5-08-2024, 14:59
İsveçdə öldürülən azərbaycanlının atası: “Kiməsə oxşadıblar, səhvən vurulub...”
Bir neçə gün əvvəl İsveçin paytaxtı Stokholm şəhərinin Upplands-Bru adlanan hissəsində qətlə yetirilən Azərbaycan vətəndaşı 35 yaşlı Məhəmməd Xankişiyevin nəşi hələ vətənə gətirilməyib.
Bu barədə Məhəmmədin atası Rafael Xankişiyev məlumat verib.
O qeyd edib ki, hadisənin hansı səbəbdən baş verməsi ilə bağlı dəqiq məlumatları yoxdur: “Şirvan rayonundanıq. Bir oğlum, bir qızım var. Oğlum 13-14 il idi ki, İsveçdə yaşayırdı. Hələ evlənməmişdi, subay idi. Orada restoranda işləyirdi. Hadisənin necə baş verməsi ilə bağlı bizə heç bir məlumat vermirlər. Ortada ancaq fərziyyələr var”.
Məhəmmədin güllələnmə səbəbi və cənazəsinin Azərbaycana nə vaxt gətirilməsinə gəlincə isə, R.Xankişiyev bildirib ki, bu barədə də onlara hələ dəqiq məlumat verən olmayıb: “Güllələnmə səbəbi məlum deyil, amma ortada belə bir fərziyyə var ki, səhvən vurublar. Oradakı polis də, prokurorluq da deyir ki, səhvən vurulub - kiməsə oxşadıblar, səhv salıblar. Deyirlər, iş polisdədir, araşdırma aparılır.
Cənazə barədə də dəqiq məlumatımız yoxdur. Dediklərinə görə, bu gün oğlumun meyitini verəcəklər. Əgər bu gün versələr, yəqin ki, sabaha gələr. İstintaq getdiyi üçün dəqiq nəsə bilmirik, gözləyirik”.
Xatırladaq ki, hadisə iyulun 30-u baş verib. İsveçdə yaşayan həmyerlimiz Məhəmməd Xankişiyev evinin yaxınlığında naməlum şəxs tərəfindən açılan atəşlə qətlə yetirilib.
5-08-2024, 14:35
Havanın temperaturu daha da yüksələcək
Növbəti iki gün ərzində Azərbaycanda havanın temperaturu yüksələcək.
Bu barədə Milli Hidrometeorologiya Xidmətindən məlumat verilib.
Bildirilib ki, avqustun 6-da Bakıda və Abşeron yarımadasında havanın maksimal temperaturunun 35-38° isti olacağı gözlənilir.
Azərbaycanın rayonlarında avqustun 6-7-də havanın maksimal temperaturunun Naxçıvan MR və Aran rayonlarında 35-38° isti, bəzi yerlərində 40° isti, dağlıq ərazilərdə 25-30° isti olacağı gözlənilir.
5-08-2024, 14:35
Havanın temperaturu daha da yüksələcək
Növbəti iki gün ərzində Azərbaycanda havanın temperaturu yüksələcək.
Bu barədə Milli Hidrometeorologiya Xidmətindən məlumat verilib.
Bildirilib ki, avqustun 6-da Bakıda və Abşeron yarımadasında havanın maksimal temperaturunun 35-38° isti olacağı gözlənilir.
Azərbaycanın rayonlarında avqustun 6-7-də havanın maksimal temperaturunun Naxçıvan MR və Aran rayonlarında 35-38° isti, bəzi yerlərində 40° isti, dağlıq ərazilərdə 25-30° isti olacağı gözlənilir.
