20-11-2025, 00:43
34 il əvvəl Qarakənddə kimlər həlak olmuşdu... - SİYAHI
Bu gün Azərbaycanın müstəqillik tarixinin ən faciəli hadisələrindən birinin ildönümüdür.
1991-ci il noyabrın 20-də Xocavənd rayonunun Qarakənd kəndi üzərində “Mi-8” vertolyotunun ermənilər tərəfindən vurulmasından 34 il ötür.
Vertolyotun vurulması nəticəsində Azərbaycanın bir çox dövlət xadimləri və jurnalistlər həlak olublar.
Həlak olanlar arasında dövlət katibi Tofiq İsmayılov, baş prokuror İsmət Qayıbov, dövlət müşaviri, sabiq daxili işlər naziri Məhəmməd Əsədov, millət vəkilləri Vaqif Cəfərov, Vəli Məmmədov, baş nazirin müavini Zülfü Hacıyev, Prezident Aparatının şöbə müdiri, jurnalist Osman Mirzəyev, Qazaxıstan daxili işlər nazirinin müavini Sanlal Serikov, Azərbaycan Dövlət Televiziyasının jurnalisti Alı Mustafayev də var. Ümumilikdə qəza nəticəsində 22 nəfər həlak olub.
1991-ci il noyabrın 20-də “Mi-8” hərbi vertolyotunda həlak olanlar:
- Tofiq Kazım oğlu İsmayılov - dövlət katibi;
- İsmət İsmayıl oğlu Qayıbov - Baş prokuror;
- Məhəmməd Nəbi oğlu Əsədov - dövlət müşaviri;
- Zülfi Saleh oğlu Hacıyev - Baş nazirin müavini;
- Vaqif Cəfər oğlu Cəfərov - millət vəkili;
- Vəli Hüseyn oğlu Məmmədov - millət vəkili;
- Osman Mirzə Hüseyn oğlu Mirzəyev - Prezident Aparatında şöbə müdiri;
- Qurban Hüseyn oğlu Namazəliyev - nazir müavini;
- İqor Aleksandroviç Plavski - keçmiş DQMV-nin prokuroru;
- Vladimir Vladimiroviç Kovalyov - keçmiş DQMV Daxili İşlər İdarəsinin rəisi;
- Sergey Semyonoviç İvanov - Dağlıq Qarabağ üzrə Milli Təhlükəsizlik Şöbəsinin rəisi;
- Nikolay Vladimiroviç Jinkin - fövqəladə vəziyyət rayonunun komendantı;
- Sanlal Dasumoviç Serikov - Qazaxıstan DİN-in müavini;
- Mixail Dmitriyeviç Lukaşov - milis general-mayoru;
- Oleq Nikolayeviç Koçerev - polkovnik-leytenant;
- Rafiq Məmməd oğlu Məmmədov - dövlət katibinin köməkçisi;
- Alı Mustafa oğlu Mustafayev - telejurnalist;
- Arif İsmayıl oğlu Hüseynzadə - “AzTV”də işıqçı;
- Fəxrəddin İbrahim oğlu Şahbazov - video-operator;
- Vyaçeslav Vladimiroviç Kotov - vertolyot heyətinin komandiri;
- Gennadi Vladimiroviç Domov - vertolyot heyətinin üzvü;
- Dmitri Borisoviç Yarovenko - vertolyot heyətinin üzvü.
20-11-2025, 00:30
Azərbaycanda iki şəhidin məzarı qarət edildi - VİDEO
Bakıda 2 Vətən Müharibəsi şəhidinin məzarı qarət edilib.
Hadisə Bakıxanov qəsəbəsində yerləşən Şəhidlər xiyabanında baş verib.
Şəhid Mayor Səyavuş Kəlbalıyevin həyat yoldaşı Pərvanə Kəlbalıyeva deyir ki, hadisə ilə bağlı xəbəri səhər saatlarında alıb.
Onun oğurlanan yeganə əşyaları (döyüş dəbilqəsi və çəkmələri) 4 ildir şüşə qutunun içərisində, məzarın yanında qorunurmuş.
Digər şəhid Fəxri Məmmədovun atası Habil Fəxri isə deyir ki, hadisəni eşidəndəndən dərin sarsıntı içərisindədirlər:
“Balamın əlləri dəyən öz gitarasını, tək təsəllimizi aparıblar”.
