18-01-2025, 18:42
Ölkəsinə qayıdan suriyalılar üçün 1700 avro
Almaniya Suriyada rejim dəyişikliyindən sonra ölkəsinə qayıdan hər suriyalı miqranta maddi yardım göstərir.
Bu barədə Almaniyanın Miqrasiya və Qaçqınlar üzrə Federal İdarəsinin (BAMF) “Spiegel” qəzetində dərc olunan məlumatında bildirilib.
Suriya yeni təyinat ölkəsi kimi ötən həftə Qayıdış və Reinteqrasiya Proqramına (REAG/GARP) daxil edilib. Suriyalılar ölkəni tərk etmək məcburiyyətində qalıb-qalmamalarından və ya hələ də sığınacaq prosesində olub-olmamalarından asılı olmayaraq, səyahət xərclərinin, o cümlədən aviabiletlərinin pulunun ödənilməsi üçün müraciət edə bilərlər. Bundan əlavə, Almaniya ölkələrinə qayıdan şəxslərə Suriyada yeni həyata başlamaları üçün birdəfəlik maddi dəstək də təmin edir. Hər bir şəxs 1700 avroya qədər pul ala bilər. Bu birdəfəlik ödənişin hər ailə üçün ən yüksək həddi 4000 avrodur.
Ölkəni tərk etmək istəyən suriyalılar birdəfəlik başlanğıc yardımı ilə yanaşı, ölkələrində tibb xidmətləri almaq üçün də maddi dəstəklə bağlı müraciət edə bilərlər. Bunun üçün adambaşına 2000 avroya qədər yardım göstərilə bilər.
Bir çox hallarda ödənişlər miqrantlar Suriyaya çatdıqdan sonra həyata keçirilir. BAMF bu məqsədlə Suriyadakı qeyri-hökumət təşkilatları ilə əməkdaşlıq etməyi planlaşdırır.
Suriyaya könüllü qayıdışı dəstəkləyən ilk əyalətlər Saksoniya-Anhalt və Hamburq olub. Saksoniya-Anhalt əyalət büdcəsindən adambaşına 1000 avroya qədər vəsait ödənilib. Hamburq şəhəri isə ötən il suriyalılara 300 avroluq səyahət yardımı təmin edib. Bu il yol xərci üçün 200 avro, ölkəyə giriş üçün isə 1000 avro ödənilməsi nəzərdə tutulub.
18-01-2025, 18:18
21 yaşlı hamilə qadın vəfat etdi
Naxçıvanda 21 yaşlı hamilə qadın vəfat edib. Hadisə bu gün baş verib.
Belə ki, qəfildən halı pisləşən 2004-cü il təvəllüdlü Məhərrəmova Gülcan İlham qızı üçün təcili tibbi yardım çağrılıb. O, xəstəxanaya aparılarkən yolda təcili tibbi yardım avtomobilində vəfat edib. Bildirilir ki, ana və övladının ölümünə səbəb təzyiq olub.
G.Məhərrəmova Babək rayonu Payız kəndində dəfn edilib. Qeyd edək ki, G.Məhərrəmova Naxçıvan Dövlət Universitetinin Memarlıq və Mühəndislik fakültəsinin Nəqliyyat mühəndisliyi ixtisası üzrə 2-ci kursunda (qiyabi) təhsil alırdı.
18-01-2025, 18:15
Qəzaların əsas səbəbi: dar səkilər, keçidi olmayan yollar
İmişlidə yol polisinə məxsus avtomobilin qarşısına digər bir nəqliyyat vasitəsinin çıxması nəticəsində xidməti maşın yol kənarında olan uşaqlara dəyib. Onlardan 2 nəfər həlak olub, digər azyaşlılar və sürücü xəstəxanaya çatdırılıb. Yaralılardan birinin vəziyyəti ağırdır.
Faktla görə cinayət işi başlanılıb, polis və prokurorluq orqanlarında araşdırma aparılır.
Mövzu ilə bağlı urbanist Anar Əliyev hadisəyə münasibətini bildirib. O, qeyd edib ki, qəzanın baş vermə səbəbi yol-infrastruktur sisteminin düzgün qurulmamasından qaynaqlanır:
"Hər birimiz bu kimi hadisələr baş verəndə günahkar axtarırıq, amma ən böyük problem yol-infrastruktur sisteminin bərbad halda olmasıdır.
İstər İmişli, istər Quba, istərsə də son iki ildə vloglarımda da göstərdiyimiz digər regionlarda yol hərəkətinin təşkilinə təhlükəsizlik baxımından yanaşma sıfır dərəcəsindədir. Bakıda hər hansısa işlər görülsə belə, hətta Gəncədə belə, yol hərəkətinin təşkilinə yeganə baxış geniş asfalt yolların çəkilməsindən ibarətdir. Ən yaxşı halda 1 metr, 30 santimetrlik piyada keçidi yaradılır. Əksər vaxtlarda isə piyada keçidləri olmur, sürücülərinin sürətlə hərəkəti üçün hər cür şərait yaradılır. Bunun da nəticəsini bu gün gördük".
