6-12-2021, 17:23
Sabiq əmək və əhalinin sosial müdafiəsi naziri Səlim Müslümovun cinayət işi üzrə ibtidai istintaq davam edir.
APA-nın əldə etdiyi məlumata görə, sabiq nazir barəsində seçilmiş həbs-qətimkan tədbirinin uzadılması ilə bağlı istintaq orqanının təqdimatına baxılıb.
Səbail Rayon Məhkəməsində keçirilən prosesdə təqdimat təmin edilərək Səlim Müslümov barəsində seçilmiş həbs-qətimkan tədbiri daha 3 ay uzadılıb.
Qeyd edək ki, Səlim Müslümovun Azərbaycan Respublikasının əmək və əhalinin sosial müdafiəsi naziri vəzifəsində işlədiyi müddətdə nazirliyin fəaliyyət istiqamətləri üzrə əlillərin və sağlamlıq imkanları məhdud uşaqların reabilitasiyası və sosial müdafiəsinin təşkil edilməsi, işəgötürənlərin əmək, məşğulluq və sosial müdafiə məsələləri ilə bağlı fəaliyyətlərinə dövlət nəzarətinin həyata keçirilməsi və digər səlahiyyətlərin yerinə yetirilməsi zamanı çoxsaylı sui-istifadə hallarına yol verməsinə dair faktlar Dövlət Təhlükəsizliyi Xidmətində araşdırılıb.
Toplanılmış materiallar əsasında başlanılmış cinayət işi üzrə Səlim Müslümovun xidməti vəzifələrinin icrası ilə əlaqədar özü üçün qanunsuz üstünlüklər əldə etmək məqsədilə qulluq səlahiyyətlərindən tamah niyyəti ilə qulluq mənafeyinə qəsdən zidd olaraq istifadə edib dövlətin qanunla qorunan mənafelərinə ağır nəticələrə səbəb olan zərər vurmasına, habelə onun tərəfindən tabeçiliyində işləyən vəzifəli şəxslərdən vasitəçi kimi istifadə etməklə müxtəlif rayonlarda əlillər üçün fərdi yaşayış və internat evlərinin tikinti-təmirinin aparılması işlərini yerinə yetirən fiziki və hüquqi şəxslərə ayrılmış pul vəsaitlərinin bir hissəsinin tələb edilərək alınmasına əsaslı şübhələr müəyyənləşib.
Həmçinin Səlim Müslümovun nazirliyin Dövlət Əmək Müfəttişliyi Xidməti tərəfindən ölkə ərazisində istehsal, sosial-məişət və iaşə təyinatlı obyektlərin inşası və yenidən qurulması zamanı əməyin mühafizəsi tələblərinə əməl olunması, onların istismara buraxılmasına razılığın verilməsi, əməyin mühafizəsi tələblərinə uyğunluğu ilə bağlı müəssisələrdə aparılmış yoxlamaların nəticələrinə görə müxtəlif vaxtlarda külli miqdarda pul vəsaitləri qismində təkrar rüşvət almasına dair məlumatlar əldə olunub. Eyni zamanda, Daxili nəzarət şöbəsi tərəfindən ərazi strukturlarında aparılmış yoxlamaların nəticələri ilə bağlı onun həmin nazirliyin müxtəlif ərazi şöbələrinin rəhbərlərinin hər birindən 10 mindən 30 min manatadək külli miqdarda təkrar rüşvət almasına əsaslı şübhələr müəyyənləşib.
Səlim Müslümov Azərbaycan Respublikası Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə), 311.3.2-ci və 311.3.3-cü maddələri (təkrar külli miqdarda rüşvət alma) ilə təqsirləndirilən şəxs qismində məsuliyyətə cəlb olunaraq barəsində məhkəmənin qərarı ilə həbs qətimkan tədbiri seçilib.
Bütöv.az
6-12-2021, 11:00
6-12-2021, 10:43
Dünya bazarında təbii qaza olan fyuçers kotirovkalarının qiyməti azalıb.
