“Bütöv Azərbaycan” adlı qəzetinizlə bu yaxınlarda “görüşdük”. Hər qəzet maraq dairəmdə olmasa da, hər oxumaq istədiyimin məram və məqsədi maraq dairəmdə olur. Bədii-publisistik janrın müxtəlif növlərində mətbu çıxışlar məni əsasən qane elədi. Sizinlə zəngləşəndə: ”Bizim məqsədimiz vətənimizə, dövlətimizə xidmət etməkdir!”-deməyiniz məni çox sevindirdi. Bəzən bəyaz gecələrə qara çalar qatmaq istəyənlər, ikili olyunlarla ikiüzlülüklərini pərdələyənlər gözlərimdə o qədər kiçilib, mənasızlaşırlar ki, az qala, üzümü göylərə tutub Sual Olunmayana Sual edəm ki, bunu niyə yaratmısan? Sonra düşünürəm: məgər kontrast beyni sirkələyib anlam vermək və fərqliliyi görmək üçün deyilmi? Bu həyatda pis olmasaydı,yaxşının qədri bilinərdimi? Siz əməlinizlə psiləri pisliyini göstərən yaxşılardansınız.

Yaradıcılıqda təmənnasız olan hər kəs mənim dostumdur. Vətənimizə, dövlətimizə sədaqətlə xidmət edən hər kəs isə mənim əzizimdir. Əziz qardaşım, vətənə xidmət, həm də onun vətəndaşlarına xidmət etmək deməkdir.Sizə, əqidənizə inamla bu gün yaradıcılıqla nəfəs alan gözəl bir qələm adamının əlyazmalarını göndərirəm. Əlbəttə, böyük ümidlərlə! Qəzetinizi isə adı kimi həmişə bütöv əqidəli görməyi, həmişə bağrının başında bağların olmasını arzulayıram!

Dərin hörmətlə: Rafiq Rəhimli.