22-11-2025, 13:59
Prezidentdən Vahid Əzizlə bağlı SƏRƏNCAM
Vahid Cəfərov (Vahid Əziz) "Şərəf" ordeni ilə təltif edilib.
Bununla bağlı Prezident İlham Əliyev Sərəncam imzalayıb.
Sərəncamla V.Əziz bu mükafata Azərbaycan ədəbiyyatının inkişafında uzunmüddətli səmərəli fəaliyyətinə görə layiq görülüb.
Qeyd edək ki, sabah Xalq şairi Vahid Əzizin 80 yaşı tamam olur.
22-11-2025, 13:24
3 nəfərin öldüyü yanğına görə kim məsuliyyət daşıyır?
Bakıda ötən gün baş verən yanğında 3 nəfər həyatını itirib. 27 nəfər tüstüdən zəhərlənmə diaqnozu ilə hospitalizasiya olunub. Hazırda 7 nəfərin müalicəsi davam etdirilir.
Faktla bağlı Baş Prokurorluqda Azərbaycan Respublikasının Cinayət Məcəlləsinin müvafiq maddəsi ilə cinayət işi başlanaraq ibtidai istintaq aparılır.
Məsələ ilə bağlı hüquqşünas Əkrəm Həsənov bildirib ki, yanğın və ya qəza nəticəsində ölüm hallarının araşdırılamsında iki cür yanaşma ola bilər.
Hüquqşünasın fikrinə görə, heç bir qayda və ya qanun pozuntusu olmayıbsa, sırf bədbəxt hadisə baş veribsə, kimisə məsuliyyətə cəlb etmək düzgün deyil:
"İkinci məsələ texniki təhlükəsizlik qaydalarının pozulması ilə bağlıdır. Hər bir binanın təhlükəsizliyinə baxan şəxs olmalıdır. Bütün qurğulara daimi nəzarət etməli, onlarla işləmək qaydalarını digər şəxslərə öyrətməli, eyni zamanda kənar şəxslərin qadağan olunmuş zonaya keçməsinin qarşısını almalıdır".
Ə.Həsənov deyib ki, cavabdeh orqan Fövqəladə Hallar Nazirliyidir:
"Nazirliyin aidiyyəti şöbəsi obyektlərdə daimi yoxlama və təlim təşkil etməlidir. Obyektin təhlükəsizliyinə cavabdeh şəxslə əməkdaşlıq mütləqdir".
22-11-2025, 13:16
Ankarada qalmaqal - Mansur Yavaş barəsində istintaq qərarı verildi
Türkiyənin Daxili İşlər Nazirliyi Ankara Böyükşəhər Bələdiyyəsinin (ABB) rəhbəri Mansur Yavaş və onun yaxın Nevzat Uzunoğlu barəsində istintaq aparılmasına razılıq verib.
İstintaq Ankara Böyükşəhər Bələdiyyəsinin konsert xərclərində yeyinti və prosedur pozuntuları ilə bağlı irəli sürülən iddialarla əlaqədardır.
Ankara Respublika Baş Prokurorluğu konsert xidmətlərinin satın alınması ilə bağlı araşdırma zamanı ittiham aktı tərtib edildikdən sonra Yavaş və Uzunoğlu haqqında “vəzifə səlahiyyətlərindən sui-istifadə” və “nəzarət vəzifəsini yerinə yetirməmək” maddələri ilə bağlı istintaq icazəsi tələb etmişdi. Nazirliyin həmin tələbi təsdiqlədiyi bildirilib.
Baş Prokurorluğun araşdırmasına əsasən Daxili İşlər Nazirliyinin Mülki İnspektorları tərəfindən hazırlanan təhvil-təslim hesabatı, Maliyyə Monitorinqi İdarəsinin (MASAK) araşdırması, Hesablama Palatasının yoxlaması və müstəqil ekspert rəyləri ABB-də keçirilmiş 32 konsert xidmətinin satın alınması zamanı bələdiyyənin ümumilikdə 154 milyon 453 min 221 lirə məbləğində ziyana uğradıldığını ortaya çıxarıb.
23 sentyabrda keçirilmiş əməliyyat zamanı aralarında sabiq bələdiyyə vəzifəliləri və şirkət nümayəndələrinin də olduğu 14 nəfər saxlanılıb. Onlara “vəzifə səlahiyyətlərindən sui-istifadə” və “tenderə müdaxilə” ittihamları irəli sürülüb.
Onlardan 5 nəfəri məhkəmənin qərarı ilə həbs olunmuş, 9 nəfər isə məhkətin nəzarəti altında sərbəst buraxılmışdı.
Hazırlanan 59 səhifəlik ittiham aktı Ankara 34-cü Ağır Cəza Məhkəməsi tərəfindən qəbul edilib. İttiham olunan 14 şəxs barəsində 7 il 6 aydan 31 il 6 aya qədər həbs cəzası tələb olunur.
22-11-2025, 12:45
Pezeşkian istefaya göndərilir? - TEHRANDAN CAVAB
İran mətbuatında Prezident Məsud Pezeşkianın istefası ilə bağlı xəbərlər yayılıb.
