Butov.az GünAz TV - yə istinadən xəbər verir ki, avqustun 8-də Əhər məhkəməsində azərbaycanlı milli-mədəni fəalların son məhkəmə iclası keçirilib.

Hakim Baqirpurun sədrliyi ilə keçirilən iclas yerli vaxtla saat 10:00-da başlayıb, iş saatının son dəqiqələrinə qədər davam edib.

Beynəlxalq Ana Dili Günü mərasimi dosyesi ilə bağlı mühakimə edilənlərdən Abbas Lisani, Rəhim Qulami, Əsgər Əkbərzadə, Əkbər Əbulzadə və İbrahim Nuri daxili təhlükəsizliyin əleyhinə olan qruplar yaratmaqda, Şapur Nüsrətpur, İsrafil Fətullazadə, Məhəmməd Rəhmanifər, Murtaza Məhəmmədi, Meysəm Colani, Meysəm Azadi, Beytulla Bərzgər, Mənsur Seyfi, Həbib Əbulzadə və Vəhid Faizpur daxili təhlükəsizliyin əleyhinə olan qruplara üzv olmaqda günahlandırılıb.

Əhərdə məlum təhqiramiz “Fitilə” televiziya verilişinə qarşı keçirilən etiraz aksiyalarında tutulanlardan İsrafil Fətullazadə, Əlirza Çingizi, Hamid Allahverdi, Calal Derovgəri, Əkbər Əbulzadə, Məcid Nağızadə, Murtaza Şokri, Əkbər Cahangiri, İbrahim Nuri, Vahid Bəstami, Süleyman Kazimi, Murtaza Səfəri, Mehdi Zəncir Bulaği və Arəş Cəfəri daxili təhlükəsizliyə qarşı toplaşma və sövdələşmədə ittiham olunublar.

Həmin gün məhkəmənin 1-ci şöbəsində hakim Nəzərinin sədrliyi ilə Əkbər Cahangiri və İbrahim Nurinin son məhkəmə iclası keçirilib. Çin rejiminin uyğur türklərinə qarşı cinayətləri ilə əlaqədar etiraz aksiyasına qoşulan fəallar sistemin əleyhinə təbliğ etmək ittihamı ilə üzləşib.

Abbas Lisani, Rəhim Qulami, Əsgər Əkbərzadə, Şapur Nüsrətpur, Meysəm Colani, İbrahim Nuri, Əlirza Çingizi, İsrafil Fətullazdə, Vahid Bəstami, Süleyman Kazimi, Mehdi Zəncir Bulaği, Beytulla Bərzgər, Murtaza Səfəri, Arəş Cəfəri, Əkbər Cahangiri, Murtaza Şokri, Hamid Allahverdi, Murtaza Məhəmmədi və Məcid Nağızadə məhkəməyə təqdim etdikləri müdafiə mətnini Azərbaycan türkcəsində yazıblar.

Avqustun 8-də, 2014-cü il fevralın 20-də Əhərdə Beynəlxalq Ana Dili Günü münasibəti ilə keçirilən mərasimdə tutulanlar, 2015-ci il noyabrın 12-də İran televiziyasında yayılan məlum təhqiramiz “Fitilə” verilişinə qarşı keçirilən etiraz aksiyasında saxlanılanlar, həmçinin 2015-ci il Qüds günündə Çin rejiminin uyğur türklərinə qarşı cinayətlərinə etiraz edən fəalların ittihamlarına baxılıb.
Məhkəmə hökmünün yaxın günlərdə elan olunacağı gözlənilir.