15-08-2024, 17:27
Kəlbəcərdə itkin düşmüşdü, 31 il sonra dəfn olundu
31 il əvvəl itkin düşmüş hesab edilən və şəxsiyyəti dəqiqləşdirilmiş mülki şəhid Zeynalova Təranə Davud qızının nəşinin qalıqları Bərdə rayonunda dəfn olunub.
Bərdə şəhər qəbiristanlığında keçirilən vida mərasimində rayon sakinləri, Bərdə və Kəlbəcər Rayon İcra Hakimiyyətinin, hüquq-mühafizə orqanlarının rəhbərləri və əməkdaşları, ictimaiyyət nümayəndələri iştirak ediblər. Vida mərasimindən sonra Təranə Zeynalovanın nəşi torpağa tapşırılıb.
Qeyd edək ki, Zeynalova Təranə Davud qızı 1970-ci ildə Kəlbəcər rayonunun Çobangərəkməz kəndində anadan olub. 1993-cü il martın 31-də Kəlbəcər rayonunun Qamışlı kəndi ərazisində “Tunel” adlanan yerdə üç qardaşı ilə birlikdə itkin düşüb. Onun nəşinin qalıqları Laçın rayonunun Malıbəyli kəndi ərazisində aşkar edilib.
15-08-2024, 17:14
İsraildən Azərbaycandakı vətəndaşlarına xəbərdarlıq
İsrailin Xarici İşlər Nazirliyi Azərbaycan, Türkiyə, Ermənistan və Türkmənistanda olan vətəndaşlarına xəbərdarlıq edib.
Xəbərdarlıq Nazirliyin rəsmi saytında yerləşdirilib.
İsrail vətəndaşlarına İran tərəfindən gələ biləcək təhlükələrə qarşı diqqətli və ehtiyatlı davranmağa çağırıb.
"Təhlükə vətəndaşlarla yanaşı, İsrailin dövlət rəmzlərinə qarşı da yönələ bilər", - açıqlamada deyilir.
15-08-2024, 16:58
Həbib bütün borclarını ödədi
Yüngül çəkidə UFC çempionu Həbib Nurməhəmmədov Federal Vergi Xidmətinə (FTS) bütün borclarını qaytarıb.
O, Federal Vergi Xidmətinə ümumilikdə təxminən 3,4 milyon dollar ödəyib.
Xatırladaq ki, bu ayın əvvəllərində məhkəmə UFC-nin keçmiş çempionunun 79 milyonluq əmlakını müsadirə edib.
Qeyd edək ki, Həbib kariyerası boyu 29 döyüşə çıxıb. O, döyüşlərin heç birində məğlub olmayıb.
15-08-2024, 16:51
Ukrayna Kursk sakinlərinə humanitar dəhliz və təxliyə təklif edib
Ukrayna hökumətinin rəsmisi Rusiyanın Kursk vilayətinin dinc sakinlərinə humanitar dəhlizlə təxliyə təklif edib.
Ukrayna baş nazirinin müavini İrina Vereşşuk rəsmi teleqram səhifəsində məlumat yayıb.
Bildirilib ki, Kursk vilayətindən olan mülki şəxslər humanitar dəhlizlə Ukraynanın Sumi vilayətinə təxliyə edilə bilər.
Həmçinin vurğulanıb ki, Rusiya Federasiyasına doğru dəhliz də mümkündür, lakin hələlik Rusiya tərəfi bununla bağlı müraciət etməyib.
15-08-2024, 16:40
Zelenski Ali Radanı təcili toplanmağa çağırdı
Ukrayna prezidenti Volodimir Zelenski Ali Radanı bəzi hüquqi məsələləri nəzərdən keçirmək üçün təcili toplaşmağa çağırıb.
Müraciətində bunu prezident özü qeyd edib.
O bildirib ki, bu, ilk növbədə, Kursk vilayətində yerləşən ukraynalı hərbçilərə, eləcə də digər dövlətlərin vətəndaşlığı olan ukraynalı legionerlərə verilən hüquqi təminatlara aiddir.
“Onlar bizim vətəndaşlarımız, Ukrayna vətəndaşları olmağa layiqdirlər”, - deyə prezident vurğulayıb.
15-08-2024, 16:18
Mirziyoyev və Putin arasında telefon danışığı
Özbəkistan prezidenti Şavkat Mirziyoyev və Rusiya rezidenti Vladimir Putin arasında telefon danışığı olub.
Bu barədə Kreml və Özbəkistan PA məlumat yayıb.
Tərəflər Putinin bu il mayın 26-28-də Özbəkistana dövlət səfəri zamanı əldə olunmuş razılaşmaların icrasını müzakirə ediblər. Kremlin mətbuat xidmətinin məlumatına görə, telefon danışığı Özbəkistan tərəfinin təşəbbüsü ilə baş tutub.
