9-10-2025, 13:55
Vəngli kəndinə daha 112 nəfər qayıtdı - FOTO
Ağdərə rayonunun Vəngli kəndinə daha bir köç mərhələsi gerçəkləşib. Oktyabrın 9-da 28 ailədən ibarət 112 nəfər dogma elinə qayıtdı.
Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən verilən xəbərə görə, kənddə bərpa edilən yaşayış evlərinin açarları keçmiş məcburi köçkünlərə təqdim olunub.
Tədbirdə çıxış edən Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidməti publik hüquqi şəxsin icraçı direktorunun müavini Mahmud Əfəndiyev sakinləri təbrik edərək, onlara yeni evlərində rifah, sağlamlıq və xoşbəxt günlər arzulayıb.
M. Əfəndiyev bildirib ki, işğaldan azad olunandan sonra təmir və bərpa işləri aparılan kənddə, sakinlərin rahat yaşaması üçün bütün zəruri infrastruktur yaradılıb.
Xatırladaq ki, Vəngli kəndinə bugünədək 188 nəfərdən ibarət 51 ailə köçürülmüşdü. Beləliklə, bu gün gerçəkləşən köçlə birlikdə kəndə ümumilikdə 79 ailə, 300-dən çox sakin qayıdıb.
9-10-2025, 13:49
Paşinyan Brüsseldə Azərbaycanla sülhü müzakirə etdi
Ermənistanın baş naziri Nikol Paşinyan Brüsseldə keçirilən ikinci “Dünya qapıları” beynəlxalq konfransı çərçivəsində Lüksemburqun baş naziri Luk Fridenlə görüşüb.
Bu barədə Ermənistan hökuməti məlumat yayıb.
Tərəflər Ermənistan-Lüksemburq münasibətlərinin gündəliyinin məsələlərini müzakirə edib, ticarət-iqtisadi əlaqələrin inkişaf etdirilməsinin vacibliyini vurğulayıb, Ermənistan-Avropa İttifaqı əməkdaşlığının dərinləşdirilməsi ilə bağlı fikir mübadiləsi aparıblar.
Həmsöhbətlər Ermənistan-Azərbaycan sülh prosesinə də toxunub, regional sabitlik və əməkdaşlığı vurğulayıblar.
9-10-2025, 13:21
Tramp atəşkəsə nail olsa, onu Nobelə namizəd göstərəcəyik - Zelenski
"Ağ Evin hazırkı rəhbəri Ukraynada atəşkəsi təmin edərsə, biz prezident Donald Trampı Nobel Sülh Mükafatına namizəd göstərəcəyik".
Bunu oktyabrın 9-da jurnalistlərlə görüşündə Ukrayna prezidenti Vladimir Zelenski deyib.
O qeyd edib ki, Rusiya prezidenti Vladimir Putin atəşkəsdən qorxur, çünki onun üçün atəşkəsdən müharibəyə qayıtmaq çətindir.
"Geniş miqyaslı müharibədən atəşkəsə keçmək, sonra yenidən irimiqyaslı müharibəyə başlamaq onlar üçün asan deyil. İqtisadi cəhətdən çətindir, cəmiyyət baxımından çətindir, sülh baxımından çətindir. Və hələ də əlini sıxan ölkələrə münasibətdə bu, əlbəttə ki, asan deyil", - Zelenski bildirib.
Onun sözlərinə görə, amerikalılar üçün Rusiya prezidentini real danışıqlar aparmağa məcbur etməyin bu qədər çətin olmasının səbəbləri bunlardır və buna görə də Putin hələlik müharibəni seçir.
Zelenski vurğulayıb ki, Rusiyaya təzyiqlər artarsa, müharibə bitə bilər.
Donald Tramp müxtəlif beynəlxalq münaqişələrdə vasitəçilik səylərinə görə Nobel Sülh Mükafatına layiq olduğunu dəfələrlə açıq şəkildə bəyan edib.
