24-07-2025, 16:45
"Azərbaycana dəvət almamışam" - Overçuk
Rusiya Federasiyası Baş nazirinin müavini Aleksey Overçuk Azərbaycana səfər planlarının olmadığını bildirib.
Jurnalistlərin “Yaxın vaxtlarda Azərbaycana səfər etməyi planlaşdırırsınızmı?” sualına cavab verən Overçuk deyib: “Yaxın vaxtlarda dəvətlər yoxdur hələ”.
Qeyd edək ki, Overçukun sonuncu rəsmi səfəri 2024-cü ilin 9 avqustunda baş tutub. Həmin tarixdə o, Azərbaycan-Rusiya Hökumətlərarası İqtisadi əməkdaşlıq komissiyasının 22-ci iclasında iştirak etmək üçün Bakıya gəlib.
Bundan sonra, 2025-ci ilin iyun ayının sonunda Rusiya Baş nazirinin müavininin Azərbaycana daha bir rəsmi səfəri planlaşdırılmışdı. Lakin bu səfər sonradan ləğv edilib.
24-07-2025, 16:32
Abşeronda əməliyyat - Saxlanılanlar var
Abşeron Rayon Polis İdarəsi Narkotiklərlə Mübarizə Bölməsinin əməkdaşlarının həyata keçirdikləri əməliyyat zamanı paytaxt sakini 38 yaşlı Rüfət Qədirov və 26 yaşlı Həsən Musayev saxlanılıblar.
R.Qədirovdan 1 kiloqram heroin və 3 kiloqram 447 qram marixuana, H.Musayevdən isə 495 qram psixotrop maddə olan metamfetamin aşkar edilib. Saxlanılanlar şəxsiyyəti istintaqla araşdırılan və sosial şəbəkələrdə tanış olduqları İran vətəndaşları tərəfindən narkokuryerliyə cəlb olunduqlarını bildiriblər. Faktlarla bağlı cinayət işi başlanılıb, araşdırma aparılır.
Qeyd edək ki, Abşeron RPİ əməkdaşlarının ilin əvvəlindən narkotiklərlə bağlı keçirdikləri əməliyyatlar zamanı 51 kiloqram müxtəlif növ narkotik vasitə qanunsuz dövriyyədən çıxarılıb. Bu istiqamətdə əməliyyatlar davam etdirilir.
24-07-2025, 16:09
İlon Mask 20 min insanın beyninə çip yerləşdirməyi planlaşdırır
Amerikalı milyarder İlon Maskın beyin-kompüter interfeysi texnologiyası üzərində çalışan "Neuralink" şirkəti 2031-ci ilə qədər 20 min insana beyin çipi implantasiya etməyi hədəfləyir.
Bu barədə "Bloomberg" agentliyi şirkətin daxili təqdimat və sənədlərinə istinadən məlumat yayıb.
Məlumata görə, önümüzdəki 6 il ərzində "Neuralink" ABŞ ərazisində 5 böyük klinika açmağı planlaşdırır. Bu mərkəzlərdə insan beyninə mikroçiplərin yerləşdirilməsi həyata keçiriləcək.
Çiplər fərqli funksiyalara malik olacaq və müxtəlif xəstəliklərin müalicəsi və ya insan-kompüter əlaqələrinin inkişaf etdirilməsi üçün istifadə olunacaq.
Şirkətin üç əsas proqramı var. "Telepathy" insan beyninin kompüterlə birbaşa əlaqəsini təmin etməyi və bu sahəni öyrənməyi hədəfləyir. "Blindsight" isə görmə qabiliyyətini itirmiş insanlara kömək etməyə yönəlib. "Deep" isə Parkinson xəstəliyindən əziyyət çəkən insanlara yönəlmiş neyroterapiya proqramıdır.
"Neuralink" 2029-cu ilə qədər "Telepathy" proqramı üzrə ABŞ tənzimləyici qurumlarından rəsmi icazə almağı və ildə təxminən 2 min əməliyyat keçirməyi planlaşdırır. 2030-cu ildən isə şirkət "Blindsight" proqramını genişləndirərək ildə 10 min nəfər görmə qüsurlu şəxsə çip yerləşdirməyi qarşıya məqsəd qoyub.
