2-12-2025, 18:34
Sülh planının 20 bəndi artıq hazırdır
ABŞ-da görüşlərdə iştirak edən nümayəndə heyəti bu gün İrlandiyada toplaşıb.
Bunu Prezident Volodimir Zelenski deyib.
O qeyd edib ki, Cenevrədə hazırlanmış və Floridada üzərində işlənmiş sülh planının 20 bəndi artıq hazırdır.
Zelenski bəzi məqamlar üzərində hələ də işləmək lazım olduğunu vurğulayıb.
2-12-2025, 18:11
Nazirliyin kollegiyası təsdiqləndi
Azərbaycanın Xarici İşlər Nazirliyinin kollegiyasının üzvlərinin sayı və tərkibi təsdiqlənib.
Bununla bağlı Baş nazir Əli Əsədov qərar imzalayıb.
Qərara əsasən, Xarici İşlər Nazirliyinin kollegiyasının üzvlərinin sayı 11 nəfərdən ibarət müəyyənləşdirilib və aşağıdakı tərkibdə təsdiq edilib:
Kollegiyanın sədri Azərbaycanın xarici işlər naziri;
Kollegiyanın üzvləri: xarici işlər nazirinin müavinləri, ADA Universitetinin rektoru, Xarici İşlər Nazirliyinin Hüquqi təminat idarəsinin rəisi, Xarici İşlər Nazirliyinin Kadrlar idarəsinin rəisi, Xarici İşlər Nazirliyinin Naxçıvan Muxtar Respublikasında İdarəsinin rəisi.
2-12-2025, 17:51
Vardanyanın məhkəməsi: zərərçəkənlər danışdılar
Azərbaycan Respublikasının Cinayət Məcəlləsinin sülh və insanlıq əleyhinə cinayətlər, müharibə cinayətləri, habelə terrorçuluq, terrorçuluğu maliyyələşdirmə ilə bağlı maddələri ilə və digər ağır cinayətlərdə təqsirləndirilən Ermənistan vətəndaşı Ruben Vardanyanın barəsində cinayət işi üzrə məhkəmə prosesi dekabrın 2-də davam etdirilib.
Bakı Hərbi Məhkəməsində hakimlər Zeynal Ağayevin sədrliyi ilə, Anar Rzayevdən və Camal Ramazanovdan ibarət tərkibdə keçirilən açıq məhkəmə iclasında (ehtiyat hakim Günel Səmədova) təqsirləndirilən şəxs bildiyi dildə, yəni, rus dilində tərcüməçi, habelə müdafiəsi üçün dövlət hesabına vəkillə təmin olunub.
Hakim Zeynal Ağayev prosesdə ilk dəfə iştirak edən zərərçəkmiş şəxslərə və zərərçəkmiş şəxslərin hüquqi varislərinə məhkəmə heyətini, dövlət ittihamını müdafiə edən prokurorları, tərcüməçiləri və s. təqdim edib, habelə onların qanunvericiliklə nəzərdə tutulmuş hüquqlarını və vəzifələrini izah edib.
Sonra zərərçəkmiş şəxslərin ifadələri dinlənilib.
Zərərçəkmiş Elşən Babayev dövlət ittihamçısı Vüsal Abdullayevin suallarını cavablandıraraq bildirib ki, Ağdərə rayonu ərazisində Ermənistan ordusunun qalıqları və qanunsuz erməni silahlı dəstələri tərəfindən atılan tankəleyhinə mərminin yaxınlıqlarında partlaması nəticəsində Tural Əmirov və Elçin Salmanov həlak olub, o və Yusif Həsənov isə yaralanıblar.
Dövlət ittihamçısı Təranə Məmmədovanın suallarını cavablandıran zərərçəkmiş Elvin Məmmədov qeyd edib ki, Xocalı rayonunun Sərdarkənd kəndi ərazisində düşmən tərəfindən atılan minaatan mərmisinin yaxınlığına düşüb partlaması nəticəsində o və Kamran Həsənov yaralanıb. Əlavə edib ki, həmin vaxt düşmən minaatan, snayper və digər silahlarla atəş açırdı.
