2-11-2021, 17:41
“Məktəblərin noyabrda bağlanması ilə bağlı yayılan məlumatların heç bir əsası yoxdur”.
Bunu ARB telekanalının “Diqqət efir” verilişində Təhsil Nazirliyinin mətbuat katibi Cəsarət Valehov deyib.
O bildirib ki, məktəblərdə koronavirusa yoluxma ilə bağlı təşviş yaradacaq hal yoxdur:
“Yoluxma halları şagirdlərin ümumi sayının 1 faizini təşkil edir, hətta 0,5 faizin altındadır. Bizim yaydığımız məlumatlarda da qeyd olunub ki, yaxın həftələrdə təhsil müəssisələrinin qapadılması ilə bağlı heç bir qərar yoxdur. Əgər belə bir qərar olarsa, Təhsil Nazirliyinin informasiya resursları kifayət qədər operativdir və biz onu daha öncə yayacağıq”.
Yoluxma hallarının daha çox yuxarı sinif şagirdləri arasında olduğunu qeyd edən C. Valehov bildirib ki, distant təhsilə keçid olarsa, təhsil müəssisələri buna hazırlıqlıdır:
“Pandemiya problemlərlə yanaşı, yeni imkanlar da yaratdı. Fors-major hallara ötən ilə nisbətən indi daha hazırlıqlıyıq. Çünki artıq müəyyən qədər təcrübəmiz var”.
Bütöv.az
2-11-2021, 17:30
Müharibədən sonra regionumuzda yaranmış yeni reallıqlar Azərbaycan dövlətinin Qarabağ və Şərqi Zəngəzurda geniş quruculuq işlərinə start verməsinə zəmin yaratdı. Ancaq ölkədə aparılan quruculuq işlərinin əhatə dairəsi yalnız Qarabağ və Şərqi Zəngəzurla məhdudlaşmır. Çünki Azərbaycan dövləti tərəfindən respublikanın bütün bölgələrində zəruri addımlar atılır, yeni yolların, təhsil və tibb müəssisələrinin tikilməsi, eləcə də bərpa-quruculuq işlərinin aparılması prosesi intensiv şəkildə davam etdirilir.
Üstəlik, bu proseslər birbaşa dövlət başçısının şəxsi nəzarətində saxlanılır. Azərbaycan Prezidenti bölgələrə mütəmadi səfərləri çərçivəsində qarşıya qoyulmuş tapşırıqların icrası səviyyəsi ilə maraqlanır, yeni tapşırıq və vəzifələri müəyyən edir.
Bu mənada dövlət başçısı İlham Əliyev və Birinci vitse-prezident Mehriban Əliyevanın Şamaxı və İsmayıllı rayonlarına noyabrın 1-də həyata keçirdikləri səfər də Azərbaycan dövlətinin ölkədə hərtərəfli inkişaf və yenidənqurma xəttini icra etməsinin əyani sübutuna çevrilib.
Azərbaycanın müasir simasının formalaşdırılmasında bu cür səfərlərin önəmli rol oynadığını qeyd etməliyik. Bu səfərlər çərçivəsində yerli əhali ilə söhbətləşən dövlət başçısı və birinci vitse-prezident məhz onlardan birbaşa olaraq problemli məsələləri dinləyir, müvafiq göstəriş və tapşırıqları ilə məsələnin sürətli şəkildə həllinə nail olur.
Elə İsmayıllı rayonunun Lahıc qəsəbəsində təmir olunan Bədöyün məscidi ilə bağlı vəziyyət də bu qəbildəndir. Belə ki, 2019-cu ildə Birinci vitse-prezident Mehriban Əliyeva İsmayıllı rayonunun Lahıc qəsəbəsində səfərdə olarkən sakinlər Bədöyün məscidinin təmiri ilə bağlı müraciət etmişdilər. Birinci vitse-prezident məsciddəki vəziyyətlə tanış olmuş və burada əsaslı təmir işlərinin aparılması barədə tapşırıq vermişdi.