Qəzanın videolarını analiz edən şəhərsalma üzrə ekspert bildirib ki, həmin yol çox güman ki, şəhərdaxili yoldur və orada sürət limiti saatda 60 km olmalıdır. Amma orada sürücülərin bu cür hərəkət etməsi üçün heç bir şərait yoxdur.
"Yol elə qurulub ki, orada saatda 100 km sürətlə hərəkət edə bilərsən. Təbii ki, sürət, digər avtomobilin yola daxil olması kimi faktorlar qəzaya təsir edib. Amma ümumi olaraq əsas problem İmişlinin küçə infrastrukturundadır. Bu nümunəyə baxdıqda görürük ki, vəziyyət necə acınacaqlıdır – piyada keçidləri yoxdur, səkilər dardır və ya yox vəziyyətindədir. Qəzanın baş verdiyi məkanda da uşaqlardan birinin yolla hərəkət etdiyini görürük, çünki səki kifayət qədər geniş deyil. Dəfələrlə bu haqda danışsaq da, görünən odur ki, heç bir nəticə vermir. Bu cür problemlər həll olmadıqca, faciəvi qəzalar da qaçılmaz olacaq".
18-01-2025, 18:00
Ermənistanın qiyamçı keşişi İrana gedib
Ermənistanda baş nazir Nikol Paşinyana qarşı
qiyam qaldırmaqla tanınan keşiş Baqrat Qalstanyan İrana şəxsi səfər edib.
Bu barədə “Sacred Struggle” Telegram kanalı məlumat yayıb.
“Fürsətdən istifadə edən Baqrat Qalstanyan Erməni Apostol Kilsəsinin Tehran Yeparxiyasının rəhbəri, arxiyepiskop Sebuh Sarkisyanla görüşüb. Bu axşam isə Baqrat Srbazan İranın erməni icmasının nümayəndələri ilə görüşəcək”, - məlumatda deyilir.
18-01-2025, 17:51
Xarici işlər naziri kanslerdən niyə küsüb? - SƏBƏB
Almaniyanın kansleri Olaf Şolts hökumətin iclasını tərk edən ölkənin xarici işlər naziri Annalena Berbokla anlaşılmazlıq yaşayıb.
“Bild” nəşrinin məlumatına görə, Şolts Ukraynaya yeni yardım paketini bloklayarkən, xarici işlər naziri Annalena Berbok hökumətin iclasını tərk edib. Bu zaman Şolts Berboku dayandırmaq istəsə də, ona əli çatmayıb.
Mətbuatda yer alan xəbərlərə görə, Berbok və Şolts arasındakı fikir ayrılığına səbəb Almaniyanın müdafiə naziri Boris Pistoriusun da qəbul etməkdə israrlı olduğu 3 milyard avroluq yardım paketi olub.
Annalena Berbok kanslerin vetosunu açıq şəkildə tənqid edib.
Məlumata görə, Berbok və Pistorius sənədlərin tərtibi üçün bir neçə ay sərf ediblər. Noyabrın əvvəlində Şolts özü Almaniyanın Azad Demokratik Partiyasının (FDP) lideri, maliyyə naziri Kristofer Lindneri Ukraynanın çox ehtiyac duyduğu vəsaitləri əngəlləməkdə ittiham etsə də, bu dəfə paketi özü bloklayıb.
Kanslerlə xarici işlər nazirinin bu olay zamanı çəkilmiş fotosu mətbuatda yayımlanıb və diqqətləri özünə çəkib.
18-01-2025, 17:44
Rəsininin öldürülməsilə bağlı iddialar rəsmən RƏDD EDİLİB
İran Silahlı Qüvvələrinin Baş Qərargahı 2024-cü ilin mayında keçmiş prezident İbrahim Rəisi və ətrafının həlak olması ilə nəticələnən helikopter qəzasının səbəbləri ilə bağlı fərziyyələrə münasibət bildirib.
Bu barədə İranın “Tasnim” agentliyi Baş Qərargaha istinadən məlumat yayıb.
İranın Baş Qərargahı şənbə günü yaydığı bəyanatda faciəvi qəza ilə bağlı "iddiaları və məsuliyyətsiz şərhləri" rədd edib.
Bəyanatda virtual məkanda müxtəlif şəxslərin prezident Rəisinin öldürülməsi ilə bağlı əsassız açıqlamalarının reallığa uyğun olmadığı bildirilib və onların məlumatsızlıqdan, bacarıqsızlıqdan və ya müəyyən məqsədlərlə verildiyi vurğulanıb.
