Gənc kinematoqrafçılara dəstək - Alternativ Kino Akademiyası yaradıldı

Mədəniyyət Nazirliyinin nəzdindəki Azərbaycan Respublikası Kino Agentliyi (ARKA) gənc kinematoqrafçılara dəstək məqsədilə Alternativ Kino Akademiyası təsis edib.
Agentlikdən bildirilib ki, layihənin kuratorluğu ARKA-nın əməkdaşı, tanınmış kinorejissor, Əməkdar incəsənət xadimi Elxan Cəfərova həvalə olunub.
“Nizami” kinoteatrında Alternativ Kino Akademiyasının ilk tədbiri keçirilib. Tədbirdə Azərbaycan Dövlət Mədəniyyət və İncəsənət Universitetindən ARKA-ya təqdim olunan 16 tələbənin layihəsindən 7-nin təqdimatı baş tutub.
Elxan Cəfərovun və ARKA-nın əməkdaşlarının iştirakı ilə keçirilən təqdimatda Xəyal Rzanın “Allaha Salam”, Şirin Əhmədovun “Sürəyyanın 32-ci günü”, Mirhafiz Həsənovun “Çağırılmamış qonaq”, Məhəmməd Məmmədovun “Qayıtdım”, Elmar Fərzəliyevin “Düşmüş mələk”, Araz Quliyevin “İkinci nəfəs” və Mirzahid Ağayevin “İnam” layihələri nümayiş etdirilib.
Qeyd edək ki, Alternativ Kino Akademiyasının yaradılmasında əsas məqsəd tələbə kinematoqrafçıların yaradıcılıq fəaliyyətinə təşviqi, kinoda yeni məzmunun yaradılması, kino vasitəsilə xaricdə milli-mənəvi dəyərlərin çatdırılması üçün işlərin görülməsidir. Həmçinin qarşıya qoyulmuş hədəflərə çatmaq üçün ARKA tərəfindən inzibati, yaradıcı məsələlərin təkmilləşdirilməsi, yerli və beynəlxalq festivallarda iştirakın təşviqi, məzmun keyfiyyətinin artırılması, qlobal kino cərəyanlarının təhlili, müasir yerli kino cərəyanlarının yaradılması, sənədləşmə proseslərində operativliyin tətbiqi nəzərdə tutulur.

Məşhur aktyor ürəyindən əməliyyat oldu

Amerikalı aktyor və Kaliforniya ştatının keçmiş qubernatoru Arnold Şvartsenegger ürəyindən əməliyyat olunub.
Bu barədə aktyor özü açıqlamasında deyib.
Şvartseneggerin sözlərinə görə, onun bədəninə kardiostimulyator yerləşdirilib. Sənətçi əməliyyatdan sonra maşın olmağa daha da yaxınlaşdığını zarafat edib.
Aktyorun sözlərinə görə, kardiostimulyator ona görə lazım olub ki, onun əvvəlki əməliyyatlarından sonra ürək döyüntüsündə pozuntular yaranıb.

Novruz Bayramından İnsanlıq Bayramına:
Ulusal – Bəşəri özül üzərində Əbədi Sabahlara doğru