Bundan sonra 1791-ci ildə inşa edilən Bədöyün məscidində və ətraf ərazilərdə Heydər Əliyev Fondunun dəstəyi ilə bərpa-təmir işləri aparılıb. Görülən işlər nəticəsində məscid orijinal formasına uyğun bərpa edilib.
Ancaq Heydər Əliyev Fondunun fəaliyyəti heç də tarixi abidələrin bərpası ilə məhdudlaşmır. Fond ölkəmizdə müxtəlif sahələri əhatə edən layihə və proqramların həyata keçirilməsi ilə məşğul olur.
Sirr deyil ki, ölkəmizin turizm potensialının artırılması da dövlətimizin daim diqqət mərkəzində dayanan məsələlərdəndir. Turizm potensialı baxımından xüsusilə seçilən Lahıc bölgəsində görülən işlər turistlərin Lahıca olan marağını daha da artırıb. Belə ki, 2019-cu ildə Lahıca 89 min nəfər turist gəlib. Onun da 37 minini xarici turistlər təşkil edib. Bu ilin sentyabrına qədər isə artıq Lahıcı 82 min turist ziyarət edib.
Ölkədə yol infrastrukturunun qurulması və yenilənməsi məsələsini də daim diqqət mərkəzində saxlayan Prezident İlham Əliyev səfər çərçivəsində eyni zamanda İsmayıllı rayonunda Basqal-Sulut avtomobil yolunun açılışında iştirak edib. Bu yolla 4 minə yaxın əhalinin yaşadığı üç yaşayış məntəqəsi arasında gediş-gəlişin rahatlaşdırılması planlaşdırılıb. Daim əhalinin problemlərini diqqət mərkəzində saxlayan Azərbaycan dövləti yeni yolların çəkilməsi ilə eyni zamanda ölkədə iqtisadi proseslərin inkişafına təkan verir. Yeni yollar regionlararası ticarət münasibətlərinin inkişafında mühüm rol oynayır.
Son illər ölkədə enerji təchizatı sisteminin yenidən qurulması ilə bağlı da əhəmiyyətli addımlar atılır. Bu istiqamətdə müasir şəbəkələrin yaradılması və bu şəbəkələrin bir-biri ilə əlaqələndirilməsi sürətlə davam edir. Bu proses həmçinin dövlət başçısının səfər etdiyi Şamaxı ərazisində də uğurla davam etdirilir. Belə ki, səfər zamanı Azərbaycan Prezidenti tərəfindən “Azərişıq” ASC-nin Şimal-Qərb Regional SCADA İdarəetmə Mərkəzinin açılışı olub. İlk dəfə olaraq Regional SCADA sistemi Mərkəzi SCADA sisteminə qoşulub.
Rayonda həmçinin “Meysəri” yarımstansiyasında da əsaslı yenidənqurma işləri aparılıb. Perspektivdə bu yarımstansiya Şamaxı və İsmayıllı rayonlarının elektrik şəbəkələrini əlaqələndiriləcək.
Prezidentin Şamaxı səfəri çərçivəsində diqqət çəkən digər bir məqam Şamaxıda yerli futbol ənənələrinin yenidən bərpasına yönəlmiş addımların atılmasıdır. Azərbaycan dövlətinin idman sahəsinə göstərdiyi qayğı futboldan da yan keçmir. İdmanın ölkədə kütləviliyinin təmin olunması üçün görülən işlər çərçivəsində bir çox komplekslər tikilir, regionlarda müasir idman meydançaları istismara verilir. Dövlət tərəfindən əsas diqqət yeni idmançı nəslinin yetişdirilməsinə yönəlib və bu cür idman obyektlərinin istifadəyə verilməsi sözügedən məqsədə çatmaq üçün mühüm rol oynayır.