Dövlət başçıları, həmçinin Özbəkistan Prezidentinin rəsmi saytında qeyd olunduğu kimi, Özbəkistan-Rusiya çoxşaxəli əməkdaşlığının daha da genişləndirilməsi, hərtərəfli strateji tərəfdaşlıq və müttəfiqlik münasibətlərinin dərinləşdirilməsi məsələlərini qaldırıblar.
Ticarət dövriyyəsinin artırılması üçün əlaqələndirilmiş tədbirlərin görülməsi, iki ölkənin aparıcı müəssisələri və regionları arasında kooperasiya əlaqələrinin inkişafı, birgə investisiya layihələrinin və humanitar proqramların həyata keçirilməsi məsələlərinə xüsusi diqqət yetirilib.
Söhbət zamanı qarşıdan gələn ikitərəfli və çoxtərəfli tədbirlərin qrafiki müzakirə edilib.
15-08-2024, 15:52
Şəhidimizin nəşi Əmircanda torpağa tapşırıldı
Birinci Qarabağ müharibəsində itkin düşmüş hesab olunan İbrahimov Cəmaləddin İbad oğlunun nəşi paytaxtın Suraxanı rayonunun Əmircan kənd qəbiristanlığında torpağa tapşırılıb.
Dəfn mərasimində kənd sakinləri, şəhidin ailə üzvləri, qazilər, eləcə də rayon icra hakimiyyətinin, hüquq-mühafizə orqanlarının əməkdaşları, ictimaiyyət nümayəndələri iştirak ediblər.
Qeyd edək ki, Cəmaləddin İbrahimov 1994-cü ildə Füzuli rayonunun Yuxarı Seyidəhmədli kəndi istiqamətində gedən döyüşlərdə itkin düşmüş sayılırdı.
15-08-2024, 15:42
Vətən müharibəsi qazisinin meyiti tapıldı
Sumqayıtda su kanalında batan 26 yaşlı oğlanın meyiti sudan çıxarılıb.
Bu barədə Fövqəladə Hallar Nazirliyindən məlumat verilib.
Bildirilib ki, avqustun 9-da Sumqayıt şəhəri, Stansiya Sumqayıt adlanan ərazidə avtomobilin su kanalına düşməsi nəticəsində batmış 1998-ci il təvəllüdlü Əliyev Abusət Fəxrəddin oğlunun meyiti Fövqəladə Hallar Nazirliyi Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri tərəfindən suda tapılıb çıxarılaraq aidiyyəti üzrə təhvil verilib.
Qeyd edək ki, A.Əliyev 44 günlük Vətən müharibəsi iştirakçısı və qazisidir.
15-08-2024, 15:38
Parlamentin yeni çağırışında ana müxalifət partiyası hansı olacaq?
Sentyabrın 1-də VII çağırış Milli Məclisə növbəti seçkilər keçiriləcək. Əvvəlki seçkilərdə olduğu kimi sentyabrın 1-dən sonra formalaşacaq yeni parlamentdə də deputatların əksəriyyəti hakim Yeni Azərbaycan Partiyasının (YAP) üzvlərindən ibarət olacağı gözlənilir.
Bununla birlikdə yeni Milli Məclisdə hansı müxalifət partiyası ikinci yeri əldə edəcəyi maraq doğurur.
Məlumat üçün bildirək ki, Ədliyyə Nazirliyi 26 partiyanı dövlət qeydiyyatına alıb: Ağ Partiya, Ana Vətən Partiyası, Azad Vətən Partiyası, Azərbaycan Demokrat Partiyası, Azərbaycan Demokratik Maarifçilik Partiyası, Azərbaycan Xalq Partiyası, Azərbaycan Xalq Cəbhəsi Partiyası, Azərbaycan Milli İstiqlal Partiyası, Azərbaycan Ümid Partiyası, Böyük Azərbaycan Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası (2024-cü ildə adını dəyişib: Ədalət, Hüquq, Demokratiya Partiyası), Demokratik İslahatlar Partiyası, Ədalət Partiyası, Gələcək Azərbaycan Partiyası, Haqq-Ədalət Partiyası, Klassik Xalq Cəbhəsi Partiyası, Milli Cəbhə Partiyası, Milli Dirçəliş Hərəkatı Partiyası, Müasir Müsavat Partiyası, Müsavat Partiyası, Respublikaçı Alternativ Partiyası, Vəhdət Partiyası, Vətəndaş Həmrəyliyi Partiyası, Yeni Azərbaycan Partiyası, Yeni Zaman Partiyası.
Parlamentin birinci çağırışından nəzər salsaq görərik ki, müxtəlif partiyalar seçkilərdə aktiv iştirak edib.
Belə ki, 1995-2000-ci illərin Milli Məclisində Yeni Azərbaycan, Xalq Cəbhəsi, Milli İstiqlal, Demokratik İstiqlal, Demokratik Sahibkarlar, Demokratik Maarifçilik, Ana Vətən, Vətəndaş Həmrəyliyi, Sosial Rifah, Müsavat partiyalarının mandatları olub.
