2-01-2025, 19:33
İrandakı türkofoblar niyə narahatdır? - Deputatdan cavab
1 yanvar 2025-ci il tarixində İran İslam Respublikasının Azərbaycandakı səfirliyinin müvəqqəti işlər vəkili Seyid Cəfər Ağayi Məryan Xarici İşlər Nazirliyinə çağırılıb.
Görüş zamanı, 29 dekabr 2024–cü il tarixində Ərdəbildə İranın Ali rəhbərinin Ərdəbil vilayəti üzrə nümayəndəsi, Ərdəbilin imam cüməsi Seyid Həsən Amelinin iştirak etdiyi və İranın Radio və Televiziya Təşkilatının “Xəbər Şəbəkəsi” kanalında yayımlanan tədbirdə Azərbaycana və dövlət başçımıza qarşı səsləndirilən təhqiramiz ifadələrə görə İran tərəfinə sərt etiraz bildirilib.
Milli Məclisin deputatı Mehriban Vəliyeva bildirib ki, Suriyada iflasa uğrayan İranın Türkiyə və Azərbaycan liderlərinə qarşı aksiya təşkil olunmasının əsas səbəbi bəllidir:
"Azərbaycandan ilk yardım karvanı Suriyaya yetişər-yetişməz İrandakı türkofoblar narahat olmağa başladılar. Onların narahatlığı əslində Türkiyə ilə Azərbaycanın Suriyada birgə fəaliyyətə keçməsi oldu. Qarabağ Zəfərindən sonra İran davamlı şəkildə ölkəmizi təhdid edirdi. Qarabağda da, Suriyada da uduzdu deyə, Azərbaycan və Türkiyədən guya qisas almaq qərarına gəldi. Özü də antitürk qüvvələrin “qəzəbli aksiyaları” nədənsə elə məhz türklərin yaşadığı bölgədə “baş qaldırır”. Sonuncu aksiya, Türkiyə və Azərbaycan liderlərinə qarşı çıxışların səsləndiyi şou isə Ərdəbildə təşkil edilib.
Azərbaycan Prezidenti cənab İlham Əliyevə və Türkiyə Prezidebti cənab Rəcəb Tayyib Ərdoğana qarşı keçirilən aksiya İran Dövlət Televiziyasında yayımlanıb. Bu, tədbirin təşkilatçılarının kim olduğunu aydın göstərir. “Çaldıran şəhidləri və dirəniş şəhidləri anma tədbiri”- məzmunu çox maraqlıdır. Səfəvilər niyə? Həm də məhz Ərdəbildə. Sözsüz ki, İran Dövlət Televiziyasının təqdimatı məkrli niyyətlərdən qaynaqlanır və ən yüksək səviyyədə dəstəkləndiyi də məlumdur.
Bir müddət öncə Seyid Amuli prezident Pezeşkiana Bakıya, COP29-a gəlmədiyinə görə təşəkkür etmişdi.
Tutaq ki, Azərbaycanın İsraillə münasibətləri Amulinin və digər şovinistlərin xoşuna gəlmir. Bəs onda Türkiyəyə qarşı iddiası nədir? Rəcəb Tayyib Ərdoğan İsrailin bölgədəki siyasətinə, hərbi əməliyyatlarına qarşı sərt və prinsipial şəkildə dayanıb. Prezident cənab İlham Əliyevin Fələstin məsələsinin iki dövlət prinsipi ilə həll olunması zəruriliyi barədə qətiyyətli mövqeyini unudurlar. Azərbaycan dövlətinin Fələstinə humanitar yardım göstərməsini də yada salmaq istəmirlər".