Prezident İlham Əliyev və Birinci vitse-prezident Mehriban Əliyeva Şamaxıda səfərdə olarkən yeni məktəb binasının açılışında iştirak edib. 1972-ci ildə inşa olunan akademik Heydər Hüseynov adına Çarhan kənd tam orta məktəbi tədris üçün artıq yararsız vəziyyətə düşdüyündən Heydər Əliyev Fondunun təşəbbüsü ilə məktəb üçün yeni binanın tikilməsinə qərar verilib. Təhsilin inkişafı ilə bağlı layihələrin icrasında da Heydər Əliyev Fondu öz dəsti-xətti ilə seçilir. Fondun prezidenti Mehriban Əliyevanın təşəbbüsü ilə təhsil sahəsində ardıcıl olaraq irimiqyaslı layihələr həyata keçirilir. Bu layihələr sırasına “Uşaq evlərinin və internat məktəblərinin inkişaf proqramı”, “Yeniləşən Azərbaycana yeni məktəb”, “Təhsilə dəstək” və “Məktəbəqədər təhsil müəssisələrinin inkişafı” proqramları daxildir. Fondun bu proqramları çərçivəsində Şamaxı rayonunda da müxtəlif illərdə yeni təhsil ocaqlarının tikintisi, təmiri və lazımi avadanlıqla təmin edilməsi üzrə bir sıra layihələr reallaşdırılıb.
İlham Əliyevin rəhbərliyi altında dövlətimizin qarşısında dayanan əsas tapşırıq bütün sahələrdə sürətli inkişafa nail olmaqdır. Məhz bu baxımdan görülən işlər sadəcə yol-nəqliyyat, enerji məsələləri ilə yekunlaşmır. Eyni zamanda təhsilin inkişafına qayğı göstərilir, müasir məktəb binaları tikilərək istifadəyə verilir. Həmçinin regionların iqtisadi potensialı nəzərə alınaraq, burada müvafiq sahələrin inkişafı üçün addımlar atılır. Bütün bunlar Azərbaycan dövlətinin əhalinin rifah halını yüksəltmək naminə kompleks işlər gördüyünün əyani sübutudur.
Bütöv.az
2-11-2021, 13:11
Türkiyə məhkəməsi Cümhuriyyət Xalq Partiyasının lideri Kamal Qılıncdaroğlunun 3 il əvvəl prezident Rəcəb Tayyib Ərdoğan barədə dediyi sözlərlə bağlı qərar verib.
Bütöv.az xəbər verir ki, məhkəmə müxalif liderin 43 min 307 lirə təzminat ödəməsi barədə qərar çıxarıb. Məlumata görə, Ərdoğan həmin təzminatı Rəcəb Tayyib Ərdoğan Universitetinin İnkişaf Fonduna bağışlayıb.
Məlumata görə, vəsait tələbələrin təqaüdü üçün sərf ediləcək.
2-11-2021, 13:04
Bu gün UEFA Çempionlar Liqasının qrup mərhələsində IV turun görüşləri keçiriləcək.
Bütöv.az xəbər verir ki, “Bayern”, “Zalsburq” və “Yuventus” qalib gələcəyi halda, pley-offa vəsiqəni iki tur öncədən təmin etmiş olacaq.
Günün matçı kimi İtaliyanın Berqamo şəhərində keçiriləcək “Atalanta” – “Mançester Yunayted” matçını göstərmək olar. Mançesterdə baş tutmuş ilk görüşdə meydan sahibləri 3:2 hesabı ilə əzmkar qələbə qazanmaqla qrupda liderliyi ələ almışdı. İndi “Atalanta”nın öz meydanında revanş almaqla liderliyi özünə qaytarmaq imkanı var.
Ancaq bu görüşə “Atalanta” itkilərlə çıxacaq. Berat Cimsiti, Robin Qozens, Hans Hatebur və Matteo Pessina zədə səbəbindən oynamayacaq. Qonaqlarda isə isveçli mərkəz müdafiəçisi Viktor Lindelöfün oynamayacağı dəqiqdir. Fransalı Antoni Marsyalın meydana çıxması isə sual altındadır.
