26-01-2026, 16:30
(TÜRKPA) Baş
katibinin bəyanatı
Qazaxıstan Respublikası Milli Qurultayının V iclasının yekunlarına dair Türk Dövlətləri Parlament Assambleyasının (TÜRKPA) Baş katibi bəyanat yayıb.
Bəyanatda deyilir:
Türk Dövlətləri Parlament Assambleyası (TÜRKPA) Qazaxıstan Respublikası Prezidenti Kasım-Jomart Tokayevin Milli Qurultayın V iclasında səsləndirdiyi və dövlətin institusional əsaslarının möhkəmləndirilməsinə, Ədalətli Qazaxıstanın qurulmasına yönəlmiş təşəbbüslərini yüksək qiymətləndirir.
TÜRKPA Qazaxıstanda həyata keçirilən islahatlara, xüsusilə konstitusiya və parlament sisteminin modernləşdirilməsinə, dövlət idarəçiliyinin səmərəliliyinin artırılmasına və nümayəndəlik institutlarının rolunun gücləndirilməsinə dəstəyini ifadə edir. Assambleya birpalatalı parlament - Qurultaya keçidi, qanunvericilik səlahiyyətlərinin genişləndirilməsini, yeni məsləhətçi strukturların yaradılmasını, eləcə də siyasi proseslərin inklüzivliyini və ictimai dialoqun inkişafını təmin edən tədbirləri alqışlayır. İslahatların real ictimai tələblərə və cəmiyyətin siyasi transformasiyaya hazırlığına əsaslanan, ölçülüb-biçilmiş və mərhələli yanaşma ilə həyata keçirilməsi xüsusi olaraq vurğulanır ki, bu da onların davamlılığını və legitimliyini təmin edir.
Assambleya diqqətə çatdırır ki, təklif olunan islahatlar qanunun aliliyinin möhkəmləndirilməsinə, dövlət orqanlarının şəffaflığının və hesabatlılığının təmin olunmasına, sosial sahədə büdcə vəsaitlərindən rasional istifadəyə və korrupsiyaya qarşı səmərəli mübarizəyə yönəlib. TÜRKPA rəqəmsallaşma strategiyasını, müasir texnologiyaların tətbiqini, fərdi məlumatların qorunmasını, həmçinin vətəndaşların maliyyə və rəqəmsal savadlılığının artırılmasını dəstəkləyir.
Assambleya xarici siyasətə, iqtisadi inteqrasiyaya və beynəlxalq əməkdaşlığa ədalət prinsipləri, beynəlxalq hüquqa hörmət, regional və qlobal sabitliyin möhkəmləndirilməsi əsasında formalaşan balanslaşdırılmış yanaşmanı alqışlayır.
TÜRKPA Qazaxıstanın türk dünyasında regionun əsas aktorlarından biri kimi strateji rolunu vurğulayır və türk dövlətləri xalqlarının davamlı inkişafı və rifahı naminə təcrübə mübadiləsinə və səylərin əlaqələndirilməsinə hazır olduğunu bir daha təsdiqləyir.
Səfir Ramil Həsən,
Türk Dövlətləri Parlament
Assambleyasının (TÜRKPA) Baş katibi
25-01-2026, 20:10
İsrailin XİN başçısı Azərbaycana yola düşdü
İsrail xarici işlər naziri Gideon Saarın rəhbərlik etdiyi 40 iş adamından ibarət nümayəndə heyəti Azərbaycan və Qazaxıstana yola düşüb.
Səfər ikitərəfli siyasi və iqtisadi əlaqələrin gücləndirilməsi məqsədi daşıyır.
Səfər proqramına rəsmi tədbirlər, eləcə də dövlət qurumlarının və ictimai təşkilatların nümayəndələri ilə əlaqələr daxildir. Xüsusilə yəhudi icmalarının nümayəndələri ilə görüşlərə diqqət yetiriləcək.
Qazaxıstana səfər ölkənin İbrahim Sazişlərinə qoşulması ilə əlaqədardır. Bundan əlavə, nazir Astanada Beynəlxalq Holokost Anım Gününü qeyd etmək üçün tədbirlərdə iştirak edəcək.
