10-09-2025, 17:33
Mənə Koçaryanla bağlı sual verməyin! - Sarkisyan
Ermənistanın keçmiş prezidenti Serj Sarkisyan ölkədə hakimiyyət dəyişikliyi məsələsinin daim gündəmdə olduğunu bildirib.
Onun sözlərinə görə, bunun “ən düzgün və optimal yolu” hökumətə və baş nazirə etimadsızlıq göstərmək, yəni impiçment elan etməkdir.
Sarkisyan parlamentin yalnız danışmaq yox, həm də dinləmək məkanı olduğunu vurğulayıb: “Baxın beynəlxalq təcrübəyə: dünən dünyada iki böyük hadisə baş verdi - Nepalda və Fransada. Hakimiyyəti devirmək və ya etimadsızlıq göstərmək üçün iki yol var. Biri Nepaldakı kimi zorakılıq və qətllərlə, digəri isə Fransadakı kimi parlament vasitəsilə. Biz xalqımıza hansını təklif etməliyik?” - deyə o, çıxışında qeyd edib.
Jurnalistlərin ikinci prezident Robert Koçaryanla bu mövzuda anlaşmamasının səbəbi barədə sualına isə Sarkisyan cavab verməkdən yayınaraq belə deyib: “Mən xahiş etmişdim ki, ikinci prezident haqqında sual verməyin.”
10-09-2025, 17:28
Aİ Ukraynaya daha 1 milyard avro maliyyə yardımı ayırdı
Avropa İttifaqı (Aİ) dondurulmuş Rusiya aktivlərindən əldə olunan vəsait hesabına Ukraynaya daha 1 milyard avro makro-maliyyə yardımı göndərib.
Bu barədə Ukraynanın Baş naziri Yuliya Sviridenko “X”də bildirib.
Onun sözlərinə görə, bu yardım Avropanın Rusiyanın artan raket hücumları və destabilizasiya cəhdlərinə qarşı Ukraynanın müdafiəsini və dayanıqlılığını gücləndirmək əzmindən xəbər verir.
Sviridenko həmçinin Avropa Komissiyasının Prezidenti Ursula von der Leyenə və İqtisadiyyat və Məhsuldarlıq, Tətbiq və Sadələşdirmə üzrə Komissar Valdis Dombrovskisə təşəkkür edib:
“Bu vəsaitlər insanların qorunmasına, şəhərlərin bərpasına və Ukraynanın Avropa gələcəyinin təmin edilməsinə xidmət edir. Təcavüzkar cavabını alacaq. Ədalət qalib gələcək.”
10-09-2025, 17:22
Xəzərdə yeni böyük quru ərazi üzə çıxa bilər
Hazırkı dövrdə Xəzər dənizi mürəkkəb ekoloji və hidroloji dəyişikliklərlə üzləşir. Son 30 ildə aparılan müşahidələr dəniz səviyyəsində əhəmiyyətli azalmanı göstərir ki, bu da sahilyanı ərazilərə və iqtisadi fəaliyyətlərə təsir göstərir.
Bunu Su və meliorativ proseslərin modelləşdirilməsi sektorunun müdiri, Su və Meliorasiya Elmi Tədqiqat İnstitutunun Su və meliorativ proseslərin modelləşdirilməsi sektorunun müdiri Kəminə Ağayeva Bakıda keçirilən 2-ci Beynəlxalq Su Təsərrüfatı Sərgi və Konfransında - “Baku Water Week”də (Bakı Su Həftəsi) çıxışı zamanı deyib.
O bildirib ki, son 30 ildə Xəzər dənizində suyun səviyyəsi 2,5 metr, son 10 ildə 1,5 metr, son 5 ildə 0,93 metr azalıb, ümumilikdə isə hər il Xəzər dənizdə suyun səviyyəsi 20-30 sm azalır: "Xəzər dənizinin şimal hissəsi çox dayazdır (orta dərinlik 5-6 metr). Səviyyənin bu qədər enməsi həmin hissənin qismən və ya tam qurumasına səbəb ola bilər. Bu, nərə balıqları, suitilər və şimaldakı bataqlıq ekosistemləri üçün ciddi təhlükədir. Sosial baxımdan suyun geri çəkilməsi Volqa deltasına, balıqçılığa və sahilyanı kənd təsərrüfatına zərbə vurur".