Ürəyinizdə Ata Günəşi olsun!
İnsanlıq – Əbədi tələbdir, bitməyən. Minillərdir insanlar pis-yaxşı, yetərsiz-yetərli İnsanlıq qaydası əsasında yaşayır, bir-birlərini bu ölçü əsasında sorğulayır, dəyərləndirirlər. Ölçüyə yetilmədiyindən çox zaman insanlar üçün bu, özlüyündə ağalıq imkanına da əsas verir. Özünü İnsanlığa yetən, ən azı İnsanlığın təşnəlisi kimi göstərənlər olur, indi də var...
Zəiflər üzərində varlığını təsdiq etmək istəyənlər çağımızda daha çoxdur. Elmi-texniki yeniliklərin az qala hər gün yarandığı, ayrıca İKT-nin qarşısıalınmaz sürətlə yürüdüyü bir vaxtda insanın özünü, başqalarını ruhsallıq (mənəvilik) baxımından tanıması çətinləşir.
Dünyadakı gərginliklərin artması gedişində insana yanaşma da qəlizləşir. İnsan yaratdığı qarışıq düşüncələrin əsiri olur, özünü sanki qırxayaq kimi çaşdırır, neyləyəcəyini bilmir. “Başınıitirmə” sindromlaşır, “bəşəri təmayülə” çevrilir.
Ölkələrin sürətli silahlanması artır, uluslararası doğmalaşma yaranmır, xəstəliklərin ölçüsü genişlənir, ekoloji durum daha da pisləşir, ədəbi-mədəni zövqlər korşalır. Dünyanın istənilən yerində insanların sabaha, yaşamağa ümidi nə qədər acı səslənsə də, azalır, proseslər hər kəsə etkisini göstərir. Bunun nədənlərini (səbəblərini) aramaq, tapmaq asan göründüyü dərəcədə də çətindir. Ona görə ki, İnsanın bu gedişdə rolunu dəyərləndirmədən, qiymətləndirmədən, başlıcası, baş verənlərdən dərs almadan, içdən arınmadan Sabahlara yol almaq çətin olacaq.
İnsan kimdir, dünyaya niyə gəlib? “İnsan özündə Mütləqilik gəzdirən, bu səbəbdən də Şəraitdən, Mühitdən, Cəmiyyətdən üstün olan, Mütləqiliyə can atan, Mütləqləşməyə qadir olan ruhsal varlıqdır” (İnam Ata). İnsan İnsanlığını təsdiq etmək üçün dünyaya gəlib. Təbiət insanı yetkin yaratmır, bu səbəbdən də onun iç dünyasını tanıması, bilməsi, özünü mahiyyətcə yenidən yaratması qaçılmazdır.
Bəs İnsan niyə bu gündədir? Suala ruhsal (mənəvi) yöndən cavab axtarmağa çalışaq. Bütün sorunların bir həlli var: İnsanın özünə, mahiyyətinə tən olması. Bu, son dərəcə çətin, ağır işdir, çox zaman anlayan üçün də həll edilə bilməyən sayılır.
***
İnsan nə qədər ki, özünü – Ruhunun imkanlarını (İnamını, İdrakını, Mənəviyyatını, İradəsini) araşdırmayıb, aşkarlamayıb, zəifliklərinin üzərində yüksəlməyib, Ruh-Bədən birliyini anlamayıb, hər kəsin şəxsində müəyyən dönəm üçün olan bu “birliyə” (Ruh-Bədən “birliyi”nə : “Təzadlar arasında birlik olmur” – Ata) yetməyib, o deməkdir ki, dünyadakı pis gərginliklər qətiyyən azalmayacaq, artacaq...
Ruhsalıq Bədəni nizamlayır. İnsan Bədənçi deyl, Ruhçudur. Bədənin instinktiv tələbinə tabe olan – Ruhdan keçir. Ruhdan keçən var ola bilmir. Xəstəliklər daha çox nizamsızlıqdan yaranır, artır. Bədənçilikdə ilişib qalmaq - İnsan halsızlığının ifadəsidir.
***
Gərginliklərin nədəni – Bilməzlikdir. Özünü bilməyən, tanımayan İnsan həyatdakı başqa canlılardan yer-göy fərqini unudur, öz gözündə adiləşir. Onun dünyaya, həyata, İnsana münasibəti səthi olur. Hər şeyə atüstü yanaşmaq insanlararası münasibətlərin onsuz da aşkarlanmayan imkanlarını korşaldır.
Özünü tanımayan başqasını da tanımır, əslində tanımaq istəmir.
Özünü tanımayanın başqasını – başqalarını tanımağa çalışması, tanıdığını iddia etməsi – ciddi yanlışlıqdır.
***
Başqasını tanımağa özündən başlamaq gərəkdir. Başqasına İnsani yanaşmaq – özünə İnsani yanaşmağının ardıdır, həm də öncəsidir. Ardıdır, ona görə ki, İnam Ata demişkən, özündə qala bilmirsən, başqalaşırsan. Öncəsidir, ona görə ki, başqasında İnsanlığın yeni çalarlarını tapırsan, özünə - insanlıq imkanlarına yenidən baxırsan, özül üzərində inkişaf edirsən.