İranın vitse-prezidenti Məhəmməd Cəfər Qaimpənah iddiaları təkzib edib.
“Biz İranı sevirik və onun üçün çalışırıq. Təhqirlər eşidirik, amma geri çəkilmirik. İran bütün iranlılara aiddir və doktor Pezeşkian da buna görə dayanır. Bizə imtiyaz və ya vəzifə lazım deyil, hər şeyimizi İrana vermişik və yenə də verəcəyik. Çoxsaylı problemlərə baxmayaraq, bütün səyimiz xalq və hökumət tərəfdarlarının qarşısında utanc yaşamamaqdır”, - o bildirib.
22-11-2025, 12:20
Sabahın hava proqnozu
Noyabrın 23-də gözlənilən hava proqnozu açıqlanıb.
Milli Hidrometeorologiya Xidmətindən məlumat verilib ki, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Gecə və səhər bəzi yerlərdə duman olacaq. Mülayim cənub-şərq küləyi əsəcək.
Havanın temperaturu gecə 10-14° isti, gündüz 16-20° isti olacaq. Atmosfer təzyiqi 767 mm civə sütunu, nisbi rütubət gecə 80-85 %, gündüz 60-70 % təşkil edəcək.
Azərbaycanın rayonlarında havanın əsasən yağmursuz keçəcəyi gözlənilir. Bəzi yerlərdə arabir duman olacaq. Mülayim şərq küləyi əsəcək.
Havanın temperaturu gecə 4-9° isti, gündüz 17-21° isti, dağlarda gecə 1-6° isti, gündüz 12-17° isti olacaq.
22-11-2025, 12:03
İlham Əliyev dərman istehsalı müəssisəsinin açılışında - FOTO
Azərbaycan Respublikasının Prezidenti İlham Əliyev Abşeron rayonunun Hökməli qəsəbəsində “Scandens Pharmaceutical Industries Ltd” MMC-nin dərman preparatları istehsalı müəssisəsinin açılışında iştirak edib.
İqtisadiyyat naziri Mikayıl Cabbarov və baş direktor Kamran Həsənov dövlətimizin başçısına müəssisə barədə məlumat verdilər.
Beynəlxalq standartlara uyğun layihələndirilən müəssisə Almaniya, İsveçrə və İtaliyanın qabaqcıl texnologiya və avadanlıqları ilə təchiz olunub. İl ərzində müəssisədə antibiotiklər, diabetologiya, hepatologiya, kardiologiya, andrologiya, allerqologiya və qastroenterologiya sahələrinə aid təxminən 800 milyon ədəd tablet və kapsul dərman preparatı istehsal olunacaq. İstehsal olunan məhsullar həm daxili bazara çıxarılacaq, həm də gələcəkdə ixrac ediləcək. Müəssisədə 120 iş yeri yaradılıb.
Dəyəri 74 milyon manat olan layihə özəl investisiya hesabına həyata keçirilib. Şirkət İqtisadiyyat Nazirliyi tərəfindən verilmiş investisiya təşviqi sənədi hesabına idxal olunan avadanlıqlara görə 6,5 milyon manat güzəşt əldə edib.
Müəssisənin fəaliyyətə başlaması Azərbaycanın əczaçılıq sənayesində yeni inkişaf mərhələsi kimi qiymətləndirilir. Burada xammaldan hazır məhsula qədər dərman preparatlarının istehsalının bütün mərhələləri həyata keçiriləcək. Yeni müəssisə ölkəmizdə əczaçılıq sənayesinin inkişafına və yerli istehsalın güclənməsinə töhfə verəcək. Yerli və beynəlxalq tələblərə cavab verən rəqabətqabiliyyətli məhsulların istehsalı ölkəmizin ixrac imkanlarını da genişləndirəcək.
Müəssisə, eyni zamanda, əczaçılıq sahəsində peşəkar kadrların hazırlanması və əməli bacarıqların inkişafı üçün baza rolunu oynayacaq. “Scandens Pharmaceutical Industries Ltd” MMC, Azərbaycan Tibb Universiteti, Macarıstanın Peç Universiteti və “Panon Pharma” şirkəti arasında imzalanmış dördtərəfli Memorandum çərçivəsində burada əczaçı və qeyri-əczaçı ixtisasları üzrə qısa və uzunmüddətli təlim və təcrübə proqramlarının həyata keçirilməsi nəzərdə tutulub.
Prezident İlham Əliyev müəssisəni işə saldı.
Müəssisənin damında ümumi gücü 450 kVt/saat olan 710 ədəd Günəş paneli quraşdırılıb ki, enerji sərfiyyatının təxminən 40 faizi bu panellər vasitəsilə ödənəcək.
22-11-2025, 11:27
Tüstüdən zəhərlənənlərin biri Könül Vəlibəylinin qızı imiş
Yasamaldakı yanğında həlak olan Bakı Milli Geyim Evinin rəhbəri Könül Vəlibəylinin qızı Ləman Qulamova da tüstüdən zəhərlənib.
