Əziz oxucular, məni tanıyanlar bilirlər ki, o qədər də qorxaq deyiləm. Amma etiraf edim ki, bəzi sifətləri görməkdən, yerində olmayan məmurların qəbuluna getməkdən  qorxuram. Elə ona görə də neçə illərdir heç bir idarəyə üz tutmuram. İşdi-şayətdi bir yerə getmək məcburiyyətində qalanda da getdiyim yerdə jurnalist olduğumu heç kimə bildirmirəm. Çünki jurnalistikaya girişən baytarlar, işdən qovulub qəzet təsis edən serjantlar, kolxozu dağılmış “xüsusi” müxbirlər peşəmizi elə günə qoyublar ki, onunla qürur duymaq  əvəzinə bir qrup yaramazın əməllərinin xəcalətini çəkirik.

Sözün düzü, həm kinayə ilə qarşılanmayım, həm də  işim dolaşığa düşməsin deyə bu dəfə də belə etdim. Sakitcə Yasamal Rayon Qeydiyyat Şöbəsinə daxil oldum. Üzləşdiyim mənzərə məni o qədər heyrətləndirib ki, hələ də onun təsirindəyəm. Adını, soyadını sonradan öyrəndiyim Nigar xanım Alışanova elə mədəni, elə ləyaqətlə xidmət göstərdi ki, heyrətə düşdüm. Sən demə mən bu iş üçün Nəsimi rayonunun eyniadlı idarəsinə getməliymişəm. Yaşımı və Yasamal sakini olduğumu nəzərə alıb məsələnin öz rayonumuzda həll olunmasına hər tərəfli yardımçı oldu. Hətta sənədlərin surətini də özü çıxartdırdı. Sənədləri aparmalı olduğum ünvanlara getməyimə  imkan vermədi. Beləcə Azərbaycan vətəndaşı olduğumdan duyğulandım. Nigar xanım həmişə ironiya ilə bura Azərbaycandır deyənlərin kinayəli səslərini qulaqlarımdan qopardı. Sənədlər hazır olanda zəng vurub xəbər verməsilə gözümdə süründürməçilərin, bürokratların obrazını darmadağın elədi. Sübut etdi ki, Azərbaycanda vətəndaşlara ləyaqətlə xidmət etmək olar. Çünki Azərbaycan vətəndaşları buna layiqdirlər. Hər kəs də öz xidmətilə  özünün hansı ləyaqətin sahibi olduğunu təsdiqləyir.

Düzünü deyim ki, nadir hallarda olsa da idarələrdə insanla  insan kimi davrananların qabağında necə deyərlər, heç vaxt xəcalətli qalmamışam. Bu dəfə də ənənəmə sadiq qalıb Nigar xanımın əməyini mükafatlandırmaq istədim. Mümkün olmadı. Çünki  o,öz vətəndaşlarına təmənnasız xidmət edirmiş.  Mən də gördüklərimi oxucularımızla bölüşməklə təmiz adı heç nəyə dəyişməyən Nigar xanıma –Yasamal Rayon Qeydiyyat Şöbəsinin işçisi Nigar Alışanovaya öz minnətdarlığımı bildirmək istədim. Üzünüz həmişə ağ olsun, Nigar xanım!

Hörmətlə Tamxil Ziyəddinoğlu

“Bütöv Azərbaycan”qəzetinin baş redaktoru