Almaniyada həftə sonu parlament seçkiləri keçiriləcək. Bu seçkilərdə türk seçiciləri maraqlandıran ən əhəmiyyətli mövzulardan biri də ikili vətəndaşlıqdır. Buna isə siyasi partiyalardan yalnız hökumətdəki Xristian Birlik Partiyası qarşı çıxır.

ANS PRESS-in "Trthaber.com"-a istinadən verdiyi xəbərə görə, partiyanın aparıcı simalarından sayılan Armin Lasçet, partiyasının mövqeyinin zamanla dəyişəcəyini deyir. Onun sözlərinə görə, ölkədə yaşayan əcnəbilərin 50 %-i ikili vətəndaşlıq hüququna malikdir.

Yeni seçiləcək hökumətdən bu məsələdə islahatlar gözlədiyini deyən Lasçet bildirib ki, XDP-nın bəzi üzvləri də ikili vətəndaşlığa dəstək verir. Almaniyada türk seçicilərinin daha çox İctimai Demokratlar və Yaşıllar partiyalarını dəstəklədiyini deyən Lasçetin sözlərinə görə, bununla belə türklərlə əlaqədar araşıdrmalarda partiyası türk seçicilərin seçimində ikinci yerdə dayanır.

XDP-nin ailə siyasətinin türk ailələrin həyatına çox uyğun gəldiyini söyləyən Lasçet qeyd edib ki, onların yalnız 20 faizi bu partiyanı seçir: "Bu çox aşağı rəqəmdir. Türk mənşəli seçicilərin dəstəyini böyük nisbətdə qazanmadan seçkidə qalib gələ bilmərik. Buna görə də türk mənşəli miqrantlar seçkilərdə təyinedici ünsürə çevrilirlər".

O, partiyasının türk və miqrant mənşəli namizədlərin azlığı səbəbində çox tənqid olunduğunu bildirib. Onun dediyinə görə, bu vəziyyət partiya üzvləri arasında türk mənşəli şəxslərin azlığı ilə bağlıdır.

Qeyd edək ki, XDP, bu seçkidə ilk dəfə Şimali Reynin Vestfaliya əyalətindən türk mənşəli Cemilə Yusufini namizəd kimi göstərib. Əgər Yusufi seçilərsə, bu partiyadan Almaniya parlamentinə gedən ilk türk mənşəli millət vəkili olacaq.