O deməkdir ki, mahiyyətcə insanlaşmağın, habelə insanlaşdırmağın sonu yoxdur, olsa-olsa öncəsi var. Əzəli, Əbədi, Sonsuz, Kamil Mahiyyət ölçüsü İnsanın halında – Özüylədöyüşündə aydın bilinir, görünür.
Kəşf edilən insanlıq imkanı bitmir, tükənmir, yeni imkanlar yaranır. Ruhsal (insani) imkana yetən başqalarını da öz insanlıq imkanlarına çatdırır. Bu gedişdə tükənmə yoxdur, tükənməzlik var.
Tükənən – İnsanlıq imkanlarını tam aşkarlamayan olur.
Bədənin imkanlarının aşkarlanması – Ruhun imkanlarının aşkarlanması ilə bağlıdır. Ruhsal ənənə yarandıqca, artdıqca Bədənin də yeni imkanları aşkarlanacaq. Birinin qazandığı uğur başqalarının uğurlarının İnsanlıq yönündə aşkarlanmasına təkan olacaq.
İnsanlığa yetən – Halını İnsanlara aydın yetirmək ustalığına yetir.
***
Novruz bayramı minillərdir ki, Ulusumuzun yaşamında özünəməxsus yer tutur. Bu bayramda milli ruhumuzun, qədimliyimizin soraqları yaşayır. Minillər öncə babalarımız inanıblar ki, insanla təbiətin birliyi var. Bu birliyi əcdadlarımız ömründə yaradıb, yaşadıb: qışın yazı əvəzləməsini öyüb, təbiətlə birgə ruhən yenidən doğulub, içəridən arınıb, bu təmizlənməni mənalandırıb, bayramlaşdırıb.
Novruz bayramı bir çox ölkələrdə qeyd edilir. Azərbaycan Novruzunun isə bənzərsizliyi ortadadır. Ümumşərq, ümumtürk keyfiyyəti olan Novruz muğamdakı bənzərsizliyimiz qədər bizimdir. Qədimdən bəri varlığın başlıca ünsürlərinə (od, su, hava, torpaq) türk öz ruhuyla baxıb, təbiətin yenidən doğulmasını mənalandırarkən başqa xalqların təsəvvürlərinə möhtac olmayıb. Minillər boyunca türkün əski inancı cilalanıb, ulu babamız Zərdüştün dönəmində sistemli təsəvvür, baxış halına gəlib. Zərdüştün “Təmiz fikir, təmiz söz, təmiz əməl” ideyası türkün ruhsal təsdiqidir.
Bu gün Novruzla bağlı müəyyən məqamlar adamların təsəvvüründə yenə də qarışıqdır. Ümumşərqi olduğu dərəcədə də ümumtürk səciyyəsi daşıyan Novruz bayramının ulusal sınırlarını anlamağımız, anlatmağımız çətinləşir.
Minillərdən bəri yol gələn, çoxlu dirənişlərə, dəyişmələrə məruz qalan Novruz türk ruhunun özünəməxsusluğunu bacardığı qədər yaşadıb. Millət o zaman var olur ki, ruhunun qədim soraqlarını, adət-ənənəsini, bir sözlə, özünəməxsus nəyi varsa, hamısını qoruyub saxlayır. Belədə millət tarixin dolanbaclarında sarsılmır, başını itirmir. Novruzda qədimliyimizin zəngin çalarları var. Tariximizin ən çətin məqamlarında belə bu bayram ürəklərdə yaşayıb.
Bayram hər şeydən öncə insanın içində olmalıdır. Novruzun mahiyyətində türkün halının yetkin ifadəsi var. Elə etmək gərəkdir ki, qədimliyimizin soraqları kürəsəlləşmə həşirində gözümüzdə qətiyyən adiləşməsin, bayağılaşmasın. Novruz bayramında başqa bayramlarda olduğu kimi zəngin süfrənin yaradılması, həşirçilik, bayağı mahnılar, əyləncələr, fişənglər selinə bürünməsi də yanlışdır.
Novruzda Od – bayramın başlıca rəmzidir, insanın içdən təmizlənməsi ideyasına xidmət edir.
Qədimlərdən bəri od türkün ağlında, düşüncəsində müqəddəslik rəmzi kimi yaşayıb, bu günə kimi gəlib çıxıb. Odun müqəddəs sayılması ilə insanın hər cür pisliklərdən, Şərdən təmizlənəcəyinə, Xeyirin qələbə çalacağına inam ifadə olunub. Adət-ənənələrimizin zirvəsində Sabahımızda yeni bayram yaradıcılığı üçün imkan daşıyan - qədimliyimizi, ucalığımızı, idrakımızın ənginliyini, ruhumuzu özündə yaşadan Novruz bayramı durur. Novruz bayramı ulusal ruhumuzu təsdiq edir, ona görə bizə belə doğmadır.