Zərərçəkmiş Xalid Şükürlü ifadəsində bildirib ki, Xocalı rayonunun Malıbəyli kəndi ərazisində düşmənin atdığı minaatan mərmisinin partlaması nəticəsində xəsarət alıb. Həmin hadisə zamanı Sadiq Məmmədov və Nicat Əhmədzadə də yaralanıblar.
Dövlət ittihamçısı Fuad Musayevin suallarını cavablandıran zərərçəkmiş Taleh Hümbətzadə qeyd edib ki, Xocavənd rayonunun Yenikənd kəndi ərazisində Ermənistan ordusunun qalıqları və qanunsuz erməni silahlı dəstələrinin atdığı artilleriya mərmisinin yaxınlığına düşərək partlaması nəticəsində yaralanıb. Hadisə zamanı Cavid Şavqatlı da xəsarət alıb.
Zərərçəkmiş Fazil Əmirli Baş prokurorun böyük köməkçisi Vüsal Əliyevin suallarını cavablandıraraq bildirib ki, Xocalı rayonunun Malıbəyli kəndi ərazisində düşmənin açdığı atəşlər nəticəsində o, Seyfəddin Cabbarov və Kamran Nəcəfov yaralanıblar.
Baş Prokurorluğun Dövlət ittihamının müdafiəsi üzrə idarəsinin şöbə rəisi Nəsir Bayramovun suallarını cavablandıran İlqar Qasımov deyib ki, Xocalı rayonu istiqamətində düşmən tərəfindən basdırılmış minanın partlaması nəticəsində o və Hüseyn Hüseynov xəsarət alıblar.
Məhkəmə prosesi sənədlərin və cinayət işi materiallarında olan digər sübutların tədqiqi ilə davam etdirilib.
Məhkəmənin növbəti iclası dekabrın 5-nə təyin olunub.
Xatırladaq ki, Ruben Vardanyan Azərbaycan Respublikası CM-in 100.1, 100.2 (təcavüzkar müharibəni planlaşdırma, hazırlama, başlama və aparma), 107 (əhalini deportasiya etmə və məcburi köçürmə), 109 (təqib), 110 (insanları zorakılıqla yoxa çıxarma), 112 (beynəlxalq hüquq normalarına zidd azadlıqdan məhrum etmə), 113 (işgəncə), 114.1 (muzdluluq), 115.2 (müharibə qanunlarını və adətlərini pozma), 116.0.1, 116.0.2, 116.0.10, 116.0.11, 116.0.16, 116.0.18 (silahlı münaqişə zamanı beynəlxalq humanitar hüquq normalarını pozma), 120.2.1, 120.2.3, 120.2.4, 120.2.7, 120.2.11, 120.2.12 (qəsdən adam öldürmə), 29,120.2.1, 29,120.2.3, 29,120.2.4, 29,120.2.7, 29,120.2.11, 29,120.2.12 (qəsdən adam öldürməyə cəhd), 192.3.1 (qanunsuz sahibkarlıq), 214.2.1, 214.2.3, 214.2.4 (terrorçuluq), 214-1 (terrorçuluğu maliyyələşdirmə), 218.1, 218.2 (cinayətkar birlik yaratma), 228.3 (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 270-1.2, 270-1.4 (aviasiya təhlükəsizliyinə təhdid yaradan əməllər), 278.1 (hakimiyyəti zorla ələ keçirmə və ya onu zorla saxlama, dövlətin konstitusiya quruluşunu zorla dəyişdirmə), 279.1, 279.2, 279.3 (qanunvericiliklə nəzərdə tutulmayan silahlı birləşmələri və ya qrupları yaratma) və 318.2-ci (Azərbaycan Respublikasının dövlət sərhədini qanunsuz olaraq keçmə) maddələri ilə ittiham olunur.
