16-11-2022, 19:25
"Zəngəzur" Cəmiyyətləri İctimai Birliyinin bəyanatı: Fransa Senatının qətnaməsi
hüquq, ədalət anlayışına ləkədir
Noyabrın 15-də Fransa Senatında qəbul edilmiş “Azərbaycana qarşı sanksiyaların tətbiqi və onun Ermənistan ərazisindən dərhal geri çəkilməsi, 9 noyabr 2020-ci il tarixli atəşkəs razılaşmasına riayət etməsi tələbi və iki ölkə arasında dayanıqlı sülhün bərqərar olmasına yönəlmiş bütün təşəbbüslərin təşviq edilməsi” adlı qətnamə özünü demokratik dəyərlərə malik sivil dövlət sayan Fransada hüquq sisteminin ədalətdən, həqiqətdən nə qədər uzaq olduğunun ifadəsi, real gerçəkliyin tam əksidir, böhtan, yalan və iftira dolu sənəddir. Bu sənədin Fransa Senatında məhz indiki günlərdə - Azərbaycanla Ermənistan arasında münasibətlərin normallaşması üçün sülh sazişinin imzalanması ərəfəsində qəbulu iki qonşu xalqın, region ölkələrinin ümidlə, inamla gözlədiyi prosesin baş tutmaması üçün düşünülmüş addımdır. Butov.az Ordum.az-a istinad edərək bildirir ki, bu fikirlər "Zəngəzur" Cəmiyyətləri İctimai Birliyinin bəyanatında yer alıb.
Əlcəzairdə milyonlarla günahsız insanı məhv etmiş, ATƏT-in Minsk Qrupunun 3 həmsədrindən biri olmuş, Azərbaycan ərazilərinin 30 ilə yaxın bir müddətdə Ermənistan tərəfindən işğalda saxlanmasına, mülki əhaliyə qarşı törədilmiş qanlı qırğınların, deportasiya və etnik təmizləmə siyasətinə qarşı bir dəfə də olsun etiraz bildirməmiş Fransa Senatında belə bədnam qətnamənin qəbulu beynəlxalq hüququn tapdanması, Fransa dövlətinin qanunverici, ali icra sisteminin bəşəri dəyərlərdən uzaq olduğunun, siyasi ikiüzlülüyün, xristian təəssübkeşliyinin, öz vətəndaşlarına, qonşularına müsibətlər yaşatmış təcavüzkar Ermənistanın separatçı, davakar hərbi-siyasi dairələrinə siyasi, hərbi, mənəvi, şirnikləndirici dəstəyin aydın ifadəsidir.
Bu, haqqın, ədalətin, hüququn, həqiqətin tapdanmasıdır!
"Zəngəzur" Cəmiyyətləri İctimai Birliyi olaraq, Fransa Senatının tarixi reallığa, hüquqa, ədalətə zidd addımını pisləyirik, belə bir əsassız qətnamənin qəbuluna etiraz edirik!
Bəyanat Fransa Senatına, prezidentinə, Bakıdakı səfirliyinə, beynəlxalq təşkilatlara göndərilmişdir.
Sədr: Hacı Abdulla
16.11.2022
16-11-2022, 19:25
Azərbaycan Fransaya nota verdi
Noyabrın 16-da Fransanın Azərbaycandakı müvəqqəti işlər vəkili JüLyen Lö Lan Xarici İşlər Nazirliyinə (XİN) çağırılaraq, noyabrın 15-də Fransa Senatında Azərbaycan əleyhinə qəbul edilmiş qətnamə ilə bağlı XİN-in etiraz notası təqdim edilib. Bu barədə XİN-dən məlumat verilib. Görüş zamanı Fransa Senatında qəbul edilmiş tamamilə həqiqətdən uzaq, yalan və iftira dolu müddəaların əks olunduğu qətnamənin Azərbaycan tərəfindən qətiyyətlə rədd edildiyi diqqətə çatdırılıb. Qətnamənin açıq təxribat xarakteri daşıdığı və sülh prosesinə öz töhfəsini vermək iddiasında olan Fransanın növbəti dəfə ermənipərəst, qərəzli və birtərəfli mövqeyini bariz şəkildə nümayiş etdirdiyi bildirilib. Fransanın bu addımının regionda sülhün bərqərar olmasına, xüsusilə də, ölkəmizin israrlı olduğu Azərbaycanla Ermənistan arasında münasibətlərin bir-birinin suverenliyi, ərazi bütövlüyü və sərhədlərinin toxunulmazlığının qarşılıqlı tanınması və hörmət edilməsi əsasında normallaşmasına ciddi zərbə vurmaq məqsədi daşıdığı, bölgədə sülhə qarşı olan revanşist qüvvələri həvəsləndirdiyi vurğulanıb. Sözügedən qətnamənin, beynəlxalq hüququn norma və prinsiplərini kobud şəkildə pozmaqla yanaşı, Azərbaycan Respublikası ilə Fransa Respublikası arasında “Dostluq, qarşılıqlı anlaşma və əməkdaşlıq haqqında Müqavilə”nin (1993) xüsusilə 2-ci maddəsinin 3-cü bəndi çərçivəsində öhdəliklərə tamamilə zidd olduğu qeyd edilib. Azərbaycan tərəfi görüşdə Fransa tərəfindən bir daha Azərbaycanın beynəlxalq hüquqla qorunan suverenliyi və ərazi bütövlüyünə qarşı yönələn, onun daxili işlərinə müdaxilə olan addım və bəyanatlardan çəkinilməsini təkidlə tələb edib. Fransanın müvəqqəti işlər vəkili Azərbaycan tərəfinin müraciətini aidiyyəti üzrə çatdıracağını bildirib.