Bütöv.az xəbər verir ki,Nyu-Yorkun NYMEX əmtəə birjasında yanvarda çatdırmaq şərti ilə təbii qaza olan fyuçerslərin qiyməti 1 mln. BTU-ya (British thermal unit – Britaniya istilik vahidi) görə 6,18% azalaraq 3,842 ABŞ dolları təşkil edib.
3-12-2021, 15:55
“Prezident İlham Əliyevin tapşırığı ilə sosial islahatların yeni mərhələsi kimi, növbəti sosial islahat paketi hazırlanıb. Bu paket çərçivəsində 2022-ci ilin əvvəlindən minimum pensiyada artım olacaq. Pensiya ilə yanaşı, müavinətlər də artacaq”.
Modern.az xəbər verir ki, bunu əmək və əhalinin sosial müdafiəsi naziri Sahil Babayev Qəbələdə Uşaq Reabilitasiya Mərkəzinin açılışı zamanı KİV-ə müsahibəsində bildirib.
O qeyd edib ki, 2018-2021-ci ildə minimum pensiya artımı 82%, orta pensiya artımı 60% olub. Müavinətlərdə də artımlar orta hesabla 2 dəfəyə yaxın olub. Ümumən, yeni ildən növbəti sosial islahat paketi çərçivəsində pensiya, müavinət, təqaüd, əməkhaqqı, sosial yardımlar artacaq. Bu artımların 2 milyondan çox insanı əhatə edəcəyini deyən S.Babayev bildirdi ki, əlavə olaraq 1 milyon 100 mindən çox pensiyaçının pensiyası da gələn ildən indeksasiya nəticəsində artacaq.
Qeyd edib ki, pensiya islahatlarında məqsəd dövlət pensiya sisteminin davamlılığının qorunması ilə yanaşı, bu sistemdə yeni humanist yanaşmaların tətbiqi, pensiya təminatına əlçatanlığın artırılmasıdır. Son illərdə həmin istiqamətdə mühüm addımlar atılıb. Pensiya sistemində yeni humanist yanaşmaların tətbiqi davam edəcək.
Bütöv.az
3-12-2021, 11:02
Halallıq geniş anlayışdır, təkcə kolbasa ilə bağlı deyil..
“Leş Tofiq” “Səhliyalı” şirkətinə nə qədər ölmüş heyvan cəmdəyi, leş satıb ?
“1000 BƏRƏKƏT HALAL NEMƏT” ət və ət məhsulları ilə Azərbaycan bazarına daxil olan “Səhliyalı” şirkəti 1996-cı ildə fəaliyyətə başlayıb. 2000-ci ildən başlayaraq kolbasa və sosiska istehsalını həyata keçirdi.
Şirkətin reklamından bəlli olur ki, Avstriyadan müasir avadanlıqlar gətirilib, guya şirkətin işçiləri xarici ölkələrdə təcrübə keçiblər.
Bütün bunlar şirkətin özü barəsində ucuz və bayağı reklamdır.
Bəs əslində vəziyyət necədir ?
Birincisi ondan başlayaq ki, son 20-30 ildə “HALAL” adı altında ölkə bazarına o qədər halal olmayan, haram, ölmüş heyvan cəmdəkləri girib ki, Azərbaycan insanını belə reklamla aldatmaq mümkün deyil.
İkincisi, HALALLIQ təkcə ətlə, kolbasa ilə bağlı məsələ deyil. İnsan hər məsələdə halallığı qorumalıdır, yoxsa kolbasa ilə halallıq olmaz.
Üçüncüsü, bəzi şirkətlər Qafqaz Müsəlmanları İdarəsindən guya halallıq sertifikatı alaraq əhaliyə ən iyrənc məhsulları təqdim edirlər.
