5-11-2025, 15:33
Litva aeroportu dron uçuşuna görə bağlandı
Litvanın paytaxtı Vilnüsdə naməlum pilotsuz uçuş aparatına görə aeroportun fəaliyyəti müvəqqəti dayandırılıb.
Vilnüs Hava Limanının rəsmisi Tadas Vasilyauskas bildirib ki, hava limanının bağlanması iki reysə təsir edib.
O qeyd edib ki, reyslərə təsir minimal olub.
5-11-2025, 15:03
Şoyqu Cənubi Qafqazla bağlı mesaj verdi
Rusiya Təhlükəsizlik Şurasının katibi Sergey Şoyqu deyib ki, Qafqazdakı vəziyyət daim diqqət tələb edir.
TASS agentliyinin məlumatına görə, Şoyqu bunu Ermənistan Təhlükəsizlik Şurasının katibi Armen Qriqoryanla görüşdə bildirib.
"Bizim üçün saatlarımızı sinxronlaşdırmaq vacibdir. Son hadisələrlə, regionda - bütövlükdə Qafqazda, Cənubi Qafqazda baş verən müxtəlif inkişaflarla bağlı hər şey daimi diqqətimizi və məsləhətləşmələrimizi tələb edir".
Qriqoryan regiondakı vəziyyətlə bağlı detalları bölüşməyə hazır olduğunu bildirib və görüşmək imkanına görə ona təşəkkür edib.
Bu gün Moskvada MDB Təhlükəsizlik Şurası katiblərinin görüşü keçirilir. Görüş çərçivəsində Şoyqu bir neçə ayrı-ayrı ikitərəfli görüşlər, o cümlədən Azərbaycandan olan həmkarı ilə görüşəcək.
4-11-2025, 17:24
Salman bin Əbdüləziz İlham Əliyevə məktub göndərdi
Səudiyyə Ərəbistanı Krallığının vəliəhdi, Baş nazir Məhəmməd bin Salman bin Əbdüləziz Al Səud Azərbaycan Respublikasının Prezidenti İlham Əliyevə təbrik məktubu göndərib. Təbrikdə deyilir:
“Əs-səlamu əleykum və rəhmətullahi və bərəkətuhu.
Zati-alinizi ölkənizin Zəfər Günü və Dövlət Bayrağı Günü münasibətilə təbrik etməkdən və səmimi arzularımı çatdırmaqdan çox məmnunam.
Sizə möhkəm cansağlığı və xoşbəxtlik, qardaş Azərbaycan Hökumətinə və xalqına daha çox tərəqqi və firavanlıq diləyirəm.
Zati-alinizə dərin hörmət və ehtiramımı bildirirəm”.
4-11-2025, 17:13
Ankarada gərginlik - Ərdoğanla Bağçalının arası dəyib
Türkiyə Prezidenti Rəcəb Tayyib Ərdoğanla onun müttəfiqi Milliyyətçi Hərəkat Partiyasının (MHP) sədri Dövlət Bağçalı arasında son günlər gərginlik yaşanır. Gərginliyin başlanğıc nöqtəsi Şimali Kiprdə (ŞKTR) keçirilən prezident seçkilərinin nəticələrinin açıqlanması olub.
Seçkilərdə federasiya tərəfdarı olan Tufan Erhürmanın qalib gəlməsinə Ərdoğan təmkinlə münasibət bildirsə də, Bağçalının reaksiyası daha sərt olub.
Ərdoğan dərhal Şimali Kiprin yeni prezidentini təbrik edib və əməkdaşlığa açıq olduğu barədə mesaj göndərib. Bağçalı isə əksinə, seçkiləri “federasiya tərəfdarlarının qələbəsi” adlandırıb və ŞKTR parlamentini adanın Türkiyəyə birləşdirilməsi ilə bağlı qərar verməyə çağırıb.
Oktyabrın 29-da Respublika Günü münasibətilə keçirilən rəsmi mərasimlərdə Bağçalının həm Anıtkabirdəki ziyarətə, həm də Ərdoğanın rəsmi qəbuluna qatılmaması siyasi dairələrdə böyük rezonans doğurub.
Əvvəlcə onun səhhəti ilə bağlı fərziyyələr səslənsə də, MHP-yə yaxın mənbələr bu qərarın siyasi motivli olduğunu bildiriblər. Partiyaya yaxın “Türkgün” qəzetinin baş redaktoru Məhəmməd Müftüoğlu Bağçalı ilə çəkilmiş fotosunu paylaşaraq yazıb ki, MHP liderini anlamaq üçün onun mesajlarını oxumağı bacarmaq lazımdır. Bu paylaşım, çoxlarının fikrincə, AKP-yə yönəlik bir xəbərdarlıq olub.