O qeyd edib ki, Ərdəbildə, Azərbaycan üçün müqəddəs məkanların birində anti-Türkiyə, anti-Azərbaycan aksiyası təşkil etməklə guya bizi “ürəyimizdən vurmaq” istəyiblər:
"Amma mənasız cəhddir. Biz cənublu qardaşlarımızın səsini, harayını eşidirik. Ərdəbildəki səs onların səsi deyil. Özü də bu şou Dünya Azərbaycanlılarının Həmrəylik Günü ərəfəsində təşkil olunub, bununla guya birliyimizi sarsıdacaqlar. Azərbaycan Prezidenti cənab İlham Əliyevin 50 milyonluq azərbaycanlının prezidenti olması, İranda 40 milyon soydaşımızın ana dilində təhsil ala bilmədiyi haqda dedikləri, yəqin, onlara çox təsir edib. Görünür, Azərbaycan Prezidentinin regionda, xüsusilə Cənubi Azərbaycanlılar arasında artan nüfuzu İranı ciddi şəkildə narahat edir. Onlar Azərbaycanı imperiya əsarəti altında görməyə alışıblar. Ancaq unudurlar ki, “çərxi fələk tərsinə dövran edir indi”. Əgər bu cür addımlar İrana qarşı atılsaydı, artıq böyük qalmaqal yaradardılar. Bəs cənab Prezidentə qarşı bu təhqirlər səsləndiriləndə niyə susurlar? Artıq şübhə doğurmur ki, bu, elə onların öz təşkil etdikləri bir oyundur.
Özü də “etiraz aksiyası” Azərbaycan-İran münasibətlərindəki əlaqələrin bərpasına yönəldiyi dövrdə baş verir. Son vaxtlarda iki ölkə hərbçiləri birgə təlimlər keçirdi, rəsmilər qarşılıqlı səfərlər etdilər, Misirdə Azərbaycan G-8-ə yekdilliklə üzv qəbul edildi. Pezeşkianın da səs verdiyi bir nəticə əldə olundu və Prezident Ərdoğan Azərbaycanın üzvlüyünü quruma əlavə güc qatacaq qərar kimi yüksək dəyərləndirdi. Amma ardınca İranda anti-Azərbaycan, anti-Türkiyə “hərəkatı” başlayır, özü də Səfəvilər xatırladılaraq. Məkrli niyyət ortadadır. “Bir millət, iki dövlət”i bölmək üçün “tarixə istinad” edirlər guya. Ancaq onlar Azərbaycan və Türkiyə qardaşlığının Çanaqqalada, Bakıda, Şamaxıda, Qarabağda dəfələrlə sınaqdan keçdiyini unudurlar. Cənublu qardaşlarımızın tarixini də bir yada salsalar yaxşı olar".
2-01-2025, 19:16
Türkiyədə qalmaqallı istefa
Türkiyə parlamentinin Ankara şəhərindən seçilən deputatı Kürşad Zorlu üzvü olduğu İYİ partiyadan istefa verib.
Bu barədə o, özünün sosial media hesabında yazıb.
Zorlu İYİ Partiya ilə rəsmi əlaqələrini bitirdiyini bildirib.
O, bu qərarını partiyanın yeni rəhbərliyi ilə əlaqələndirib.
2-01-2025, 19:04
Azər Baxşəliyevin ürəyinin fəaliyyəti bərpa edilib
Həkimlər aktyor Azər Baxşəliyevin ürəyinin fəaliyyətini bərpa edib, süni tənəffüs aparatına qoşulub.
Bu barədə Azərbaycan Tibb Universitetinin mətbuat katibi Günel Aslanova bildirib.
O qeyd edib ki, hazırda aktyorun vəziyyəti kritik ağır olaraq qalmaqdadır: “Xəstənin bir müddət öncə ürək fəaliyyəti dayanıb. Həkimlərin səyi nəticəsində ürək fəaliyyəti bərpa olunub. Xəstə süni tənəffüs aparatına qoşulub. Vəziyyəti həddən artıq ağır kritik olaraq qalır”.
2-01-2025, 18:45
Şəhidimizin qardaşı dünyaya gəldi
Vətən müharibəsi şəhidi Yusif Ələsgərovun qardaşı dünyaya gəlib.
Şəhidin anası Sevinc Abdullayeva oğul övladı dünyaya gətirib.
Qeyd edək ki, 1996-cı il təvəllüdlü Yusif Ələsgərov 2020-ci il sentyabrın 27-də başlayan Vətən müharibəsi zamanı Füzuli, Xocavənd, Cəbrayıl və Qubadlının azadlığı uğrunda gedən döyüşlərdə tankçı kimi iştirak edib. Oktyabrın 24-də Qubadlı döyüşləri zamanı ağır yaralanıb. Müalicəsi tam bitmədən yenidən döyüş bölgəsinə qayıdıb.
Y. Ələsgərov noyabrın 7-də Xocavənd rayonu istiqamətində gedən döyüşlərdə şəhid olub. Tovuz rayonunun Yuxarı Öysüzlü kəndində torpağa tapşırılıb.
