«Bu, ömürdür mən dediyim, nağıl yox»

Vasif Süleyman 1965-ci ildə Şəmkir rayonunun Dəllər qəsəbəsində anadan olub. 1996-cı ildə Bakı Dövlət Univesitetinin filologiya fakültəsini bitirib. «Azərbaycan dəmiryolçusu» qəzetinin redaktoru, «Ədəbiyyat qəzeti»nin redaksiya heyətinin üzvüdür. Azərbaycan Yazıçılar və Jurnalistlər Birliklərinin üzvü, «Qızıl qələm», «Şahmar Əkbərzadə» mükafatlarının laureatı, Prezident təqaüdçüsüdür. «Sevgi atılandan sonra başlayır» adlı kitabı 1993-cü, «Eşq ol, dərgahına səcdəyə gəlim» adlı kitabı isə 2003-cü ildə çap olunub. Şeirləri Türkiyənin mətbu orqanlarında çap olunub, sözlərinə musiqi bəstələnib.
Bu gün isə Vasif Süleymanın yeni kitabının təqdimatı olub

«Azərbaycan dəmiryolçusu» qəzetinin redaktoru, Prezident təqaüdçüsü, şair Vasif Süleymanın «Azərbaycan Dəmir Yolları» Qapalı Səhmdar Cəmiyyətində «Bu, ömürdür mən dediyim, nağıl yox» adlı yeni kitabının təqdimat mərasimi keçirilib.

SalamNews xəbər verir ki, «Azərbaycan dəmiryolçusu» qəzetinin əməkdaşı Ziya Zakiroğlu, Mətbuat Katibliyinin əməkdaşı Kəmalə Əzməmmədova bildiriblər ki, kitab şair Məmməd İsmayılın «Növbədənkənar yazı və ya hər kitab sevinəni tapır» adlı ön sözü ilə açılır. Kitabda şairin müxtəlif illərdə yazdığı şeirlər, «Uçurum» poeması və publisistik yazıları toplanıb.

V.Süleyman hər kəsə minnətdarlığını bildirib və oxuculara avtoqrafla kitab bağışlayıb.