Çempionlar Liqası
E qrupu
00:00 “Dinamo” (Ukrayna) – “Barselona” (İspaniya)
00:00 “Bayern” (Almaniya) – “Benfika” (Portuqaliya)
Xal durumu
1. “Bayern” – 9
2. “Benfika” – 4
3. “Barselona” – 3
4. “Dinamo” – 1
F qrupu
00:00 “Vilyareal” (İspaniya) – “Yanq Boyz” (İsveçrə)
00:00 “Atalanta” (İtaliya) – “Mançester Yunayted” (İngiltərə)
Xal durumu
1. “Mançester Yunayted” – 6
2. “Atalanta” – 4
3. “Vilyareal” – 4
4. “Yanq Boyz” – 3
G qrupu
21:45 “Volfsburq” (Almaniya) – “Zalsburq” (Avstriya)
00:00 “Sevilya” (İspaniya) – “Lill” (Fransa)
Xal durumu
1. “Zalsburq” – 7
2. “Sevilya" – 3
3. “Lill” – 2
4. “Volfsburq” – 2
H qrupu
21:45 “Malmö” (İsveç) – “Çelsi” (İngiltərə)
00:00 “Yuventus” (İtaliya) – “Zenit” (Rusiya)
Xal durumu
1. “Yuventus” – 9
2. “Çelsi” – 6
3. “Zenit” – 3
4. “Malmö” – 0
2-11-2021, 12:53
Bazar ertəsi Qlazqoda İqlim konfransının açılışında çıxışından sonra 78 yaşlı ABŞ prezidenti Co Bayden yuxulayıb.
Bütöv.az Daily Mail-ə istinadən bildirir ki, natiqlərdən biri iqlim problemlərinin həlli üçün hərəkətə keçməyin zəruriliyini vurğuladığı zaman Bayden yuxulu görünürmüş. Buna səbəb onun gərgin Avropa turu olub. Bu anları əks etdirən görüntülərdə Bayden gözlərini açmaqda çətinlik çəkdiyi amma sonda tam yuxuladığı görünür. Bu anda köməkçisi ona yaxınlaşıb qulağına nəsə deyəndən sonra Bayden yenidən gözlərini açıb.
2-11-2021, 11:21
İmişli rayonunda 11 yaşlı qızı zorlayan şəxs barəsində həbs qətimkan tədbiri seçilib.
Bu barədə Baş Prokurorluğun Mətbuat Xidməti məlumat yayıb.
Bildirilib ki, İmişli rayon sakini, 2010-cu il təvəllüdlü A.N-nın (ad şərtidir) atalığı 1978-ci il təvəllüdlü S.C (ad şərtidir) tərəfindən zorlanması faktı əsasında sonuncuya Cinayət Məcəlləsinin 149.3.3 (zorlama təqsirkar şəxs üçün aşkar surətdə on dörd yaşına çatmayan şəxs barəsində törədildikdə) və 150.3.3-cü (seksual xarakterli zorakılıq hərəkətləri təqsirkar şəxs üçün aşkar surətdə on dörd yaşına çatmayan şəxs barəsində törədildikdə) maddələri ilə ittiham elan edilib və barəsində məhkəmənin qərarı ilə dörd ay müddətində həbs qətimkan tədbiri seçilib.
Hazırda istintaq davam edir.
Qeyd edək ki, İmişli Rayon Mərkəzi Xəstəxanasından rayon sakini 2010-cu il təvəllüdlü A.N.-nın (ad şərtidir) hamiləlik vəziyyətinin aşkar edilməsinə dair rayon prokurorluğuna məlumat daxil olub.
Faktla bağlı Cinayət Məcəlləsinin müvafiq maddələri ilə cinayət işi başlanılıb. Hazırda istintaq davam edir.