Elə “Səhliyalı” şirkətinin “Min bərəkət halal nemət” markası ilə satılan kolbasa və sosiskalarının istehsal olunduğu sexlərdən yayılan videolar göstərdi ki, məhsulların içindən siçan nəcisi, heyvan tükü çıxır.
Bunun harası HALAL oldu, cənab Səhliyalı ?
Bir məsələni unutmayın ki, Xırdalanda taxta sexinin ərazisini hasara alıb orada uzun illər gizli olaraq ölmüş heyvan, at, eşşək cəmdəkləri satılırdı və bu məsələyə yüksəkçinli bir polis zabiti “krışa”lıq edirdi. Bax, həmin zaman “Səhliyalı” şirkətinin Xırdalanda 2 kolbasa sexi var idi. Aydın oldumu ?
Təsəvvür edirsiniz, hətta hökumətin rəsmi orqanı olan qəzetlər yazıb ki, “Səhliyalı” kolbasa üçün ərəb ölkələrindən mənşəyi məlum olmayan, üfunət iyi verən heyvan əti gətirir və ətə o qədər ədviyyat, zərərli maddələr vurulur ki, üfunət iyi çəkilsin.
Şirkət hətta öz saytı olan sahliyalı.com-da da ət məhsullarını haradan aldığını göstərmir.
Bəs onda istehlakçı aldığı məhsulun tərkibini, mənşəyini haradan bilsin ?
Hətta mediada şirkətin istehsal etdiyi sosiskadan siçan ətinin çıxmasını göstərən faktlar da var.
Bəli, mediada “Min bərəkət, halal nemət” adlı kolbasaların konkret olaraq leş ətlərdən hazırlandığı barədə ciddi informasiyalar var.
“Səhliyalı”nın çox iyrənc reklamı da var. Guya öz halallığını camaata göstərmək üçün hamını gözünün qarşısında “Bismillah” deyərək xüsusi aparatla heyvanın başı kəsilir. Bu biabırçılıqdır, vəhşilikdir.
Bir məsələni də unutmaq olmaz ki, dünyada onkoloji xəstəliklərin mənbəyi daha çox kolbasadır.
Bir sözlə, Bəşirovlar ailəsinə məxsus olan “Səhliyalı” şirkəti Min bərəkət adı altında min hoqqadan çıxır.
(gundelik baki.com)
Bütöv.az olaraq məqalədə toxunulan iddialarla bağlı qarşı tərəfin mövqeyini dərc etməyə hazırıq!
3-12-2021, 10:59
Baş Prokurorluq yanında Korrupsiyaya Qarşı Mübarizə İdarəsində Ekologiya və Təbii Sərvətlər Nazirliyinin vəzifəli şəxsləri barədə cinayət işi davam edir.
Kecən ay mediada xəbər verilmişdi ki, sahibkar Novruz Gülməmmədov Şamaxı Regional Meşə Təsərrüfat Birliyinin rəhbəri Əfqan Qəribov, Xanmusa və Sabir adlı meşəbəyilərdən Korrupsiyaya Qarşı Mübarizə İdarəsinə şikayət edib. O, şikayətində həmin şəxslərin sahibkarlıq fəaliyyətinə mane olduqları, Basqal meşələrini şəxsi təsərrüfatları kimi idarə etdikləri, sahibkarlardan qeyri-qanuni olaraq haqq yığdıqlarını bildirib.
Korrupsiyaya Qarşı Mübarizə İdarəsi isə məsələyə operativ yanaşaraq, cinayət işi başlayıb. Novruz Gülməmmədov idarəyə çağırılaraq ifadəsi alınıb. Məlumatda bildirilir ki, sahibkar idarədə adıçəkilən şəxslər barəsində əlavə faktlar təqdim edib. O, bildirib ki, Əfqan Qəribov Ekologiya və Təbii Sərvətlər Nazirliyində çalışan əmisi Cabbar Qəribova və nazirliyin departament rəhbəri Namiq Xıdırova güvənir. Şikayətçinin iddiasına görə, Əfqan Qəribov və işçilərinin qanunsuz əməllərinin arxasında məhz bu iki şəxs dayanır. Namiq Xıdırovun qardaşı oğlu Şamil Xıdırov isə idarədə baş meşəbəyidir.