24-07-2025, 15:58
Bu il mina partlayışlarında 18 nəfər xəsarət alıb
Ermənistan tərəfinin apardığı mina terroru nəticəsində 2025-ci ilin birinci yarımilində mina və partlamamış hərbi sursat partlayışları nəticəsində 18 nəfər müxtəlif dərəcəli bədən xəsarəti alıb.
Bu barədə Baş Prokurorluqda keçirilən geniş kollegiya iclasında bildirilib.
Qeyd olunub ki, 2020-ci ilin noyabr ayından hazırki vaxtadək isə ümumilikdə 400 şəxs bu terrorun qurbanı olmuş, onlardan 70 nəfəri həlak olmuş, 330 nəfəri müxtəlif dərəcəli bədən xəsarəti almışdır.
24-07-2025, 15:53
Bütün rayonlarda ehsan verilməsi DAYANDIRILACAQ
Azərbaycanda bəzi rayon və kəndlərdə yas mərasimlərində ehsan verilməsi dayandırılıb. Sabirabad, Saatlı, Samux, Biləsuvar, Quba, Kürdəmir, Şamaxı, Balakən rayonları və Naxçıvanın Mahmudkənd kəndində yas mərasimlərində ehsan verilməsi dayandırıldığı deyilir.
Artıq çay süfrəsindən başqa ehsan verilməməsi tövsiyə olunur. Qeyd edək ki, ehsan verilməməsi barədə məsələ tövsiyə xarakterlidir və bəzi insanlar bu tövsiyələrə əməl etmir. Məsələ cəmiyyətin müxtəlif təbəqələri tərəfindən birmənalı qarşılanmasa da, əsas məqsəd israfçılığın qarşısını almaq və yas mərasimlərini daha sadə formada keçirməkdir.
Tezliklə bütün rayonlarda ehsan süfrələrinin verilməsinin dayandırılması gözlənilir.
Artıq bu barədə müvafiq qurumlara tapşırıqlar verilib.
Mövzu ilə bağlı Milli Məclisin deputatı Ceyhun Məmmədov deyib ki, əslində burada söhbət yasla bağlı qadağalardan getmir:
“Məsələ ondadır ki, artıq bir çox rayonlarımızda insanlar özləri şüurlu şəkildə bu prosesə başlayıblar və yas mərasimlərindəki israfçılığa tədricən son qoyulur. Bu hansısa bir qadağa nəticəsində baş vermir. Sözügedən məsələ uzun müddətdir ki, cəmiyyətdə geniş şəkildə müzakirə olunur”.
Millət vəkili bildirib ki, dəfələrlə parlamentdə, mətbuatda, televiziyada yas mərasimlərindəki israfçılığa son qoyulması ilə bağlı məsələlərə toxunub:
“Çünki bu gün insanlar bu vəziyyətdən əziyyət çəkirlər. Yas mərasimlərində əbəs yerə böyük məbləğdə vəsait xərclənir və xüsusilə də maddi imkanı zəif olan insanlar bu vəziyyətdən ciddi şəkildə zərər görürlər. Ona görə də bu cür təşəbbüslərin başlanması və belə bir prosesin həyata keçirilməsi olduqca önəmlidir və düşünürəm ki, yalnız alqışlanmalıdır”.
C.Məmmədov qeyd edib ki, bu məsələnin iki həlli yolu var: "Birincisi, insanların özlərinin anlayaraq bu prosesə daxil olması, onu dərk etməsi və bu israfçılıqdan könüllü şəkildə imtina etməsidir. İkinci yol isə inzibati üsullarla aparıla bilər. Düşünürəm ki, ən düzgün, ən sağlam yol insanların bu prosesi şüurlu şəkildə başlatması və bu addımları könüllü olaraq həyata keçirməsidir. Sevindirici haldır ki, cəmiyyət artıq bu prosesə özü başlayıb və bu gün insanlar könüllü şəkildə bu yola gedirlər”.
