8-07-2024, 21:10
Sabiq erməni nazirin malikanəsi müsadirə olundu
ABŞ məhkəməsi Ermənistanın keçmiş maliyyə naziri Qaqik Xaçatryanın ailəsinə məxsus Los-Ancelesdəki malikanənin müsadirə edilməsinə qərar verib.
Bu barədə Ermənistan Baş Prokurorluğu məlumat yayıb.
Qərara əsasən, cinayət mənşəli mülkiyyət hesab edilən malikanə ən yüksək bazar qiymətinə satılacaq.
Məhkəmə malikanənin müsadirə edilməsi və satılması barədə qərarı Ermənistan Baş Prokurorluğu ilə ABŞ-nin müvafiq orqanlarının əməkdaşlığı nəticəsində qəbul edib. Hazırda erməni və amerikalı tərəflər malikanənin satışından əldə ediləcək məbləğin böyük hissəsinin Ermənistana qaytarılmasını təmin etmək üçün danışıqlar aparır.
Qeyd edək, Ermənistan Milli Təhlükəsizlik Xidmətinin istintaq şöbəsi bundan əvvəl keçmiş nazirin oğulları - Qurgen və Artem Xaçatryanlara qarşı cinayət işi açıb. Ermənistan və ABŞ hüquq-mühafizə orqanlarının əməkdaşlığı nəticəsində ABŞ-də müvafiq məhkəmə prosesi başlayıb.
8-07-2024, 20:53
Ukraynada ölənlərin sayı 33-ə çatdı
Ukraynanın xilasetmə xidməti bu gün səhər saatlarında Rusiyanın Ukrayna şəhərlərinə endirdiyi raket zərbəsi nəticəsində ölən və yaralananlarla bağlı son məlumatları açıqlayıb.
Qurum 33 nəfərin həlak olduğunu, 140 nəfər yaralandığını təsdiqləyib.
Kiyevdə 22, Dnepropetrovsk vilayətində isə 11 nəfərin həlak olduğunu bildirir.
140 yaralıdan 74-ü Kiyevdə, ikisi Kiyev vilayətində, 64-ü Dnepropetrovsk vilayətində olub.
Dağıntılar altından 19 nəfər xilas edilib.
İyulun 8-də səhər saatlarında Rusiya Ukrayna şəhərlərinə iri raket zərbələri endirib. Ukraynanın ən böyük uşaq xəstəxanası olan Oxmatdıt qismən dağılıb. Ölkənin səlahiyyətli orqanları xəstəxanada iki nəfərin öldüyünü bildirib. Uşaqlar da daxil olmaqla daha 16 nəfər yaralanıb.
8-07-2024, 19:32
Putin Pezeşkianla telefon danışığı apardı
Rusiya prezidenti Vladimir Putin İranın yeni seçilən lideri Məsud Pezeşkianla telefon danışığı aparıb.
Bu barədə Kremlin mətbuat xidməti məlumat yayıb.
Putin Pezeşkianı prezident seçkilərində qələbəsi münasibətilə təbrik edib. Liderlər 2024-cü ildə şəxsi təmaslar barədə razılığa gəliblər.
“Hər iki tərəf əldə olunmuş yüksək səviyyədə mehriban qonşuluq Rusiya-İran münasibətlərindən məmnunluq ifadə edib və müxtəlif sahələrdə qarşılıqlı faydalı əməkdaşlığın daha da inkişaf etdirilməsi üçün yaxından işləməyə hazır olduqlarını təsdiqləyiblər”, - Kremlin mətbuat xidmətindən bildirilib.
8-07-2024, 18:27
Ərdoğan Pezeşkianla regionu müzakirə etdi
Türkiyə Prezidenti Rəcəb Tayyib Ərdoğan İranın yeni seçilmiş prezidenti Məsud Pezeşkian ilə telefon danışığı aparıb.
Bu barədə Türkiyə Prezidentinin mətbuat xidməti məlumat yayıb.
Telefon danışığı zamanı Türkiyə ilə İran arasında ikitərəfli əlaqələr, regional və qlobal məsələlər müzakirə edilib. Ərdoğan Türkiyə ilə İran arasındakı əlaqələrin yeni dövrdə də hər sahədə inkişaf etməyə davam edəcəyinə inandığını bildirib.
Ərdoğan Pezeşkianı qələbə münasibətilə təbrik edib, ona yeni vəzifəsində uğurlar arzulayıb.
8-07-2024, 17:51
Putin Şoyqunun köməkçilərini işdən çıxardı
Rusiya prezidenti Vladimir Putin Təhlükəsizlik Şurasının katibi Sergey Şoyqunun köməkçiləri - Yevgeni Anoşin və Nail Muxitovu işdən azad edib.
Bu barədə rus KİV-ləri məlumat yayıb.
Məlumata görə, Anoşin və Muxitovun tutduqları vəzifələrdən uzaqlaşdırılmasının səbəbi açıqlanmır.
Təhlükəsizlik Şurası katibinin köməkçisi vəzifələrini kimin tutacağı hələlik məlum deyil.