Həmin faktlarla Korrupsiyaya Qarşı Mübarizə İdarəsinə müracət etmiş daha bir şəkayətci Agcəbədi rayon Taxta körpü qəsəbəsində yaşayan Əsədov Adil Əsəd oglu Qaynarxett.az-a bildirib ki, Şamaxı rayonunun Dədə-günəş meşəbəyliyinin 2 saylı meşə dolayının 6 və 7-ci kvartalları, ona bitişik meşə ərazisi əsil soyqırıma məruz qalıb. Həmin ərazidən 300 kub odun cıxarılıb. Dədə-günəş meşəsinin 9 saylı meşə dolayısının 0.50 hektar böyütmə bagı və 35 hektar meyvə bagında olmuş 2500 dəmir borudan cəmi 30-u qalıb. Bütün bu materiallar idarə rəisinin və sahə rəsi Xanmusanın həyətlərinə daşınıb.
Şikayətci bildirir ki, meşəbəyi Şakir Bəşirovdan 14 min manat 300 kub "odun pulu"nu idarə rəisi Əfqan Qəribov alıb və 2 saylı meşə dolayının 6-7-ci kvartalları, ona bitişik ərazi soyqırıma məruz qalıb. Bu azmış kimi sahə rəisi Xanmusa da əlavə olaraq 600 manat alıb. Üstəlik Ekologiya işçisi İdraka da 700 manat verən Şakir öz ərizəsin yazaraq işdən çıxıb. Bu qanunsuzluq barədə o, Nazirliyə və Korrupsiyaya Qarşı Mübarizə idarəsinə yazılı izahat verib və bu qanunsuz işlərin başında birbaşa Departament rəhbəri Namiq Xıdırovun dayandıgıni bildirib.
"İsmayıllı, Şamaxı, Ağsu və Qobustan rayonlarının ərazisində 149 iaşə obyekti rəsmiləşdirmişdir 37 obyekti isə bilərəkdən siyahıya salmamışdılar. Ekologiya nazirliyinin auditinin təxmini hesablamasına görə Namiq Xıdırov Əfqan Qəribovun müavini Kamil adlı şəxsin və Xanmusanın iştirakı ilə Qarabağa kömək adıyla sahibkarlardan adambaşına 500-dən 2500 manat arası pul yığaraq mənimsəmişdir."
Şikayətci Adil Əsədovun dediyinə görə "6 saylı Regional Ekologiya və Təbii Sərvətlər idarəsinin rəisi Akif Məmmədov Əfqan Qəribov ilə bir yerdə işləyiblər və yaxın dostdurlar. Əfqan Qəribovun bütün qanunsuz işlərini Akif Məmmədov ört-basdır edir. Yoxsa o bu qədər qanunsuzluqlara niyə göz yumsun?. Vəzifəsi təbiəti qorumaq olan bu şəxs nə məqsədlə reaksiya vermir, şıkayətləri qulağardına vurur? Sual da cavab da aydındır. Belə ki, onlar hamısı əlbirdir, arxalarıda olan da məhs nazirlikdə oturur. Başqa cür olsaydı belə qanunsuzluqlar olmazdı. Əlavə olaraq bildirirəm ki, bu yaxınlarda vəzifədən kənarlaşdırılmış Əfqan Qəribov heç nə olmamış kimi hər gün idarədə olur, işçilərədə deyir ki, "narahat olmayın, bu gün, sabah qayıdıram yerimə".