İnam Atanın (Asif Atanın) Novruz bayramına ayrıca yanaşması var. O, “Novruzluğumuz” (1990) adlı fəlsəfi-bədii məqamda Zərdüştlüyümüzü “Oda tapınmağımız, işıqlanmağımız, təzələnməyimiz, təmizlənməyimiz” kimi qiymətləndirir, özünün müəyyənləşdirdiyi 7 böyük Ulusal Dəyərimizdə Od amilinin müqəddəsliyini, yaşarılığını, birxətliyini əsaslandırır: “Novruzumuzdan Zərdüşt İşığı götürün, Dədə Qorqud Ağsaqqallığı götürün, Babək Hünəri götürün, Nəsimi Vüqarı götürün, Füzuli Heyrəti götürün, Muğam Hikməti götürün, Saz Mətanəti götürün”. Ulusal dəyərlərimizin özülündə Zərdüştdən gələn, mənalandırılan İşıqçılıq durur.
Ulusal ruhumuzda olan ülvi, gözəl nə varsa, hamısı ulusumuzun yaranmasına, əbədi var olmasına xidmət etməlidir. Novruzu türk idrakından gələn, cilalanan bayram kimi sevirik, dəyərləndiririk. Novruz ayrı-ayrı xalqların yaşamında var. Başqa yandan, Novruz qədim çağların bayramıdır, dünyagörüşüdür. Bayramın özülündə duran həqiqi elm, fəlsəfə adamların təsəvvüründə demək olar, yoxa çıxıb. İndi bayramın yalnız “bədii” hissəsi qalıb. Bu hissədəki əyləncələr isə onu adiləşdirir.
Novruzu Ata-Ocaq bayramlarının doğması sayıram. Dünyanın hər mənada tükəndiyi bir çağda özümüzə və dünyaya təqdim edilən İnsanilik, Xəlqilik, Şərqilik, Bəşərilik bayramları Sabahımızda Ulus olaraq möhtəşəm yaradıcılığımızın sübutu kimi dərk, təsdiq olunacaq. Bayramların hamısı İnsanla bağlıdır.
***
İnsanilik – bəşərin varolma, özünütəsdiq düsturudur. İnsanilikdən qıraqda nə varsa, antibəşəridir. Minillərdir bəşərin canlı yaşamı, bədiiyyatı, incəsənəti İnsanlıqdan danışır, insaniliyi öyür. Ancaq İnsanlıq əsasında yaşamaq getdikcə daha da çətinləşir. Bu gün dünyada elmi-texniki inkişaf ən yüksək həddə çatıb. Ancaq inkişafın bu səviyyəsi daha çox insanlığa qarşıdır. İnsana, insanlığa xidmət etməyən tərəqqi gerilikdir, çünki insansızlığa əsaslanır. Qoy elmi-texniki tərəqqi indikindən dəfələrlə az olsun, ancaq İnsan yox olmasın! Qoy dünya indikindən maddiyyatca qat-qat zəif olsun, ancaq dünya insansız olmasın! İnsansız dünya tükənmiş dünyadır! Yalnız İnsaniliyə əsaslanan tərəqqi – yaşarıdır, sabahlıdır! Yalnız müqəddəsliyə əsaslanan tərəqqinin sabahı, gələcəyi var. İnam Atanın (Asif Atanın) Mütləqə İnam dünyabaxışının başlıca sözü, harayı, mövzusu İnsandır. İnsansız heç bir tərəqqi yoxdur. Bu səbəbdən də tərəqqinin ölçüsü İnsanilikdir.
Ancaq indiki gedişlə dünya gündən-günə daha çox antiinsanlığa yuvarlanacaq. Antiinsani dünyanın insan, bəşərsevərlik çağırışları çox zaman sözdən o yana getmir. Siyasiləşmiş dünyada insaniliyin qaydasına uyğun yaşamaq hünər istəyir. Bicliyin, əyriliyin, vicdansızlığın, umacağın, minnətçiliyin ölçü sayıldığı dünya təbii olaraq asanlığa meyil edir. Mütləqə İnam Ruhaniyyatının baş mövzusu İnsandır. İnsansız dünya, yüksəliş (tərəqqi), təbiət yoxdur!
İnam Ata – İnsanlığın bənzərsiz harayçısıdır. İnsan haraylı, İnsan bayraqlı İnsanlıq Bayramı müqəddəslik carı çəkir, Atayurdumuzu, Şərqimizi, Dünyamızı İnama çağırır. İnsanilik Bayramı Bəşərin Mütləqilik səviyyəsində Kutsallığının içsəsidir. İnsanlıq Bayramı – Bəşərin Bayram ənənəsinin göy ölçüsüdür.
Bu yerdə Atanın “İnsanilik Mərasimi üstə Mütləqlə Təmas”ını sunuram:
“Dünyanın Dünyadan Yüksək Mənasını özündə daşıyan. Həyatın Həyatdan Yüksək Mənasını özündə daşıyan. Özünün Özündən Yüksək Mənasını özündə daşıyan. Gerçəklikdən yüksək olan! Cəmiyyətdən yüksək olan! Şəraitdən Yüksək olan! Mühitdən Yüksək olan! Mütləqə can atan! Mütləqləşməyə Qadir olan! Mütləq İnam daşıyan! Mütləq İdrak daşıyan! Mütləq Mənəviyyat daşıyan! Mütləq İradə daşıyan İnsan! Sənə çatmalıyam!”
Bəşər yeniləşməlidir, deməli, ona yeni Dünyabaxış, yeni bayramlar gərəkdir. İnam Atanın yaratdığı bayramlar (İnsanilik, Xəlqilik, Şərqilik, Bəşərilik) İnamlaşacaq dünyanın - Mütləqə İnam Sivilizasiyasının, kamilləşən, ruhsallaşan İnsanındır - İnsanlarındır.