Hadisə ilə bağlı DİN-dən bildirilib ki, məsələ ilə bağlı araşdırma aparılır.
Əməli törədən şəxs və ya şəxslərin müəyyən olunaraq saxlanılması istiqamətində əməliyyat axtarış tədbirləri davam etdirilir.
Ətraflı “Xəzər Xəbər”in videomaterialında:
20-11-2025, 00:13
Prezident Ağdamla bağlı paylaşım etdi
Prezident İlham Əliyev Ağdamın işğaldan azad olunmasının 5-ci ildönümü ilə bağlı sosial şəbəkə hesablarında paylaşım edib.
Butov.az həmin paylaşımı təqdim edir:
20-11-2025, 00:02
Ağdamın azadlığının beşinci ili
Bu gün - noyabrın 20-si Ağdam Şəhəri Günüdür.
Prezident İlham Əliyevin imzaladığı sərəncama əsasən, hər il noyabrın 20-də Ağdam Şəhəri Günü təntənəli şəkildə qeyd edilir.
Bu əlamətdar günün təsis olunması Ağdam şəhərinin Ermənistan silahlı qüvvələrinin işğalından azad edilməsi tarixi ilə bağlıdır. Belə ki, bu gün - noyabrın 20-də şəhərin erməni işğalçılarından təmizlənməsindən 5 il ötür.
Azərbaycanın Vətən müharibəsində qazandığı parlaq qələbə nəticəsində Ağdam bir güllə atılmadan düşmən tapdağından azad olunub.
Qeyd edək ki, Ağdamın işğaldan azad edilməsi şərəfinə Azərbaycan Respublikasında “Ağdamın azad olunmasına görə” medalı təsis olunub. Prezident İlham Əliyevin Sərəncamı ilə Ağdamın işğaldan azad edilməsi uğrunda döyüş əməliyyatlarında iştirak edərək şəxsi igidlik və şücaət göstərmiş hərbi qulluqçular “Ağdamın azad olunmasına görə” medalı ilə təltif edilib.
Ağdam rayonu 1993-cü il iyulun 23-də erməni silahlı birləşmələri tərəfindən işğal olunmuşdu. Qarabağın mərkəzində yerləşən Ağdamın 846,8 kv. km-i, yəni 77,4%-i, 1 şəhər və 80 kəndi ermənilərin əlinə keçmişdi. Rayondakı 38 kolxoz-sovxozun 26-sı, 129 səhiyyə obyektinin 105-i, 108 məktəbin 74-ü, 271 mədəniyyət evinin 199-u, 24 tikinti təşkilatı, 67 idarə-müəssisə, 17 məscidin 14-ü işğal altında qalmışdı. Bütövlükdə, rayonun işğal olunmuş ərazisində bütün tikililər - Azərbaycanın tarixi, mədəni, dini və milli abidələri dağıdılıb və ya yerlə-yeksan edilib. Ağdam düşmənlə döyüşlərdə 6 000 şəhid verib, onlardan 16-sı Azərbaycanın Milli Qəhrəmanıdır. Şəhər “Qafqazın Xirosiması” adlandırılırdı, çünki düşmən tapdağı olduğu illərdə bura tamamilə dağıdılmışdı.
2021-ci il mayın 28- də Azərbaycan ictimaiyyətinə təqdim olunmuş Baş Plan əsasında Ağdam bərpa olunur. Şəhərin özündə 5 məhəllə nəzərdə tutulur. .
Azərbaycan Prezidenti İlham Əliyevin müxtəlif səfərləri zamanı açılışında iştirak etdiyi sənaye müəssisələri, Ağdam cümə məscidi, “İmarət” tarixi kompleksi, “Aghdam City Hotel” mehmanxanası, dörd bir tərəfdə sürətlə davam edən bərpa-quruculuq işləri ilə tarixi şəhəri yenidən "ağ gün"lərinə qovuşur.
19-11-2025, 22:56
Qonşusunun qulağını dişləyib qopardı, həbs edildi
Bakıda qonşusuna ağır xəsarət yetirmiş şəxsin məhkəməsi başa çatıb.
Bakı Ağır Cinayətlər Məhkəməsində Kürdəmir rayon Sor-Sor kənd sakini 1982-ci il təvəllüdlü Cavad Rüstəmova (soyadlar şərtidir) hökm oxunub.