5-08-2024, 08:31
Arzu Əyyarqızının yeni kitabı işıq üzü gördü
Arzu Əyyarqızının ''Ən müqəddəs pay kəlağay'' adlı yeni kitabı işıq üzü gördü. Kitab Mirvarid Dilbazi Poeziya Məclisinin mənəvi dəstəyi və xaricdə yaşayan Elvira Həmidlinin maddi dəstəyi ilə ''Elm və təhsil'' - nəşriyyayında nəşr olunub. Kitabın redaktoru- araşdırmaçı, yazar, publisist Vaqif Osmanlı, ön söz müəllifi- Güllü Eldar Tomarlı, məsləhətçi- Elvira Həmidli, rəyçi- Vüsal Sehranoğludu.
İnşallah, gənc şair Arzu Əyyarqızının kitabının təqdimatı Bakıda, sonra Cəlilabadda olacaq.
Arzu Əyyarqızının lirik dünyası onun milli ruhu, azadlıq, haqq-ədalət savaşı, sevgisi kimi saf və duyğuludur, şeirləri milli ruh nəğmələridir. Hər bənd, hər misranın çəkisi var. Gənc olsa da, müdrik düşüncələri oxucunu düşünməyə vadar edir. Çağdaş gənclərin əksəriyyətindən fərqli olaraq milli ruh, milli kimlik, milli əxlaq, milli dünyagörüş onun fkir dünyasının təməlidir. Başında, çiynində min illərdir Azərbaycan xanımlarının qürurla gəzdirdiyi, nənələrimizin mirası qədim milli baş örtüyümüz kəlağayını - abır, həya, ismət, namus, gözəllik, yaraşıq rəmzimizi bu gün ləyaqətlə gəzdirən, şeirlərində tərənnüm edən Arzu xanımın milli mənəvi dəyərlərə sayğısı sonsuzdur. Onun kəlağayı sevgisi özü, şeirləri qədər safdır.
Nə gözəl yaraşıq verirsən mənə,
Al rəngdə, butalı gözəl kəlağay.
Namusum, iffətim, başımın tacı,
Sən Odlar Yurduma özəl kəlağay.
Arzu xanım adını tariximizin şanlı səhifələrinə yazan, “Vətənin qoynuna köçən” şəhidlərin əziz və qədirbilən bacısıdır. Vətənin və onun şeirlərinin qəhrəmanları “sıldırım qayalara ayaq izləri ilə bərabər” cəsarətini, rəşadətini həkk edən ərənlərdi, dişiylə, yumruğuyla, düşmənə nifrətiylə silahlanan, keçilməzlikləri keçən igidlərdi.
Qalxıb zirvələrə sancdı bayrağı,
Əsdi qorxusundan, titrədi yağı.
Qurban hünərinə, Vətən dayağı -
Alqış bozqurduma, alqış əsgərə!
Arzu Əyyarqızı heç vaxt özündən razı deyil, özünü şair hesab etmir, ancaq onun şeirlərini oxuyan belə düşünmür, çünki onun yazdıqlarından poetik ətir var. Onun “dərdlinin dərdini bilən” və duyan lirik düşüncələri həmkarlarına “Haqqın dərgahından gələn şeirlər yazmağı” məsləhət görür. Nə olsun ki, Arzu xanım gəncdir, agıllı məsləhətin yaşı olmur. Sözün nahamar yolları gəncləri də kamilliyə doğru aparır:
Enişdi, yoxuşdu şairin yolu,
Cibləri boş olar, ürəyi dolu.
Onun var-dövləti - imzası, qolu,
Hər zaman tox olar gözü şairin.
O, “dünya vecinə olmayanları” sözünün qamçısı ilə tərbiyə etməyə çalışır. Ən yaxşı tərbiyə metodu söz olsa da, ilahi sözü anlamayanlara hərdən mənəvi qamçı da göstərmək lazımdır. Şair xanım “günahlar içində gərdiş edənlərə, nankora, nadana quyruq bulayan”lara xəbərdarlıq edir ki, “həyat bumeranqdır, çıxacaq qarşına etdiyin hər iş”.
Xor nəfsinə yenik düşmə,
Şeytanlara satar səni.