Əməkdar artist ağır xəstəlikdən dünyasını dəyişdi

Tanınmış müğənni, Əməkdar artist Sahibə Əhmədova vəfat edib.
İfaçı xərçəng xəstəliyindən dünyasını dəyişib.
Qeyd edək ki, müğənni "Şah İsmayıl" operasında Ərəbzəngi rolunun əvəzsiz ifaçısı kimi şöhrət qazanıb.
O bir zamanlar oxuduğu muğam və xalq mahnıları ilə məşhurlaşmışdı.
Sahibə Əliqulu qızı Əhmədova 1956-cı il yanvar ayının 11-i Ağcabədi rayonunun Hacılar kəndində anadan olub. Orta təhsilini həmin rayonun Boyat kəndində alıb. Uşaqlıqdan milli musiqiyə böyük marağı olub. İlk musiqi müəllimi Ağcabədi rayonunda fəaliyyət göstərən “Rast” ansamblının tanınmış xanəndələrindən olan əmisi oğlu Sabir Abbasov olub.
1975-ci ildə Asəf Zeynallı adına Orta-ixtisas Musiqi Texnikumunun xanəndəlik fakültəsinin muğam şöbəsinə daxil olub və görkəmli muğam ustadı, Əməkdar müəllim Nəriman Əliyevdən dərs alaraq muğam sənətinin sirlərini öyrənib. Texnikumda təhsilini davam etdirməklə yanaşı, 1976-cı ilin oktyabr ayından etibarən ustad tarizən Bəhram Mansurovun təşəbbüsü ilə Azərbaycan Dövlət Akademik Opera və Balet Teatrında işə başlayıb.
Opera səhnəsində ilk ifa etdiyi obraz M.Maqomayevin “Şah İsmayıl” operasından Ərəbzəngi obrazı olub. Elə ilk gündən Sahibə xanımın özünəməxsus tərzdə və yüksəs peşəkarlıqla ifa etdiyi bu obraz tamaşaçıların yaddaşında bu günə qədərdə böyük iz buraxıb və haqlı olaraq da “Səhnəmizin Ərəbzəngisi” adını qazanıb.
Sonralar opera səhnəsində silsilə ana obrazlarında çıxış edib. Ü.Hacıbəylinin “Leyli və Məcnun” operasında Leylinin anası, Məcnunun anası, Z.Hacıbəyovun “Aşıq Qərib” operasında Qəribin anası, Ş.Axundovanın “Gəlin qayası” operasında Camalın anası, R.Mustafayevin “Vaqif” operasında qarı və s.
Operanın nəzdində respublikamızın hüdudlarından kənarda Rusiya, Bolqarıstan, Türkiyə kimi bir çox ölkələrdə qastrol səfərlərində olub. Həmçinin Sahibə xanım M.Maqomayev adına Azərbaycan Dövlət Akademik Filarmoniyasının solisti olaraq bir çox dövlət səviyyəli tədbirlərin və konsert proqramlarının iştirakçısı olub.
Muğam və xalq mahnılarımızın mahir ifaçısı olan Sahibə xanımın ifasında “Bayatı-Şiraz”, “Çahargah”, “Şur”, “Segah”, “Orta Mahur”, “Mahur-hindi”, “Rahab”, “Bayatı-kürd”, “Qatar”, “Şahnaz” muğam dəstgahları, “Qarabağ şikəstəsi”, “Arazbarı”, “Simayi-Şəms” kimi zərbi-muğamları lentə alınıb və bir çoxu Azərbaycan Televiziyasının Qızıl Fondunda saxlanılır. Sahibə xanım “Uca dağlar”, “Ahu kimi”, “Alma almaya bənzər”, “Dağlardan aşdım” və s. xalq mahnılarını böyük şövqlə ifa edib. Uzun illər göstərdiyi fəaliyyətin nəticəsi olaraq bir çox diplom və fəxri fərmanlarla təltif olunub. 16 sentyabr 2006-cı il tarixində Azərbaycan Prezidentinin sərəncamı ilə “Əməkdar artist” fəxri adına layiq görülüb. 3 övladı var.
Allah rəhmət eləsin.

“Avroviziya”da təmsilçimizin ifa edəcəyi mahnı bu tarixdə təqdim olunacaq

“Avroviziya 2024” beynəlxalq mahnı müsabiqəsində Azərbaycan təmsilçilərinin ifa edəcəyi mahnı 15 mart Bakı vaxtı ilə saat 12:30-da Avroviziyanın rəsmi Youtube kanalında və İctimai Televiziyanın canlı yayımında təqdim olunacaq.
Bu barədə İctimai Televiziya və Radio Yayımları Şirkətindən məlumat verilib.
Öncə bildirildiyi kimi, mahnı müasir pop və ənənəvi etnik musiqi janrlarını özündə birləşdirir. Mahnının müəllifi bu il ölkəmizi Avroviziyada təmsil edəcək Fahree - Fəxri İsmayılov özüdür. Qeyd olunan vaxtda ictimaiyyətə ilk dəfə açıqlanacaq mahnı üzərində Fahree ilə birgə gənc, istedadlı yerli musiqiçilər - Mado Salikh, Edqar Ravin, Həsən Heydər və Mila Miles da işləyib.
Onu da qeyd edək ki, mahnının muğam hissəsini “Səs Azərbaycan: Doğma nəğmələr” müsabiqəsinin finalçısı İlkin Dövlətov ifa edəcək. Xatırladaq ki, təmsilçilərimiz İsveçin Malmö şəhərində mayın 7-də səhnəyə çıxacaqlar.

