Qaraçöp kəndində “Qaraçöp İcma Mərkəzi” fəaliyyətə başlayır.
Mərkəz heç bir maddi dəstək olmadan kəndin könüllü fəal gəncləri tərəfindən təsis olunub.
QİM-in yaranmasının səbəbi icmadakı təhsilə olan marağın, inteqrasiyanın və icmanın səsinin daha böyük kütləyə çatdırılmasıdır. Jurnalist Tozu Gülmmədova QİM-in təsisçilərindən biridir. O, “Marneuli” radiosu ilə söhbəti zamanı mərkəzlə bağlı məlumat verib. Onun sözlərinə görə, mərkəzdə gənclərin özlərini inkişaf etdirmələri üçün bir sıra fəaliyyətlər həyata keçiriləcək.
“Mərkəzdə gənclər müxtəlif layihələr həyata keçiriləcək. Bu mərhələdə gürcü dili danışıq kursu, musiqi alətlərində ifa kursları, özünüinkişaf təlimləri və kitab oxumaqla bağlı tədbirlərimiz var. Bundan başqa ümumi icma əhalisinə maraqlı olan tədbirlər keçirməyi planlayırıq, kəndin tanınmış aşıqları, sənətkarlarının xatirəsinə həsr olunmuş tədbirlər və s.”
Tozu Gülməmmədova üzv olmaq üçün gənclərin onlara müraciət etdiklərini bildirib. T. Gülməmmədova qeyd edib ki, iki ay əvvəl Qaraçöp kəndində araşdırma apararaq gənclərin ehtiyacları, mərkəzdə hansı yeniliklərin olmasını istədikləri ilə bağlı məlumat toplayıblar.
Təsisçi mərkəzin açılmasının vacibliyindən də söhbət açıb.
“Mərkəzin yaranması bizim üçün çox vacib idi çünki gənclərin məktəbdən başqa özlərini inkişaf etdirəcək imkanları yox idi. Bu mərkəz hər kəsə, hər ideyaya açıq mərkəzdir.”
Qeyd edək ki, “QİM” Qaraçöpdə təsis edilən ilk icma mərkəzidir.