"NASA-nın Qlobal Su Monitorinqin tərəfindən bir neçə peykdən toplanan radar altimetriya məlumatları əsasında aparılan hesablamalara əsasən 21-ci əsrin sonuna qədər Xəzər dənizinin səviyyəsi 9-18 metr enə bilər ki, bu da dənizin təxminən 1/4 sahəsini itirməsinə və 93 min kvadrat kilometr yeni quru ərazinin üzə çıxmasına səbəb olacaq. Yeni yaranacaq torpaqların çoxu Xəzərin şimal hissəsində formalaşacaq", - deyə K. Ağayeva qeyd edib.
10-09-2025, 17:17
Hikmət Hacıyev Vaşinqtonda ABŞ Dövlət katibinin müavini ilə görüşdü
Azərbaycan Respublikası Prezidentinin köməkçisi - Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyev Dövlət katibinin müavini Kristofer Landau ilə görüşüb.
Bu barədə Azərbaycanın ABŞ-dakı səfirliyi məlumat yayıb.
Görüş Hikmət Hacıyevin Vaşinqtona səfəri çərçivəsində baş tutub.
Tərəflər Azərbaycan və ABŞ arasında strateji münasibətlər, regional və qlobal məsələlərlə bağlı geniş müzakirələr aparıb.
10-09-2025, 17:02
Pensiyalar ödənildi
Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondu tərəfindən Bakı, Sumqayıt şəhərləri və Abşeron rayonu üzrə sentyabr ayının pensiyaları ödənilib.
Bu barədə Nazirliyin Mətbuat xidmətindən məlumat verilib.
Habelə Naxçıvan Muxtar Respublikasının Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondu tərəfindən muxtar respublika üzrə bu ayın pensiya ödənişi həyata keçirilib.
Respublikamızın digər bölgələri üzrə, habelə güzəştli şərtlərlə pensiya hüququna malik şəxslərin sentyabr ayı üzrə pensiyaları da bu ay qrafik üzrə ödəniləcək.
10-09-2025, 16:36
Qırmızı Bazara İLK KÖÇ
Sabah Xocalının Şuşakənd kəndinə ilk köç yola salınacaq.
Şuşakəndlə bərabər, Xocavəndin Sos kəndinə və Qırmızı Bazar qəsəbəsinə ilk köç olacaq.
10-09-2025, 16:05
Şəmkir sakini su arxına yıxılaraq öldü
Şəmkirdə bədbəxt hadisə baş verib.
Rayon ərazisində orta yaşlı kişi su arxına yıxılıb. O, aldığı xəsarətlərdən hadisə yerində ölüb.
Hadisənin ehtiyatsızlıqdan baş verdiyi bildirilir.
Əraziyə polis əməkdaşları cəlb edilib.
10-09-2025, 15:43
Putinlə Paşinyanın görüş vaxtı açıqlandı
Ermənistanın baş naziri Nikol Paşinyan Moskvaya gedəcək. Sentyabrın 26-30-da Moskvada “Ümumdünya Atom Həftəsi” keçiriləcək və bu tədbirdə öz dövlətlərində nüvə proqramlarını inkişaf etdirən müxtəlif ölkələrin liderləri iştirak edəcəklər.
Mənbə bildirib ki, Nikol Paşinyan tədbirə dəvət olunacaq. Bundan əlavə, o, Rusiya prezidenti Vladimir Putinlə ayrıca görüş keçirəcəyini gözləyir.
Bununla bağlı suala Baş nazir aparatının informasiya və ictimaiyyətlə əlaqələr şöbəsinin müdiri Armen Xaçatryan ənənəvi cavab verib.
“Hökumət başçısının səfərləri ilə bağlı məlumatlar müvafiq müddətdə ötürülür”.
Bundan əvvəl Rusiya Xarici İşlər Nazirliyinin rəsmi nümayəndəsi Mariya Zaxarova Paşinyanın “Ümumdünya Atom Həftəsi”ndə iştirakını istisna etməyib.
Paşinyanla Putin arasında sonuncu görüş avqustun 31-də Şanxay Əməkdaşlıq Təşkilatının sammiti çərçivəsində baş tutub.
10-09-2025, 15:35
Okeanın dərinliyində şirin su ehtiyatı tapıldı
Alimlər Atlantik okeanının dərinliklərində yerləşən Nyu-Cersidən Menə qədər ABŞ-ın şərq sahili boyunca uzanan geniş, gizli şirin su qatının olduğu güman edilən sualtı təbii anbar aşkar ediblər.