Bildirilib ki, cinayət hadisəsi ötən il oktyabrın 6-sı Suraxanı rayon Bəhruz Kəngərli küçəsində yerləşən “Həsənoğlu market”in qarşısında baş verib.
Həmin vaxt marketin sahibi olan Nihadla qonşusu Cavad 18 manat borc pul və maşını obyektin qarşısında bərk sürməyə görə dalaşıblar. Dava zamanı Cavad Nihada dəmir parçası ilə zərbələr endirib həmçinin bir qulağını dişləyərək qoparıb. Hadisədən sonra Nihad qulağını xəstəxanaya apararaq tikdirmək istəsə də, tibbi müdaxilə müsbət nəticələnməyib. Belə ki, yerinə tikilən qulaq çürüyərək düşüb.
Məhkəmədə Nihad Əliyev qulağını qoparan qonşusuna ağır cəza tələb edib: “Cavad yüksək sürətlə idarə etdiyi avtomobili evimin qarşısında təhlükəli manevrlər edərək saxladı, təhqiredici sözlərlə özünə məxsus fermadakı işçisini çağırdı. Ona yaxınlaşıb məhlədə söyüş söyməyə görə irad bildirdim. Cavad içkili olduğu üçün mübahisə etməyə başladı və bir-birimizlə tutaşdıq. İtələşərkən mən yerə yıxıldım, Cavad sol qulağımı dişləyərək qopardı. Qonşular araya girərək bizi ayırdı, Cavad fermasının həyətinə girdi. Mən isə marketə girib salfetka ilə qulağımın qanını kəsdim. Sonra marketin çölündə olan dəmir parçasını götürüb Cavadın maşınının sol yan şüşəsinə vurdum. Cavad avtomobildən düşüb üstümə gələrkən yerdən “kubik” daşını götürüb mənə atdı. Yerə yıxıldığım üçün mənə zərbələr vurdu. Cavadın əlindən dəmir parçasını marketin satıcısı alıb yerə tulladı. O, avtomobili ilə uzaqlaşdı, ayağa qalxarkən qulağımın yerində olmadığını gördüm. Bu zaman yadımda qalmayan şəxs qulağımın yarısını tapıb gətirdi. Qulağımı yuyaraq qardaşıma zəng edib gəlməsini xahiş etdim”.
Zərərçəkmiş şəxs bildirib ki, bundan sonra qardaşı ilə birgə xəstəxanaya gedib: “Məni təcili yardım maşını ilə M.Nağıyev adına xəstəxanaya apardılar və orada qulağımı tikdilər. Lakin həkim qulağın birləşmə imkanının 1% olduğunu bildirdi. Bir aydan sonra yenidən həkimə getdim, lakin qulağın birləşmədiyini və çürüdüyünü dedi. Daha sonra qulağımın qopmuş hissəsi yenidən düşdü. Təxminən bir il müalicə edildikdən sonra təkrar əməliyyat lazım olduğunu, yalnız bundan sonra estetik əməliyyat oluna biləcəyimi söylədilər. Bunun üçün isə təxminən 12 000 manat pul lazımdır. Hazırda təqsirləndirilən şəxsdən şikayətçiyəm. Əməliyyatım və müalicəm üçün lazım olan xərclərin ödənilməsini tələb edirəm”.
İbtidai istintaq və məhkəmə prosesi dövründə azadlıqda olan Cavad isə deyib ki, dəfələrlə qarşı tərəflə barışmağa cəhd edib, lakin Nihad onu bağışlamır.
Məhkəmə Cavad Rüstəmovu Cinayət Məcəlləsinin 126.1-ci (Qəsdən sağlamlığa ağır zərər vurma) maddəsi ilə təqsirli bilib. Noyabrın 12-si bitən prosesin yekununda ona 3 il 6 ay həbs cəzası verilib və məhkəmə zalındaca qandallanıb.
19-11-2025, 22:51
ABŞ Ukraynanın təslim olmasını tələb edir – ŞOK PLAN
ABŞ və Rusiya arasında Ukrayna müharibəsinin dayandırılmasına dair hazırlanan sənədin detalları üzə çıxıb və beynəlxalq mediada ciddi rezonans yaradıb.n Bu h
barədə Qərb mətbuatı yazır. Məlumata görə, sənəd Ukraynanın maraqları ilə tam ziddiyyət təşkil edən tələblərdən ibarətdir.