Arzu Əyyarqızı bu dünyadan, bəşər övladlarından, mənəvi dünyamızdan narahat, Türk qızıdır, xanımıdır, qələmlə silahlanıb eybəcərliklərlə, tamahının köləsinə çevrilənlərlə savaşan söz döyüşçüsüdür. Hər şeirində heç olmasa bir misra ilə incə-incə həssas məqamları vurgulayır:
Anlaqlılar susub, xəyala dalıb,
Qanmazlar məclisin başını seçir.
Varlı kimi görünürük,
Haqqımızı sata-sata.
Arzu Əyyarqızının lirik qəhrəmanının sevgi hissləri də özü kimi təvəzökardı. Həm də, çox şey istəmir, “gözü toxdu”. Yazır ki, “gözlərin gözümü, izlərin izimi, sözlərim sözümü sevsə bəsimdir”. Nəhayət istəyinin mənəvi zirvəsi lap ucadır:
Olsan da səbəbkar saçımda dənə,
Gəl, al ürəyimi verirəm sənə.
Nəfəsin, varlığın yetərdi mənə,
Ürəyin özümü sevsə bəsimdir.
Uğurlu söz adamını söz yaşadır və yaşadacaq. Arzu xanım da buna əmindi. Çünki sözün xidmətində vicdanla dayanıb. Nə olsun ki, zamanın ən ağır şələsi - söz və fikir yükü belindədi, yorulmur, usanmır, qələminə müraciəti qəlbinin hökmüdür: “haqsızlığın kəs bağrını, ədalətin hakimi ol, yaz, qələmim, yaz doğrunu, Vicdanıma salma ləkə, təriflərə etmə meyil, Haqqı qoru, Haqqa əyil!”.
Arzu Əyyarqızının söz, fikr, düşüncə dünyasının leytmotivi budur!
Mən hər şeirə poeziya demirəm. Arzu xanımın “Ruhum içir göz yaşımı” şeiri ilahi dərdin poeziyasıdır!
GÜLLÜ ELDAR TOMARLI
Mirvarid Dilbazi Poeziya Məclisi İctimai Birliyinin sədri,
şəxsi “KəlağayıMuzeyi”nin direktoru,
AYB və AAB-nin üzvü
4-08-2024, 14:16
İranda qum fırtınası - 1362 nəfər xəstəxanaya yerləşdirildi
İranda qum fırtınasıyla əlaqədar 1362 nəfər xəstəxanaya yerləşdirilib.
Qum fırtınası Sistan-Beluçistan ostanının şimalında daha güclü olub.
Qum fırtınası 1 milyona yaxın insanın yaşadığı Zabul, Zahek, Hamun, Hirmen, Nimruz, Zahidan, Mircave, Nusret Abad, Haş, Saravan, İranşehr və Mehristan şəhərlərini əhatə edib, son 5 gündə 1362 nəfər xəstəxanaya yerləşdirilib.
4-08-2024, 13:57
Çində torpaq sürüşməsi - 4 nəfər ölüb, onlarla insan itkin düşüb
Çinin cənub-qərbindəki Sıçuan əyalətində baş verən sel və torpaq sürüşməsi nəticəsində 4 nəfər həyatını itirib, 23 nəfər isə itkin düşüb.
Sıçuan əyalətində tüğyan edən sel nəticəsində bölgədə bir körpü uçub, bəzi binalara ziyan dəyib.
Yerli hakimiyyət orqanları təbii fəlakət nəticəsində 4 nəfərin öldüyünü, 23 nəfərin itkin düşdüyünü təsdiqləyib.
Genişmiqyaslı axtarış-xilasetmə əməliyyatlarının davam etdiyi bölgədən 939 nəfər təxliyə olunub.
4-08-2024, 13:17
Jurnalist olmaq istəyənlər qabiliyyət imtahanı veriblər
Dövlət İmtahan Mərkəzi (DİM) avqustun 4-də ali təhsil müəssisələrinin bakalavriat səviyyəsinin jurnalistika ixtisasına qəbul olmaq istəyən abituriyentlər üçün qabiliyyət imtahanı keçirib.