O, ölümündən sonra “Vətən uğrunda” və “Şuşanın azad olunmasına görə” medalları ilə təltif edilib.
2-01-2025, 18:16
"Qara polkovnik" vəfat etdi
Rusiya Dövlət Dumasının keçmiş deputatı Viktor Alksnis vəfat edib.
Keçmiş Sovet Ordusunun polkovniki 74 yaşında dünyasını dəyişib.
2019-cu ilin oktyabrında ona xərçəng diaqnozu qoyulub və bir neçə əməliyyat keçirib.
Viktor Alksnis tanınmış sovet və rus siyasi xadimidir, 1989-1991-ci illərdə SSRİ xalq deputatı, 1990-1991-ci illərdə Latviya SSR Ali Sovetinin deputatı olub. O, həmçinin 1999-2007-ci illərdə üçüncü və dördüncü çağırış Dövlət Dumasının deputatı olub və 2013-2015-ci illərdə Moskva vilayətinin Ruza rayonunun Tuçkovo şəhər qəsəbəsinə rəhbərlik edib.
SSRİ dövründə Alksnis jurnalistlər arasında “qara polkovnik” kimi tanınıb. Bu, onun 1991-ci ildə Sovet İttifaqında Fövqəladə Hallar üzrə Dövlət Komitəsinin (QKÇP) tərəfdarlarını dəstəkləməsi ilə bağlıdır.
O, həmçinin, 1993-cü il oktyabrın 4-də Moskvada hökumət binalarının tanklardan atəşə tutulması zamanı baş vermiş faciəli hadisələrin şahidi olub.
2-01-2025, 17:47
İlham Əliyev Monteneqronun Prezidentinə başsağlığı verdi
Azərbaycan Prezidenti İlham Əliyev Monteneqronun Prezidenti Yakov Milatoviçə başsağlığı məktubu göndərib. Məktubda deyilir:
"Hörmətli cənab Prezident,
Çetinye şəhərində silahlı hücum nəticəsində insanların həlak olması və xəsarət alması xəbəri bizi son dərəcə sarsıtdı.
Bu faciə ilə əlaqədar dərdinizə şərik çıxır, Sizə, həlak olanların ailələrinə və yaxınlarına, bütün Monteneqro xalqına öz adımdan və Azərbaycan xalqı adından dərin hüznlə başsağlığı verir, yaralananların tezliklə sağalmasını arzulayıram".
2-01-2025, 17:40
"Real" "Arsenal"ın müdafiəçisi üçün 100 milyon avro təklif etdi
"Real Madrid" "Arsenal"ın müdafiəçisi Vilyam Saliba üçün 100 milyon avro ödəməyə hazırdır.
Keçid baş tutsa, Saliba ən bahalı müdafiəçi olacaq.
Futbolçu keçidə razılıq verib və artıq klublar arasında danışıqlar aparılır.
Qeyd edək ki, Salibanın müqaviləsi 2027-ci ilin yayında bitəcək.
2-01-2025, 17:22
Çox yatmaq təhlükəlidir
İslandiya alimləri müəyyən ediblər ki, gecə doqquz saatdan çox yatan insanların insult riski 85% arta bilər.
Tədqiqatın nəticələri "Neurology" jurnalında dərc olunub.
Tədqiqat orta yaş həddi 62 olan 32 minə yaxın ciddi xəstəliyi olmayan insanı əhatə edib.
İştirakçılar altı il ərzində izlənilib, onların yuxu rejimi və xəstəlik tarixçələri haqqında məlumat toplanıb. Məlum olub ki, gündə doqquz saatdan çox yatanların (iştirakçıların 24%-i) və ya gün ərzində 90 dəqiqədən çox istirahət edənlərin (iştirakçıların 8%-i) insult riski 7-8 saat arasında yatanlarla müqayisədə 85% daha yüksəkdir.
Tədqiqatçılar qeyd ediblər ki, ümumiyyətlə artıq yuxu damar xəstəliklərinin inkişaf ehtimalının artması ilə əlaqələndirilir. Gecə istirahətinin tövsiyə olunan miqdarını aşan iştirakçılarda insult riski 23% artıb. Uzun gündüz yuxusu da təhlükəli hesab edilib. bir saat yarımdan çox istirahət damar pozğunluqları ehtimalını 25% artırır.
