Mahmud Fəzli aclıq aksiyasına başlayıb

Azərbaycan milli kimliyi uğrunda dinc mübariz, il yarımdır Təbrizin mərkəzi zindanında saxlanan Yeni Güney Azərbaycan Milli Oyanış Hərəkatının üzvü Mahmud Fəzli aprelin 7-də aclıq aksiyasına başlayıb.

"Media forum" saytının məlumatına görə, Mahmud Fəzli aclığa Ali Məhkəməyə yazdığı şikayət məktubunun göndərilməsinə Təbriz zindanı rəisinin mane olmasından sonra başlayıb. Təbriz zindanının rəisi aprelin 5-də azərbaycanlı fəalların saxlandığı korpusa baxış keçirərkən Mahmud Fəzli ağır şəraitə kəskin etiraz bildirib. Bundan sonra o, zindan rəhbərliyinin təhdid və təhqirinə məruz qoyularaq narkotik maddələr ittihamı ilə saxlanan məhbusların yanına salınıb. İran Kəşfiyyat Nazirliyinin (ETTELAAT) əməkdaşları Yeni GAMOH təşkilatı mərkəzi komitəsinin üzvü Mahmud Fəzlini 2012-ci il dekabrın 31-də Təbrizdə tutub. Təşkilatın digər üzvləri Ayət Mehrəlibəyli, Lətif Həsəni, Şəhram Radmehr, Behbud Quluzadə ötən ilin yanvar-fevral aylarında həbs edilib.

Təbriz məhkəməsi azərbaycanlı fəalları qanunsuz təşkilat yaratmaqda və dövlət quruluşuna qarşı təbliğat aparmaqda günahlandıraraq onların hər birini 9 il müddətinə azadlıqdan məhrum edib.