Siyasi müşahidəçilər hesab edirlər ki, problem yalnız Kipr məsələsi ilə məhdudlaşmır.
2022-ci ildə “Ülkü Ocaqları”nın keçmiş rəhbəri Sinan Ateşin qətli və bu işlə bağlı MHP üzvlərinin həbsi AKP-MHP münasibətlərində ilk çatları yaradıb. Ərdoğanın mərhumun həyat yoldaşı Ayşə Ateşi qəbul etməsi Bahçəli tərəfinin ciddi narazılığına səbəb olmuşdu.
Bundan başqa, bu il keçirilən bəzi kadr dəyişiklikləri, xüsusilə MHP-yə yaxın adların vacib vəzifələrdən uzaqlaşdırılması da milliyyətçilər arasında narazılıq doğurub.
Bağçalı sentyabrda “Türkiyə–Rusiya–Çin ittifaqı” ideyasını irəli sürməsi, bu bəyanatın Ərdoğanın Nyu-Yorka, BMT Baş Assambleyasına səfəri ərəfəsində səslənməsi də diqqətdən qaçmayıb. Analitiklər bunu iki tərəf arasında xarici siyasətdə baxış fərqi kimi dəyərləndiriblər. Ərdoğan Qərblə münasibətləri taraz saxlamağa çalışır, Bahçəli isə daha “Avrasiya yönlü” xətti müdafiə edir.
Eyni zamanda, Bağçalının “Türkiyədə iki vitse-prezident - biri kürd, biri ələvi olmalıdır” təklifi də iqtidar düşərgəsində sərt reaksiya doğurub. Hakim partiyanın deputat Şamil Tayyar bu ideyanı “Livan modelinə aparan təhlükəli təklif” adlandırıb.
Bağçalı bu günkü qrup toplantısında iddialara cavab verib.
Bağçalı çıxışında “Cümhur İttifaqı bayraqdır, vətəndir, millətdir” sözləri ilə birlikdə AK Partiya ilə əməkdaşlığın davam etdiyini bildirib: “Biz Milliyyətçi Hərəkat Partiyası və Cümhur İttifaqıyıq. Bu yol davam edəcək”.
Bağçalı Respublika Günü mərasimlərinə qatılmaması ilə bağlı müzakirələrə də toxunub. O, bunun şəxsi səbəblərlə bağlı olduğunu və hərəkətinin “protest kimi başa düşülməsini” istəmədiyini deyib.
Jurnalistlər MHP liderindən Avropa İnsan Hüquqları Məhkəməsinin Selahəttin Demirtaş barədə qərarını xatırladanda, Bağçalı belə cavab verib: “Hüquqi yollar nəticəsini verib. Onun azadlığa çıxması Türkiyə üçün xeyirli olacaq”.
Bağçalının çıxışı “ittifaq sarsılmaz” mesajı kimi qiymətləndirilsə də, müşahidəçilərə görə, AK Partiya və MHP arasında son dövrlər müəyyən fikir ayrılıqları qalmaqdadır.
Buna baxmayaraq, Bağçalının son çıxışı siyasi temperaturu bir qədər endirib. Lakin onun Demirtaşla bağlı “yumşaq tonu” növbəti günlərdə Türkiyə siyasətinin əsas müzakirə mövzularından biri olacaq.
4-11-2025, 16:59
Pakistan Prezidenti İlham Əliyevi təbrik etdi
Pakistan İslam Respublikasının Prezidenti Asif Əli Zərdari Prezident İlham Əliyevə təbrik məktubu ünvanlayıb. Məktubda deyilir:
"Zati-aliləri.
Şanlı Zəfər Gününün beşinci ildönümü münasibətilə Zati-alinizə və qardaş Azərbaycan xalqına Pakistan Hökuməti və xalqı adından, şəxsən öz adımdan ən səmimi təbriklərimi çatdırıram.
Bu gün Zati-alinizin uzaqgörən rəhbərliyi ilə Vətəninin suverenliyini və ərazi bütövlüyünü fədakarlıqla bərpa edən Azərbaycan xalqının əzmkar mübarizəsinin və qətiyyətinin qürurverici təntənəsidir. İşğal olunmuş ərazilərin azad edilməsi Azərbaycanın müasir tarixində ədalətin, dözümlülüyün və milli birliyin rəmzi olan əlamətdar bir nailiyyət kimi qalır.