Avqust ayında Ağ Ev ABŞ prezidentini Nobel Sülh Mükafatına namizəd göstərərək onu “sülhün prezidenti” adlandırıb.
Xatırladaq ki, bu mötəbər mükafata Ermənistan və Azərbaycan da Ağ Ev rəhbərinin namizədliyini irəli sürüb.
9-10-2025, 13:16
Qəzzada döyüşlər dayandırıldı - TƏCİLİ
Qəzza zolağında atəşkəs razılaşması qüvvəyə minib.
Məlumatı Misirin “Al Qahera News” telekanalı yayıb.
İsrail Baş naziri Benyamin Netanyahunun ofisi isə açıqlayıb ki, atəşkəs razılaşması yalnız bu axşam İsrail hökuməti tərəfindən təsdiqləndikdən sonra qüvvəyə minəcək.
Baş nazirin ofisindən bildirilib ki, sənədin təsdiqi üçün bu gün saat 17:00-da (Bakı vaxtı ilə 20:00) Təhlükəsizlik Kabinetinin iclası keçiriləcək. Kabinetə ölkənin müdafiə, təhlükəsizlik və xarici siyasət məsələlərində qərar qəbul edən əsas nazirlər daxildir.
Qeyd edək ki, ABŞ Prezidenti Donald Trampın vasitəçiliyi ilə İsrail və HƏMAS arasında atəşkəs razılaşması imzalanıb.
Tramp bəyan edib ki, “bütün girovlar çox yaxın zamanda azad ediləcək” və İsrail qüvvələri razılaşdırılmış xəttə qədər geri çəkiləcək.
Qəzza atəşkəsi ABŞ, Qətər, Misir və Türkiyənin birgə diplomatik səylərinin nəticəsi kimi qiymətləndirilir.
9-10-2025, 13:02
Narkotikin təsiri ilə avtobusu sürən şəxs həbs olunub - VİDEO
Sumqayıtda narkotik vasitənin təsiri altında sərnişin avtobusu idarə edən sürücü həbs olunub.
DİN-dən verilən xəbərə görə, Sumqayıt Şəhər Polis İdarəsi Dövlət Yol Polisi Şöbəsinin əməkdaşları tərəfindən hərəkətin təhlükəsizliyinin təmini məqsədi ilə profilaktik tədbirlər davam etdirilir. Sonuncu tədbir nəticəsində şəhər ərazisində 123 saylı marşrut xətti üzrə hərəkət edən 50-AF-276 dövlət qeydiyyat nişanlı sərnişin avtobusunu idarə edən sürücü Şahin İbrahimovun narkotik maddə qəbul etdiyi barədə şübhə yarandığından o, yol polisləri tərəfindən saxlanılaraq tibbi müayinəyə aparılıb.
Müayinə zamanı Ş.İbrahimovun narkotik maddə qəbul etdiyi müəyyən olunub. Onun barəsində inzibati protokol tərtib edilərək məhkəməyə göndərilib.
Məhkəmənin qərarı ilə Ş.İbrahimov 2 il müddətinə sürücülük hüququndan məhrum edilməklə 30 gün müddətinə inzibati qaydada həbs olunub.
9-10-2025, 12:48
Ankarada müdafiə nazirlərinin üçtərəfli görüşü keçirilir
Türkiyənin Ankara şəhərində Azərbaycan, Türkiyə və Gürcüstan müdafiə nazirlərinin görüşü keçirilir.
Bbu barədə Türkiyə Milli Müdafiə Nazirliyi "X" sosial media hesabında məlumat yayıb.
Görüşlərdə regional təhlükəsizlik, hərbi əməkdaşlıq və birgə təlimlərin keçirilməsi kimi məsələlərin müzakirə olunacağı gözlənilir.
9-10-2025, 12:45
Tanınmış vəkilin fəaliyyəti dayandırıldı
Tanınmış vəkil Zabil Qəhrəmanovun vəkillik fəaliyyəti müvəqqəti dayandırılıb.
Vəkillər Kollegiyasının Rəyasət Heyəti ötən gün bu barədə qərar qəbul edib.
