7-06-2025, 20:39
İranda internet tamamilə kəsilib
İranın bütün ərazisində internet demək olar ki, tamamilə kəsilib.
Bu barədə "NetBlock" beynəlxalq internet monitorinq xidməti "Telegram" kanalında məlumat yayıb.
"İnsident daha erkən silsilə qismi nasazlıqlardan sonra olub və İsraillə hərbi gərginliyin artması fonunda bir neçə günlük raket zərbələrindən sonra baş verib", - deyə məlumatda bildirilir.
7-06-2025, 19:16
“Neftçi” növbəti transferini açıqladı
“Neftçi” daha bir futbolçunun keçidini rəsmiləşdirib.
Murad Xaçayevlə 2 illik müqavilə imzalanıb.
Donetsk “Şaxtyor”unun yetirməsi olan 27 yaşlı müdafiəçinin sonuncu klubu “Sumqayıt” (2019-2025) olub.
O, Sumqayıt təmsilçisində “Neftçi”nin hazırkı baş məşqçisi Samir Abasovun rəhbərliyi altında da oynayıb.
Qeyd edək ki, M.Xaçayev milli komandamızın heyətində 1 oyun keçirib.
7-06-2025, 17:23
Rusiyanın 55 milyon dollarlıq qırıcısı məhv edildi
Rusiyaya məxsus Su-35 qırıcısı şənbə günü səhər Kursk vilayətində vurulub.
Bu barədə Ukrayna Hərbi Hava Qüvvələri məlumat yayıb.
Rusiya tərəfi hadisə ilə bağlı rəsmi məlumat verməyib.
Müharibədə Rusiya tərəfdarı teleqram kanalları təyyarənin vurulduğunu təsdiqləyib.
Qeyd edək ki, təyyarənin dəyəri 55 milyon dollardan çoxdur.
7-06-2025, 16:55
İlon Mask qalmaqallı postunu sildi
Milyarder İlon Mask "X" hesabında yazdığı və Donald Trampın qalmaqallı maliyyəçi Ceffri Epşteynin işi ilə bağlı sənədlərdə adının hallandığını iddia etdiyi paylaşımı silib.
Linkə keçid edilən zaman yazının artıq mövcud olmadığı bildirilir.
Qeyd edək ki, İlon Mask daha əvvəl etdiyi paylaşımda Donald Trampın Ceffri Epşteynin işi ilə bağlı sənədlərdə adının keçdiyini iddia etmişdi.
"Əsl bombanı atmağın vaxtı gəldi: Prezident Donald Trampın Epşteyn işində adı keçir. Bu, faylların ictimaiyyətə açıqlanmamasının əsl səbəbidir. Gününüz xeyirli olsun, Donald Tramp!" - deyə Mask paylaşımında bildirmişdi.
7-06-2025, 16:34
11 il əvvəl birinci sinifə gedənlərin 34 faizi universitetə daxil olub
Azərbaycanda doqquzillik ümumi orta təhsil mərhələsi qanunvericiliklə məcburi hesab olunduğuna görə, müəyyən yaş həddinə çatan hər bir şəxsin məktəbə cəlb olunması nəzərdə tutulur. Lakin bu tənzimləmələrə baxmayaraq, həmin mərhələni başa vuranların yalnız az bir qismi təhsillərini növbəti pillələrdə tam orta və ya peşə təhsili səviyyəsində davam etdirir.
Dövlət İmtahan Mərkəzindən verilən məlumata görə, 2024-cü ildə ali təhsil müəssisələrinə və tam orta təhsil bazasında orta ixtisas təhsili müəssisələrinə qəbul üçün 86 836 şagird ərizə verib ki, bu da 2013-cü ildə birinci sinifə gedən 135 min 681 şagirdin təxminən 64 faizini təşkil edir. Bu şagirdlərin 9 min 413-ü orta ixtisas təhsil müəssələrinə, 44 min 471-i isə ali məktəblərə qəbul olunub.
Ümumilikdə 2013-cü ildə birinci sinifə gedənlərin 34,7 faizi ali məktəblərə, 8,3 faizi kollec və texnikumlara, 8,6 faizi peşə məktəblərinə qəbul olunub. Onların 21,5 faizi ali və orta məktəblərə qəbul oluna bilməyib, 10 faizi isə ali və ora ixtisas təhsilini davam etdirmək üçü ərizə verməyib.