Bu il Qələbə Gününün qeyd olunması Ermənistanla münasibətlərdə əhəmiyyətli inkişafdan sonra regionda davamlı sülhə doğru müsbət nəticələrin təşviq edilməsi ilə üst-üstə düşdüyündən xüsusi əhəmiyyət daşıyır. Bu tarixi məqam hamı üçün sabitlik, əməkdaşlıq və firavanlıqla təmin olunacaq gələcəyin qurulması üçün yeni ümidlər doğurur.
Pakistan Azərbaycanın suverenliyinə və ərazi bütövlüyünə qətiyyətli və ardıcıl dəstəyini bir daha təsdiqləyir. Əminəm ki, xalqlarımız və dövlətlərimiz arasında dostluq və qardaşlıq əlaqələri qarşıdakı illərdə də möhkəmlənəcəkdir.
Fürsətdən istifadə edərək, Zati-alinizə möhkəm cansağlığı və səadət, qardaş Azərbaycan xalqına davamlı sülh, tərəqqi və firavanlıq arzularımı çatdırıram.
Zati-aliləri, ən yüksək ehtiramımı qəbul etməyinizi xahiş edirəm".
4-11-2025, 00:06
İtaliyadan Rusiyaya etiraz - SƏBƏB
İtaliya Xarici İşlər Nazirliyi Rusiyanın Romadakı səfiri Aleksey Paramonovu çağırıb.
Rusiya diplomatik missiyası səfirin İtaliya Xarici İşlər Nazirliyinə çağırıldığını təsdiqləyib. Məlumata görə, bu addımın atılmasına səbəb Rusiya Xarici İşlər Nazirliyinin sözçüsü Mariya Zaxarovanın şərhi olub.
Belə ki, Zaxarova Romanın mərkəzindəki tarixi qüllənin uçmasını şərh edərək bildirib ki, əgər ölkə hökuməti pullarını Ukraynanı dəstəkləməyə xərcləməyə davam edərsə, bütün İtaliya uçulacaq.
3-11-2025, 20:36
Vuçiç təslim olur
Serbiyada hökumət əleyhinə kütləvi etirazlardan sonra prezident Aleksandar Vuçiş vaxtından əvvəl parlament seçkilərinin keçirilməsinə hazır olduğunu bəyan edib.
Bununla belə, yeni seçkilərin tarixi hələ müəyyənləşdirilməyib.
Qeyd edək ki, noyabrın 1-də Novi-Sad şəhərində minlərlə insan toplanaraq hökumət əleyhinə aksiyada iştirak edib. Təxminən 39 min nəfərin qatıldığı tədbir 2024-cü ildə dəmir yolu vağzalında baş vermiş faciənin ildönümünə həsr olunub.
Həmin il vağzalın damının uçması nəticəsində bir neçə nəfər həyatını itirmişdi.
3-11-2025, 19:53
Simonyan da namizəd oldu
Ermənistanın parlamentinin sədri Alen Simonyan 2026-cı il parlament seçkilərində iştirak etmək üçün namizədliyini irəli sürüb.
O, "Vətəndaş müqaviləsi" partiyasından namizədliyini irəli sürüb.
3-11-2025, 19:29
Ermənistan Türkiyəni gözləyir
Ermənistan hökumətinin prioritet istiqamətlərindən biri Türkiyə ilə münasibətlərin normallaşdırılmasıdır.
Bu barədə Ermənistan Təhlükəsizlik Şurasının katibi Armen Qriqoryan Brüsseldə keçirilən konfransda bildirib.
Qriqoryanın sözlərinə görə, Ermənistan artıq Türkiyə ilə sərhədin açılması üçün bütün zəruri hazırlıqları başa çatdırıb.
O qeyd edib ki, sərhədin açılması həm Ermənistan, həm də Türkiyə iqtisadiyyatına qarşılıqlı fayda gətirə bilər.
3-11-2025, 18:50
Ərdoğan parada onlarla birlikdə gələcək
Xəbər verdiyimiz kimi, Türkiyə Prezidenti Rəcəb Tayyib Ərdoğanın Azərbaycana Zəfər paradında iştirak edəcək.
Ərdoğanla birlikdə Türkiyənin milli müdafiə naziri Yaşar Gülər və xarici işlər naziri Hakan Fidanın da paradda iştirak edənlər arasında olacağı gözlənilir.
Qeyd edək ki, parad noyabrın 8-də paytaxtın Azadlıq meydanında təşkil olunacaq. Bu tarix Zəfərin 5-ci ildönümünə təsadüf edir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!