Bu barədə DİM-dən bildirilib.
Bu mərhələdə III ixtisas qrupu üzrə test imtahanı verərək müsabiqə şərtini ödəyən və jurnalistika ixtisasına qəbul olmaq üçün internet vasitəsilə anket dolduraraq qeydiyyatdan keçən abituriyentlər iştirak ediblər.
İmtahan Bakı şəhərində və DİM-in regional bölmələrinin yerləşdiyi Naxçıvan, Gəncə, Lənkəran, Şəki, Bərdə, Göyçay, Şirvan, Xaçmaz şəhərlərində təşkil olunub. İmtahanın keçirilməsinə 9 imtahan binası, 32 zal, 12 imtahan rəhbəri, 70 nəzarətçi cəlb olunub.
İmtahan bütün binalarda saat 10:00-da başlanıb və 2 saat 30 dəqiqə davam edib.
DİM-in elektron imtahanlar korpusunda imtahanın başlanmasından bir neçə dəqiqə əvvəl Mətbuat Şurasının və KİV nümayəndələrinin iştirakı ilə təklif olunan 238 mövzu arasından 3 mövzu seçilib və videobağlantı vasitəsilə imtahan mərkəzlərinə çatdırılıb. Abituriyentlər təqdim olunmuş mövzulardan biri üzrə inşa (esse) yazıblar.
İmtahan nəticələri yazı işlərinin yoxlanılması prosesi başa çatdıqdan sonra 4-5 gün ərzində elan olunacaq.
Məqbul qiymət alan abituriyentlər ixtisas seçimi zamanı jurnalistika ixtisasını ərizələrində qeyd edə biləcəklər.
4-08-2024, 13:14
QHT-lər üçün yeni imkanlar: Pulsuz konfrans zalı, “QHT Evi” açılır
Azərbaycan Milli QHT Forumuna üzv QHT-lər
bazası təhlil olunub və burada çoxsaylı problemlər aşkarlanıb. Bu səbəbdən İdarə Heyəti qərar verib ki, yeni üzvlük siyasəti formalaşdırılsın və üzvlər yenidən qeydiyyata alınsın.
Bu barədə Azərbaycan Milli QHT Forumunun (AMQF) İdarə Heyətinin sədri Ramil İskəndərli bildirib.
O qeyd edib: “Təəssüf ki, üzvlər siyahısında adları keçən bəzi təşkilatların və şəxslərin QHT sektoruna heç bir aidiyyəti olmadığı müəyyən edilib. Buna görə də üzv təşkilatlara yeni üzvlük vəsiqələri veriləcək, bununla da köhnə vəsiqələr etibarsız sayılacaq. Forumun Nizamnaməsinə uyğun olaraq, üzvlük haqqına İdarə Heyətində baxılıb, illik cəmi 100 manat üzvlük haqqı müəyyən edilib. Deyərdim ki, bu, simvolik rəqəmdir. Azərbaycan Milli QHT Forumuna üzv olmaq istəyən QHT-lər İdarə Heyətinə müraciət etməli, İdarə Heyətində məsələyə baxıldıqdan sonra müsbət qərar verilərsə, üzvlük haqqı ödənməli və yeni vəsiqə əldə olunmalıdır”.