16-11-2022, 19:22
Mədəniyyət Nazirliyinin səlahiyyəti artırıldı
Mədəniyyət Nazirliyinin səlahiyyəti artırılıb. Bununla bağlı Prezident İlham Əliyev Azərbaycan Respublikası Prezidentinin 2018-ci il 6 iyun tarixli 119 nömrəli Fərmanı ilə təsdiq edilmiş “Azərbaycan Respublikasının Mədəniyyət Nazirliyi haqqında Əsasnamə”də dəyişiklik edilməsi barədə Fərman imzalayıb. Fərmana əsasən, Mədəniyyət Nazirliyinə dövlət büdcəsindən ayrılan vəsaitin, büdcədənkənar vəsaitin, habelə Nazirliyin strukturuna daxil olmayan tabeliyindəki qurumlar tərəfindən işlər görülməsindən və xidmətlər göstərilməsindən əldə edilən vəsaitin (o cümlədən tutulan xidmət haqlarının) sərəncamçısı olaraq, maliyyə vəsaitini bölüşdürmək, ayrılmış vəsaitin həddi nəzərə alınmaqla, Nazirliyin struktur bölmələrinin, strukturuna daxil olan qurumların və strukturuna daxil olmayan tabeliyindəki qurumların işçilərinin vəzifə maaşlarına əlavələrin, maddi yardım və mükafatların verilməsini təmin etmək həvalə edilib.
16-11-2022, 19:15
“Putin uşaqları və qadınları vurur, bu barbarlıqdır” - Bayden
“Putin mülki hədəfləri, uşaqları və qadınları vurur, bu barbarlıqdır”. Ağ Evin məlumatına görə, bunu ABŞ prezidenti Co Bayden Balidə keçirilən G20 sammiti çərçivəsində Böyük Britaniyanın baş naziri Rişi Sunak ilə görüşü zamanı deyib. “Biz NATO üzrə tərəfdaşlarımız və G7 liderləri ilə Rusiyanın bu yaxınlarda Kiyevə və Ukraynanın qərbinə endirdiyi raket zərbələri ilə bağlı müzakirə apardıq. Baş verənlər qəddarlıqdır. Balidəki dünya liderləri qlobal sülhə doğru irəliləyiş əldə etməyə çalışarkən, Putin mülki hədəfləri, uşaqları və qadınları hədəf alır. Rusiya müharibəni dayandıra bilər və bunu etməlidir. Əgər istəsələr, sabah da dayandıra bilərdilər”, - Bayden əlavə edib.
16-11-2022, 19:13
Ukraynada 33 yaşlı azərbaycanlı döyüşçü həlak olub
Ukraynada daha bir azərbaycanlı döyüşçü həlak olub. Bu gün Kiyevdə Ukraynanın müdafiəsi uğrunda həlak olan 33 yaşlı azərbaycanlı Sabir Qəzənfərovla vida mərasimi keçirilib. Sabir Qəzənfərov könüllü döyüşçü olub. O, Baxmut istiqamətində rus işğalçıları ilə döyüşlərdə qəhrəmancasına həlak olub! Allah rəhmət eləsin!
