Dünən, 18:42
HƏMAS bəzi şərtlərlə məhbus mübadiləsinə hazırdır
HƏMAS nümayəndə heyəti Misirdəki vasitəçilərlə Qəzza zolağında atəşkəs razılaşmasını müzakirə edərək birdəfəlik girov mübadiləsinə və beş illik atəşkəsə hazır olduqlarını açıqlayıb.
Bunu adının açıqlamasını istəməyən HƏMAS rəsmisi Fransa mətbuatına verdiyi açıqlamada deyib.
Məlumatda bildirilir ki, HƏMAS-ın nümayəndə heyəti Qəzza zolağında atəşkəs və girovların mübadiləsi ilə bağlı danışıqların bir hissəsi olaraq Misirin paytaxtı Qahirəyə gəlib. Heyət burada beş illik atəşkəs şərtilə girovları azad etməyə hazır olduğunu deyib.
Həmas rəsmisi Mahmud Mərdəvi isə Qahirədə aparılan danışıqlarla bağlı açıqlamasında belə deyib: "Bu dəfə biz müharibənin bitdiyinə dair zəmanət tələb edəcəyik. İşğalçı qismən razılaşdıqdan sonra müharibəyə qayıda bilər. Lakin hərtərəfli razılaşma və beynəlxalq zəmanətlə bunu edə bilməyəcək".
Dünən, 18:28
Amerikalıların əksəriyyəti Trampı dəstəkləyir
Donald Trampın andiçmə mərasimindən sonrakı ilk 100 gündə ABŞ prezidenti kimi çıxışı amerikalıların əksəriyyəti tərəfindən dəstəklənib.
Bu barədə “NORC” tədqiqat mərkəzinin “Associated Press” üçün keçirdiyi sorğuda göstərilib.
Araşdırma nəticəsində məlum olub ki, 10 amerikalıdan 7-si Trampın fəaliyyətini gözləntilərinə uyğun olaraq qiymətləndirib.
Lakin agentliyin qeyd etdiyi kimi, bu o demək deyil ki, amerikalıların əksəriyyəti prezidentin siyasətindən razıdır. Sorğu iştirakçılarının 44%-i Trampın fəaliyyətinin prioritet sahələrini səhv müəyyən etdiyinə inanır, 24%-i onun seçimi ilə razıdır, 62% isə ABŞ-nin Tramp dövründə yanlış istiqamətdə getdiyini düşünür.
Ümumilikdə hər 10 respondentdən 4-ü Trampın prezidentlik fəaliyyətini bəyənir. Sorğu aprelin 17-dən 21-dək aparılıb və 1200-dən çox amerikalı iştirak edib.
Dünən, 18:13
Husilər ABŞ-nin 7 PUA-sını vurdu
Yəməndəki husilər 6 həftə ərzində ABŞ-nin 7 ədəd “MQ-9 Reaper” PUA-sını vurublar.
Adı açıqlanmayan ABŞ rəsmiləri, 6 həftədə vurulan PAU -ların ümumi sayının 7-yə yüksəldiyini və vurulan PUA-ların dəyərinin 200 milyon dolları ötdüyünü deyiblər.
Dünən Pentaqon rəsmilərinin paylaşdığı məlumata görə, husilərin PUA-lara qarşı hücum imkanlarında nəzərəçarpacaq dərəcədə irəliləyiş var.
Qeyd edək ki, “General Atomics” tərəfindən istehsal edilən və təxminən 30 milyon dollar dəyərində olan “MQ-9 Reaper” PUA-ları 40 min futa qədər yüksəklikdə (təxminən 12.100 metr) uça bilir.
Dünən, 17:52
İranda güclü partlayış - 36 ölü, 1139 yaralı
İranın cənubundakı Hörmüzqan əyalətinin Bəndər Abbas şəhərində Şəhid Rəcai limanında baş verən partlayış nəticəsində ölənlərin sayı 36-ya çatıb.
Bunu ILNA-ya müsahibəsində İslami Şura Məclisinin Səhiyyə və Tibbi Xidmətlər Komissiyasının üzvü Məhəmməd Camalian deyib.