Sonda şikayətci Adil Əsədov bu qanunsuzluqlar barədə Prezident İlham Əliyevə və Ekologiya və Təbii Sərvətlər naziri Muxtar Babayevə teleqram göndərdiyini dedi. O, bildirdi ki, prezident İlham Əliyev cənabı çıxışlarında məmurları sahibkarlığın inkişafına yardım etməyə çağırır, amma onlar bunun əksini görür. Yaxud dövlət rəhbərliyinin təşəbbüsü ilə demək olar ki, hər il müxtəlif bölgələrdə ağacəkmə kampaniyaları keçirilir, amma bu ağacları qorumağa məsul olan şəxslər meşələri məhv edirlər. Ona görə də şikayət etdim. Susmaq hamımıza ziyan gətirir. Yəqin ki, Ekologiya və Təbii Sərvətlər Nazirliyi şıkayətimə operativ reaksiya verəcək. (Qaynarxett.az)
Bütöv.az
3-12-2021, 10:57
“Azergold” QSC-dəki qeyri-adi tenderlə bağlı Buta.vs olduqca inginc material dərc edib.
Axar.az xəbər verir ki, “Azergold” QSC-nin sədri Zakir İbrahimovun öz oğlu Zaur İbrahimə dəyəri milyonlarla manatla ölçülən tenderlər qazandırdığı bildirilir.
Məlumatda deyilir ki, Zaur İbrahim hazırda atasının rəhbərlik etdiyi “Azergold” QSC-nin tenderlərini qeyri-qanuni yollarla əldə edən “AZCD Group” QSC-yə rəhbərlik edir:
“O, Britaniyada ali təhsil aldıqdan sonra 2019-cu ildə Bakıya qayıdır və bibisinin həyat yoldaşının sədri olduğu Mənzil İnşaatı Dövlət Agentliyində (MİDA) işə başlayır.
Bundan sonra atası Zakir İbrahimov bir şirkət (“Buta Construction” QSC) təsis edərək, oğlunu ora faktiki rəhbər (formal direktor Azər adlı şəxs idi) təyin edir, “Azergold” QSC-nin tenderlərini müxtəlif üsullarla həmin şirkətə ötürür və bu mexanizmlə dövlət əmlakını ailəlikcə mənimsəyə başlayırlar. Bu yolla bir müddət külli miqdarda pul qazansalar da, Zaurun səriştəsizliyindən götürdükləri işləri sona çatdıra bilmirlər...”
Məlumatda deyilir ki, Zaurun şəxsi keyfiyyətləri götürülən işlərin keyfiyyətli şəkildə və vaxtında yerinə yetirilməsinə imkan verməyib. Buna baxmayaraq, “Azergold” Zaura aid şirkətlə işləməkdə davam edib:
“Bu uğursuz layihə ilə yanaşı yenə Zaurun bibisinin yoldaşı ona birbaşa iş verməsə də, rəhbəri olduğu MİDA-nın tenderinin qalibi olmuş “Çinar İnşaat” MMC-yə təzyiq edərək 2 binanın 2 milyon manatlıq tikintisini “Buta Construction” QSC-yə verir. Təbii ki, bu iş də yarımçıq qalır, binaların tikintisi yarımçıq saxlanılır. Yenə də Zaurun atası və digər yaxın qohumları işə qarışır və ona “gözün üstündə qaşın var” deyən olmur.
Amma artıq tikinti bazarında qeyri-ciddi şirkət kimi tanındıqları üçün və atasının məsləhəti ilə “Buta Construction” QSC-nin adını dəyişərək “AZCD Group” QSC (http://www.azcdgroup.com) edirlər. Ofisin ünvanını dəyişirlər, amma əməllər dəyişmir. Şirkətin adı dəyişdikdən sonra 30.09.2021-ci il tarixdə “Azergold” QSC tərəfindən satınalma dəyəri 22 307 945,859 (iyirmi iki milyon üç yüz yeddi min qoqquz yüz qırx beş) manat olan Tülallar-Çovdar avtomobil yolunun inşası tenderini, - burada bir çox köklü, beynəlxalq və “AZCD Group” QSC-dən dəfələrlə böyük və təcrübəli şirkətlərlər iştirak etməsinə baxmayaraq - nə hikmətdirsə, yenə Zaur İbrahimin “AZCD Group” şirkəti qazanır.”
