüdlü G.Həsənova və 1981-ci il təvəllüdlü B.Həsənovadır. Yaralıların vəziyyətinin orta ağır olduğu bildirilir.
Faktla bağlı araşdırma aparılır.
14-09-2025, 10:11
Ukrayna Rusiyanın ən böyük neft zavodunu vurdu
Ukrayna Silahlı Qüvvələri Rusiyanın Leninqrad vilayətində yerləşən Kirişi Neft Emalı Zavoduna hücum edib.
Bu barədə vilayətin qubernatoru Aleksandr Drozdenko bildirib.
Onun sözlərinə görə, Kirişi şəhəri yaxınlığında üç pilotsuz uçuş aparatı vurulub.
Lakin onların qalıqları müəssisənin ərazisinə düşərək yanğına səbəb olub.
Məlumata görə, yanğın qısa müddətdə söndürülüb. Hadisə nəticəsində tələfat və ya xəsarət alan olmayıb.
Qeyd edək ki, Kirişi Neft Emalı Zavodu Rusiyanın ən iri müəssisələrindən biridir və ildə təxminən 20 milyon ton neft emal etmək gücünə malikdir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!