“Avroviziya”da tətbiq olunacaq bir sıra dəyişikliklər açıqlandı

İsveçin SVT yayım şirkəti 2024-cü ildə Malmödəki "Avroviziya" Mahnı Müsabiqəsini daha da maraqlı etmək üçün tətbiq ediləcək bir sıra dəyişiklikləri açıqlayıb.
Eurovision.tv bununla bağlı məlumat yayıb. İlk dəfə olaraq "Böyük beşlik" ölkələri - Fransa, Almaniya, İtaliya, İspaniya, Böyük Britaniya və müsabiqənin ev sahibi İsveç təmsilçiləri mahnılarını yarımfinal zamanı canlı ifa edəcəklər.
Əvvəlki illərdə yarımfinal zamanı yuxarıda adları çəkilən ölkələrin hər birinin məşqindən yalnız qısa bir fraqment nümayiş etdirilirdi. İndi “Böyük beşlik” və İsveç “Avroviziya” səhnəsinə çıxaraq öz işlərini canlı yayımda tamaşaçılara nümayiş etdirə biləcəklər.
Mayın 7-də ilk yarımfinalda Almaniya, İsveç və Böyük Britaniya təmsilçiləri, mayın 9-da isə ikinci yarımfinalda Fransa, İtaliya və İspaniyadan olan iştirakçılar səhnəyə çıxacaqlar.
Finalda səsvermə qaydaları da dəyişir: indi bu, daha uzun sürəcək, çünki tamaşaçılar “Avroviziya 2024”ün ilk iştirakçısı səhnədə çıxış etdikdən dərhal sonra öz səslərini favoritə verə biləcəklər. Əvvəlki illərdə səsvermə tamaşadan sonra başlayırdı.
Səsvermədə "Avroviziyanın" iştirakçısı olmayan ölkələrdə olan mahnı müsabiqəsinin pərəstişkarları da iştirak edəcək. Onlara səs vermək üçün 24 saat vaxt veriləcək. Bunlar üçün onlayn səsvermə hər yarımfinal və finalın ikinci məşqi başa çatdıqdan dərhal sonra başlayacaq, canlı yayım başlayana qədər davam edəcək.
Müsabiqənin təşkilatçıları "Avroviziya 2024" zamanı tətbiq olunacaq daha bir böyük dəyişikliyi də açıqlayıblar: bu, daha sonra açıqlanacaq, eyni zamanda müsabiqənin bəzi aspektləri dəyişməz qalacaq, məsələn, münsiflər heyəti və tamaşaçılar tərəfindən səsvermə.
Hər bir iştirakçı ölkədəki milli münsiflər hələ də yalnız finala səs verəcək (yekun nəticənin demək olar ki, 50%-ni təşkil edir, 50%-dən bir qədər çoxu ictimai səsvermədən gəlir) və hər yarımfinalda ilk 10-luq ictimai səsvermə yolu ilə müəyyən ediləcək. Həmçinin həm yarımfinalda, həm də finalda nəticələrin təqdimatında heç bir dəyişiklik olmayacaq.
Qeyd edək ki, ölkəmizi yarışmada Fahree (Fəxri İsmayıl) və İlkin Dövlətov təmsil edəcək.

“BİR İL NƏ TEZ ÖTÜB KEÇDİ...”


Azərbaycan Respublikası Prezidenti yanında Dövlət İdarəçilik Akademiyasında rektorun müşaviri, Tarix kafedrasının professoru, Əməkdar müəllim, Azərbaycan Yazıçı¬lar Birliyinin üzvü, ləyaqətli insan Musa Quluza-dənin vəfatından bir il ötür. Unudulmaz dostumuzun əziz xati¬rə¬sinə ehtiramla...


