Yunus Əmrə İnstitutu Bakı Türk Mədəniyyət Mərkəzinin müdiri Cihan Özdemir AMEA Mərkəzi Elmi Kitabxanasını (MEK) ziyarət edib. Qonaq MEK-in Sərgi salonu, Diplomatik fond, Nadir kitab fondu və başqa bölmələrinin fəaliyyəti ilə tanış olub. O, tanışlıqdan və Mərkəzi Elmi Kitabxana ilə əməkdaşlığa başlamaqdan məmnunluğunu ifadə edib. Mərkəzin müdiri C.Özdemir Yunus Əmrə İnstitutunun Bakıdakı fəaliyyətindən bəhs edib və gələcəkdə Mərkəzi Elmi Kitabxana ilə birlikdə bir sıra tədbirlərin, sərgilərin, beynəlxalq konfransların təşkil edilməsinin mümkünlüyünü səsləndirib.
Daha sonra çıxış edən AMEA Mərkəzi Elmi Kitabxanasının (MEK) direktoru Leyla İmanova kitabxananın tarixi, fəaliyyəti, indiyə kimi görülən işlər, həyata keçirilən layihələr, tədbirlər, aksiyalar və s. haqqında qısa məlumat verib. Gələcək planlardan söhbət açan MEK direktoru L.İmanova C.Özdemirin Türkiyədə dəfn olunmuş soydaşlarımızın məzar fotolarının sərgisi, AXC ilə bağlı sənədlərin sərgisini, xüsusi incəsənət növü hesab edilən miniatürlər kolleksiyasının MEK-də sərgisinin keçirilməsi təklifini dəstəklədiyini, kitabxana olaraq Azərbaycan və Türkiyənin birliyinə, mədəniyyətlərinin təbliğinə xidmət edən tədbirlərin keçirilməsinə MEK-in dəstək verəcəyini bildirib.