"Financial Times" yazır ki, planın əsas bəndlərindən biri rus dilinin Ukraynada rəsmi dövlət dili kimi tanınmasıdır. Sənəddə, həmçinin Rus Pravoslav Kilsəsinə rəsmi status verilməsi nəzərdə tutulur. Mənbələr bunu Kreml üçün maksimalist siyasi üstünlüklər hesab edir
Sənədə görə , Ukrayna ordusunun sayı yarıya endirilməli bəzi əsas silah kateqoriyalarından imtina edilməli və ABŞ-ın hərbi yardımı dayandırılmalıdır.
Qərb mətbuatı bildirir ki, sənədin bir hissəsində Krım və Donbasın Rusiyanın ərazisi kimi tanınması ehtimalı yer alır. Əvəzində Moskvanın Xerson və Zaporojye vilayətlərinin bir hissəsini geri qaytara biləcəyi qeyd olunur.
ABŞ rəsmiləri Zelenskiyə qapalı şəkildə bu şərtləri nəzərdən keçirməyi tövsiyə edib. Planın ilkin detalları sabah Ukrayna liderinə ABŞ Ordusunun rəhbərliyinin Kiyevə səfəri zamanı təqdim olunacaq. Daha sonra amerikalı nümayəndə heyətinin Moskvaya yollanacağı gözlənilir
Ekspertlər sənədi Ukraynanın faktiki kapitulyasiyası kimi dəyərləndirir. Qeyd edilir ki, ordunun yarıya endirilməsi və Donbasdan imtina Kiyevin təhlükəsizlik sistemini tam çökməyə məcbur edəcək
Kiyev isə artıq ilkin mövqeyini çatdırıb, sənəddəki maddələrin böyük hissəsi Ukrayna üçün qəbuledilməzdir. ABŞ–Rusiya planının açıqlanması müharibənin gedişində yeni siyasi gərginlik yaradıb və yaxın günlərdə daha kəskin reaksiyaların verilməsi gözlənilir.
19-11-2025, 22:39
Xocavənddə 140 ev təmir olunacaq - 12 MİLYONLUQ SİFARİŞ
“Ağdam, Füzuli və Xocavənd rayonlarında Bərpa, Tikinti və İdarəetmə Xidməti” publik hüquqi şəxs Xocavənddə çoxmənzilli yaşayış binalarının təmiri ilə bağlı tenderlərə yekun vurub.
Qurum "Araz İnşaatçı” MMC, “Qarabağ Enerji Təchizat” MMC və "Platin-M" MMC və "Via Construction" MMC ilə müqavilə bağlayıb.
“Araz İnşaatçı” MMC ilə bağlanmış müqavilənin məbləği 2 milyon 352 min 837 manatdır. Müqavilə Xocavənd rayonunun Cütcü kəndində fərdi yaşayış (40 ev - 6732m2) evlərinin təmiri işlərini nəzərdə tutur.
“Qarabağ Enerji Təchizat” MMC ilə 2 milyon 941 min manatlıq müqavilə imzalanıb. Müqavilədə Xocavənd rayonunun Kiş kəndində fərdi yaşayış (50 ev – 8415 m2) evlərinin təmiri işləri nəzərdə tutulur.
"PLATIN-M" MMC ilə bağlanmış müqavilənin məbləği 2 milyon 928 min 713 manat təşkil edir. Müqavilə Xocavənd şəhərində fərdi yaşayış evlərinin (50 ev - 8415 m2) təmir işlərinin satın alınması işləri həyata keçiriləcək.
"VIA CONSTRUCTION" Məhdud Məsuliyyətli Cəmiyyəti “Xocavənd rayonunun Hadrut qəsəbəsində İnfrastruktur binasının tikintisi və çoxmənzilli yaşayış binalarının təmiri işləri”nin satın alınması işlərini həyata keçirək. Bu şirkətlə 3 milyon 695 min 545 manat dəyərində müqavilə imzalanıb.
19-11-2025, 22:09
Həmin açarı bu dəfə Ronaldoya hədiyyə etdi
Ulduz futbolçu Kriştianu Ronaldo və xanımı Ağ Evdə ABŞ Prezidenti Donald Trampın qonağı olub.
