26-09-2025, 19:47
Rusiya təxribata hazırlaşır - ŞOK PLAN
Rusiya Birləşmiş Krallıq ətrafında kritik infrastruktur üzərində gizli əməliyyatlara hazırlaşır.
Bu barədə "Financial Times" qəzeti yazıb.
Bildirilir ki, “Yantar” adlı gəmi ötən ilin payızından başlayaraq 13 ay ərzində Böyük Britaniya sularında müşahidə aparıb. Bu müddətdə gəmi Avropanın sualtı kabel xətləri və strateji obyektlərini izləyib.
Araşdırma Avropa Kosmik Agentliyinin peyk radiolokasiya məlumatlarına əsaslanır. Həmin görüntülərdə “Yantar”ın 2024-cü ilin noyabrında İrlandiya dənizinin mərkəzində kritik kabel xətləri üzərində dayandığı aşkarlanıb. Mütəxəssislər bildirirlər ki, gəmi fəaliyyətini gizlətməyə çalışıb.
Hazırda Böyük Britaniyada rəqəmsal rabitənin 99%-i sualtı optik kabellərlə təmin olunur. Ölkənin qaz təchizatının üçdə ikisi də dəniz dibi boru kəmərləri vasitəsilə daşınır. Bu səbəbdən həmin infrastruktura mümkün hücum xüsusi təhlükə yaradır.
“Yantar”ın sualtı aparatlarla təchiz edildiyi, kabel xətlərinə qoşularaq məlumat ələ keçirmək, həmçinin gələcəkdə diversiya məqsədilə partlayıcı qurğular yerləşdirmək imkanına malik olduğu bildirilir.
Rəsmi Moskva isə gəmini “okeanoqrafik tədqiqat gəmisi” kimi təqdim edir. Lakin Qərb hərbi ekspertləri iddia edirlər ki, gəminin əsas missiyası NATO ölkələrinin sualtı izləmə sistemlərinə və rabitə xətlərinə qarşı kəşfiyyat fəaliyyəti aparmaqdır.
26-09-2025, 19:34
Toyda zəhərlənənlərin sayı 70-i keçdi
İmişli rayonunda zəhərlənənlərin sayı 74-ə çatıb.
Bu barədə TƏBİB-dən məlumat verilib.
Bildirilib ki, 24.09.2025-ci il tarixində saat 14:10 radələrindən etibarən zəhərlənmə şübhəsi ilə 74 nəfər (8-i uşaq olmaqla 35-i kişi, 4-ü uşaq olmaqla 39-u qadın cinsli) İmişli Rayon Mərkəzi Xəstəxanasının Təcili tibbi yardım şöbəsinə hospitalizasiya olunub:
“Onlara qeyri-infeksion enterit və kolit diaqnozu təyin olunub və hər birinə zəruri tibbi yardım göstərilib.
Vəziyyəti ağır qiymətləndirilən 5 nəfər (2-si kişi, 3-ü qadın cinsli) Kliniki Tibbi Mərkəzə təxliyyə edilib. Vəziyyəti qənaətbəxş qiymətləndirilən 56 nəfər (26-sı qadın, 30-u kişi cinsli) ambulator müalicə üçün evə buraxılıb. 4 nəfər isə iltizamnamə əsasında ixtisaslı tibbi xidmətdən imtina edib.
Vəziyyətləri stabil qiymətləndirilən digər 9 nəfərin müalicələri müvafiq şöbələrdə davam etdirilir”.
26-09-2025, 19:22
Yeni diplomat Azərbaycanla tanışlıq üçün Atəşgaha getdi
ABŞ-nin Azərbaycandakı Səfirliyinin yeni müvəqqəti işlər vəkili Emi Karlon ölkəmizin mədəniyyəti ilə tanışlıq məqsədilə ilk olaraq Atəşgah məbədini seçib.
Bu barədə səfirliyin feysbuk hesabında paylaşım edilib.
Bununla yanaşı, paylaşımda E.Karlonun məbəddə lentə alınan ilk videomüraciəti də yer alıb.
ABŞ-nin Azərbaycandakı yeni missiyasının rəhbərinin müavini öz videomüraciətində iki ölkənin 30 ildən çoxdur tərəfdaş olduğunu diqqətə çatdırıb: “Biz birlikdə terrorizmlə mübarizə aparmışıq, enerji təhlükəsizliyini inkişaf etdirmişik və hər iki ölkə üçün rifah yaratmışıq”.