9-cu sinifdən sonra təhsilini davam etməyənlərin sayı 13, 8 faizdir. 9-cu sinifdə haqqında məlumat olmayanlar isə 2013-cü ildə məktəbə gedənlərin 3,2 faizini təşkil edir.
Onu da qeyd edək ki, ali və orta ixtisas məktəblərinə sənəd verməyənlərin 69 faizi oğlan, 39 faizi qızdır. Təhsilini davam etdirməyənlərin 75 faizi kənd, 25 faizi isə şəhər məktəblərinin məzunlarıdır.
7-06-2025, 15:52
Helsinkidə Müdafiə Nazirliyinin binasına boya atdılar
Fələstin tərəfdarları Helsinkidə Müdafiə Nazirliyinin binasının fasadına boya atıblar.
Məlumata görə, iki şübhəli hadisə yerindən qaçıb.
"Hadisəyə görə məsuliyyəti Palestine Action təşkilatı öz üzərinə götürüb. Təşkilat Qəzzada müharibəyə və Finlandiya Müdafiə Nazirliyinin İsrailin hərbi sənaye şirkətləri ilə əməkdaşlığına qarşıdır", - nəşr yazır.
7-06-2025, 15:45
Bakıda faciəvi qəza - 3 nəfər öldü
Respublika Təcili və Təxirəsalınmaz Tibbi Yardım Mərkəzinə iyunun 7-də, saat 13:50 radələrində Nərimanov rayonu, Böyükşor gölü ərazisindən yol-nəqliyyat hadisəsi ilə bağlı çağırış daxil olub.
Bu barədə TƏBİB-dən bildirilib.
"Çağırış əsasında təcili tibbi yardım briqadası ünvana cəlb olunub. Hadisə yerində 3 (kişi cinsli) şəxsin həkiməqədər ölüm faktı qeydə alınıb. Xəsarət alan 68 yaşlı (kişi cinsli) şəxs isə müştərək travma diaqnozu ilə Sabunçu Tibb Mərkəzinə hospitalizasiya olunub", - məlumatda deyilir.
***
Bakının Sabunçu rayonunda, Böyükşor gölü yaxınlığında ağıq qəza baş verib.
Bu barədə Bakı Şəhər Dövlət Yol Polisi İdarəsindən məlumat verilib.
İlkin məlumata görə, "Mercedes" markalı yük maşını ilə "Volkswagen" markalı minik avtomobili toqquşub.
Avtoqəzada 3 nəfər ölüb, 1 nəfər xəsarət alıb.
Faktla bağlı araşdırma aparılır.
7-06-2025, 15:38
Ceyhun Bayramov pakistanlı həmkarı ilə danışdı
İyunun 7-də xarici işlər naziri Ceyhun Bayramovun Pakistan İslam Respublikasının Baş nazirinin müavini, xarici işlər naziri Məhəmməd İshaq Dar ilə telefon danışığı baş tutub.
Bu barədə XİN-dən məlumat verilib.
Bildirilib ki, nazirlər arasında Azərbaycan-Pakistan tərəfdaşlığından irəli gələn məsələlər, ikitərəfli, çoxtərəfli əməkdaşlıq gündəliyinin müxtəlif aspektləri müzakirə olunub.
Ali və yüksək səviyyədə qarşılıqlı səfərlərin artan dinamikasından məmnunluq ifadə olunub. Laçın şəhərində keçirilmiş Azərbaycan-Türkiyə-Pakistan Zirvə görüşü çərçivəsində aparılmış danışıqlardan irəli gələn məsələlər, o cümlədən 21-22 iyun tarixində İstanbulda keçiriləcək İslam Əməkdaşlıq Təşkilatının (İƏT) Xarici İşlər Nazirləri Şurasına, habelə Azərbaycanın cari ilin iyul ayında ev sahibliyi edəcəyi İqtisadi Əməkdaşlıq Təşkilatının Zirvə Toplantısına hazırlıq məsələləri nəzərdən keçirilib.
Telefon danışığı zamanı, həmçinin qarşılıqlı maraq doğuran regional məsələlər ətrafında fikir mübadiləsi aparılıb.
7-06-2025, 15:20
17 il əvvəl həlak olan mayora şəhid statusu veriləcək - Yoldaşından AÇIQLAMA
Məhkəmə 2008-ci ildə həlak olan Müdafiə Nazirliyinin mayoru Rövşən Abbasova şəhid statusunun verilməsinə qərar verib.
Müvafiq qərar Gəncə İnzibati Məhkəməsi tərəfindən qəbul edilib.
