9-01-2025, 17:05
XİN-dən Paşinyana cavab
“Ermənistan sülhdə maraqlıdırsa, ərazi iddialarından əl çəkməlidir”.
Bunu Azərbaycan Xarici İşlər Nazirliyinin mətbuat katibi Ayxan Hacızadə Ermənistanın baş naziri Nikol Paşinyana cavabında deyib.
Onun sözlərinə görə, Ermənistanın "sülhsevər narrativi" regionda davamlı sülh və sabitliyin qurulmasının ən mühüm sütununu - dövlətlərin ərazi bütövlüyünə və suverenliyinə hörmət edilməsini gözardı edir:
"Bəs bütün bunlar həqiqətən nə deməkdir? Baş nazir Nikol Paşinyan, qoy sizin əməlləriniz sözdən daha çox danışsın".
N.Paşinyan bildirib ki, Ermənistan, həqiqətən də, qonşuları ilə sülh qurmaqda maraqlıdırsa, nə üçün Konstitusiyasında və milli qanunvericiliyində təsbit olunmuş "Qərbi Ermənistan" və "Qarabağ Respublikası" adlandırdığı ərazilərə olan iddialardan imtina prosesini başlamaqdan hər vəchlə imtina edir:
"Bağışlayın, amma sizin arqumentləriniz Ermənistanın "xoş niyyətlərinin" təsdiqi hesab edilə bilməz".
9-01-2025, 16:57
"Şuşa" restoranının yanındakı digər obyektlər də sökülür
Bakının Nərimanov rayonu ərazisində yerləşən məşhur "Şuşa" restoranı və ətrafındakı bir sıra obyektlər sökülür.
Həmin ərazidə yerləşən "Green cafe", "Bakı restoranı", "Ciyərxana" kimi obyektlər də söküləcək.
Nərimanov Rayon İcra Hakimiyyətindən bildirilib ki, bu onların səlahiyyətində deyil.
Qeyd edək ki, "Şuşa" restoranının sökülməsi barədə məlumatı Nərimanov Rayon İcra Hakimiyyəti yaymışdı.
Xatırladaq ki, ötən gün Nərimanov Rayon İcra Hakimiyyətindən verilən məlumatda "Şuşa" restoranının ərazisinin park statusu daşıdığı, buna görə restoranın söküldüyü bildirilmişdi.
9-01-2025, 16:44
Saakaşvili ilə bağlı yeni qərar
Gürcüstan parlamentində sabiq prezident Mixail Saakaşvilinin "cinayətlərini" araşdırmaq üçün komissiya yaradılacaq.
Bu barədə hakim "Gürcü arzusu - Demokratik Gürcüstan" partiyasının icraçı katibi, parlament çoxluğunun lideri Mamuka Mdinaradze məlumat verib.
"Saakaşvili rejiminə qiymət vermək üçün Gürcüstan parlamentinin yaz sessiyasının birinci həftəsində 2003-2012-ci illərdə qüvvədə olan rejimi və həbsdə olan şəxsləri araşdırmaq üçün müvəqqəti istintaq komissiyası yaradılacaq”, - deyə icraçı katib bildirib.
9-01-2025, 16:21
DİN-dən həbsdə olan qubalı fermerin ailə üzvlərinin iddialarına cavab
Azadlıqdan məhrum olunan qubalı fermerin ailə üzvlərinin iddiaları əsassızdır.
Bu barədə DİN-in Mətbuat xidmətindən bildirilib.
Qeyd olunub ki, törətdiyi cinayət əməllərinə görə məhkəmə qərarı ilə 11 il 6 ay azadlıqdan məhrum olunan qubalı fermer kimi təqdim olunan Rəşid Məmmədovun cinayət işi üzrə ailə üzvlərinin iddiaları yayılıb.
İddialara cavab olaraq, DİN-in Mətbuat Xidmətindən bildirilib ki, Quba rayon sakini, əvvəllər xuliqanlıq, qəsdən sağlamlığa zərər vurma maddələri ilə məhkum edilən Rəşid Məmmədovun qanunsuz əməllərindən zərər çəkmiş vətəndaşlar tərəfindən daxil olan çoxsaylı şikayətlər əsasında DİN-in Baş Mütəşəkkil Cinayətkarlıqla Mübarizə İdarəsində cinayət işi başlanılaraq istintaq hərəkətləri aparılıb.
İstintaqla müəyyən olunub ki, 43 yaşlı R.Məmmədov müxtəlif vaxtlarda ayrı-ayrı vətəndaşların 68.000 manat, 34.000 manat, 10.000 manat, 11.900 manat, 13.090 manat, 23.800 manat və 7.500 manat məbləğində pul vəsaitlərini özlərinin və ya ailə üzvlərinin şəxsiyyətləri üzərində zor göstərəcəyi və ya əmlaklarını məhv edəcəyi ilə hədə-qorxu gəlməklə ələ keçirib. Onun qanunsuz əməlləri istintaqla təkzibolunmaz dəlillərlə sübuta yetirilib.
