Sentyabrın 22-də Bakı Şəhər Mədəniyyət və Turizm Baş İdarəsinin Suraxanı Rayon Mərkəzləşdirilmiş Kitabxana Sisteminin Mərkəzi Kitabxanasında “Açıq kitabxana” layihəsi çərçivəsində kitab sərgisi keçirildi. Mərkəzi Kitabxananın həyətində təşkil edilən sərgidə Bülbülə qəsəbəsinin ziyalıları, əmək və müharibə veteranları, eləcə də Suraxanı rayonunda yerləşən 79, 140, 208 və 226 nömrəli tam orta məktəblərin şagirdləri iştirak etdilər. Həmin gün “Açıq kitabxana”nın təşkili kitabsevərlərə ən dəyərli hədiyyə oldu. Bütünlüklə, mütaliə mədəniyyətinin inkişafına xidmət edən sərgidə yeni və aktuallıq kəsb edən kitablar oxuculara təqdim olundu. Sərgidə Bülbülə qəsəbəsindəki 226 nömrəli tam orta məktəbin tarix müəllimi, tarixçi-publisist Təranə Cəbiyeva da iştirak etdi. Təranə Cəbiyeva müəllifi olduğu kitabları imzalayaraq, Suraxanı Rayon Mərkəzləşdirilmiş Kitabxana Sisteminin Mərkəzi Kitabxanana hədiyyə etdi. Sərgi iştirakçıları Suraxanı Rayon Mərkəzləşdirilmiş Kitabxana Sisteminin “Açıq kitabxana” layihəsini uğurlu layihə kimi dəyərləndirərək, layihənin təşkilatçılarına – Suraxanı Rayon MKS-in direktoru M.Əhmədovaya, MKS-in metodisti V.Məmmədovaya, MSK-in şöbə müdirləri S.Ələkbərovaya, S.Abasovaya və A.Şərbətovaya minnətdarlıqlarını söylədilər.