Məlumata görə, mayor 2006-cı ilin noyabr ayında N saylı hərbi hissənin qərargah rəisi vəzifəsində çalışarkən döyüş postunu yoxlayıb hərbi hissəsinə qayıdan zaman avtomobil qəzası keçirib.
Aldığı ağır kəllə beyin travması nəticəsində 2006-cı il noyabr ayından 2007-ci ilin aprel ayına kimi Mərkəzi Klinik Hərbi Hospitalda komatoz vəziyyətdə müalicə alıb, 2007-ci ildə zabit istefaya buraxılıb və ona əlillik təyin olunub. O, aldığı ağır travmadan 11 mart 2008-ci ildə vəfat edib.
Qeyd edək ki, mərhum R.A.Abbasovun meyiti müayinə olunmadığından onun ölümünün səbəbi haqqında qəti fikir söyləmək mümkün olmadığı əsas gətirilərək ona şəhidlik statusu verilməyib. İş materiallarının tədqiqindən belə qənaətə gəlinib ki, mərhum mayor döyüş postunu yoxladıqdan sonra, yəni xidməti vəzifəsini icrası zamanı, qayıdarkən avtoqəzaya düşüb. Ölümün səbəbli əlaqəsi xidməti zamanı avtoqəzada almış olduğu xəsarətlər olub
Gəncə İnzibati Məhkəməsinin qərarı ilə mərhumun həyat yoldaşının iddiası təmin edilib. Azərbaycan Respublikası Müdafiə Nazirliyinin üzərinə şəhid statusunun verilməsi tələbi qoyulub.
Mərhumun həyat yoldaşı Elnurə Abbasova qeyd edib ki, həyat yoldaşının vəfatından 2-3 il sonra şəhidlik statusunun verilməsi ilə bağlı müraciət etsələr də, işə baxılmadan bağlanmışdı: “O vaxt həyat yoldaşımın qardaşı ilə atası da sağ idi, onlar vəfat etdikdən sonra mən tək qaldım deyə yenidən müraciət etmək imkanım olmadı”.
Qərarın icrası ilə bağlı Elnurə Abbasova bildirdi ki, hələ ki, xəbər gözləyir, qərarın icrası ilə bağlı onlara nəsə deyilməyib.
“Atası ilə anası həmişə danışırdı ki, uşaqlıqdan hərbiyə xüsusi marağı olub, ali məktəbi bitirdikdən sonra öz istəyi ilə kəşfiyyatçı oldu. Hər günü səngərdə, cəbhə xəttində keçirdi. Ömrünün 16 ilini hərb sahəsinə verdi”- deyə o bildirib.
Qeyd edək ki, Rövşən Abbasovun həm də 23 və 19 yaşlı iki qızı var.
7-06-2025, 15:06
Valideynlərdən qızıl üzük alan müəllimə TÖHMƏT VERİLDİ
Tovuzda orta məktəb müəlliminə məxsus olduğu iddia edilən qalmaqallı görüntülər yayılıb.
İddiaya görə, Tovuz rayon Əlimərdanlı kənd Mərdan Musayev adına tam orta məktəbinin Günel adlı müəllimi özünə təmtəraqlı tədbir təşkil edib. Qeyd olunur ki, o, valideynlərdən hədiyyə qismində zinət əşyası tələb edib.
Məsələ ilə bağlı Qazax-Tovuz Regional Təhsil İdarəsindən bildirilib ki, video mayın 24-də qeyri-iş günü məktəbdənkənar ərazidə çəkilib, valideynlərin şəxsi təşəbbüsü ilə alınmış zinət əşyası müəllimə təqdim edilib.
"Ancaq təhsilverənlərin etik davranış qaydalarına, eyni zamanda Məktəbəqədər və Ümumi Təhsil üzrə Dövlət Agentliyi və Regional Təhsil İdarəsi tərəfindən məktəblərə təqdim olunmuş müvafiq təlimatlara əsasən, müəllimlərə hər hansı qiymətli hədiyyə, maddi və ya qeyri-maddi nemətlərin və s. verilməsi yolverilməz hesab olunur. Bu baxımdan, valideynlərə bir daha müraciət edərək xatırladırıq ki, müəllim əməyinə təşəkkür və dəyərin göstərilməsi mənəvi təşəkkür, əməkdaşlıq və hörmət çərçivəsində olmalıdır. Ona görə də etik davranış qaydalarını pozduğuna görə müəllimə töhmət verilib".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!