Bundan əvvəl ölü sayı 28 nəfər təşkil edirdi.
***
16:25
İranda limanda partlayış nəticəsində ölənlərin sayı 28-ə çatıb, 1139 nəfər yaralanıb.
Bu barədə İRNA məlumat yayıb.
Qeyd edək ki, 6 nəfər itkin düşüb.
***
12:10
İranın cənubundakı Bəndər-Abbas şəhərinin Şəhid Rəcai dəniz limanında baş vermiş partlayış nəticəsində ölənlərin sayı 25-ə çatıb.
Bu barədə aprelin 27-də ostan məhkəmə sisteminin rəhbəri Müctəba Kahremani məlumat yayıb.
“Faciəli hadisə 25 nəfərin həyatına son qoyub”, – o söyləyib.
İranın daxili işlər naziri İskəndər Momeni öz növbəsində qeyd edib ki, limanda yanğın 80 % lokallaşdırılıb. Onun sözlərinə görə, bu istiqamətdə işlər yaxın saatlarda başa çatdırılmalıdır.
***
10:40
İranın Şəhid Rəcai limanında baş vermiş partlayışda yaralananların sayı 1 139 nəfərə çatıb.
Bu barədə İran hökumətinin sözçüsü Fatimə Mühacirani sosial şəbəkədə məlumat yayıb.
“Şəhid Rəcai Limanında vəziyyət nəzarət altındadır. Tibb müəssisələrində 1 139 nəfər var. Onların bir hissəsi hava yolu ilə Şiraz və Luristana aparılıb”, – hökumət sözçüsü bildirib.
***
09:05
İranın cənubundakı Bəndər Abbas şəhərinin Şəhid Rəcai dəniz limanında baş verən partlayış nəticəsində ölənlərin və yaralıların sayı artıb.
Hadisə nəticəsində 18 nəfər həlak olub, 800-dən artıq şəxs xəsarət alıb.
Bildirilib ki, partlayışın dalğası çox güclü olub və limandakı əksər binalara, eləcə də avtomobillərə ciddi ziyan dəyib. Artıq şəhərdə zərərçəkənlərin sayı çox olduğuna görə transfuziya mərkəzi təcili qan toplanmasını elan edib.
Dünən, 17:48
Bakıda yağış yağacaq, şimşək çaxacaq - XƏBƏRDARLIQ
Hava şəraitinin dəyişəcəyi ilə bağlı növbəti xəbərdarlıq edilib.
Milli Hidrometeorologiya Xidmətindən bildirilib ki, Bakıda və Abşeron yarımadasında aprelin 27-si axşam və 27-dən 28-nə keçən gecə bəzi yerlərdə yağış yağacağı gözlənilir. Yarımadanın bəzi yerlərində leysan xarakterli olacağı, şimşək çaxacağı ehtimalı var.
Havanın temperaturu ötən günlərlə müqayisədə tədricən 5-8 dərəcə aşağı enəcək.
Dünən, 17:33
Ərdoğan müəlliminin dəfn mərasimində
Türkiyə Prezidenti Rəcəb Tayyib Ərdoğan müəllimi Ahmet Karamanın dəfn mərasiminə qatılıb.
Bununla bağlı “TRT Haber” məlumat yayıb.
Bildirilib ki, Ahmet Karaman Ərdoğanın İstanbul İmam Hatip Liseyində ərəb dili müəllimi olub.
Türkiyə Prezidenti öz müəllimi üçün başsağlığı mesajı paylaşıb: “Bu gün vəfatını kədərlə qarşıladığımız İstanbul İmam Hatip Liseyində ərəbcə müəllimlərimizdən olan dəyərli pedaqoq Ahmet Karamanla vidalaşırıq. Allahdan müəllimimizə rəhmət diləyirik. Onun dəyərli ailəsinə, tələbələrinə və İmam Hatip camaatına başsağlığı verirəm. Məkanı cənnət olsun”.