Üzvlər üçün böyük üstünlüklərin olacağını deyən Ramil İskəndərli bildirib: “Bilirsiniz ki, hazırda QHT sektorunda ən böyük problemlərdən biri təlimlər, tədbirlər, konfranslar üçün zalların icarə qiymətlərinin əksər QHT-lərin büdcələrinə uyğun olmamasıdır, xeyli QHT bundan əziyyət çəkir. İllərdir təklif edilir ki, “QHT Evi” yaradılsın, orada bu imkanlar olsun, amma bu sahədə konkret addımlar yox idi. AMQF olaraq biz bu problemi demək olar həll edirik. Bu günlərdə Azərbaycan Milli QHT Forumu şəhərin mərkəzində - Qış Bulvarına yaxın ərazidəki “World Business Center”də yerləşib. “World Business Center”də hər cür şəraiti olan iki konfrans zalı var. Onlardan biri 25-40 nəfərlik, digəri 70 nəfərlikdir. AMQF-dən yeni üzvlük vəsiqələri əldə edən QHT-lər əvvəlcədən İdarə Heyətini xəbərdar etməklə növbəlilik əsasında bu zallardan ödənişsiz istifadə edə bilər. Bunun üçün 5 iş günü əvvəldən [email protected] elektron ünvanına xahişlə müraciət etmək (koordinator: Ləman Ağalarova +994513659897) kifayətdir. Zallardan pulsuz istifadəyə əlavə xidmətlər (kofe, çay, su, materiallar və digər xidmətlər) daxil deyil”.
Ramil İskəndərli onu da deyib ki, hazırda AMQF-nin ofisində dizayn, təmir işləri gedir. Bir-iki ay ərzində “World Business Center”də AMQF-nin hər cür şəraitlə təmin edilmiş geniş ofisi istifadəyə veriləcək. QHT-lər burada da növbəlilik əsasında təlimlərini keçə bilərlər. Biz “QHT Evi” arzusunu reallığa çevirmək istəyirik - bizim ofisimiz elə “QHT Evi” olacaq.
AMQF-nin İdarə Heyətinin sədrinin sözlərinə görə, üzvlər Forumun ekspertləri tərəfindən müxtəlif mövzularda bilik və bacarıqların artırılması istiqamətində təlimlərdə, seminarlarda, vebinarlarda, onlayn və hibrid görüşlərdə təmənnasız olaraq iştirak imkanı qazanacaqlar. BMT və digər strukturlarda təmsil olunma və üzvlüklə əlaqədar QHT-lərə davamlı qaydada konsultativ dəstək göstəriləcək.
4-08-2024, 12:58
İsraildə terror - Ölən və xəsarət alanlar var
İsrailin mərkəzindəki Holon şəhərində bıçaqlı şəxsin hücumu nəticəsində iki nəfər ölüb, daha iki nəfər yaralanıb.
Təcili yardım xidmətinin işçiləri hücum qurbanlarının bir-birindən təxminən 500 metr məsafədə üç fərqli yerdə olduğunu bildiriblər.
"Hadisə yerində 66 yaşlı qadın ölüb, daha bir yaşlı kişi xəstəxanada ölüb. 68 yaşlı zərərçəkən də ağır vəziyyətdədir, 26 yaşında başqa bir kişi orta dərəcədə xəsarət alıb", - nəşr yazıb.
Məlumata görə, polis cinayətkara atəş açıb, o, xəstəxanada ölüb
Hadisə terror aktı kimi qiymətləndirilib.
Hüquq-mühafizə orqanlarının məlumatına əsasən, hücumçu hadisə yerinə gələn polis zabiti tərəfindən güllələnib. Həmin şəxs İsrailə giriş icazəsi olmayan Amar Odehin qərb sahilindəki Salfit şəhərinin 34 yaşlı sakinidir.
4-08-2024, 12:30
Pezeşkian eks-naziri özünə xüsusi müşavir təyin etdi
Əli Tayyib Niya İranın yeni prezidenti Məsud Pezeşkiyanın xüsusi müşaviri təyin edilib.
Əli Tayyib Niya 11-ci hökumət dövründə İranın maliyyə və iqtisadiyyat naziri vəzifəsində çalışıb.
Prezident Məsud Pezeşkianın təlimatına əsasən, Şəhram Dəbiri İranın parlament işləri üzrə sədr müavini təyin edilib.
Şəhram Dəbiri bundan əvvəl Təbriz Şəhər Şurasının sədri vəzifəsində çalışıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!