Baş Qərargahın üç rəsmi hesabatına istinad edilərək, qəzaya hadisənin baş verdiyi "bölgədəki mürəkkəb atmosfer və coğrafi şərait"in səbəb olduğu vurğulanıb və hər hansı texniki nasazlıq, təxribat, terror hücumu, partlayış, elektron müharibə ilə bağlı iddialar rədd edilib.
2024-cü il mayın 19-da İran prezidenti İbrahim Rəisi, xarici işlər naziri Hüseyn Əmir Abdullahian və daha 6 nəfər helikopterinin dağlarda qəzaya uğraması və alovlanması nəticəsində həlak olub.
18-01-2025, 17:01
İmişlidəki qəza yerində xuliqanlıq törədənlər saxlanılıb - DİN
İmişli rayonu ərazisində ölümlə nəticələnən yol-nəqliyyat hadisəsi ilə əlaqədar bir qrup şəxs hadisə yerində xuliqanlıq hərəkətləri törədib.
Bu barədə Daxili İşlər Nazirliyi məlumat yayıb.
Bildirilib ki, xidməti avtomobilə əlavə zərər vurmaqla hadisə yerində hüquq pozuntusu törətməyə cəhd göstərən şəxslər müəyyən olunaraq saxlanılıblar.
Fakta görə cinayət işi başlanılıb, araşdırmalar davam etdirilir.
18-01-2025, 16:48
İmişlidəki hadisə ilə bağlı cinayət işi açıldı
Yanvarın 18-də, saat 12:30 radələrində İmişli şəhəri, Abbasqulu Şadlinski küçəsində Dövlət Yol Polisi avtomobilinin iştirakı ilə ölümlə nəticələnən yol-nəqliyyat hadisəsi ilə bağlı cinayət işi açılıb.
Bu barədə Baş Prokurorluğun Mətbuat xidmətindən məlumat verilib.
Bildirilib ki, sözgedən hadisə barədə rayon prokurorluğuna məlumat daxil olub.
Faktla bağı İmişli rayon prokurorluğunda Cinayət Məcəlləsinin 263.3-cü (yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki şəxsin ölümünə səbəb olduqda) maddəsilə cinayət işi başlanaraq ibtidai istintaq aparılır.
Baş Prokurorluğun məlumatında bildirilib ki, hadisə nəticəsində 2 nəfər ölüb, əlavə 2 nəfər, o cümlədən yol polisi avtomobilinin sürücüsü xəsarət alıb.
18-01-2025, 16:13
İmişlidəki qəzada ölən və yaralanan uşaqların çoxu qızlardı - TƏBİB AÇIQLADI
Xəbər verdiyimiz kimi, İmişli rayonu ərazisində ölümlə nəticələnən yol-nəqliyyat hadisəsi baş verib. Belə ki, xidmətə gedən DYP avtomobilinin qarşısına digər bir nəqliyyat vasitəsinin çıxması nəticəsində xidməti maşın yol kənarında olan uşaqlara dəyib. Nəticədə 2 nəfər ölüb, 3 nəfər xəsarət alıb.
TƏBİB-dən hadisə ilə bağlı bildirilib ki, Respublika Təcili və Təxirəsalınmaz Tibbi Yardım Mərkəzinə 18 yanvar saat 12:50 radələrində İmişli rayonu, Yalavac kəndi ərazisində piyada vurma hadisəsinin baş verməsi səbəbilə çağırış daxil olub.
Çağırış ünvanına 2 təcili tibbi yardım briqadası cəlb olunub.
"Xəsarət alan 3 uşaq (qadın cinsli) 1-i kritik ağır olmaqla, müxtəlif dərəcəli bədən xəsarətləri ilə İmişli Rayon Mərkəzi Xəstəxanasına təxliyə olunub.
1992-ci il təvəllüdlü (kişi cinsli) və 2015-ci il təvəllüdlü (qadın cinsli) şəxslərə ilkin olaraq, qapalı kəllə-beyin travması diaqnozu təyin olunub və ilkin zəruri tibbi xidmətlər göstərilib. Hazırda Reanimasiya şöbəsində müalicələri davam etdirilir, vəziyyətləri ağır qiymətləndirilir.
Təxliyə olunan şəxslərdən 1 nəfərin (qadın cinsli) xəstəxanada həkimə qədər ölüm faktı qeydə alınıb.
Qeyd edək ki, 1 uşağın isə hadisə yerində həkiməqədər ölümü baş verib".
18-01-2025, 16:00
İmişlidə ölən məktəblilər yol polisinin qardaşı uşaqlarıdır
İmişli rayonunda baş verən qəza zamanı dünyasını dəyişən azyaşlılar hadisəni törədən polis əməkdaşının qardaşı övladlarıdır.
Qəzada xəsarət alan yol polis inspektorunun da vəziyyətinin ağır olduğu bildirilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!