R.Məmmədova zərər çəkmiş şəxslərin pulunu hədə-qorxu ilə tələb etməsi faktları üzrə ittiham elan edilərək cinayət işinin istintaqı tamamlanaraq baxılması üçün Sumqayıt Ağır Cinayətlər Məhkəməsinə göndərilib.
Törətdiyi qanunsuz əməllərə görə məhkum edilən R.Məmmədovun ailə üzvlərinin həqiqətə uyğun olmayan iddiaları tam əsassızdır, barəsində olan ittihamlardan yayınmaq məqsədindən irəli gəlir, qərəzlidir, həqiqəti əks etdirmir.
9-01-2025, 16:12
İlham Əliyev Gürcüstanın Baş nazirinə başsağlığı verdi
Azərbaycan Prezidenti İlham Əliyev Gürcüstanın Baş naziri İrakli Kobaxidzeyə başsağlığı məktubu göndərib. Məktubda deyilir:
"Hörmətli cənab Baş nazir,
Qali rayonunun Saberio kəndində baş vermiş yanğın nəticəsində beş uşağın həlak olması xəbəri bizi son dərəcə sarsıtdı.
Bu faciə ilə əlaqədar dərdinizi bölüşür, Sizə, həlak olan uşaqların ailəsinə və yaxınlarına, bütün Gürcüstan xalqına şəxsən öz adımdan və Azərbaycan xalqı adından dərin hüznlə başsağlığı verirəm".
9-01-2025, 15:45
“Qarabağ”dan böyük hesablı qələbə
Qış hazırlıq prosesini davam etdirən "Qarabağ" və "Kəpəz" komandaları arasında yoxlama oyunu keçirilib.
“Azərsun Arena”da təşkil olunan qarşılaşma Ağdam təmsilçisinin 5:1 hesablı qələbəsi ilə yekunlaşıb.
Meydan sahiblərinin heyətində qolları 5, 14, 35-ci dəqiqələrdə Aleksey Kaşuk, 38-ci dəqiqədə Emmanuel Addai, 64-cü dəqiqədə isə Davud Məsumov vurublar.
Gəncə klubunun yeganə qoluna isə 67-ci dəqiqədə Ehtiram Şahverdiyev imza atıb.
Qeyd edək ki, “Qarabağ” yanvarın 12-də ikinci yoxlama görüşündə "Zirə"ni sınağa çəkəcək.
9-01-2025, 15:26
Ukrayna-Rusiya danışıqları bu tarixdə baş tuta bilər
Ukrayna və Rusiya arasında danışıqlar 2025-ci ilin birinci yarısında baş tuta bilər.
Bu barədə CNN Ukrayna və Amerika rəsmilərinə istinadən məlumat yayıb.
Məlumata görə, Kiyev və Moskva arasında danışıqlar 2024-cü ilin noyabrında Kəmalə Harris qalib gəlsə belə, bu ilin birinci yarısına planlaşdırılıb.
“Həm Amerika, həm də Ukrayna administrasiyası Moskva ilə danışıqların 2025-ci ilin birinci yarısında – ABŞ seçkilərində kimin qalib gəlməsindən asılı olmayaraq – baş tuta biləcəyini gözləyirdi və onların məqsədi potensial danışıqlardan əvvəl Ukraynanın mövqeyini daha da genişləndirmək idi”, – CNN bildirib.
ABŞ-ın yeni seçilmiş prezidenti Donald Trampın Ukrayna və Rusiya üzrə nümayəndəsi Keyt Kelloq çərşənbə günü Fox News-a deyib ki, Trampın vəzifəyə başlamasından sonra 100 gün ərzində iki tərəf arasında müharibəyə son qoymaq üçün həll yolu tapacağına ümid edir.
9-01-2025, 15:15
Dənizkənarı Bulvar İdarəsinin sabiq rəhbərinin həbs müddəti uzadıldı
Dənizkənarı Bulvar İdarəsi Publik Hüquqi şəxsin sabiq rəhbəri barəsində həbs qətimkan tədbirinin müddəti uzadılıb.
Bu barədə Binəqədi rayon Məhkəməsində təqdimada baxılıb.
Məhkəmə istintaq orqanının təqdimatını təmin edib və onun barəsində olan həbs müddətini daha 4 ay uzadıb.