“Bir il nə tez ötüb keçdi...” Bu, Sizin sözünüzdür, Musa müəllim. “Dünyasını dəyişmiş həyat yoldaşım Zemfira xanım üçün “Sənsizlik” silsiləsindən esselər” başlıqlı yazınızı “Söz” jurnalında oxumuşdum. Nisgilli sözləriniz, səmimi etiraflarınız insanın ürəyini göynədir... “Hardasan” başlıqlı essenizdə təbiətinizə uyğun sakit, məsum halda itirdiyiniz ömür-gün yoldaşınızı haraylayırsınız. Bu “sakitlik” eyni zamanda ülvi, saf bir məhəbbətlə sevən, sevdiyinin qəfil itkisindən sarsılan həssas insan qəlbinin harayıdır, səssiz hayqırtısıdır...
Təəssüf... Çox təəssüf ki, bu gün eyni sözlər xətrinizi əziz tutan dostlarınızın dilində səslənir: “Bir il nə tez ötüb keçdi...”, “Hardasan?”, “Sizsiz çox darıxmışıq Musa müəllim! Yeriniz elə görünür ki...”
Bilirəm ki, ən əziz dostlarınızdan olan Xalq şairi Nəriman Həsənzadə, professor İbrahim Quliyev üçün də çox ağır itki oldu sizin yoxluğunuz. Bir-birinizə necə doğma, bağlı idiniz... Dəfələrlə aramızda bu barədə söhbət olmuşdu... “İbrahim müəllim çox etibarlı dostdur” deyirdiniz... “O cür insanları qorumaq lazımdır”.
Nəriman Həsənzadə də ömür-gün yoldaşı Sara xanımı itirdikdən sonra ona çoxlu şeirlər həsr etmişdi. Qınamışdılar ki, həyat yoldaşına şeir yazır. Nə qədər cahil, duyğusuz olmalısan ki, bu cür nümunə olası bir addımı rişxəndlə qarşılayasan.
Azərbaycanın tarix yazan şəxsiyyətləri, sərkərdələri, hökmdarları öz həyat yoldaşlarına abidələr ucaldıblar. İstər Nəriman müəllimin şeirləri, istərsə də Sizin esseləriniz ailə dəyərlərinin “can üstə” olduğu indiki zamanda gəncliyə böyük örnəkdir. Həm də bir xəbərdarlıqdır. Sağlığınızda bir-birinizin qədrini bilin, sevdiklərinizə çox zaman ayırın, deyirsiz bu etiraflarınızla...
Doğmalar yanımızda olanda onları vaxtsız, qəfil itirməyi ağlımıza gətirmirik, bəlkə də gətirməkdən qorxuruq. Onlara olunası diqqəti, sevgini çox vaxt arxa plana keçiririk. Qəfil bu itki səssiz, səmirsiz sənin başının üstünü alanda yanıb-tökülürsən. Yoxluqları ilə barışa bilmirsən. Onlar üçün edəcəklərini zamanın axarına buraxdığın üçün bir ömür əzab çəkirsən...
Deyirlər, torpağın üzü soyuqdur, heç kim ölənlə ölmür. Vallah boş söhbətdir. Doğmalar itkiləri ilə əzizlərinin ömründən bir parçanı da qoparıb özü ilə aparır. Və o yer daim göynəyir, sızıldayır...

Siz də bizə çox doğma idiniz. Yeriniz elə görünür ki... Təmkinli, səmimi, mehriban, qayğıkeş Musa müəllim!
Bizi 90-cı illərdə Xalq şairimiz Nəriman Həsənzadə tanış etmişdi. Nəriman müəllimin “Prometey” jurnalını işləyirdim, orada sizin esseniz də gedirdi. Şəklinizi ilk dəfə onda gördüm. Doğma insan təsiri bağışladınız görən kimi. Sanki illərdir tanıyırdım sizi. Bir gün də Nəriman müəllimlə mənim “Elm və həyat” jurnalı redaksiyasındakı darısqal iş otağıma gəldiniz. Nəriman məllim:
- Aliyə, bu mənim Musa qağamdı, tanış ol.
- Musa qağa, bu da bizim Aliyə.
İkimiz də güldük. Dedik biz artıq “tanışıq”. Siz bizdən biri-birimizə o qədər danışmısınız ki, sanki biz illərdir tanışıq. Beləcə doğmalaşdıq. Sizin bir kitabınızı da bir yerdə işlədik. Razı qalmışdınız.
Bu sözü sizin xətrinizi əziz tutan, sizin də ona böyük hörmət bəslədiyiniz, bir yerdə işlədiyiniz tarixçi-alimimiz Firdovsiyyə xanım üçün də demişəm, bu gün sizin üçün də deyirəm, Musa müəllim. Həyat qəribədir... İnsanları biri-birinə yaxınlaşdıran, doğmalaşdıran qan qohumluğu deyilmiş sən demə. Mənim üçün doğmadan-doğma insanlar var ki, onların uzaqdan-uzağa varlığı, hətta itirdiklə¬rimizin xatirəsi belə bəs edir ki, yaşamaq üçün stimulun olsun. Onların həyat yolunu, məsləhətlərini, tövsiyələrini həyat yoluna məşəl edib irəliləyəsən.
Akademik Cəmil Quliyevi, uzun illər “Respublika” qəzetinin baş redaktoru olmuş Teymur Əhmədovu, yazıçı Cəmil Əlibəyovu, “Elm və həyat” jurnalından mərhum Binnət Süleymanı həmişə ehtiramla xatırlayıram...
Bu gün Nəriman Həsənzadə, Firdovsiyyə Əhmədova, Ülkər Hüseynova, Sevda Əlibəyli, Şirindil Alışanov, Şəddat Cəfərov, Tərlan Əkbərov, Xatirə Həsənzadə, Şamil Qurbanov və b. qan qohumlarım deyillər, amma dar günümün dostu, məsləhət, güvənc yerimdirlər... Tək mənə yox, hamıya qarşı belədilər...
Siz də belə idiniz, mənə həmişə doğma olan Musa müəllim! Sizi daim hörmətlə, ehtiramla xatırlayacağam.
Əziziniz, “Hardasan” deyib harayladığınız Zemfira xanımla qovuşduğunuz yeni dünyanızda rahat uyuyun. Ruhunuz şad olsun!