16-11-2022, 19:09
Polşa prezidenti: Raket qəsdən atılmayıb
Polşaya qəsdən raket hücumu edilməyib. Bunu Polşa Prezidenti Andrey Duda sərhəddəki olaya münasibət bildirərkən deyib. Dudanın sözlərinə görə, 1970-ci illərə aid S-300 raketinin Rusiya tərəfindən buraxıldığına dair heç bir sübut tapılmayıb. Buna baxmayaraq, Prezident qeyd edib ki, dünən baş vermiş hadisəyə görə Rusiya məsuliyyət daşıyır: "Ötən gün Rusiyanın Ukraynaya kütləvi, görünməmiş irimiqyaslı hücumu olub. Rusiya Polşa ilə həmsərhəd Volın və Lvov vilayətləri də daxil olmaqla, ölkə boyu müxtəlif tipli 100-ə yaxın raket atıb. Buna görə də, Rusiya hadisəyə görə məsuliyyət daşıyır". Xatırladaq ki, Rusiya ordusu ötən gün Ukraynaya 100-ə yaxın raket atıb. Raketlərdən ikisinin Polşanın Ukrayna ilə sərhəddə yerləşən Prjevoduv şəhərinə düşdüyü iddia olunub. Hadisə nəticəsində iki nəfərin öldüyü bildirilib. Sonradan məlum olub ki, həmin raketlər Ukrayna tərəfindən Rusiya ordusunun raketlərini zərərsizləşdirmək üçün atılıb.
16-11-2022, 19:08
Fransa rəsmilərinin Azərbaycanda aktivləri dondurulacaq - Bəyanat
Milli Məclis Fransa Senatının qətnaməsi ilə bağlı bəyanat qəbul edib. Butov.az xəbər verir ki, bəyanatı Milli Məclisin deputatı Ramin Məmmədov oxuyub. Bəyanatda deyilir: “Azərbaycan Fransanı beynəlxalq ictimaiyyət tərəfindən qəbul edilmiş sərhədlərə hörmət etməyə çağırır. 30 il işğala göz yuman, səs verdiyi qətnamələri Ermənistandan tələb etməyən Fransa bu gün Ermənistanın ərazi bütövlüyünün pozulduğunu bildirir. Fransa Senatının bu kimi çıxışları Cənubi Qafqazda sülhə mane olmaq niyyəti daşıyır. Müstəmləkə illərində Fransanın törətdiyi soyqırımıları hər kəsə məlumdur, bu hadisələrdən hələ də əziyyət çəkən xalqlar var. Bu kimi hadisələr təbii ki, Fransanın siyasi tarixindən silinməyəcək. Əlcəzairdə bir milyondan çox insan Fransa tərəfindən qətlə yetirilib. Eyni zamanda hələ də mina xəritələrini Fransa Əlcazairə düzgün təqdim etməyib. Bu gün dünyada minadan əziyyət çəkən ölkələrdən biri də Əlcəzairdir. Fransanın rolunu hazırda Cənubi Qafqazda Ermənistan davam etdirir. Bu gün Ermənistan hələ də düzgün mina xəritələrini Azərbaycana təqdim etməyib. Qondarma dövlətdə əhalinin insan hüquqlarını tələb edən Fransanın hüquqdan danışmağa haqqı yoxdur. Fransada irqçi, müsəlmanlara qarşı fobiyanın olması hər kəsə məlumdur". Bəyanatda, həmçinin Milli Məclisin bir sıra təkliflər irəli sürdüyü qeyd olunub. Həmin təkliflər aşağıdakılardır:
- Fransa hökuməti tərəfindən birtərəflik təminatı verilməyən qədər, onun Azərbaycan və Ermənistan arasında normallaşma prosesi ilə əlaqədar təşəbbüs və fəaliyyətlərdə iştirakına cəlb edilməsinə imkan verilməməsi, bu məsələlərlə bağlı Fransa rəsmiləri ilə hər hansı müzakirənin aparılmaması
- Fransa rəsmilərinin Azərbaycanda hər hansı aktivləri aşkar edildiyi təqdirdə, onların dondurulması
- Fransa şirkətlərinin Azərbaycan dövlətinin sifarişləri həyata keçirilən hər hansı layihədə iştirakına yol verilməməsi,
- Fransa şirkətlərinin enerji sektorunda Azərbaycan tərəfi ilə əməkdaşlığına yenidən baxılması
- Azərbaycanla Fransa arasında mövcud olan siyasi, iqtisadi münasibətlərə yenidən baxılması
- Qoşulmama Hərəkatının sədri kimi Fransanın müstəmləkəçilik siyasi, insanlıq əleyhinə cinayətlərin və hərbi cinayətlərin beynəlxalq təşkilat çərçivəsində qaldırılması
- İslam Əməkdaşlıq Təşkilatı çərçivəsində Fransanın islamafobiya siyasətinin gündəliyə çıxarılması.
- Türk dövlətləri təşkilatları çərçivəsində Fransanın türkəfobiya siyasətinin gündəliyə çıxarılması
Qeyd edək ki, ötən gün Fransa Senatı Azərbaycana qarşı sanksiyaların tətbiqi ilə bağlı qətnamə qəbul edib.