Onun sözlərinə görə, Azərbaycan və ABŞ üçün tarixi bir anda ölkəmizdə olmaq onun üçün böyük şərəfdir: “Ağ Evdə avqustun 8-də sülh razılaşması təşəbbüsünün irəli sürülməsi Cənubi Qafqaz bölgəsi üçün cəsarətli yeni bir səhifənin başlanğıcını qoydu. ABŞ Azərbaycan və Ermənistan arasında davamlı sülhə nail olmağa yardım etməyə sadiqdir. Bu sülh yolunu möhkəmləndirməklə Cənubi Qafqazın ticarət, tranzit və enerji mərkəzi kimi böyük potensialını açırıq. Bu da özlüyündə gələcək iqtisadi əməkdaşlığımızın əsasını təşkil edir.
Vaşinqtonda prezidentlər Donald Tramp və İlham Əliyevin imzaladığı Anlaşma Memorandumu ABŞ-Azərbaycan strateji tərəfdaşlığının yaradılması istiqamətində ilk addımdır və ümid edirik ki, bu, ortaq maraq doğuran məsələlər üzrə əlaqələndirməni gücləndirəcək”.
Diplomat vurğulayıb ki, növbəti 3 il ərzində məqsədi iki ölkə arasında münasibətləri daha da gücləndirmək, regionda sülh prosesini dəstəkləmək, həm amerikalılar, həm də azərbaycanlılar üçün faydalı olacaq ortaq iqtisadi imkanları təşviq etməkdir.
26-09-2025, 19:05
Adnan Əhmədzadənin BƏƏ-dəki aktivləri bu şəxsə keçir
SOCAR-ın İnvestisiya departamentinin sabiq direktor müavini Adnan Əhmədzadənin həbsindən sonra onun Birləşmiş Ərəb Əmirliklərində yerləşən “Oilmar Shipping and Chartering DMCC” şirkətinin bütün səhmləri şirkətin baş direktoru Yusif Məmmədov tərəfindən alınıb.
Bu barədə “Haqqın.az” məlumat yayıb.
Məlumata görə, Sinqapurun bunker nəşri olan “Manifold Times” yazır ki, “Oilmar”ın sahibi ilə bağlı “hadisələr” (azərbaycanlı oliqarxın həbsi nəzərdə tutulur – red.) səhmlərin geri alınması prosesini işə salır.
Nəşr şirkət rəhbərliyinin bütün səhmləri almağa başladığını və alış prosesinin yaxın bir neçə gün ərzində başa çatdırılmasının gözlənildiyini açıqlayıb.
Qeyd olunur ki, Dubayda yerləşən “Oilmar Shipping and Chartering DMCC” dəniz yanacağı və neft məhsullarının satışı üzrə ixtisaslaşıb.
Şirkət 2015-ci ilin noyabrında yaradılıb və dünyanın 60-dan çox ölkəsində xidmət göstərir. 2022-ci ildə “Oilmar” komandası ilk dəfə olaraq 1 milyard ABŞ dollarını keçən ümumi gəlir əldə edib.
26-09-2025, 19:00
Güclü külək məktəbin darvazasını aşırdı
Güclü külək 20 nömrəli məktəb-liseyin Parlament prospektinə tərəf çıxışındakı darvazanı aşırıb.
Hadisə nəticəsində xəsarət alan olmayıb.
26-09-2025, 18:51
Bağçalıdan Türk dünyası ilə bağlı vacib MESAJ
Türkiyənin Milliyyətçi Hərəkat Partiyasının (MHP) lideri Dövlət Bağçalı NATO, Ukrayna müharibəsi və Yaxın Şərqdəki vəziyyətlə bağlı sərt açıqlamalar verib.
O, partiyaya yaxın “Türkgün” qəzetinə müsahibəsində bildirib ki, əgər NATO Ankaranın maraqlarını nəzərə almırsa, Türkiyə “həm Şərqə, həm də Qərbə baxmalıdır”.
Bağçalının sözlərinə görə, NATO üzvlüyü yalnız blok daxilində hücumlardan müdafiə ilə məhdudlaşmamalıdır:
“Bəzi müttəfiqlər Türkiyənin həyati prioritetlərini görməzdən gəlir. Cəmiyyətdə də buna qarşı etiraz artır. Türkiyənin təhlükəsizlik sahəsində təxirəsalınmaz ehtiyacları var”.