Z.Qəhrəmanovun vəkillik fəaliyyəti 6 aylıq dayandırılıb.
Qeyd edək ki, Gəncədə yaşayan vəkil daha çox Tovuzda 10 yaşlı Nərmin Quliyevanı qətlə yetirməkdə təqsirləndirilən İlkin Süleymanovun müdafiəçisi kimi tanınıb. O, həmçinin qətl ittihamı ilə 11 il həbsə məhkum edilən şəxsin 4 il sonra bəraət alması ilə bağlı da gündəmə gəlib.
9-10-2025, 07:41
Qığılcımdan doğulmuşlar
"Mübarizə bu gün də var, yarın da,
Mən də onun ən ön sıralarında..."
(R.RZA)
Dünyanın qəribə, bir tərəfdən olduqca mürəkkəb, digər tərəfdən isə ahəngdar, qanunauyğun, rabitəli və demək ki, anlaşılan qaydaları, bu xüsusda da görünən və görünməyən tərəfləri vardır. Andromeda dumanlığından üzübəri, Böyük Süd yolunun açdığı möhtəşəm, ellipsvari trayektoriya ilə süzülüb axmaqla ümumən var olduğu Qalaktikaya yaraşıq verən, habelə Həyatiliyilə kainata meydan oxuyan YERimiz açılmamış gizlinləri ilə yanaşı, Allahın saxladığı istisnalar xaric, həm də konkret fiziki, kimyəvi quruluşa, tərkibə malikdir. Ancaq O, məhz bu nöqtəsindən zəka sahiblərini, düşüncə adamlarını ürəklərə qoru düşən mənəvi amillərilə bir daha düşündürmüş, təfəkkür mərhələlərinin keçid bucaqlarında heyrətləndirmiş, bununla da elmin bütün sahələrini pillə-pillə işıqlandırıb sevindirmişdir.
Düşünün, Dünyamızın Özü möhtəşəm bir Ulduz Partlayışından əmələ gəlmişdir. Enerjinin itməzliyi qanunundan yola çıxaraq anlayırıq ki, hər bir qabarcıq içində milyardlarla qabarcıq daşıyır. Bir könül, ruh insanı ədəbiyyatda bunu "...bir dünyada neçə dünya arzular..." kimi ifadə edib. Fizikada bu, elektrolitik dissosiasiya ilə; Kimyada kimyasal maddələrin içindəki maddələrin depolanması; Coğrafiyada Yer üzərində olan fiziki güc və onun potensialı; Tarixdə gələcəkdəki insan cəmiyyətinin yaranması, inkişafı üçün əsas hərəkətverici qüvvənin başlanğıc səbəbi, fikir məcmusu; Astranomiya və Təbiət elmində "Böyük Partlayış" sayəsində Göy cisimlərinin, kainatın potensial qabiliyyətinin bir növ, təqdimatı kimi ifadə olunur ki, bu da kinematoqrafiyada Ulduz müharibələrinin virtual təsvirlərinə qədər gedib çıxır. Ən gözəl, lakonik təqdimatı isə "Qurani-Kərim" vermişdir. Bu müqəddəs kitaba görə ən ali enerji Allaha məxsusdur. Bütün Yaranmışlarsa özündə Allahdan bir zərrə daşıyırlar.
Təfəkkür, zəka sahibi atomların, proton və neytronların tükənməz sayı qədər zərrənin və zərbənin təsirindən yaranan, necə deyərlər, gün işığına (bəlkə də zülmətə...) keçərək zaman-zaman vahidləşmiş, daşlaşmış bir qor yükü gəzdirir ruhunda. Əlbəttə, bu çağlayan dünyamızın hər bir millimetrlik koordinatında özü kimi də qaynayan bitməz-itməz enerji burulğanı bu kimi kəslərin yaşamlarının mayasında iz salmaya, orada bir təbəddülat yaratmaya bilməz. Bu aydındır. Ancaq məsələnin fəlsəfəsi ondadır ki, milyonlarla zərbənin zərrəsindən bir daha doğulmuş olan o seçilmiş əzabkeş fərd hətta bir əsəri, elmi kəşfi, yaradıcılığının bircə nümunəsi ilə belə minlərin, milyonların o işığa bürünməsinə, bununla da tarixin təkərinin həyat əhəmiyyətli hissəsinə çevrilməsinə vəsilə ola bilir..