8-07-2024, 16:38
Polşa və Ukrayna arasında hərbi saziş imzalandı
Polşanın paytaxtı Varşavada Polşa və Ukrayna arasında müdafiə və təhlükəsizlik sahəsində 10 il müddətinə əməkdaşlıq haqqında saziş imzalanıb.
Sənədi Polşanın baş naziri Donald Tusk və Ukrayna prezidenti Volodimir Zelenski imzalayıblar. İmzalanma mərasimi onların danışıqları zamanı baş tutub.
Baş nazir qeyd edib ki, bu sənədə qarşılıqlı öhdəlik kimi yanaşır. Onun sözlərinə görə, Polşa yaxın vaxtlarda sazişin həyata keçirilməsi üçün əməli addımlara başlayacaq.
8-07-2024, 16:26
Paşinyan Təhlükəsizlik Şurasının iclasını keçirdi
İyulun 8-də Ermənistanın baş naziri Nikol Paşinyanın rəhbərliyi ilə Təhlükəsizlik Şurasının növbəti iclası keçirilib.
Bu barədə hökumətin mətbuat xidmətinin məlumatında bildirilib.
Məlumata görə, görüşdə Silahlı Qüvvələrdə cari islahatlar və avtomatlaşdırılmış vahid idarəetmə sistemi, eləcə də bioloji təhlükəsizliklə bağlı məsələlər müzakirə olunub.
7-07-2024, 22:22
Fransa seçkiləri: Solçular birinci, Makron ikinci yerdədir
Bu gün Fransa parlamentinin aşağı palatasına seçkilər keçirilib.
Günün sonuna qədər seçici fəallığı 67,1% təşkil edib.
Sonuncu seçki məntəqələri yerli vaxtla saat 20:00-da bağlanıb. Seçici fəallığı birinci turun göstəricisini üstələyib, bu, 1997-ci ildən bu yana rekord göstəricidir. Qeyd edək ki, iyunun 30-da keçirilən birinci turda seçicilərin 66,71 faizi seçki məntəqələrinə gedib.
BFMTV bildirib ki, parlament seçkilərində siyasi blokların heç biri mütləq səs çoxluğu əldə edə bilməyib. İlkin nəticələrə görə, solçu Yeni Xalq Cəbhəsi seçkilərdə liderlik edir.
Fransa prezidenti Emmanuel Makronun koalisiyası ikinci, Marin Le Penin partiyası isə üçüncü yerdədir
Yekun nəticələr iyulun 8-i səhər elan olunacaq.
Kanal qeyd edir ki, Makron ölkədə parlament seçkiləri başa çatdıqdan sonra xalqa müraciət edə bilər
7-07-2024, 20:18
Rusiyada güclü zəlzələ baş verdi
Rusiyanın Kamçatka yarımadasında zəlzələ baş verib.
Bu barədə Rusiya Elmlər Akademiyasının Geofizika Xidmətinin Kamçatka bölməsi məlumat yayıb.
Zəlzələnin maqnitudası 6.1, dərinliyi 95 kilometr olub.
Qeyd olunur ki, zəlzələnin episentri Ust-Kamçatskdan 69 kilometr məsafədə yerləşib.
7-07-2024, 19:28
Ərdoğan UEFA-ya etiraz etdi
Türkiyə Prezidenti Rəcəb Tayyib Ərdoğan Avropa Futbol Assosiasiyaları İttifaqının (UEFA) Türkiyə millisinin futbolçusu Merih Dəmiralı iki oyunluq diskvalifikasiya etmək qərarını siyasi motivli adlandırıb.
Türkiyə lideri Berlində keçirilən futbol üzrə Avropa çempionatının (Avro-2024) 1/4 final mərhələsinin Türkiyə – Niderland oyununda onu müşayiət edən jurnalistlərlə söhbətində UEFA-nın qalmaqallı qərarını şərh edib.
“Açıq şəkildə qeyd etmək lazımdır ki, UEFA-nın Merih Dəmiralla bağlı diskvalifikasiya qərarı Avropa çempionatına ciddi kölgə salıb. Bu, izaholunmaz, sırf siyasi qərardır”, - deyə Ərdoğan bildirib.
Türkiyə Prezidenti vurğulayıb ki, UEFA-nın türk futbolçu ilə bağlı mövqeyi şəxsən Dəmirala qarşı deyil, bütövlükdə Türkiyə xalqını cəzalandırmaq cəhdidir.
“Türkiyə yığmasının bu ədalətsizliyə ən yaxşı cavabı meydanda nümayiş etdirdiyi gözəl oyun oldu”, - deyə Ərdoğan bildirib.
Türkiyə dövlətinin başçısı eyni zamanda Niderland ilə oyunda niderlandlı futbolçunun qaydaları açıq-aşkar pozduğuna görə hakimin penalti təyin etmədiyini qeyd edib.
Ərdoğan əmin edib ki, Türkiyə bundan sonra da futbolu inkişaf etdirəcək və getdikcə qarşısına daha iddialı hədəflər qoyacaq.
Türkiyə lideri, həmçinin Berlindəki oyunda Niderland millisinin azarkeşlərinə “centlmen davranışlarına” görə təşəkkür edib və bu komandaya Avro-2024-ün finalı yolunda uğurlar arzulayıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!