2000-2005-ci illərin Milli Məclisində Yeni Azərbaycan, Xalq Cəbhəsi, Vətəndaş Həmrəyliyi, Ana Vətən, Kommunist, Milli İstiqlal, Yurddaş, Sosial Rifah, Azərbaycan Naminə Alyans partiyaları təmsil edilib.
2005-2010-cu illərin Milli Məclisində Yeni Azərbaycan, Müsavat, Vətəndaş Həmrəyliyi, Ana Vətən, Sosial Rifah, Xalq, Vətəndaş Birliyi, Bütöv Azərbaycan Xalq Cəbhəsi, Ədalət, Ümid, Demokratik İslahatlar, Böyük Quruluş partiyalarının mandatları olub.
2010-2015-ci illərin Milli Məclisində Yeni Azərbaycan, Vətəndaş Həmrəyliyi, Ana Vətən, Ümid, Bütöv Azərbaycan Xalq Cəbhəsi, Demokratik İslahatlar, Böyük Quruluş, Ədalət, Vətəndaş Birliyi, Sosial Rifah, Milli Dirçəliş Hərəkatı partiyaları yer alıb.
2015-2020-ci illərin Milli Məclisində Yeni Azərbaycan, Vətəndaş Həmrəyliyi, Ana Vətən, Bütöv Azərbaycan Xalq Cəbhəsi, Demokratik İslahatlar, Böyük Quruluş, Vətəndaş Birliyi, Sosial Rifah, Sosial Demokrat, Vəhdət, Demokratik Maarifçilik, Milli Dirçəliş Hərəkatı partiyalarının təmsilçiləri olub.
2020-ci ildə seçilmiş Milli Məclisdə isə bu partiyaların təmsilçiləri var: Yeni Azərbaycan Partiyası, Vətəndaş Həmrəyliyi Partiyası, Respublikaçı Alternativ Partiyası, Demokratik İslahatlar Partiyası, Böyük Quruluş Partiyası, Bütöv Azərbaycan Xalq Cəbhəsi Partiyası, Ana Vətən Partiyası, Milli Cəbhə Partiyası, Vəhdət Partiyası, Demokratik Maarifçilik Partiyası.
Sonuncu parlamet seçkilərində hakim partiyadan sonra ən çox yeri Vətəndaş Həmrəyliyi Partiyası (VHP) tutub. Belə ki, partiya parlamentdə üç mandat qazana bilib. Digər partiyalar isə hərəsi bir mandatda məclisdə təmsil olunub.
Qeyd edək ki, siyasi partiyalar parlamentdə təmsil olunmaqda xüsusi maraqlıdır. Belə ki, parlamentdə təmsil olunmaq və çoxluq qazanmaq həmin partiyalara bu mənada maliyyə üstünlüyü verir.
Hazırda bir deputatla təmsil olunan partiyanın aylıq dövlət maliyyələşməsi təxminən 20 min manatdır. Bu da öz növbəsində partiyanın fəaliyyətinin genişlənməsinə əhəmiyyətli dərəcədə şərait yaradır. Bu səbəbdən də siyasi partiyalar parlamentdə təmsil olunmaqda maraqlıdırlar.
Ehtimal edilir ki, VII çağırış parlamentdə də VHP ikinci ən çox deputatı olan partiya olacaq. Bu partiya seçkilərdə 18 namizədlə iştirak edir.
15-08-2024, 15:20
Bakıda içməli suyun təchizatı nə zaman bərpa ediləcək? - RƏSMİ
Oğuz-Qəbələ-Bakı su kəmərində aparılan təmir-bərpa işləri avqustun 15-i səhər saat 06:00-da tamamlanıb.
Azərbaycan Dövlət Su Ehtiyatları Agentliyinin (ADSEA) mətbuat xidmətindən bildirilib ki, hazırda su xəttinin doldurulması və quyuların işə salınması işlərinə başlanılıb.
“Avqustun 16-sı günorta saatlarında Bakı şəhəri üzrə içməli suyun təchizatı tam bərpa ediləcək. Su təminatı rejimində dəyişiklik olan ərazilərdə suyun verilməsi normal rejimə qaytarılacaq. Hazırda Oğuz-Qəbələ-Bakı su xəttində tamamlanma işləri davam etdirilir”, - deyə ADSEA-dan bildirilib.
Xatırladaq ki, avqustun 12-i gecə saatlarından başlayaraq Oğuz-Qəbələ-Bakı su kəmərində əsaslı təmir-bərpa işləri aparılır. Təmir-bərpa işləri nəticəsində Yasamal, Səbail, Nəsimi, Binəqədi, Sabunçu, Xəzər, Suraxanı, Ramanı, Pirallahı rayonlarında suyun verilməsi rejimində dəyişiklik edilib. Əhalinin digər mənbələr hesabına suyla təmin olunması istiqamətində işlər görülüb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!