Xatırladaq ki, 11 yaşlı qızın övladı Akademik M.Ə.Mirqasımov adına Respublika Klinik Xəstəxanasının Hamiləlik patologiyası şöbəsində qeysəriyyə əməliyyatı ilə dünyaya gəlib. Körpə 30-31 həftəlikdir.
Bütöv.az
2-11-2021, 11:18
Azərbaycan Respublikası Mədəniyyət Nazirliyinin dəstəyi ilə Bakı Media Mərkəzi və “Salnaməfilm” studiyasının birgə istehsalı olan “Şuşa, sən azadsan!” sənədli filmi Zəfər bayramı ərəfəsində geniş auditoriyaya təqdim olunacaq.
Bütöv.az xəbər verir ki, bu barədə “Bakı Media Mərkəzi” məlumat yayıb.
Müasir hərb tarixinin ən parlaq səhifələrindən biri olan “Şuşa əməliyyatı”nın maraqlı detalları izləyicilərə ilk dəfə bu filmdə təqdim olunacaq.
Filmdə Şuşa əməliyyatını həyata keçirən cəsur əsgər və zabitlərimizin müsahibələri, əməliyyat zamanı çəkilmiş eksklüziv kadrlar yer alır.
Sənədli filmdə Vətən Müharibəsi Qəhrəmanı, Xüsusi Təyinatlı Qüvvələrin komandanı, general-leytenant Hikmət Mirzəyevin Şuşanın işğaldan azald olunması ilə bağlı fikirləri yer alıb:
“Mən Şuşaya girəndə özümü çox xoşbəxt və vicdanımın nə qədər rahatlıq içində olduğunu hiss etdim”.
2-11-2021, 11:04
Dünya bazarında neft qiymətləri fərqli istiqamətdə dəyişib.
WTI markalı neftin dekabr fyuçersləri 0,11 % ucuzlaşaraq, bir bareli 83,96 ABŞ dolları təşkil edib.
“Brent” markalı neftin yanvar fyuçersləri 0,02 % bahalaşaraq, bir bareli 84,73 ABŞ dolları olub.
Mənbə: Bloomberg
Bütöv.az
2-11-2021, 08:22
Lavrovla Mirzoyan arasında telefon söhbəti olub. Tərəflərin müzakirəsində üç məsələ əsasdır:
Bölgədə kommunikasiyanın blokadadan çıxarılması;
Azərbaycan-Ermənistan sərhədində gərginliyin azaldılması;
Bir il öncə imzalanan üçtərəfli bəyanatların ildönümü ərəfəsində icrası.
Lavrovun G-20 sammitindən sonra İrəvana zəngi iki ehtimalı önə çıxarır:
Birincisi, 3+3 formatının müzakirə edildiyi Çavuşoğlu-Lavrov görüşündə tərəflər prosesin sürətləndirilməsinə razılaşıblar;
Bu, az ehtimaldır, çünki Ankara və Moskva bölgənin gələcəyi ilə bağlı demək olar hər şeyi müzakirə edib və Ermənistandan cavab gözlənilir. Təbii ki, Roma görüşündə tərəflər prosesin sürətlənməsinə dair fikir mübadiləsi aparıb, amma Lavrovun məhz Çavuşoğlu ilə müzakirəyə görə İrəvana dərhal zəngi az inandırıcıdır.
İkinci və güclü ehtimal Putinin iştirak etmədiyi G-20 sammitində Ərdoğanın ABŞ və Fransa liderləri ilə görüşüdür;
Ərdoğan Bayden və Makronla ayrılıqda Cənubi Qafqazı, bölgədəki 3+3 formatını müzakirə etdi. Bu görüşlərdən dərhal sonra Moskvanın hərəkətə keçməsi rusları narahat edən məsələlərin olduğundan xəbər verir:
• Ruslar Ərdoğan və Baydenin 1 saat 10 dəqiqə çəkən görüşündə nələrin razılaşdırıldığından xəbərsizdir;
• - Qərbin bölgədə Türkiyəni tərəf kimi qəbul etməsi Ankara və Bakının masada əlini gücləndirir;
• - Qərbin bölgəyə marağını ruslar öz vasitəçiliyinə risk olaraq görür.