Qeyd edək ki, Dənizkənarı Bulvar İdarəsi Publik Hüquqi şəxsin vəzifəli şəxslərinin qanunsuz əməlləri barədə Azərbaycan Respublikası Hesablama Palatasından daxil olmuş material əsasında Baş prokuror yanında Korrupsiyaya qarşı Mübarizə Baş İdarəsində Azərbaycan Respublikası Cinayət Məcəlləsinin müvafiq maddələri ilə cinayət işi başlanıb.
İbtidai istintaqla həmin İdarənin İdarə Heyətinin sabiq sədri Mustafayev İlqar Əziz oğlunun 2021-2023-cü illər ərzində İdarənin fəaliyyəti istiqamətləri üzrə ayrılmış xüsusilə külli miqdarda pul vəsaitini mənimsəmə və israf etmə yolu ilə talamasına, vəzifə səlahiyyətlərindən sui-sitifadə etməsinə və vəzifə saxtakarlığı törətməsinə əsaslı şübhələr müəyyən edilib.
Toplanmış ilkin sübutlar əsasında İlqar Mustafayevə Cinayət Məcəlləsinin 179.4 (xüsusilə külli miqdarda ziyan vurmaqla mənimsəmə), 308.2 (ağır nəticələrə səbəb olan vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə ittiham elan edilməklə müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında Binəqədi Rayon Məhkəməsinin qərarı ilə həbs qətimkan tədbiri seçilib.
9-01-2025, 15:10
ABŞ Türkiyənin YPG-yə hücumunun qarşısını almağa çalışır - Blinken
ABŞ Türkiyə hərbçiləri ilə Suriyadakı kürd yaraqlıları arasında münaqişənin gərginləşməsinin qarşısını almağa çalışır.
Bunu ABŞ-ın dövlət katibi Antoni Blinken deyib.
O qeyd edib ki, Türkiyənin Suriyada fəaliyyət göstərən Kürdüstan Fəhlə Partiyası (PKK) yaraqlıları ilə bağlı “qanuni narahatlıqları” var və Bəşər Əsəd rejiminin devrilməsindən sonra ölkədə nizamlanma aparılmalıdır.
“Bu, müəyyən vaxt aparacaq bir prosesdir”, deyən Blinken və eyni zamanda bildirib ki, Suriyadakı kürd yaraqlılarına qarşı müharibə ABŞ-ın maraqlarına qətiyyən uyğun gəlmir.
Blinken Parisdə jurnalistlərə deyib: “Biz bunun baş verməməsi üçün hər cür səy göstərəcəyik”.
Türkiyə PKK yaraqlılarını məhv etmək üçün təşkilatın Suriyadakı YPG adlanan qoluna qarşı hücuma keçməklə hədələyib. Kürdlərin YPG təşkiları on ildir ki, İŞİD qruplaşmasına qarşı mübarizədə ABŞ-la əməkdaşlıq edir.
Blinken ümid etdiyini bildirib ki, Donald Trampın yeni administrasiyası bu məsələyə çox güclü maraq göstərəcək.
9-01-2025, 14:53
Bakıda "Yeni Keşlə Bazarı" tikilir
Fevralın 1-ə qədər "Keşlə bazarı" kimi tanınan ticarət mərkəzi sökülməlidir. Söküntü işləri Həsən Əliyev küçəsindən Ziya Bünyadov prospektinə paralel olaraq metronun "Koroğlu" stansiyasına qədər yeni avtomobil yolunun tikintisi ilə əlaqədardır.
"Keşlə bazarı"nın satıcıları üçün Dərnəgüldə yerləşən "Eurohome" tikinti malları bazarında yer ayrılıb. Bu barədə satıcılar "Baku TV"yə məlumat verib.
"Hazırda orada bizim bazarın tikintisi gedir. Bayrama qədər vaxt verilsəydi, yaxşı olardı. Bu boyda bazar oraya necə yerləşəcək?!" - satıcı qeyd edib.
Onun sözlərinə görə, ticarət mərkəzinin köçürüləcəyi ərazi "Yeni Keşlə bazarı" adlandırılacaq.
Xatırladaq ki, yeni yolun tikintisi ilə əlaqədar olaraq tikinti altına düşən yaşayış və qeyri yaşayış obyektlərinin, həmçinin torpaq sahələrinin ölçüləri hazırlanıb və tikinti altına düşən maneələrin qiymətləndirilməsi işləri yerinə yetirilib.
Bu çərçivədə tikinti altında düşən yaşayış və qeyri yaşayış obyektlərinin, o cümlədən “Keşlə bazarı” kimi tanınan ticarət mərkəzinin də sökülməsi nəzərdə tutulur.
Sözügedən bazarda sahibkarlıq fəaliyyəti ilə məşğul olan vətəndaşların çoxsaylı müraciətləri nəzərə alınaraq bazarda söküntü işlərinin başlanılması 2025-ci ilin fevral ayının 1-nə qədər təxirə salınıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!