Bu əlamətdar tapıntı təxminən 50 il əvvəl gözlənilməz bir kəşfin təkrarıdır. Həmin vaxt minerallar və karbohidrogenlər axtaran ABŞ hökumət gəmisi bu ölkənin şimal-şərqində dəniz dibində aparılan qazıntı zamanı şirin suya rast gəlmişdi. Bu ilkin sürprizə əsaslanaraq, qabaqcıl qlobal tədqiqat ekspedisiyası olan “Expedition 501” bu yay Keyp Koddan yola çıxıb. Duzlu suyun altında qazma işləri aparan qrup minlərlə nümunə götürərək burada nəhəng sualtı su anbarının mövcudluğunu təsdiqləyib.
Ekspedisiyanın rəhbəri Brendon Daqan bildirib ki, bu, dünyanın dayaz duzlu sularında mövcud olduğu bilinən bir çox gizli şirin su anbarlarından biridir.
Kolorado Mədən Məktəbinin geofiziki və hidroloqu Daqan əlavə edib: “Biz cəmiyyət üçün daha çox şirin su tapmaq üçün hər cür imkanlardan istifadə etməliyik”.
Tədqiqat qrupları Yer üzündə şirin su axtarılacaq son yerlərdən birini araşdırıb. Onlar bu yeri tapıblar və yaxın aylarda bütün dünyada öz laboratoriyalarında onun təxminən 50 min litrini təhlil edəcəklər. Alimlər onun mənşəyinin sirrini - suyun buzlaqlardan, quruda əlaqəli yeraltı su sistemlərindən və ya hər hansı bir birləşmədən gəldiyini araşdırırlar. Eyni zamanda, tədqiqat qrupu qeyd edir ki, suyun kimə məxsus olduğu, ondan kimin istifadə edəcəyi və təbiətə hədsiz zərər vermədən necə çıxarılacağı da müzakirə olunur. Əgər sonuncu mümkün olarsa, onda suyu kütləvi şəkildə ictimai istifadə məqsədilə sahilə çıxarmaq üçün illər lazım olacaq.
BMT-nin hesablamalarına görə, beş ildən sonra təmiz suya qlobal tələbat tədarükü 40 faiz üstələyəcək. İstiləşmə, iqlim böhranı, dəniz səviyyəsinin yüksəlməsi sahillərdəki şirin su mənbələrini tükəndirir, süni intellekt və bulud hesablamalarını gücləndirən məlumat mərkəzləri isə hədsiz dərəcədə su istehlak edir.
10-09-2025, 14:44
Ceyhun Bayramov ABŞ Dövlət Departamentinin rəsmisilə görüşdü
Azərbaycan Respublikasının xarici işlər naziri Ceyhun Bayramov ABŞ Dövlət Departamentinin Avropa və Avrasiya məsələləri üzrə Bürosunun baş rəsmisi Brendan Hanrahanı qəbul edib.
Bu barədə XİN-in Mətbuat xidməti məlumat yayıb.
Görüş zamanı Azərbaycan-ABŞ münasibətləri, Strateji Tərəfdaşlıq Xartiyasının hazırlanması məqsədilə Strateji İşçi Qrupunun yaradılması haqqında Anlaşma Memorandumundan irəli gələn məsələlər, Azərbaycan-Ermənistan normallaşma prosesi, habelə qarşılıqlı maraq doğuran regional və beynəlxalq təhlükəsizlik məsələləri müzakirə olunub.
Azərbaycan-ABŞ münasibətlərinin tarixi, bir sıra, o cümlədən təhlükəsizlik, enerji sahələri üzrə qarşılıqlı faydalı əməkdaşlıq ətrafında fikir mübadiləsinin aparıldığı görüşdə, xüsusilə cari ilin avqust ayında baş tutan ali səviyyəli səfər və təmasların münasibətlərin inkişafında əhəmiyyətli yer tutduğu qeyd edilib.
Tarixi Vaşinqton görüşü nəticəsində ölkəmizin təşəbbüskarı olduğu Azərbaycan-Ermənistan sülh gündəliyinin irəlilədilməsi istiqamətində əldə olunan tarixi razılıqların, o cümlədən sülh müqaviləsinin paraflanması və keçmiş münaqişənin qalıqları olan strukturların ləğvi üzrə atılan addımların vacibliyi vurğulanıb.
Görüş zamanı, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!