2-12-2025, 17:48
Tehran və Ankara razılığa gəliblər - Arakçi
İki böyük regional güc olaraq Tehran və Ankara regionda davamlı sülh, sabitlik və inkişafı təşviq etmək üçün sıx əməkdaşlığa sadiqdirlər.
Bunu İranın xarici işlər naziri Abbas Arakçi bildirib.
Arakçi dünən Türkiyənin xarici işlər naziri Hakan Fidan və onu müşayiət edən nümayəndə heyətini Tehranda qəbul etdiyini söyləyib.
O qeyd edib ki, "tamamilə isti və konstruktiv bir atmosferdə iki tərəf ikitərəfli münasibətlərin artan trayektoriyasını nəzərdən keçirib və hər iki ölkə liderlərinin iqtisadi, ticarət, enerji, texnologiya, təhlükəsizlik və mədəniyyət sahələrində əməkdaşlığı dərinləşdirmək əzmini bir daha təsdiqləyiblər".
Arakçi əlavə edib ki, hər iki tərəf "Qəzza və İordan çayının Qərb sailindəki fəlakətli vəziyyətlə bağlı dərin narahatlıqlarını ifadə edib, İsrail rejimi tərəfindən törədilən soyqırımı qətiyyətlə pisləyib və bu cinayətlərə son qoyulması və rejimin beynəlxalq forumlarda məsuliyyətə cəlb edilməsinin təcili zərurəti barədə razılığa gəliblər".
Suriya və Livandakı hadisələrdən danışan Abbas Arakçi vurğulayıb ki, hər iki ölkə "bu dövlətlərin milli suverenliyinə, ərazi bütövlüyünə və birliyinə tam hörməti vurğulayır və davam edən İsrail təcavüzünü qətiyyətlə pisləyir".
2-12-2025, 17:40
Novruzla Ramazan eyni günə düşür: 11 gün iş olmayacaq
Gələn il Novruz və Ramazan bayramları üst-üstə düşəcək.
2026-cı ildə martın 20, 21, 22, 23, 24-ü Novruz bayramıdır. Qərar Nazirlər Kabineti tərəfindən verilib.
21 və 22 mart tarixləri şənbə və bazar günlərinə təsadüf edir. Əmək Məcəlləsinin tələblərinə əsasən, 25 və 26 mart qeyri-iş günləri olacaq.
Martın 20, 21-i həm də Ramazan bayramıdır. Əmək Məcəlləsinə əsasən, Ramazan bayramı iş günü hesab olunmayan başqa bayram günü ilə üst-üstə düşdükdə növbəti iş günü istirahət günü hesab edilir. Beləliklə, Əmək Məcəlləsinin tələbinə əsasən növbəti iş günləri 27 və 30 mart tarixləri də qeyri-iş günü olacaq.
Beləliklə, Novruz və Ramazan bayramları ilə əlaqədar 20, 21, 22, 23, 24, 25, 26, 27, 28, 29 və 30 mart qeyri-iş günü olacaq.
2-12-2025, 17:27
Federika Moqerini saxlanıldı
Avropa diplomatiyasının keçmiş rəhbəri və Avropa Kollecinin rektoru Federika Moqerini Belçika polisi tərəfindən dələduzluqda şübhəli bilinərək saxlanılıb.
Avropa Baş Prokurorluğu (EPPO) Avropa Xarici Fəaliyyət Xidmətinin (EEAS) Brüsseldəki mənzil-qərargahında Aİ vəsaitlərinin mümkün sui-istifadəsi ilə bağlı təhqiqat çərçivəsində axtarışların aparıldığını təsdiqləyib. Keçirilən əməliyyatlar nəticəsində 3 şübhəli həbs edilib.
Brüggedəki Avropa Kollecinin bir neçə binasında, eləcə də müttəhimlərin iqamətgahlarında paralel araşdırmalar aparılıb. EPPO aydınlaşdırıb ki, saxlanılan şəxslər dələduzluq, korrupsiya və cinayətkar maraqların toqquşmasında ittiham olunurlar. Axtarışlar zamanı çoxlu sənədlər ələ keçirilib. İstintaq Avropa Fırıldaqçılıqla Mübarizə Bürosunun (OLAF) köməyi ilə aparılır.