Deputat əlavə olaraq bildirib ki, bu ənənə ölkənin bütün bölgələrində tətbiq edilməlidir:
“Digər bölgələr də mərhələli şəkildə bu qaydalara əməl etməlidir. Biz bu məsələni birdəfəlik həll etməliyik. Çünki bu problem insanlara ciddi şəkildə ziyan vurur”.
O, eyni zamanda ehsan mərasimlərinin qadağan olunması ilə bağlı həm müsbət, həm də mənfi məqamlara toxunub:
“Müsbət tərəf ondan ibarətdir ki, israfçılığa son qoyulur və bu, həmçinin qida məhsullarına da ciddi təsir göstərəcək. Çünki hazırkı vəziyyətdə bu, ciddi bir problemə çevrilib. İnsanlar bu israfçılıqla həm maddi cəhətdən əziyyət çəkirlər, həm də bu, bazarda qiymətlərin artmasına da təsir göstərir. Mən düşünürəm ki, burada heç bir mənfi tərəf yoxdur. Əksinə, bunun müsbət cəhətləri daha çoxdur”.
Deputat, həmçinin vurğulayıb ki, əgər insanlar bir araya gəlmək istəyirsə, bunu müxtəlif formalarda, daha sadə və mənalı şəkildə edə bilərlər.
“Əksər hallarda bu mərasimlərdə təqdim edilən yeməklərdən ehtiyacı olmayan insanlar istifadə edir və bu, sadəcə olaraq adətə çevrilmiş bir vərdiş halını alır. Buna "ehsan" demək də, məncə, tam doğru deyil. Kimsə doğrudan da ehsan vermək istəyirsə, həmin yeməkləri uşaq evlərinə, qocalar evlərinə, ehtiyacı olan ailələrə göndərə bilər. Bu cür yardım daha mənalı və savab olar. Amma mövcud formada keçirilən yas mərasimləri, əslində, böyük bir israfçılıq, həm də dini baxımdan da böyük bir günahdır”.
Həmsöhbətimiz yaxın zamanlarda respublikanın hər yerində bu qaydaların tətbiq olunacağını və cəmiyyətimizdə istər yas, istərsə də toy mərasimlərində israfdan uzaq bir yanaşmanı görəcəyimizdən ümidləndiyini bildirib:
“İnsanın yaxın qohumu və ya doğması dünyasını dəyişəndə, o adam bu ağır günü və dərdini yaşamaq istəyir. Amma elə bil yemək hazırlamaq, yer axtarışı və digər təşkilati məsələlərlə məşğul olmaq zərurəti yaranır. Bu isə nə doğru, nə də dünyasını dəyişən insana xeyir verən bir addımdır. Cəmiyyətimiz anlamalıdır ki, bu israfçılığın dünyasını dəyişmiş insan üçün heç bir faydası yoxdur. Biz bu cür israfçılıqdan, mənasız və yersiz xərclərdən qurtulmalıyıq”.
C.Məmmədov onu da diqqətə çatdırıb ki, cəmiyyət bu məsələdə daha həssas və məsuliyyətli mövqe nümayiş etdirməlidir.
“Belə proseslər nə ənənəyə, nə də mənəviyyatımıza yaraşır. Bu, cəmiyyət üçün narahatedici bir məsələdir. Qeyd etdiyimiz adətlərin heç bir dini əsası yoxdur. Ona görə də biz qəti şəkildə bu adətlərdən imtina etməli, cəmiyyətimizi bu cür israfçı və yanlış əməllərdən xilas etməliyik. Əks halda, insanlarımız uzun illər bu problem altında əziyyət çəkməyə davam edəcək”.
24-07-2025, 15:20
AZAL təyyarəsinin atəşə tutulması ilə bağlı yeni TƏFƏRRÜAT
2024-cü il dekabrın 25-də AZAL-ın "Embraer 190" mülki təyyarəsinin vurulması ilə bağlı yeni detallar üzə çıxıb.
"Minval Politika"nın əldə etdiyi məlumata görə, Cənub Hərbi Dairəsinin döyüş növbətçiliyini yerinə yetirən aşağıdakı hərbi qulluqçuları raket buraxılışı zamanı icra edilən fəaliyyətin birbaşa şahidi və iştirakçılarına çevriliblər.