MHP lideri ABŞ, Qərb və İsrailin Suriyada atdığı addımların bölgədə sabitliyi pozduğunu, orada “ikinci İsrail” yaratmaq cəhdləri olduğunu bildirib.
O qeyd edib ki, İsrail hökuməti hazırda eyni vaxtda altı dövlətə - Fələstin, Livan, Yəmən, İran, Suriya və Qətərə qarşı aqressiv siyasət yürüdür və ABŞ Prezidenti Donald Trampın rəhbərliyi ilə Vaşinqton bu prosesə tam dəstək verir.
Bağçalı, həmçinin Ankara Rusiya-Ukrayna müharibəsinin tezliklə başa çatmasında maraqlı olduğunu vurğulayıb:
“Türkiyə tarixi boyunca məzlum xalqların taleyinə diqqət göstərib və öz tarixi missiyasına uyğun hərəkət etməyə hazırdır”.
MHP sədri qlobal güc mərkəzlərinin Asiyaya yönəldiyini, Rusiyanın sarsıntılara baxmayaraq hərbi-siyasi qüvvə kimi qaldığını qeyd edib. O, Türk dünyasını və Türk Dövlətləri Təşkilatını Avrasiya mərkəzində mühüm beynəlxalq aktor kimi qiymətləndirib.
26-09-2025, 18:30
Şuşa 31 milyona 12 bina tikiləcək - şirkət məlum oldu
“Şuşa Şəhəri Dövlət Qoruğu İdarəsi” PHŞ tenderlərin nəticələrini açıqlayıb.
Birinci tenderdə Şuşa şəhəri, D-4 massivində 12 binanın tikintisi çərçivəsində (2-ci mərhələ) abadlıq, sahədaxili kommunikasiya, qurğulara aid mallar və xidmətlərin, 1,2,3,10,11 və 12 nömrəli binalarının tikintisi işləri nəzərdə tutulur.
Tenderin qalibi "Crystal İnşaat" ASC (VÖEN: 1603491051) olub. Qalib şirkətə 16 milyon 675 min 260,66 manat ödəniləcək.
Həmçinin Şuşa şəhəri D-4 yaşayış massivində (1-ci mərhələ) tikintisi nəzərdə tutulan 4, 5, 6, 7, 8 və 9 nömrəli yaşayış binalarının tikinti işləri üzrə keçirilən tenderin qalibi də "Crystal İnşaat" ASC olub. Qalib şirkətlə 14 milyon 176 min 846,46 manat dəyərində müqavilə bağlanıb.
İki tenderin ümumi dəyəri 30 milyon 852 min 107,12 manatdır.
Şirkət bundan əvvəl “Cəbrayıl, Qubadlı və Zəngilan Rayonlarında Bərpa, Tikinti və İdarəetmə Xidməti” PHŞ-nin 6 milyon 50 min manatlıq Zəngilan rayonu, Ağalı kəndində yerləşən hotelin tam təchizatlı təmir və tamamlama işlərinin ikinci mərhələsi ilə bağlı tenderin qalibi olub.
Qeyd edək ki, “Crystal İnşaat” ASC 2018-ci ildə yaradılıb, nizamnamə kapitalı 4 000 AZN təşkil edir. Şirkətin qanuni təmsilçisi Rəsul Rəsulov Məhəmmədəli oğludur. Hüquqi ünvanı AZ0100, Abşeron rayonu, Xırdalan şəhəri, H.Əliyev Pr. (Xırdalan), ev 11 B 2 ünvanında yerləşir.
26-09-2025, 17:38
Sarkisyan və Köçəryana təklif edirəm: siyasətdən getsinlər! - Rubinyan
“Mən təklif edirəm ki, Serj Sarkisyan və Robert Köçəryan uzun illər Ermənistanı sıxışdıran korrupsioner sistemin qurucuları və liderləri, seçkilərin saxtakarları kimi siyasətdən getdiklərini elan etsinlər”.
Bunu sentyabrın 26-da parlamentdə jurnalistlərlə söhbətində vitse-spiker Ruben Rubinyan Ermənistanın baş naziri Nikol Paşinyanın istefası tələbilə küçəyə toplaşan izdihamı xatırladaraq deyib.