İlkin məlumatlara görə, EEAS əməkdaşları gənc diplomatlar üçün on aylıq təhsil proqramını həyata keçirmək üçün 2021-ci il tenderinin seçim meyarları ilə bağlı Avropa Kollecinə əvvəlcədən məlumat vermiş ola bilərlər. Müsabiqədən sonra qurum 654 000 avro maliyyə vəsaiti əldə edib. Kollecə Federika Moqerini rəhbərlik edir. Hazırda heç kimə qarşı rəsmi ittiham irəli sürülməyib.
2-12-2025, 17:13
Bütün şəhid ailələri və müharibə əlilləri evlə təmin olunacaqlar
"Birinci plenar iclasda sual qalxmışdı ki, Əmək və Əhalinin Sosial Müdafiəsi Nazirliyi şəhid ailələri və müharibə əlilləri üçün mənzil və yaxud fərdi evlərin inşasından maraqlı deyil. Bu belə deyil".
Bunu Milli Məclisin bu gün keçirilən iclasında çıxışı zamanı əmək və əhalinin sosial müdafiəsi naziri Anar Əliyev deyib.
Nazir bildirib ki, şəhid ailələrinin və müharibə əlillərinin mənzil, məişət şəraitinin yaxşılaşdırılması üçün 2 proqram icra edilir:
"Əmək və Əhalinin Sosial Müdafiəsi Nazirliyi bu proqramları icra etmək üçün kifayət qədər vəsaitə malikdir, proqrmalar dayandırılmayıb və davam etdirilir. Nazirlik ölkə üzrə yeni inşa edilmiş çoxmənzilli binalarda mənzillərin alışını həyata keçirir və bu məqsədlə müvafiq tenderləri elan edirik. Ümumilikdə bu proqram çərçivəsində 15,7 min mənzil və fərdi evlərin verilməsi təmin edilib. 2018-2025-ci illərdən bu kateqoriyadan olan şəxslərə 10 min mənzil və fərdi evlərin verilməsini təmin etmişik. Post-müharibə dövründə 6,9 min mənzil verilməsini təmin etmişik. Cari ildə isə bu məqsədlər üçün 400-ə yaxına mənzilin alınmasını təmin edəcəyik.
Dağlıq və dağətəyi rayonlarda coğrafi çətinliklər nəzərə alınaraq növbəti ildən həmin rayonlarla bağlı xüsusi yanaşma tətbiq olunacaq. Mənzil-məişət şəraitin yaxşılaşdırılmasına ehtiyacı olan məznil növbəsində olan ölkə üzrə bütün şəhid ailələri və müharibə əlilləri mənzillə təmin olunacaqlar”.
2-12-2025, 17:09
2026-cı ilin bayram günləri - Baş nazir QƏRAR VERDİ
2026-cı il üçün Novruz, Ramazan və Qurban bayramları günləri müəyyən edilib.
Nazirlər Kabineti bu barədə qərar verib.
2026-cı il martın 20, 21, 22, 23, 24-ü Novruz bayramı, martın 20, 21-i Ramazan bayramı, mayın 27, 28-i Qurban bayramı günləri müəyyən edilib.
Həmin günlər iş günü hesab edilmir.
2-12-2025, 16:58
“Meydan TV” işi üzrə məhkəmə başlayır
“Meydan TV” işi üzrə ittiham olunan 10 nəfərin məhkəməsi başlayır.
Bakı Şəhər Baş Polis İdarəsində aparılan ibtidai istintaqla toplanmış materiallar baxılması üçün Bakı Ağır Cinayətlər Məhkəməsinə göndərilib.
Cinayət işini Aytən Əliyevanın sədrlik etdiyi hakimlər araşdıracaq.
İlk iclas dekabrın 12-si keçiriləcək.