Futbolçu ABŞ lideri ilə görüşündən fotolar paylaşıb.
Məlumata görə, Tramp Ağ Evin simvolik açarını Ronaldoya da verib.
Qeyd edək ki, ABŞ Prezidenti avqustda Vaşinqtonda səfərdə olan Azərbaycan lideri İlham Əliyevə də eyni hədiyyəni təqdim edib.
Tramp hər dəfə açarı təqdim edərkən bunun yalnız “çox xüsusi insanlara” verildiyini vurğulayıb.
Ağ Evin “qızıl açarı” ABŞ siyasi mədəniyyətində nadir təqdim olunan simvolik hədiyyədir. Açar dərin diplomatik məna daşıyır, etimad, strateji tərəfdaşlıq və yüksək hörmətin nişanı sayılır.
19-11-2025, 21:55
Kremldə nə baş verir?
Rusiya ilə Ukrayna arasında davam edən dörd illik müharibə, eləcə də güc strukturlarının səlahiyyətlərinin sürətlə genişlənməsi Kreml elitası içində ciddi parçalanma yaradıb.
“Vajnyye İstorii”yə danışan Kremlə yaxın mənbələrə görə, Rusiyanın idarəetmə sistemi dərin böhran yaşayır və hakimiyyət daxilində resurslar uğrunda açıq mübarizə, qarşıdurmalar və xaos getdikcə güclənir.
Mənbələr bildirir ki, əvvəllər mövcud olan qərar qəbuletmə mexanizmləri faktiki olaraq dağılıb və hər kəs “öz marağı üçün çalışır”:
“Sistem indi elə mərhələyə gəlib ki, artıq heç bir qayda qalmayıb, nə yaxşı, nə pis. Hamı başa düşür ki, nə qorunan var, nə də təhlükəsizlik təminatı. Heç kim heç nədən sığortalanmayıb”, – deyə Kremlin strukturlarında çalışan rəsmi qeyd edir.
Mənbələrə görə, Rusiya hakimiyyətində ən böyük xaosu yaradan qüvvə "silovik"lərdir. Onlar hökumətlə və Prezident Administrasiyasının siyasi blokuyla koordinasiya etmədən hərəkət edir, bir çox hallarda tam müstəqil qərarlar verirlər.
İllər boyu müxalifəti susdurmaq üçün istifadə edilən “xarici agent” statusu artıq Prezident Administrasiyasının tam nəzarətindən çıxıb. İndi bu status yalnız Kremlin tənqidçilərinə deyil, həm də böyük biznes sahiblərinə və hətta Kremlin tərəfdarı olan bəzi bloqerlərə verilir.
Prezident Administrasiyasının birinci müavini Sergey Kiriyenko artıq güc strukturları ilə qarşıdurmada qalib tərəf ola bilmir. O, Kreml daxilində daxili siyasəti kurasiya etsə də, rəsmilərin həbsi ilə bağlı qərarlar ona əvvəlcədən bildirilmir. Halbuki həbs edilənlər arasında Kiriyeŋkonun təyin etdiyi şəxslər də var.
Rəqəmlər vəziyyətin gərginliyini daha aydın göstərir: müharibə başlayandan bəri Rusiya üzrə məmurların həbsi üç dəfə artıb. Təkcə 2025-ci ildə 155 məmur - merlər, vitse-qubernatorlar və yüksək vəzifəli şəxslər həbs edilib. Prokurorluq həmin dövrdə 4,5 trilyon rubl dəyərində biznes aktivlərini müsadirə edib.
Mənbələr bildirir ki, müharibə nə qədər uzanırsa, Kreml daxilində güc mərkəzləri arasında savaş bir o qədər dərinləşir, dövlət idarəçiliyi isə sürətlə nəzarətdən çıxan xaosa doğru gedir.
19-11-2025, 21:43
Azərbaycan qadınları qızıl medal qazandı
Azərbaycanın qadınlardan ibarət 3x3 basketbol millisi Ər-Riyadda təşkil olunan VI İslam Həmrəyliyi Oyunlarının qalibi olub.
Yığma finalda Türkiyə millisinə 21:13 hesabı ilə qalib gələrək qızıl medala sahib çıxıb.
Qeyd edək ki, yığmamız yarımfinalda Misiri 22:15 hesabı ilə üstələmişdi.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!