“QƏLƏMİNİ SİLAHA DƏYİŞƏN MƏDƏT”

Şəhid Mədət Qəmbərov 26 sentyabr 1995-ci ildə ailəsinin məskunlaşdığı Bərdədə, “Çadır şəhərciyi”ndə dünyaya gəlib. O, 2013-cü ildə İmamqulubəyli Qəsəbə Tam Orta Məktəbini bitirib. Elə həmin ildə Gəncə Dövlət Universitetinin Azərbaycan dili və Ədəbiyyat fakültəsinə daxil olub. 2017-ci ildə ali məktəbi bitirib hərbi xidmətə yollanıb. 2019-cu ildə 69 saylı köçkün məktəbinə müəllim təyin olunub. Mədətin bir arzusu da vardı – tarixçi olmaq. Ona görə də, həmişə öz üzərində çalışırdı. Ona “Evlənmək vaxtındır,” - deyəndə, o, “Kəndimizi alacağıq, toyu da orada edəcəyik. İndi ermənyə toy tutmaq vaxtıdır,”- deyirmiş.
2020-ci ilin iyulunda baş verən Tovuz hadisələri və general Polad Həşimovun şəhid olması Mədətə çox təsir edir. Odur ki, İkinci Qarabağ Müharibəsi başlayan kimi o, özünü cəbhədə hiss edir. Mədət müharibə başlayandan bir gün sonra könüllü olaraq cəbhəyə yollanır. Onun döyüş yolu Ağdərədən başlayıb elə orada da bitir. Oktyabrın 16-da Mədət Qəmbərov qəhrəmanlıqla şəhid olur. Ölümündən sonra “Vətən uğrunda” medalı ilə təltif olunur. Onun məzarı Ağdam Şəhidlər Xiyabanındadır.
Şəhidin atası Ağdamın Mollalar kəndindən olan, Birinci Qarabağ Müharibəsinin iştirakçısı, Əzim Qəmbərovun xatirə yazısı da çox kövrəkdi,
“Mən aşiq qanlı qala,
Qanlı yol, qanlı qala,
Rəvadırmı görəsən
Biz ölək, qanlı qala?!
Qanlı qalmadı, onu qanına bələdik. Oğlum, bu xatirəm üçün məni bağışla,”- deyərək, yeganə təsəllimizin Qələbəmiz olduğunu yazır.
Bu məlumatları istedadlı şairə Tahirə İmanovanın ötən il çap edilmiş “Qələmini silaha dəyişən Mədət” adlı kitabından əldə etmişik. Kitaba Tahirə xanımın “Bu millətin dərya tutmaz dərdi var” adlı yazısı ilə yanaşı şəhidin doğmaları, müəllimləri, dostları və şagirdlərinin xatirə yazıları da daxil edilib.

Mina RƏŞİD