Beləliklə də, məlum olur ki, nəticədə sözügedən şirkət bir il ərzində“Azergold” QSC-nin ümumi dəyəri 30 milyon (!) manatdan çox olan 3 layihəsini “qazanıb”.
Məlumatda Z.İbrahimin kübar həyat tərzi keçirməsi, işçiləri tez-tez təhqir etməsi və s. bu kimi şəxsi keyfiyyətlərindən də bəhs olunur.
Xatırladaq ki, ölkə başçısının da dəfələrlə tenderlərin və dövlət satınalmalarının korporativ maraqlara xidmət etməsi və buradakı korrupsiya halları barədə açıqlamaları, tənqidləri olub. Lakin belə görünür ki, Azərbaycanda bu sahədə səliqə-səhman yaratmağa tələsən yoxdur və bu gedişlə hələ xeyli müddət büdcə vəsaitlərinin tender adı ilə talanması prosesi davam edəcək.
Bütöv.az
3-12-2021, 10:50
Dünya bazarında neft qiymətlərində artım müşahidə olunur.
WTI markalı neftin yanvar fyuçersləri 1,94 % bahalaşaraq bir bareli 67,79 ABŞ dolları olub.
“Brent” markalı neftin fevral fyuçersləri 1,87 % bahalaşaraq bir bareli 70,97 ABŞ dolları təşkil edib.
Mənbə: Bloomberg
Bütöv.az
2-12-2021, 20:29
Bu günə qədər Azərbaycan Qida Təhlükəsizliyi Agentliyi (AQTA) Bakı şəhəri və regionlarda yerləşən 220 məktəbəqədər təhsil müəssisəsində monitorinq keçirib.
Agentlikdən “Report”un sorğusuna cavab olaraq bildirib ki, monitorinqlər zamanı 205 bağçada 1 236 nöqsan aşkar edilərək qanunvericiliklə müəyyən edilmiş qaydada tədbirlər görülüb.
Qeyd olunub ki, AQTA ölkə üzrə fəaliyyət göstərən məktəbəqədər təhsil müəssisələrində yoxlamaları davam etdirir: "Bu ilin oktyabrın 4-dən başlayan yoxlamalar çərçivəsində məktəbəqədər təhsil müəssisələrində qidalanmanın Nazirlər Kabinetinin 103 saylı qərarında göstərilən qida normalarına uyğun təşkil edilməsi, qida təhlükəsizliyi sahəsində texniki normativ hüquqi aktların tələblərinin yerinə yetirilməsi vəziyyətinin qiymətləndirilməsi, həmçinin yeyinti məhsullarının tədarük prosesi, onların saxlanması, daşınması, realizə olunması, markalanma və qablaşdırılmasına dair tələblərə əməl olunması yoxlanılır. Bununla yanaşı, mütəxəssislər tərəfindən bağçalarda yeyinti məhsullarının hazırlandığı və saxlandığı sahələrin sanitar-texniki və sanitar-gigiyenik normalara uyğunluğuna yerində baxış keçirilir.
Bütöv.az
2-12-2021, 20:03
Noyabrın 30-da DSX-nin Mi-17 tipli hərbi helikopterinin Xızı rayonu ərazisində yerləşən “Qaraheybət” aviasiya poliqonunda təlim uçuşları yerinə yetirərkən qəzaya uğraması ilə bağlı bəzi detallar ilk dəfə açıqlanıb.
“Real TV” xəbər verir ki, qəzaya uğramazdan əvvəl helikopter II helikopterə eniş komandası verə bilib.
Daha ətraflı aşağıdakı süjetdə:
[media=https://www.youtube.com/watch?v=hd75gJ1KeOU]
Bütöv.az
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!