Saarı 40-dan çox iş adamı və İsrail dövlət qurumlarının nümayəndələrindən ibarət nümayəndə heyəti müşayiət edir. Nümayəndə heyəti su texnologiyaları və kənd təsərrüfatı, kibertəhlükəsizlik, mühəndislik, maliyyə, səhiyyə və digər sektorları təmsil edir.
Saarın təşəbbüsü ilə Bakı və Astanada da biznes forumlarının keçirilməsi planlaşdırılır. Bu forumlara İsrail nümayəndə heyətinin nümayəndələri ilə yerli sahibkarlar və işgüzar dairələr arasında görüşlər də daxil olacaq.
25-01-2026, 19:51
Moskva geri addım atır?
Rusiya nümayəndə heyəti Əbu-Dabidə keçirilən danışıqlarda ərazi məsələləri üzrə ABŞ-ın mövqeyi ilə razılaşmağa məcbur olub və ilkin tələblərindən geri çəkilib.
Bu barədə Britaniyanın "The Times" qəzeti adını açıqlamayan rusiyalı diplomatın sözlərinə istinadən yazır.
Nəşrin məlumatına görə, üçtərəfli məsləhətləşmələrin ilk günü yekunlaşdıqdan sonra Rusiya tərəfi əvvəlcə ərazi güzəştləri ilə bağlı müəyyən öhdəliklər əldə etməyə ümid edib. Lakin nəticədə ABŞ nümayəndələrinin mövqeyi qəbul olunub.
“Biz əvvəlcə ərazi güzəştlərinə dair hansısa öhdəlik almağa ümid edirdik, amma sonda amerikalılarla razılaşmalı olduq”, - mənbə bildirib.
Yanvarın 24-də Əbu-Dabidə Rusiya, ABŞ və Ukrayna nümayəndələrinin iştirakı ilə keçirilən üçtərəfli danışıqların ikinci raundu başa çatıb. TASS-ın mənbələri görüşdə “bufer zonalar” və “müxtəlif nəzarət mexanizmləri”nin müzakirə olunduğunu bildiriblər. Ukrayna mətbuatı isə tərəflərin atəşkəsə dair məsələlərdə müəyyən irəliləyiş əldə etdiyini, lakin ərazilər üzrə kompromisə gələ bilmədiyini yazır.
Ukrayna Prezidenti Vladimir Zelenski danışıqları “konstruktiv” adlandıraraq tərəflərin bir çox mövzunu müzakirə etdiyini deyib. Onun sözlərinə görə, üçüncü raundun gələn həftə keçirilməsi mümkündür.
25-01-2026, 19:42
Sahibə Qafarova həmkarı ilə görüşdü
Milli Məclisin sədri Sahibə Qafarova Bəhreyn Krallığına rəsmi səfəri çərçivəsində yanvarın 25-də bu ölkənin Şura Məclisinin sədri Əli bin Saleh Al Salehlə görüşüb.
Bu barədə Milli Məclisin Mətbuat və ictimaiyyətlə əlaqələr şöbəsindən məlumat verilib.
Azərbaycan parlamentinin sədrini səmimiyyətlə salamlayan Əli bin Saleh Al Saleh bu səfərin ölkələrimiz və parlamentlərimiz arasında münasibətlərin daha da dərinləşməsinə töhfə verəcəyinə inamını ifadə edib. O, ölkəsinin Azərbaycanla əməkdaşlığı genişləndirməkdə maraqlı olduğunu bildirərək, bu çərçivədə parlamentlərarası əlaqələrin daha da genişləndirilməsinin əhəmiyyətini vurğulayıb.
Milli Məclisin sədri Sahibə Qafarova göstərilən yüksək səviyyəli qonaqpərvərliyə görə təşəkkürünü bildirərək, Azərbaycan parlamentinin sədrinin Bəhreyn Krallığına ilk rəsmi səfərinin münasibətlərimizin daha da dərinləşdirilməsi ilə bağlı müzakirələr aparmağa imkan verəcəyini vurğulayıb.
Söhbət zamanı xalqlarımızın dost ölkələrimizi birləşdirən ümumi dini və mədəni dəyərləri bölüşdüyü diqqətə çatdırılıb. Tərəflər ikitərəfli münasibətlərin bütün sahələrdə inkişafı üçün böyük potensialın olduğunu vurğulayaraq, siyasi təmasların, iki dövlət arasında müxtəlif sahələrdə qarşılıqlı səfərlərin həyata keçirilməsinin əlaqələrin inkişafına təkan verəcəyinə inamlarını ifadə ediblər.
