AMEA Mərkəzi Elmi Kitabxanasının əməkdaşı Gülşən Məmmədoğlu AMEA Rəyasət Heyətinin iclasında MEK direktoru Leyla İmanovanın işdən azad edilməsi qərarı ilə bağlı öz facebook səhifəsində Prezidentə müraciət edib.
CƏNAB PREZİDENT, SİZƏ MÜRACİƏT EDİRİK, AZƏRBAYCAN NAMİNƏ ONU İTİRMƏYƏK...
Leyla İmanova 2014-cü ildən fəaliyyətə başlayan yeni MEK-in memarıdır. Mən bir MEK əməkdaşı kimi şahid olaraq deyim ki, o, bu 5 ildə gözümüzün qarşısında gecə-gündüz demədən, düşünərək, iş saatlarından əlavə əmək sərf edərək, tətil hüquqlarını istifadə etmədən kitabxananın yeni profildə uğurlu təşkil olunması üçün bütün mövcud resurslarını sərf etdi. Məhz Leyla İmanovanın yüksək zəkası ilə düşünülmüş strateji planla, səriştəli idarəçiliyi ilə qabaqcıl dünya təcrübəsinə əsaslanan, milli-mənəvi dəyərlərin hər şeydən üstün tutulduğu, humanizmin, peşəkarlığın, obyektivliyin əsas meyarlar olduğu, tarixlə çağdaşlığı birləşdirən gözəl kitabxana mühiti yarandı. Bu 5 ildə Mərkəzi Elmi Kitabxana hər işinin zirvəsində oldu, dövlətçiliyə xidmət edən informasiya məkanına çevrildi. Əldə edilən nəticələr, həyata keçirilmiş layihələr, qazanılan uğurlar göz qabağındadır. Əgər kiminsə məlumatı yoxdursa, xahiş edirəm, kitabxanın veb saytına (http://www.mek.az/) girib 2014-dən bu günə qədər bütün illərin hesabatını, toplu 5 illik hesabatı, bütün xəbərləri izləsin.
Nə isə, fəaliyyət və uğurlar barədə çox uzun yazmaq olar. Qısası onu deyim ki, dünən AMEA Rəyasət Heyətində Leyla İmanovanın vəzifədən azad edilməsi ilə bağlı verilmiş qərar bizi, şəxsən məni, həm vətəndaş, həm də müəssisənin əməkdaşı kimi çox sarsıtdı. Dünəndən bəri bu xəbəri alan bütün MEK əməkdaşları dərin bir məyusluq içindədirlər. Hər kəs bu ədalətsiz qərarın şokunu yaşayır.
Axı niyə!? Məgər vətəni, milləti sevməyin, ölkə elminə-mədəniyyətinə töhfələr bəxş etməyin, cəmiyyətə vicdanla xidmət etməyin, rüşvətin-korrupsiyanın ayaq basa bilmədiyi, sağlam təməl üzərində daim inkişafa köklənmiş modern, universal bir Elm Ocağı yarada bilmənin, əvəzi, mükafatı budurmu?
Hörmətli, Cənab Prezident!
Bu ölkənin sıravi bir vətəndaşı, sadə bir MEK əməkdaşı olaraq Sizə müraciət edirəm. Leyla İmanova Sizin yeni meyarlarla qurmaq istədiyiniz Yeni Azərbaycan ücün əldə çıraqla axtarılan əvəzedilməz kadrlardandı. Çox xahiş edirəm, çox xahiş edirik, AZƏRBAYCAN naminə onu itirməyək!!!
Çox xahiş edirəm, çox xahiş edirik, bu cür kadrlara ehtiyacı olan ölkəmizin gələcəyi ilə bağlı ümidlərimizin sarsılmasına, Mərkəzi Elmi Kitabxananın layiqsiz, səriştəsiz əllərə düşməsinə icazə verməyin...


Gülşən Məmmədoğlu