Beləliklə, 51-ci Hava Hücumundan Müdafiə Diviziyasının döyüş idarəetmə qrupunun böyük şturmanı, kapitan Dmitri Yevgeniyeviç Pudovkin;
Cənub Hərbi Dairəsinin qərargahının əməliyyat növbətçisi, polkovnik-leytenant Vladimir Viktoroviç Yanovski;
Hərbi Hava Qüvvələrinin və Hava Hücumundan Müdafiənin 4-cü Mühafizə Ordusunun komanda məntəqəsinin operativ növbətçisi, polkovnik Gennadi Nikolayeviç Yeremenko - təyyarəmizin atəşə tutulması zamanı icra edilən fəaliyyətin birbaşa şahidi və iştirakçılarına çevriliblər.
Xatırladaq ki, bir neçə gün əvvəl AZAL təyyarəsinin vurulması əmrini kimin verdiyi məlum olub.
AZAL-a məxsus "Embraer 190" mülki təyyarəsinin vurulması barədə qərarın verilməsində Rusiya Cənub Hərbi Dairəsinin Hərbi Hava Qüvvələrinin (HHQ) və Hava Hücumundan Müdafiə (HHM) 4-cü qvardiya ordusunun 51-ci Hava Hücumundan Müdafiə diviziyasının komandiri, general-mayor Aleksandr Vasilyeviç Tolopilonun şəxsən iştirak etdiyi ehtimal olunur. Lakin adı çəkilən bu şəxs nəinki cəzalandırılıb, əksinə vəzifəsi artırılıb.
24-07-2025, 15:06
Ağdamda daha bir yanğın
Ağdamda növbəti yanğın başlayıb.
Yanğın rayonun Gülablı kəndi istiqamətində müşahidə edilir.
Hazırda FHN-in əməkdaşları yanğının söndürülməsi istiqamətində işlər aparır.
Qeyd edək ki, artıq 3-cü gündür, işğaldan azad edilmiş ərazilərdə boş sahələrdə quru ot və kol-kosun yanması müşahidə edilir. Alovun söndürülməsinə FHN-in helikopterləri də cəlb edilmişdi.
24-07-2025, 14:58
Cüdoçumuz erməni rəqibinə ipponla qalib gəldi
Azərbaycan cüdoçusu Məhəmməd Ağakişiyev (73 kq) Makedoniyanın paytaxtı Skopyedə keçirilən XVIII Avropa Gənclər Yay Olimpiya Festivalında (EYOF) Ermənistandan olan rəqibinə ipponla qalib gəlib.
Bu barədə Milli Olimpiya Komitəsinin mətbuat xidmətindən məlumat verilib.
Mübarizəyə 1/8 finaldan başlayan cüdoçumuz Tiqran Saruxanyanla qarşılaşıb. Rəqibinə ipponla qalib gələn M.Ağakişiyev 1/4 finala vəsiqə qazanıb.
24-07-2025, 14:45
Köç karvanı Ağdərənin Həsənriz kəndinə çatdı - FOTO
İyulun 24-də doğma yurduna yola salınan köç karvanı Ağdərə rayonunun Həsənriz kəndinə çatıb.
Bu mərhələdə köçürülən 114 nəfərdən ibarət 29 ailəyə mənzillərin açarları təqdim edilib.
Mərasimdə Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəliyinin, Qaçqınların və Məcburi Köçkünlərin İşləri üzrə Dövlət Komitəsinin və "Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidməti" publik hüquqi şəxsin rəsmiləri iştirak ediblər.
Həsənriz kəndində daimi yaşayış üçün köçürülən ailələrə bərpa edilmiş fərdi yaşayış evlərində mənzillər verilib. Qeyd edək ki, hazırda Qarabağda və Şərqi Zəngəzurda, ora köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 50 mindən çox insan yaşayır.
24-07-2025, 14:34
Füzulidəki yanğın Hadruta çatır
Füzuli rayonunun Mollavəli kəndi istiqamətindən Xocavənd rayonunun Hadrut qəsəbəsi istiqamətinə doğru yanğınlar müşahidə olunur. Yanğının miqyası genişlənir.
Əraziyə yanğınsöndürən briqadaları cəlb olunub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!