Görüşdə ölkələrimizin BMT, İslam Əməkdaşlıq Təşkilatı və Qoşulmama Hərəkatı kimi müxtəlif beynəlxalq və regional təşkilatlar çərçivəsində müsbət əməkdaşlıq etdikləri vurğulanaraq, bu təşkilatlarda qarşılıqlı dəstək göstərilməsindən razılıq ifadə olunub.
Söhbət zamanı qanunvericilik orqanları arasında əməkdaşlıq məsələləri nəzərdən keçirilib. Diqqətə çatdırılıb ki, Azərbaycan və Bəhreyn qanunvericilik orqanları arasında səmərəli əməkdaşlıq əlaqələri qurulub. Hər iki ölkənin parlament sədrləri səviyyəsində həyata keçirilən qarşılıqlı səfərlər bu münasibətlərin daha da dərinləşməsinə töhfə verib.
Spiker Sahibə Qafarova Şura Məclisinin sədri ilə bundan əvvəlki görüşlərini, həmçinin, Əli bin Saleh Al Salehin Qoşulmama Hərəkatı Parlament Şəbəkəsinin Manama şəhərində keçirilən konfransında iştirakını məmnunluqla xatırlayıb. Vurğulanıb ki, Bəhreyn Parlamenti bu mühüm parlament platformasının bütün konfrans və parlament tədbirlərində, o cümlədən, təşkilatın rəhbər orqanlarında təmsil olunur.
Görüşdə qarşılıqlı maraq doğuran digər məsələlər ətrafında da fikir mübadiləsi aparılıb.
25-01-2026, 19:10
Əli Laricaninin qızı ABŞ universitetindən qovuldu
ABŞ-nin Corciya ştatında yerləşən Emori Universiteti İranın Ali Milli Təhlükəsizlik Şurasının katibi Əli Laricaninin qızı Fatimə Ərdəşir Laricani işdən çıxarıb.
Bu barədə Universitet məlumat yayıb.
Qərar artan siyasi təzyiqlər, ictimai etirazlar və ABŞ rəsmilərinin narazılığı fonunda qəbul edilib.
O, Emori Universitetinin Hematologiya və Tibbi Onkologiya kafedrasında dosent vəzifəsində çalışıb. Fatimə ilə bağlı məlumatlar artıq universitetin internet səhifəsindən silinib.
25-01-2026, 18:54
Rusiya Maduronun azad edilməsini tələb edir
Rusiya Venesuelanın sabiq Prezidenti Nikolas Maduronun dərhal azadlığa buraxılmasını tələb edir.
Rusiyanın xarici işlər nazirinin müavini Sergey Ryabkov TASS agentliyinə açıqlamasında Moskvanın sözügedən məsələdəki mövqeyini ifadə edib.
Diplomat bildirib ki, hazırda istənilən müzakirənin başlaması üçün ilk addım Maduro və həyat yoldaşı Siliya Floresin azad edilməsidir.
Ryabkov Moskvanın Maduroya siyasi sığınacaq verib-verməyəcəyi ilə bağlı sualları cavablandırarkən qeyd edib ki, bu məsələ yalnız o azad edildikdən sonra müzakirə mövzusu ola bilər:
“Hazırda hər şey hipotetik xarakter daşıyır. Əsas məsələ onun azadlığa buraxılmasıdır”.
Xatırladaq ki, 3 yanvar tarixində ABŞ xüsusi təyinatlıları Venesuelada “Mütləq Qətiyyət” (“Operation Absolute Resolve”) adlı hərbi əməliyyat keçirərək Nikolas Maduronu və xanımını həbs ediblər. Onlar dərhal Nyu-Yorka aparılıb və hazırda Manhetten federal məhkəməsində narkoterrorizm, kokain qaçaqmalçılığı və qanunsuz silah saxlama ittihamları ilə mühakimə olunurlar.
25-01-2026, 18:39
NATO təlimində böhran: Amerikalı əsgərlər geri çəkildi
NATO-nun Norveç ərazisində keçirdiyi qış hərbi təlimləri zamanı gözlənilməz vəziyyət yaşanıb.