"Mən təklif edirəm ki, “Daşnaksütyun” özünü ləğv etsin, çünki o, 004 saylı sirkulyarında məqsədinin Ermənistanın müstəqilliyindən imtina etmək olduğunu qeyd edən bir partiyadır. Bu barədə sonra danışacağıq. Xalq bizim hakimiyyətdə olmağımızı istəmədiyini söyləyəndə, iqtidardan gedəcəyik. Mexanizm hamıya məlumdur - seçkilər", - Rubinyan bildirib.
R.Rubinyan deyib ki, keçmiş iqtidar korrupsiyaya uğramasaydı, Serj Sarkisyan hakimiyyətdən uzaqlaşdırılmazdı.
“Hələ Baş Prokurorluğun Robert Köçəryan və onun ailəsindən tələb etdiyi, təxminən 200 milyon dollar dəyərində olan çoxsaylı aktivləri demirəm. O, mütləq ödəyəcək”.
26-09-2025, 17:10
Nazirlikdən gözlənilən hava şəraiti ilə əlaqədar əhaliyə müraciət
FHN gözlənilən hava şəraiti ilə əlaqədar əhaliyə müraciət edib. Müraciətdə deyilir:
"Milli Hidrometeorologiya Xidmətinin məlumatına görə, yaxın günlər ərzində ölkədə hava şəraitinin qeyri-sabit keçəcəyi, bəzi ərazilərdə güclü külək əsəcəyi, ayrı-ayrı yerlərdə leysan xarakterli intensiv yağış yağacağı, bəzi dağ çaylarından qısamüddətli sel keçəcəyi, şimşək çaxacağı proqnozlaşdırılır.
Qeyd olunanları nəzərə alaraq, Fövqəladə Hallar Nazirliyi əhaliyə müraciət edərək müvafiq təhlükəsizlik qaydalarına riayət etməyə çağırır.
Belə ki, güclü külək zamanı yüngül konstruksiyalı və müvəqqəti tikililərdən, bina və reklam lövhələrindən uzaq durmaq, elektrik dirəyi və naqillərinin, hündür ağacların altında dayanmamaq tövsiyə olunur. Güclü küləyin baş verən yanğınların söndürülməsi ilə əlaqədar yaratdığı çətinlikləri nəzərə alaraq, küləkli hava şəraitində yanğın təhlükəsizliyi qaydalarına xüsusilə ciddi riayət edilməlidir.
Həmçinin, leysan xarakterli yağıntıların səbəb ola biləcəyi sel və daşqından qorunmaq üçün sel və daşqın təhlükəli ərazilərdən uzaq durmaq, bu təhlükə ilə üzləşdikdə dərhal yaxınlıqdakı yüksəkliyə qalxmaq tövsiyə olunur.
Eyni zamanda, ildırımla bağlı təhlükələrdən qorunmaq üçün elektrik cihazlarını şəbəkədən ayırmaq, telefonla (sabit şəbəkə, mobil, taksofon və s.) danışmamaq, açıq havada olarkən elektrik xətti, ildırım ötürücüsü, navalça və antenaya yaxınlaşmamaq, hündür ağacların altında daldalanmamaq və bu məqsədlə nisbətən çökək yer seçmək, avtomobildə olduqda isə hərəkəti dayandıraraq şüşələri qaldırıb ildırımın bitməsini gözləmək lazımdır.
Unutmayın: Qaydalara biganəlik – həyatımıza təhlükədir!
Təhlükə zamanı 112-yə zəng edin!".
26-09-2025, 17:02
Təqaüd kartından pul oğurlayan şəxs saxlanıldı
Lənkəranda ahıl şəxsin təqaüd kartından pul oğurlanıb.
DİN-in Mətbuat Xidmətinin Lənkəran regional qrupundan verilən məlumata görə polis əməkdaşlarının keçirdikləri tədbirlərlə həmin vəsaitin zərərçəkmişin kartdakı pulu bankomatdan çıxarmaq üçün kömək istədiyi 23 yaşlı Kənan Əlizadə tərəfindən oğurlandığı məlum olub.
Araşdırmalarla K.Əlizadənin kartdakı pulu nağdlaşdırmaq və terminal vasitəsilə pul göndərmək üçün kömək istəyən ümumilikdə 4 nəfərin kartındakı 1977 manat vəsaiti taladığı müəyyən edilib.
Faktlarla bağlı Lənkəran ŞRPŞ-də cinayət işi başlanılıb, araşdırmalar aparılır. K.Əlizadənin qanunsuz əməllərindən zərərçəkən başqa vətəndaşlar varsa bu barədə polis orqanlarına məlumat verə bilərlər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!