Tezdən oyanmışdı. Həyətdə xeyli var-gəl elədi. Heç yerdə qərar tuta bilmirdi. Bir stəkan çay içəndən sonra pambıq sahəsinə getməyi qərarlaşdırdı. Sarvan kəndinin mərkəzində Sosialist Əməyi Qəhrəmanı Qüdrət Səmədovun heykəli önündə dayandı. Əmək qəhrəmanının qazandığı uğurlar, nailiyyətlər gözləri önündən gəlib keçdi. Həyat belədir deyə düşündü: illər bir göz qırpımında ötüb keçir, amma yaxşılıq, xeyirxahlıq heç zaman yaddan çıxmır. "Əmək ordenli" Mərdan sanki gördüyü işlər haqqında hesabat verirdi:
- Bu il pambıq əkinini, çiyid səpinini yüksək səviyyədə aparmışıq, hava şəraiti imkan versə sahələrdən bol məhsul toplayacağıq.
Çiyid səpilmiş sahəyə çatanda günəş bir boy yuxarı qalxmışdı. Cərgələrə düzələn pambıq kolları sahəni al-əlvan xalıya döndərmişdi. Mərdan yenicə cərgələrə düzülən pambıq kollarını sığallayır, sevinirdi. Cərgələrdə seyrəklik yox idi. Yaxşı çıxış alınmışdı. Ucu-bucağı görünməyən sahələr günəşin altında hər an bir az böyüyürdü.
Mərdan Cəlilov bu yerlərdə dünyaya göz açıb. Daim xeyirxah insanlardan həyat dərsi alıb. Bilmədiklərini onlardan öyrənib, torpağa könül verib, torpaqda onu naümid qoymayıb, əlindən tutub ucaldıb. Bu yerdə yadıma bir misra düşür.

Torpaqdan güc aldın, torpaq ucaltdı,
Ucalıq, məğrurluq sənə yaraşır.
Amalı müqəddəs, ürəyi təmiz,
Səninlə həmişə fəxr edirik biz.

Sonuncu misra Mərdan Cəlilova çox yaraşır. Çünki kənddə ona rast gələn hər kəs bu misranı xatırlayır, onunla qürur duyduqlarını deyir.
Ötən il pambıq sahəsində yüksək göstəricilərə nail olan Mərdan Cəlilov cari ildə rekord nəticələr qazanıb. Onun rəhbərlik etdiyi "P-Aqro" MMC ötən il 2050 hektar sahədən 6933 ton məhsul yığıb. 331 fermeri birləşdirən "P-Aqro" MMC cari ildə 2150 hektar sahədə pambıq yetişdirib. Pambıq sahələrindən indiyə kimi 8854 ton "ağ qızıl" yığılıb. Necə deyərlər, fermerlərin əziyyəti yerdə qalmayıb. 41,3 sentner pambıq yığılıb. Yüksək göstəricilərdir.
Salyanda pambıqçılığın zəngin tarixi ənənəyə və böyük potensiala malik olduğunu deyən Salyan DAİM-in direktoru Tariel Atamalıyev pambıqçılığın inkişaf etdirilməsi ilə bağlı cənab prezident İlham Əliyevin qəbul etdiyi qərarların, verdiyi tapşırıq və tövsiyələrin ölkəmizdə bu sahənin sürətli inkişafı üçün zəmin yaratdığını xüsusilə qeyd etdi.