2-01-2025, 17:14
Bəzi plastik cərrahların sənədləri saxtadır - Nazirlikdən xəbərdarlıq
Ölkə ərazisində praktik tibb fəaliyyəti ilə məşğul olan plastik cərrahların peşə fəaliyyətinin qanuni əsasları ilə bağlı mediada ziddiyyətli məlumatlar yer alıb.
Bu Səhiyyə Nazirliyinin yaydığı məlumatda deyilir.
Bildirilib ki, səsləndirilən iddialarla bağlı Azərbaycan Respublikasının Səhiyyə Nazirliyi və Baş Prokurorluq tərəfindən ilkin araşdırmalar aparılıb və şübhəli məqamlar müəyyən edilib.
"Əldə olunan məlumatlara əsasən bəzi hallarda sözügedən ixtisas daşıyıcısı qismində çıxış edən şəxslərin tibbi təhsil sənədləri və praktik tibb fəaliyyəti ilə məşğul olmağa hüquq verən şəhadətnamələri saxtalaşdırılıb.
Plastik cərrahiyyə ixtisası üzrə fəaliyyət göstərən tibb mütəxəssislərinin sözügedən istiqamətlə məşğul olmağa icazə verən sənədlərinin hüquqi əsaslarının kompleks şəkildə yoxlanılmasına ehtiyac yaranıb. Bununla bağlı, Azərbaycan Respublikası səhiyyə nazirinin müvafiq əmri ilə Azərbaycan Respublikası Səhiyyə Nazirliyinin, Azərbaycan Respublikası Baş Prokurorluğunun, Azərbaycan Respublikası Daxili İşlər Nazirliyinin və Azərbaycan Respublikası Elm və Təhsil Nazirliyinin səlahiyyətli nümayəndələrindən ibarət Xüsusi Təftiş Komissiyası yaradılıb.
Azərbaycan Respublikasının ərazisində praktik tibb fəaliyyəti ilə məşğul olan plastik cərrahlar peşə fəaliyyətinin qanunauyğunluğunu təsdiq edən sənədlərinin notariat qaydasında təsdiq edilmiş surətlərini (baza ali tibb təhsili, diplomdansonrakı təhsilə aid bütün sənədlər, əmək kitabçası, tibbi fəaliyyət ilə məşğul olmağa buraxılma barədə şəhadətnamə, sertifikasiya şəhadətnaməsi və s.) 2025-ci il 31 yanvar tarixinədək Azərbaycan Respublikasının Səhiyyə Nazirliyinə şəxsən təqdim etməlidirlər.
Mütəxəssis tərəfindən sənədlər tələb olunan qaydada və tarixədək təqdim edilmədiyi təqdirdə, bu hal onun praktik tibb fəaliyyəti ilə məşğul olmağa buraxılma barədə şəhadətnamə və ya sertifikasiya şəhadətnaməsinin ləğvi üçün əsas olacaq", - nazirlikdən qeyd edilib.
2-01-2025, 16:36
Rusiya miqrantları deportasiya etməyə başlayır
Rusiyada qeyri-qanuni yaşayan əcnəbi vətəndaşların və ya vətəndaşlığı olmayan şəxslərin deportasiyası rejimi martın 5-dən başlayacaq.
Bu barədə xarici KİV məlumat yayıb.
Məlumata görə, bu rejim əcnəbilərin məlumatlarının reyestrə daxil edildiyi gündən tətbiq olunacaq. Qeyd olunur ki, qanunsuz miqrantların müəyyən hüquq və azadlıqları məhdudlaşdırılacaq, onlara miqrasiya sahəsində dövlət nəzarəti tədbirləri tətbiq olunacaq.
Dekabrın 29-da bildirilib ki, nəzarət edilən şəxslərin reyestrinə daxil edilmiş əcnəbilərə polisin icazəsi olmadan yaşayış yerini dəyişmək, habelə yaşadıqları rayon sərhədlərini tərk etmək qadağan ediləcək. Bundan əlavə, onlar nəqliyyat vasitələrini idarə edə, sürücülük vəsiqəsi ala, daşınmaz əmlak sata və ya ala bilməyəcəklər.
Həmçinin, əcnəbilər reyestrə daxil olduqdan sonra, xüsusən də nikaha girə, kredit müqaviləsi bağlaya, bank hesabı aça bilməyəcəklər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!