16-11-2022, 19:05
Erməni hərbçilər qəzaya düşdü - 1 ölü, 7 yaralı var
Ermənistan ordusunun hərbi qulluqçu, 2000-ci il təvəllüdlü Qriqor Qriqoryan “Kamaz” markalı hərbi yük maşınının qəzaya uğraması nəticəsində ölüb. Bu barədə Ermənistan Müdafiə Nazirliyinin mətbuat xidməti məlumat yayıb. Məlumata görə, qəza nəticəsində 7 əsgər yaralanıb, onlar qarnizon hospitalına yerləşdirilib, müayinə və lazımi tibbi yardım göstərilib. “Yaralı hərbi qulluqçuların həyatı təhlükədə deyil. Hadisənin baş vermə şəraitinin tam aydınlaşdırılması üçün araşdırma aparılır”, - deyə məlumatda bildirilir.
16-11-2022, 19:03
Fransa məhsullarının satışı qadağan edilsin! - Deputat
“Fransa Senatı ötən gün qərəzli, bədnam qətnamə qəbul edərək erməni bacılarına öz dəstəklərini nümayiş etdirib. Qətnamənin əsas təşəbbüskarı və həmmüəllifi Brüno Retayo Azərbaycanın guya Rusiyanın Ukraynada apardığı müharibədən faydalanaraq Ermənistana hücum etdiyini, Azərbaycan tərəfindən ermənilərə qarşı hərbi cinayətlər törədilsə də, bu ölkəyə qarşı heç bir sanksiya tətbiq edilmədiyini, Rusiyaya qarşı sanksiyalar tətbiq edilsə də, Azərbaycan və Türkiyəyə qarşı analoji sanksiyaların olmamasının utancverici olduğunu bildirib”. Bu barədə deputat Naqif Həmzəyev Milli Məclisin bu gün keçirilən iclasında bildirib. Deputatın sözlərinə görə, digər nümayəndələr də bu sərsəm və yalan fikirləri davam etidirblər: "Göründüyü kimi, ermənidən də böyük erməni olan bu şəxslər, Fransa Senatında təmsil olunan siyasi qüvvələr və Makron hökuməti sırf öz korporativ siyasi maraqlarına görə erməni diasporunun, lobbisinin maliyyə və siyasi dəstəyini almaq üçün beynəlxalq hüquqdan yaranan öhdəliklərini pozublar. Faktiki olaraq aparıcı siyasi qüvvələr, Makron administrasiyası erməni lobbisinin təsiri altındadır və Azərbaycana münasibətdə milli maraqları yox, ermənilərin maraqlarını əsas tuturlar. 30 il ərzində Azərbaycanın tarixi torpaqlarını işğal altında saxlayan, Ermənistana qarşı heç bir fikir bildirməyən Fransa hökumətinin ölkəmizə bu cür münasibəti onun həm də insan hüquq və azadlıqlarına hörmətsizliyinin bariz nümunəsidir. Ermənistanın siyasi-hərbi hakimiyyətinin törətdiyi vandalizm aktları nəticəsində xeyli sayda uşaq və qadın olmaqla, minlərlə mülki şəxs həyatını itirib və ya yaralanıb, eyni zamanda regionda ciddi humanitar problemlər meydana çıxıb. Fransa yüz ildən çox bir müddət ərzində Əlcəzair xalqına qarşı çox dəhşətli müharibə aparıb, soyqırımı siyasəti yürüdüb, milyonlarla əlcəzairlinin ölümünə səbəb olub. Təəssüflər olsun ki, Fransa Senatının üzvləri tarixdən dərs götürmək əvəzinə, bu qətnamə ilə milli-dini ədavəti qızışdırmaqla yeni münaqişə ocaqları yaratmaq istəyirlər". Deputat təklif edib ki, qətnaməni qəbul edən şəxslərin Azərbaycana girişinə qadağa qoyulsun. Eyni zamanda fransız məhsullarının ölkəmizdə satışı qadağan edilsin.
16-11-2022, 19:00
Şəhid ailəsi statusunun verilməsi qaydası dəyişdi
Şəhid ailəsi statusu gizir və zabit heyəti üçün Fövqəladə Hallar Nazirliyinin verdiyi arayışlarla da təsdiq olunacaq. Bu barədə Nazirlər Kabineti müvafiq qərar qəbul edib. Fövqəladə Hallar Nazirliyinin şəhid və şəhid ailəsi statusu verildiyi tarixdən 5 (beş) iş günü müddətində bu barədə məlumatı Azərbaycan Respublikası Əmək və Əhalinin Sosial Müdafiəsi Nazirliyinin Mərkəzləşdirilmiş elektron informasiya sisteminin “Zəfər” altsisteminə daxil edirlər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!