...və beləliklə də, o möhtəşəm Ulduz selinin yaratdığı bir Dünya, habelə mabəd olaraq ondan doğulan bir kəhkəşan ulduz misalı, həyatın bitməz şillələrindən Dünya Məktəbi tədrisini keçmiş kimi olan dönməz bir Həqiqət, əqidə sahibi ruhən ondan qidalanan milyon könülə qaranlıqda işıq olması ilə həm də qarşıdakı tarixi epoxanın sarvanına çevrilmiş olur.
Hörmətlərimlə: Gülgəz NUR
8-10-2025, 21:30
Hüquqşünas Səməd Vəkilovun kitabı Prezident kitabxanasının saytında yer alıb.
Müvəkkil Hüquq Mərkəzi İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Qərbi azərbaycanlıların yurd həsrəti: Salyana deportasiya” layihəsi çərçivəsində tədqiqatçı-hüquqşünas Səməd Vəkilovun “Qərbi Azərbaycandan Deportasiyanın tarixi və hüquqi aspektləri: Salyana köçürülmə (1948-1953)” kitabı işıq üzü görmüşdür.
QHT.az xəbər verir ki, kitabın baş məsləhətçiləri Milli Məclisin Təbii ehtiyatlar komitəsinin sədri, dosent Sadiq Qurbanov, ADPU-nun prorektoru, professor Mahirə Hüseynova, elmi redaktor, dövlət mükafatı laureatı, tarix üzrə fəlsəfə doktoru Nazim Mustafa, redaktorlar Cəsarət Hüseynzadə, Telman İbrahimov, rəyçilər ADPU-nun Qərbi Azərbaycan Araşdırmalar Mərkəzinin rəhbəri, tarix üzrə fəlsəfə doktoru, Leyla Calalova, həmin mərkəzin baş mütəxəssisi Möhübbət Məmmədovdur.
Kitab Prezident kitabxanasının saytında yer alıb (https://www.ebooks.az/az/book/GlqonhT) bu barədə hüquqşünas Səməd Vəkilov məlumat verib.
Qeyd edək ki, “Qərbi Azərbaycandan Deportasiyanın tarixi və hüquqi aspektləri: Salyana köçürülmə (1948-1953)” kitabında 1948-1953-cü illərdə Qərbi Azərbaycanda yaşayan azərbaycanlılara qarşı həyata keçirilmiş deportasiya tarixi və hüquqi kontekstdə dəyərləndirilmişdir. O, cümlədən deportasiyaya məruz qalmış əhali qrupunun Salyan ərazisində Qarabağlı, Yeni Uluxanlı, Qaraçala, Xalac, Yolustü və.s. kəndlərdə məskunlaşdırılması ilə bağlı yaşanan ağır şərait, sürgün aktına məruz qalmış icmanın şəxsi hekayələri və bioqrafik məlumatları da yer almışdır.
8-10-2025, 19:31
Türk Dünyası Mediatorlar Birliyi təsis edildi
Türk Dünyası Mediatorlar Birliyi Ankarada təsis edilib.
Müvafiq sərəncam Türkiyə Respublikasının Prezidenti Rəcəb Tayyib Ərdoğan tərəfindən imzalanıb.
Təşəbbüs Mediasiya Şurasının təklifi və Müstəqil Sənayeçi və İş Adamları Dərnəyinin (MÜSİAD) dəstəyi ilə irəli sürülüb.
Qurumun yaradılması Türk dövlətləri arasında mediasiya, diplomatiya və hüquqi əməkdaşlığın dərinləşdirilməsinə xidmət edəcək.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!