Qeyd edək ki, “Meydan TV” ilə bağlı cinayət işi çərçivəsində jurnalistlər - Aynur Elgünəş, Natiq Cavadlı, Ramin Deko, Xəyalə Ağayeva, Aytac Tapdıq, Aysel Umudova, Şəmşad Ağa, Fatimə Mövlamlı, Nurlan Libre və Ülviyyə Əli həbs olunublar. Onlar barəsində mütəşəkkil dəstə tərəfindən törədilən qaçaqmalçılıq və digər bir neçə ağır maddə ilə ittiham elan edilib.
2-12-2025, 16:39
Sarkisyan Putinə gizli məktub yazıbmış – Qarabağla bağlı plan nə idi?
Ermənistanın sabiq prezidenti Serj Sarkisyanın Rusiya lideri Vladimir Putinə ünvanladığı gizli məktubun mətni üzə çıxıb.
Məktub bu gün Ermənistan hökumətinin saytında dərc olunub.
Məktub Ermənistan rəhbərliyinin illər boyu “sülh tərəfdarı” görüntüsü yaratmasına baxmayaraq, əslində prosesə maksimalist, qeyri-konstruktiv və Azərbaycanın ərazi bütövlüyü ilə ziddiyyət təşkil edən mövqedən yanaşdığını təsdiqləyir.
Sarkisyan məktubunda Qarabağdakı separatçıların danışıqların bütün mərhələlərində “tamhüquqlu tərəf” kimi tanınmasını tələb edir, 1991-ci ildə keçirilmiş separatçı “referendumun” nəticələrinin gələcək statusun əsas hüquqi bazası sayılmasını istəyir və Azərbaycanın işğal olunmuş rayonlardan çıxmasını yalnız Rusiyanın təmin edəcəyi təhlükəsizlik şərtləri ilə şərtləndirirdi.
Məktubda ən diqqətçəkən məqam isə Ermənistanın Rusiya vasitəsilə Azərbaycana təzyiq göstərilməsinə açıq çağırış etməsi, hətta Bakının tələbləri qəbul etməyəcəyi təqdirdə “Dağlıq Qarabağın müstəqilliyinin tanınması prosesinə başlamaq” barədə təklif irəli sürməsidir.
Sənəddən görünür ki, Ermənistan danışıqlarda balanslı həllə deyil, faktiki olaraq status-kvonun qorunmasına, separatçı rejimin legitimləşdirilməsinə və işğal olunmuş ərazilərin qaytarılmamasına çalışıb. Sarkisyan Rusiyanın vasitəçilik rolunu neytral mexanizm kimi deyil, Bakıya qarşı siyasi təzyiq vasitəsi kimi görməyə cəhd edir və Moskvanın bölgədə öz ağırlığından istifadə etməsini açıq şəkildə tələb edir.
Məktub həm də onu göstərir ki, Ermənistan illər boyu beynəlxalq vasitəçilərə konstruktiv tərəf kimi təqdim olunmasına baxmayaraq, real danışıqlarda sülhə yönəlmiş addımlar atmaq niyyətində olmayıb. Sənəddə Bakı tərəfindən irəli sürülən “ərazilər müqabilində sülh” formatı ən təhlükəli ssenari kimi təqdim edilir, kompromisə getmək əvəzinə Ermənistanın maksimalist mövqedən geri çəkilməyəcəyi vurğulanır.
Bu məktub Ermənistanın əvvəlki rəhbərliyinin danışıqlar prosesindəki səmimiyyəti ilə bağlı suallara nöqtə qoyur: rəsmi İrəvan illərlə regionda sabitliyə aparan yolları bağlayıb, sülh prosesini manipulyasiya edib və Rusiya faktorundan istifadə edərək Azərbaycanın legitim tələblərini neytrallaşdırmağa çalışıb.
Ortaya çıxmış sənəd göstərir ki, münaqişənin 30 ilə yaxın müddətdə uzanmasının əsas səbəblərindən biri Ermənistanın reallığa uyğun olmayan maksimalist siyasəti və sülhə deyil, status-kvonu saxlamağa hesablanmış mövqeyi olub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!