Salyan "P-Aqro" MMC-in uğurları ilbəil artır. Burada çalışan insanlar təsərrüfatla məşğuldular. Ələsgər Əliyev uzun illər pambıqçılıqla məşğuldur, ixtisasca aqronomdur. Torpağın dilini yaxşı bilir.
Çiyidin əkinindən yığımınadək sahəni nəzarətində saxlayır. Onun dediklərindən:
- Pambıq bitkisi körpə uşaq kimidir. Gərək nazını çəkəsən, vaxtında aqrotexniki qaydalara əməl edəsən, vaxtlı-vaxtında dərmanını, suyunu verəsən ki, sonda da üzün gülsün, cibin dolsun.
Fermer Rahil Hüseynov da söhbətə qoşulur:
- Bizim vəzifəmiz bol məhsul yetişdirməkdir. Sağ olsun dövlətimizi. Dövlətin əli fermerin kürəyindədir. Dövlətin güzəştlərindən faydalanırıq. Salyan kəndlisi halal zəhməti, yenilməz hünəri ilə arxa cəbhədə hünər göstərir. Min bir zəhmət bahasına yetişən məhsulu itkiyə yol vermədən yığıb dövlətə təhvil veririk, əvəzində isə ailəni saxlamaq, ehtiyacları ödəmək üçün yaxşı gəlir əldə edirik. Mərdan Cəlilovu özümüzə örnək bilirik. Biz fermerlər onun qayğısından, məsləhətlərindən bəhrələnirik.
El ağsaqqalı Əlirza kişi pambıq dolu lafetləri görəndə sevincindən ürəyi dağa dönür: - Bizim Salyan torpağı bərəkət boğçamızdır. Adamları zəhmətkeş, əkib becərən insanlardır. Mərdan da belə insanlardan biridir. Onu tarlada pambıq kolları açılanda görəsiniz. Sevinci yerə-göyə sığmır. Əsl təsərrüfat adamıdı. Sovetlər dönəmində bizim Sarvan kəndinin qabaqcılları çox olub. Mərdan da onların davamçılarından biridi.
Mərdan Cəlilov pambıq qəbulu məntəqəsində pambıq tayasının yanında işçiləri tələsdirirdi: - Tez olun, yağış yağsa əziyyətimiz havayı olar. İşçilər onun sözlərindən sonra daha cəld işləməyə başladılar.

Onun üzündə sevinc, fərəh hissi var idi. Uşaq kimi sevinirdi: - Biz arxa cəbhədəyik, üzərimizə ikiqat məsuliyyət düşür. Ölkəmizin güclənməsi, iqtisadiyyatımızın artması üçün cənab Prezidentimizin, Ali Baş Komandanımızın tapşırıqların canla-başla yerinə yetirməliyik. Arxa cəbhədə hər vətəndaş bir əsgər olmalıdır. Xoşbəxtəm! İşğaldan azad olan torpaqlarımızda üçrəngli bayrağımız dalğalanır. Bir neçə aydan sonra o torpaqlarda həyat canlanacaq, əkin-biçin olacaq. Ali Baş Komandanımıza, cənab prezidentimiz İlham Əliyevə bu sevincli günləri bizə bəxş etdiyinə görə sağ ol deyirəm.
Qələm dəftərimi yığışdırıb göylərə baş çəkən "ağ qızıl" tayalarına baxıram. İnsan əlləri, insan zəhməti çox şeyə qadirdir. İnsan qurub-yaratmaq üçün doğulur. Mərdan Cəlilov kimi insanlar heç zaman unudulmur, heç zaman yaddan çıxmır. Hər dəfə Salyana yolum düşəndə onun xoş sorağını eşidirəm. Adı böyük hörmətlə, məhəbbətlə çəkilir, haqqında xoş sözlər deyilir.
Mərdan Cəlilov təkcə doğmalarının, dostlarının deyil, həm də elin-obanın fəxridir. Sarvanlılarının onunla öyünməyə, qürur duymağa mənəvi haqqı var. Bu haqqı o özü qazanıb.
O, ömrünü hədər yaşamayıb. Mənalı, şərəfli bir ömür sürür. Elə bir ömür yaşayır ki, yüz ömrə dəyər.
…O, axşam işdən yorğun qayıtmışdı. Sarvan kəndinin mərkəzindəki Şəhidlər Xiyabanını ziyarət etdi. Qarşısında dayanıb baş əydi. Əlindəki gül dəstəsini Şəhidlərin məzarı üstə qoyub öz-özünə pıçıldadı:

Torpaq üçün alış, yan,
Həyat olsun firavan.
On beş şəhid diyarı,
Qəhrəman kəndi Sarvan.

Yorğunluğu çıxmışdı. Üz-gözündəki təbəssümü görmək çətin deyildi…

Mənalı və şərəfli ömür yolu onu uca bir zirvəyə qaldırıb. O, elə bir zirvədə dayanıb ki, o zirvədən ölkəmizin hər yeri görünür. Fəsillər bir-birini əvəz edir, yarpaqlar yaşıllaşır, sonra saralır, yerə qar düşür, sonra qar əriyir, isti və soyuq küləklər əsir… Amma Mərdanın dayandığı zirvəni duman bürümür, yağış, qar döyəcləmir, fəsillərin isti-soyuğu bir-birini əvəz eləmir. Bu zirvə əlvan güllərə qərq olub və bu zirvənin gülləri, çiçəkləri heç zaman solmayacaq, öz ətrini hər yerə yayacaq. Torpağa bağlı insanın ömür zirvəsi kimi.

Sabir Qasımoğlu