Butov.az xəbər verir ki, Beynəlxalq Əlilər Günü münasibətilə sağlamlıq imkanları məhdud uşaqlar üçün tədbir keçirilib.

Tədbir həmin uşaqlar üçün nəzərdə tutulmuş layihənin tərkib hissəsidir. Layihənin rəhbəri 2 saylı xüsusi internat məktəbini müəllimi Könül Quliyeva bildirib ki, - "məqsədim danışma və eşitmə mehdudiyyətli insanların cəmiyyətə inteqrasiya olmasıdır. Çünki onlar da ünsiyyətə can atır, qarşılaşdıqları insanlarla münasibət qurmağa çalışırlar. Hər yerdə; istər mağazalarda, istərsə də şirkətlər olsun, onları başa düşən və ünsiyyət qura bilən insanların sayı artmalıdır, bu, vacibdir. Bunun üçün də bütün bunları nəzərə alan video hazırlanıb. Həmin videonu elə məhdudiyyətli insanların özləri tərəfindən çəkilib. Əks etdirilən bu rolikdə məqsəd danışa bilən insanların danışa bilməyənlərə mənəvi dəstək olmaqlarının vacibliyini çatdırmaqdır. Jest dilini təbliğ edək və onlar özlərini kənarlaşdırılmış hiss etməsinlər".

Qeyd edək ki, 3 dekabr Beynəlxalq Əlilliyi olan Şəxslər günü kimi qeyd olunur. İndi dünya əhalisinin təxminən 10 faizini fiziki cəhətdən məhdudiyyətli insanlar təşkil edir. Əlilliyi olan insanların 20 faizi inkişaf etməkdə olan ölkələrdə yaşayır. Azərbaycan BMT Baş Məclisi tərəfindən 2006-cı ildə qəbul edilmiş “Əlillərin hüquqları haqqında” Konvensiyaya qoşulub.