Bu barədə sosial şəbəkədə ailənin yaxınları məlumat yayıb.
Onların sözlərinə görə, 25 yaşlı Ləman Qulamova Kliniki Tibbi Mərkəzə yerləşdirilib.
Hazırda müalicəsi Toksikologiya şöbəsində davam etdirilir. Vəziyyəti orta ağır qiymətləndirilir.
Qeyd edək ki, hadisə nəticəsində 3 nəfər həyatını itirib. 27 nəfər isə zəhərlənmə diaqnozu ilə Kliniki Tibbi Mərkəzin Təcili tibbi yardım şöbəsinə hospitalizasiya olunub.
22-11-2025, 11:13
Qarabağa köçən 7 min nəfər işlə təmin olunub - RƏSMİ
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi işğaldan azad olunan ərazilərə köçürülən sakinlərlə bağlı aktiv məşğulluq tədbirlərini davam etdirir.
Nazirliyin İctimaiyyətlə əlaqələr şöbəsindən bildirilib ki, həmin sakinlərdən artıq 7 min 27 şəxsin məşğulluğu təmin edilib. O cümlədən 4 min 836 nəfərin vakansiya üzrə işlə təminatı həyata keçirilib, 589 nəfər özünüməşğulluq proqramına cəlb edilərək bu proqram çərçivəsində öz kiçik ailə təsərrüfatlarını yaradıb. 1185 nəfər isə fərdi qaydada özünüməşğul şəxslərdir.
Sakinlər üçün peşə hazırlığı kurslarının təşkili işləri də aparılır. Artıq 319 nəfər sakin işəgötürənlərlə birgə təşkil olunan peşə hazırlığı kurslarına cəlb edilib.
22-11-2025, 00:54
Trampla Ukraynanı müzakirə etdi
Almaniya Kansleri Fridrix Merts və ABŞ Prezidenti Donald Trump Ukrayna ilə bağlı sülh planını telefon danışığında müzakirə ediblər.
Federal hökumətin sözçüsü Stefan Kornelius telefon söhbətinin konstruktiv şəraitdə keçdiyini bildirib. Söhbət zamanı tərəflər məsləhətçilər səviyyəsində növbəti addımların razılaşdırıldığını bildiriblər.
Almaniya Kansleri telefon söhbətindən sonra avropalı tərəfdaşlarını məlumatlandırıb.
Qeyd edək ki, ABŞ-ın hazırladığı 28 maddəlik sənəd Rusiyanın maraqlarına yönələn bir sıra güzəştləri nəzərdə tutur. Bunlara Kiyev tərəfindən əlavə ərazi güzəştləri, Ukrayna Silahlı Qüvvələrinin şəxsi heyətinin sayının və ölkənin NATO-ya üzvlüyünə qəbul edilməməsi daxildir.
Ukrayna Prezidenti Volodimir Zelenski yaranmış vəziyyəti tarixin ən çətin anlarından biri adlandırıb. O, bildirib ki, Ukrayna çox ağır seçimlə üz-üzədir və bu seçimdə ya öz ləyaqətini, ya da önəmli tərəfdaşını itirmək riski mövcuddur.
Almaniya Kansleri Fridrix Merts, Fransa Prezidenti Emmanuel Makron və Böyük Britaniyanın Baş naziri Kir Starmer də ABŞ-ın sülh təşəbbüsünü Ukrayna Prezidenti Volodimir Zelenski ilə telefon danışığında müzakirə ediblər. Telefon söhbətində Vaşinqtonun münaqişənin dayandırılması istiqamətindəki səyləri yüksək qiymətləndirilsə də, danışıqlarda razılaşmanın yalnız Avropa tərəfdaşlarının birgə iştirakı ilə mümkün olacağı vurğulanıb.
22-11-2025, 00:30
Hikmət Mirzəyev şəhid atası ilə görüşdü - FOTO
Müdafiə nazirinin müavini, Quru Qoşunların komandanı, Vətən Müharibəsi Qəhrəmanı general-polkovnik Hikmət Mirzəyev əfsanəvi kəşfiyyatçı, Xüsusi Təyinatlı Qüvvələrin hərbçisi, şəhid kapitan Mühüd Orucovun atası Qurban Orucovla görüşüb.
Bu barədə sosial şəbəkələrdə məlumat yayılıb.
Hikmət Mirzəyev Mühüd Orucovun Xüsusi Təyinatlı Qüvvələrində misilsiz xidmətlərindən bəhs edib.
Qurban Orucov oğlu ilə bağlı xatirələrini bölüşüb:
“Evə gələndə rəhmətlik anası soruşardı ki, bala, komandirin necə adamdı? Mühüd fəxrlə deyərdi ki, ana, məndən nigaran qalma, komandirim qızıl kimi adamdı”.
Qeyd edək ki, M. Orucov 2016-cı il aprelin 2-dən 3-nə keçən gecə Talış yüksəkliyi uğrunda gedən qızğın döyüşlərdə şəhid olub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!