General-leytenant Arzu Rəhimov Oklahoma Milli Qvardiyasının Quru Qoşunlar komandanı general-mayor Hopper Smitin başçılıq etdiyi nümayəndə heyətini qəbul edib

16 mart 2016-cı il tarixdə Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin rəisi general-leytenant Arzu Rəhimovun başçılıq etdiyi nümayəndə heyəti ilə ABŞ-ın Oklahoma Milli Qvardiyasının Quru Qoşunlar komandanı general-mayor Hopper Smitin başçılıq etdiyi nümayəndə heyəti arasında görüş keçirilmişdir. Tərəfdaşlıq Proqramı çərçivəsində ölkəmizdə rəsmi səfərdə olan nümayəndə heyəti ilə görüşdə general-leytenant Arzu Rəhimov Ermənistan-Azərbaycan Dağlıq Qarabağ münaqişəsi haqqında məlumat vermiş, Azərbaycan ərazisinin 20%-nin Ermənistan tərəfindən işğal olunduğunu qonaqların diqqətinə çatdırmışdır. Azərbaycan-ABŞ arasında ikitərəfli əlaqələrin inkişaf etdiyini deyən general-leytenant Arzu Rəhimov bunun hər iki dövlətin maraqlarına xidmət etdiyini bildirmişdir. Görüşdə tərəflər rəhbərlik etdikləri qurumların fəaliyyəti haqqında fikir mübadiləsi və müzakirələr aparmışlar. Görüşdən məmnun qaldıqlarını bildirən general-mayor Hopper Smit Dağlıq Qarabağ münaqişəsinin tezliklə sülh yolu ilə həll olunmasına ümid etdiklərini qeyd etmişdir. General-mayor Hopper Smit Səfərbərlik və Hərbi Xidmətə Çağırış üzrə Dövlət Xidmətinin nümayəndə heyətini Oklahoma ştatına səfərə dəvət edib.

Görüş dostluq və qarşılıqlı anlaşma şəraitində keçib.