Dünən, 17:17
İlham Əliyevdən Pezeşkiana başsağlığı
Azərbaycan Prezidenti İlham Əliyev İran İslam Respublikasının Prezidenti Məsud Pezeşkiana başsağlığı məktubu ünvanlayıb. Məktubda deyilir:
"Hörmətli cənab Prezident
Bəndər Abbas şəhərindəki Şəhid Rəcai limanında baş vermiş partlayış nəticəsində insan tələfatı və çox sayda yaralı barədə xəbər bizi son dərəcə kədərləndirdi.
Bu faciə ilə əlaqədar Sizə, həlak olanların ailələrinə və yaxınlarına, bütün İran xalqına şəxsən öz adımdan və Azərbaycan xalqı adından dərin hüznlə başsağlığı verir, xəsarət alanlara şəfa diləyirəm.
Allah rəhmət eləsin!".
Dünən, 16:50
Sabah İranda Milli Matəm Günü olacaq
İranda 28 aprel Milli Matəm Günü elan edilib.
Bu barədə İran hökuməti məlumat yayıb.
Qeyd edilib ki, Bəndər Abbas şəhərindəki Şəhid Rəcai limanında baş verən partlayışla əlaqədar 28 aprel Milli Matəmi Günü elan olunub.
Bundan əvvəl Şəhid Rəcai limanında baş verən partlayışla əlaqədar Hörmüzqan vilayətində 3 günlük matəm elan edilmişdi.
Xatırladaq ki, son məlumata əsasən, aprelin 26-da İranda limanda partlayış nəticəsində ölənlərin sayı 28-ə nəfərə çatıb, 6 nəfər itkin düşüb, 1139 yaralı var.
Dünən, 16:36
ABŞ-dən Yəmənə son 41 gündə 1200 hücum
Yəmənin “Ənsar Allah” hərəkatı ABŞ döyüş təyyarələrinin martın 15-dən bəri Yəmənə 1200-dən çox hava hücumu təşkil etdiyini açıqlayıb.
Yəmənin husilərdən ibarət hökumətinin Xarici İşlər Nazirliyi hücumlar nəticəsində yüzlərlə dinc sakinin həlak olduğunu, yüzlərlə insanın yaralandığını, çoxsaylı mülki obyektlərin, o cümlədən yaşayış məntəqələri, limanlar, səhiyyə müəssisələri, su anbarları və tarixi yerlərin dağıdıldığını açıqlayıb.
Dünən, 15:48
Cüdoçularımızdan Avropa çempionatında 5 medal
Azərbaycan cüdoçuları Monteneqroda keçirilən böyüklər arasında Avropa çempionatını 5 medalla başa vurub.
Yığma Podqoritsa şəhərində baş tutan qitə yarışında 1 gümüş və 4 bürünc medal əldə edib.
100 kq çəki dərəcəsində tatamiyə çıxan Zelim Kotsoyev gümüş medala yiyələnib. Əhməd Yusifov (60 kq), Rəşid Məmmədəliyev (73 kq), Zelim Tçkayev (-81 kq) və Murad Fətiyev (-90 kq) bürünc medal qazanıb.
Uşanqi Kokauri (+100 kq) turniri 5-ci, Turan Bayramov (-60 kq) isə 7-ci pillədə tamamlayıb. Yığma mötəbər turnirdə qarışıq komanda yarışında da iştirak edib.
Yekunda Azərbaycan medalların əyarına görə 47 ölkə arasında ümumi komanda hesabında 10-cu, kişilər arasında isə 5-cı yeri tutub.
Qeyd edək ki, Zelim Kotsoyevdən başqa bütün mükafatçılarımız karyeralarında ilk dəfə böyüklər arasında Avropa çempionatının medalçısı olublar. Azəbaycan cüdo tarixində ilk dəfə olaraq idmançılarımız qitə yarışında beş müxtəlif çəki dərəcəsində fəxri kürsüyə yüksəlib.
Ölkəmizi Avropa çempionatında 12 çəki dərəcəsində 15 cüdoçu (9 kişi, 6 qadın) təmsil edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!