1 noyabr 2015-ci il tarixində keçiriləcək Parlament seçkilərində 31 saylı Suraxanı ikinci seçki dairəsindən namizədliyi irəli sürülmüş Milli Dirçəliş Hərəkatı Partiyasının sədri, millət vəkili Fərəc Quliyev 2010-2015-ci illərdə Milli Məclisdə deputatı kimi 5 illik parlament fəaliyyəti dövründə keçirilmiş 114 iclasda 105 təkliflə çıxış etmişdir.

Həmin təkliflərin bir qismini ixtisarla hissə-hissə diqqətinizə çatdırırıq və hər birinin həyata keçib, keçməməsi barədə məlumat veririk.
Fərəc Quliyevin Soydaşlarımız və Türk Dünyasıyla bağlı səsləndirdiyi təkliflərdən 11-ni seçib təqdim edirik:

Türk ölkələrinin inteqrasiyası ilə bağlı təkliflər:

Bütöv Azərbaycan tarixinin və Bütöv Türk tarixinin tədrisi təklifi
- Son vaxtlar Qarabag tarixinin məktəblərdə ayrıca dərs kimi tədrisi ilə bağlı fikirlər səslənir. Yaxşı mənada Dağlıq Qarabağın ümumiyyətlə Qarabağ ərazilərinin tarixini tanıtmaqdan söhbət gedir. Amma hər halda biz bütün çıxışlarımızda, söhbətlərimizdə, atdığımız addımlarımızda çalışmalıyıq ki, Dağlıq Qarabağı ayrıca subyekt kimi təqdim etməyək. Azərbaycan tarixinin tədrisində daha çox çalışmalıyıq ki, Bütöv Azərbaycan tarixi, hətta Bütöv Türk tarixi tədris olunsun. Ayrı-ayrı bölgələrin tarixinin tədris olunması məncə uyğun deyil.
(Bütöv Türk Tarixi hazırlanması
Türkdilli dövlətlər tərəfindən qərara alındı )

***

Türkdilli Dövlətlərin Əməkdaşlıq Şurasının Birinci Zirvə Toplantısının Bəyannaməsinin təsdiq edilməsi təklifi
- Türkdilli Dövlətlərin Əməkdaşlıq Şurasının Birinci Zirvə Toplantısının Bəyannaməsinin təsdiqi vacibdir. Buradakı müddəalar Türk cumhuriyyət-lərinin inteqrasiyasında irəliyə doğru daha bir addımdır. Mən bunu təqdir edirəm, hesab edirəm ki, bu kimi sənədlərin işlək halda olması üçün, bu müddəalara uyğun əməli addımlar atılmalıdır.

***

Türk Cumhuriyyətlərinin əməkdaşlığının siyasi-hərbi müstəviyə keçirilməsi təklifi
- Türk Cumhuriyyətlərinin əməkdaşlığı iqtisadi-mədəni müstəvidən, siyasi-hərbi müstəviyə keçirilməlidir.

***

Vahid Türk hərbi birliyinin yaradılması təklifi
- Biz artıq “Türk Cümhuriyyətləri Asayişi Birgə Mühafizə Qüvvələri”nin yaradılmasını da yubanmadan gündəliyə gətirməliyik. Bu qüvvələr bugün Türkiyədə PKK-ya qarşı, sabah Qarabağda erməni işğalına qarşı birgə mübarizə apara bilər.

***

Türkiyə ilə Azərbaycan arasında viza rejimi aradan qaldırılması təklifi
- Türkiyə ilə Azərbaycan arasında viza rejimi dərhal aradan qaldırılmalıdır.