Rusiya Vaşinqtonla görüşdən sonra Ankaranın əlavə istəklər irəli sürməsi ehtimalına qarşı mövcud şərtlərdə-Ərdoğanla Putinin razılaşması çərçivəsində kommunikasiyanın açılması, reional əməkdaşlıq platformasının qurulmasını sürətləndirmək istəyir. Və həm də “hakim rolunu” yenidən nümayiş etdirirlər: üçtərəfli razılaşmaların icrası və sərhəd məsələsinin müzakirəsi də buna hesablanıb.
Güman ki, Moskvadan eyni motivli zəng Bakıya da ediləcək.
Lavrovun zəngində diqqətdən yayınmayan kiçik bir detal da var: tərəflər gündəmdə olan məsələlərlə bağlı “saatları dəqiqləşdirib”; bu ifadə mövqelərin dəyişib-dəyişmədiyini yoxlamaq kimi da oxuna bilər. Və burada diqqət Ərdoğanın Romadakı görüşləri ilə bağlı açıqlamalarındakı bir məqama yönəlir: Türkiyə prezidenti bildirdi ki, “Makronla Cənubi Qafqazı müzakirə etdik, dedik ki, bölgədə müsbət addımlar var və bu addımları hörmətli İlham Əliyev qardaşımız da davam etdirmək istəyir. Hətta Paşinyanla da görüşməsi oldu, bu görüşdə “altılıq platformasını” yaratmaq məsələsi gündəmə gəldi”.
Əliyevlə Paşinyan sonuncu dəfə 11 yanvar 2021-ci il tarixində Moskvada, Putinin vasitəçiliyi ilə görüşüb, ondan sonra hansısa təmasla bağlı heç bir məlumat yoxdur, lakin Ərdoğanın açıqlamasının məntiqi ardıcıllığı Azərbaycan və Ermənistan rəhbərliyinin ayrılıqda görüşdüyü fikrini də gündəmə gətirir. Bu açıqlamadan sonra erməni mediası xüsusilə “ayrı görüş” məsələsi üzərində dayanır. Mümkündür ki, Lavrov Mirzoyanla həm də bunu – Moskvadan xəbərsiz görüşün olub-olmadığını aydınlaşdırmaq istəyib.
Asif Nərimanlı
2-11-2021, 08:08
Azərbaycan MiQ-29 qırıcıları üçün İsrailin “hava-hava” raketlərini alıb.
Bu barədə məlumatı Teleqram kanallarına istinadla erməni mediası tirajlayıb.
“Azerbaijani Armed Forces” kanalı Azərbaycanın “I-Derby ER” aviasiya raketini aldığını iddia edib.
Bildirilib ki, raket artıq ordumuzun arsenalına daxil edilib. “I-Derby ER” “Derby” raketlərinin təkmilləşdirilmiş və tam modernləşdirilmiş versiyasıdır.
“I-Derby ER” orta mənzillidir, 100 km-likdəki hədəfi dəqiqliklə məvh etmək gücündədir. Raketin ağırlığı 118 kq-dır, döyüş başlığının ağırlığı isə 23 kq-dır.
Bu raketi F-16C/D, F-5, Miraj, JAS-39 Gripen, o cümlədən MiQ-21 və MiQ-29 qırıcıları daşımaq imkanındadır.
Erməni analitiklərin iddiasına görə, Azərbaycanın arsenalında Belarus və Ukraynadan alınmış və modernləşdirilmiş 10 MiQ-29 qırıcısı var.
Qeyd edək ki, hərbi ekspertlər bu raketin imkanlarını yüksək qiymətləndirirlər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!