Manevrlər çərçivəsində ehtiyatda olan Finlandiya hərbçiləri ilə qarşıdurmada ABŞ qoşunları geri addım atmaq məcburiyyətində qalıb.
“Birgə Vikinq” adlı təlim zamanı Finlandiya tərəfi hücum mövqeyində çıxış edib, Amerika hərbçiləri isə müdafiə xəttini qoruyub. Təlimin gedişində fin əsgərlərinin ABŞ qüvvələrinə qarşı aşkar üstünlük qazandığı bildirilib.
Nəşrə danışan hərbi mənbənin sözlərinə görə, finlandiyalı əsgərlərə hücumların intensivliyini azaltmaqla bağlı tövsiyə verilib. Səbəb isə ABŞ hərbçilərinin şərti itkilərinin həddindən artıq artması olub ki, bu da onların mənəvi durumuna mənfi təsir göstərib.
Mənbə qeyd edib ki, ABŞ ordusunun həm əməliyyat təcrübəsi, həm də Arktika iqlimində döyüş hazırlığı baxımından boşluqları üzə çıxıb. Avropadakı NATO üzvləri – xüsusilə Finlandiya, Norveç və Böyük Britaniya – sərt və soyuq şimal şəraitində fəaliyyətə daha yaxşı uyğunlaşıb.
Xatırladaq ki, Norveç Silahlı Qüvvələrinin rəhbərliyi altında keçirilən “Birgə Vikinq” təlimlərində ümumilikdə 10 minə yaxın hərbçi iştirak edib.
25-01-2026, 18:27
Qrenlandiya böhran: İşıqsız və istiliksiz qaldı
Qrenlandiyanın paytaxtı Nuukda elektrik və istilik sistemi kəsilib.
Bu barədə "Reuters" məlumat yayıb.
Agentlik bildirib ki, "Soyuq qış gecəsində minlərlə insan elektriksiz və istiliksiz qalıb".
Hadisəyə səbəb kimi fırtınalı küləklərin elektrik kabelini sıradan çıxarması göstərilir.
25-01-2026, 18:21
“Temu” Türkiyədə xarici məhsul satışlarını dayandırdı
Məşhur e-ticarət platforması “Temu” Türkiyədəki fəaliyyətində köklü dəyişiklik edərək xaricdən məhsul satışını rəsmən dayandırıb.
Bu gündən etibarən platforma Türkiyədəki istifadəçiləri üçün beynəlxalq sifarişləri tamamilə qeyri-aktiv edib.
Hazırda sayt və tətbiq üzərindən axtarış edən müştərilər yalnız Türkiyə daxilindəki anbarlardan göndərilən və yerli satıcılara məxsus məhsulları görə bilirlər.
Xatırladaq ki, yanvarın 21-də Türkiyə Rəqabət Qurumu tərəfindən “Temu”nun İstanbul ofisində qəfil yoxlama aparılıb və şirkətin rəqəmsal məlumatları araşdırılıb.
Bundan əlavə, Türkiyə hökuməti yanvarın 7-də dərc edilən yeni qərarla xaricdən gələn bağlamalar üçün tətbiq olunan 30 avroluq (təxminən 60 AZN) rüsumsuz limiti fevralın 1-dən (bəzi bəndlər üzrə isə 6-dan) etibarən tamamilə ləğv edib.
25-01-2026, 18:05
Fərəh Pəhləvi İranda ölənlərdən danışdı
Şahbanu Fərəh Pəhləvi İranda etirazçıların ölümünə görə kədərləndiyini bildirib.
O, bununla bağlı bəyanat yayıb.
Fərəh Pəhləvi verdiyi açıqlamada bu ölümlərin "İranın ruhunda dərin bir yara" qoyduğunu bildirib və indi, həmişəkindən daha çox, "həmrəylik və insanlıq içində birləşməyin" vacib olduğunu vurğulayıb.
"Biz həqiqəti, ədaləti və insan ləyaqətini müdafiə edərək İranın azadlığı uğrunda bütün şəhidləri xatırlamağa davam edəcəyik. İşıq qaranlıq üzərində qələbə çalacaq", - deyə Pəhləvi yazıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!