***

Xaricdə yaşayan soydaşlarımızla bağlı verilmiş təkliflər:

Diasporanın gücləndirilməsi təklifi
- 2015-ci il ermənilərin Türklərə qarşı soyqırımı törətməsinin 100 ili kimi diqqətdə olacaq. Hərçəndi bunu ermənilər tam tərsinə təqdim etmək istəyirlər. Dövlət Diaspora komitəsinin qənaətbəxş fəaliyyəti diasporamızın inkişaf dinamikasında öz əksini tapıb. Bu il diasporamızı daha da koordinasiyalı aktivləşdirmək üçün Dövlət Diaspora komitəsinə əlavə vəsait ayrılması doğru olar.
(Bu istiqamətdə tədbirlər görüldü)

***


Güney Azərbaycanla bağlı verilmiş təkliflər:

Milli fəalların azad olunması üçün Azərbaycan Parlamentinin İrana müraciət göndərməsi təklifi
- Güney Azərbaycandakı milli fəalların azad olunması üçün Azərbaycan parlamentinin İran parlamentinə, Beynəlxalq təşkilatlara müraciət göndərməsinin vacib məsələ olduğunu bidirirəm.

***

Güney azərbaycanlı qaçqınlara qaçqın statusunun verilməsi təklifi
- 1 milyon qaçqının hüquqlarını qoruyan Azərbaycan Respublikasının Güney Azərbaycandan ölkəmizə qaçqın statusu ilə gəlmiş 20-yə qədər qaçqının hüquqlarını qorumaması təəssüf doğuran bir haldı. Prezidentin "Azərbaycan 50 milyonluq azərbaycanlıların vətənidir" ifadəsini xatırladaraq, icra orqanlarını soydaşlarımız qarşısında olan borcumuzu yerinə yetirməyə çağırıram.

***

Gürcüstanda yaşayan azərbaycanlılarla bağlı təkliflər:

Gürcüstanda yaşayan azərbaycanlıların təhsil və sosial problemləri ilə bağlı təkliflər
- Kənarda olan soydaşlarımız Azərbaycanın problemləri üzərinə dövlətimiz ilə bir yerdə getməyi bacarırlar. Gürcüstan türkləri ilə bağlı müəyyən addımlar atılıb. Orda azərbaycanlılar kompakt yaşadığı üçün sərmayə qoyuluşu çox mühim məsələ kimi qeyd olunmalıdır. Miqrasiya məsələləri ilə bağlı Azərbaycan tərəfindən olan güzəştlər müsbət qarşılanmalıdır. Eyni zamanda ora dərsliklərin göndərilməsi, insanlarımıza sahib çıxılması istiqamətində müəyyən işlər görülür və bundan sonra da görülməsi lazım olan işlər var. Məsələn, orda ən azından gələcəkdə bir ali məktəbin təsis olunması (yaradılması) kimi, orda bir milli təhsilin səhmana salınması mühim məsələdir və yaxud, gürcüstanlı soydaşlarımızın problemləri ilə bağlı beynəlxalq konfransın keçirilməsi və s. kimi məslələr.
(Bəzi tədbirlər görüldü)

***

Gürcüstanda yaşayan azərbaycanlıların təhsil problemiylə bağlı növbəti konseptual təklif
- Qarşıdakı yeni təhsil ili Azərbaycan ali məktəblərinə qəbul üçün Azərbaycan hökuməti Gürcüstan doğumlu soydaşlarımız üçün bir limit ayırsın – bu, 50 yer və ya başqa rəqəmlə ifadə oluna bilər. Amma hər halda biz Gürcüstanda soydaşlarımızın kompakt yaşadığı yerlərin kadr təminatı üçün addım atmalıyıq. Azərbaycan ali məktəblərinə qəbul üçün məhz onların arasında bir testin keçirilməsi və limitdə nəzərdə tutulan sayda ən yaxşılarının seçib, Azərbaycan dövləti hesabına təhsil verib, təyinatla yalnız oraya göndərilməsini təmin etməliyik.
(Hələlik həyata keçirilməyib)

***

Gürcüstanda yaşayan azərbaycanlıların təhsil probleri ilə bağlı ikinci təklif
- Yeni təhsil ili üçün təbii ki, insanlar ali məktəblərə seçimə başlıyacaq. Mən təklif edirəm ki, Azərbaycan tərəfi Borçalı türkləri üçün bir limit ayırsın – bu, 50 yer, ya 100 yer olacaq bilmirəm, amma hər halda biz kadrların hazırlanması üçün, məhz onların arasında bir testin keçirilməsi və ən yaxşılarının seçilib, orda kadrlarla təmin olunması üçün iş görməliyik.
(Hələlik həyata keçirilməyib)