Aliyə CAVANŞİR
12 mart 2024

Sabah Füzulidə Uşaq Yaradıcılıq Mərkəzinin açılışı olacaq

Sabah Füzuli şəhərində Kurmanqazı adına Uşaq Yaradıcılıq Mərkəzinin açılışı olacaq.
Bunu Prezident İlham Əliyev Azərbaycan-Qazaxıstan Ali Dövlətlərarası Şuranın birinci iclasında deyib.
Qazaxıstan Prezidentinə Qarabağın bərpasında göstərilən qardaş köməyinə, məhz qazax xalqının Azərbaycan xalqına hədiyyəsi və Prezident Tokayevin təşəbbüsü olan Füzuli şəhərindəki Kurmanqazı adına Uşaq Yaradıcılıq Mərkəzinə görə təşəkkürünü bildirdiyini deyən dövlətimizin başçısı, həmçinin qeyd edib: “Azərbaycanın suverenliyinin bərpası məsələsində həmrəylik sözlərinə görə minnətdarıq. Əlbəttə, zənnimcə, Azərbaycanda hamı bilir ki, Qazaxıstan bizim etibarlı dostumuz və müttəfiqimizdir”.

Sertab Erener 21 ildən sonra yenidən “Eurovision”a hazırlaşır

“Eurovision” mahnı müsabiqəsi tarixində Türkiyəyə birincilik gətirən Sertab Erener 21 ildən sonra müsabiqənin şou hissəsində yenidən səhnə almağa hazırlaşır.
2003 "Eurovision" qalibi Sertab Erener İstanbulda verdiyi konsertdə 2024 "Eurovision" Mahnı Müsabiqəsini təşkil edəcək İsveçdən dəvət aldığını və müsabiqə gecəsi üçün hazırlıqlara başladığını açıqlayıb.
59 yaşlı Erener mayın 11-də İsveçin Malmö şəhərində keçiriləcək yarışmanın şou hissəsində "Everyway That I Can" mahnısını fərqli versiyada oxuyacağını açıqlayıb.
Türkiyənin sonuncu dəfə qatıldığı "Eurovision" Mahnı Müsabiqəsində ölkəni təmsil edən Can Bonomo 2012-ci ildə "Love Me Back" mahnısı ilə yeddinci olmuşdu.
Türkiyə 2013-cü ildə bal sistemindəki ədalətsizliyi əsas gətirərək "Eurovision"dan çəkilib.

Azərbaycanı "Avroviziya-2024"də bu il o təmsil edəcək

İctimai Televiziya və Radio Yayımları Şirkəti "Avroviziya-2024" beynəlxalq mahnı müsabiqəsində Azərbaycanı təmsil edəcək iştirakçının adını açıqlayıb.
Bu il ölkəmizi İsveçin Malmö şəhərində Fahree - Fəxri İsmayılov təmsil edəcək.
Xatırladaq ki, bu il seçim prosesi 2 əsas mərhələdən ibarət olub. Birinci mərhələdə iştirakçılar yerli musiqi və səhnə peşəkarlarından ibarət jüri qarşısında mahnılarını canlı olaraq ifa ediblər. Yerli jüri səsverməsi nəticəsində 15 ifaçıdan 6-sı beynəlxalq jüri səsverməsinə keçə bilib. Fahree səsvermənin lideri olmaqla 2024-cü ildə Azərbaycanın Avroviziya təmsilçisi adına layiq görülüb.
Qeyd edək ki, əvvəlki illərdən fərqli olaraq, bu ilki seçimlərdə hər bir ifaçı məhz Avroviziya səhnəsində ifa etmək istədiyi mahnı ilə iştirak edib. Qalib mahnıda müasir pop və ənənəvi etno elementlərinin sintezi əksini tapir.
İsveçin Malmö şəhərində keçiriləcək "Avroviziya-2024" mahnı müsabiqəsinin yarımfinal mərhələləri bu il mayın 7-si və 9-u, final mərhələsi isə mayın 11-də baş tutacaq. Püşkatma nəticəsində Azərbaycan bu il 1-ci yarımfinalda çıxış edəcək.