NAZİM AĞAYEV -
SEVİLƏN SƏNƏTÇİ

Respublikanın Əməkdar artisti, Prezident təqaüdçüsü , sevilən müğənni NAZİM AĞAYEVİN vəfatından 5 il keçsə də, sənət ömrü yaşayıb davam edir. Müğənninin sağlığında qələmə aldığım yazını saytın oxularına təqdim edirəm.
Ruhu şad, məkanı cənnət olsun.

Lənkəranda o ev, o küçə yenə qalır. Yaşlı adamların bəziləri bura “köhnə bağça”, bəziləri “çörəkçi Asiyənin evi” deyirdilər. İndi həmin ünvanda başqaları yaşayır. Qapıya isə Demokratik Azərbaycanın ilk hərbi naziri, artilleriyanın atası sayılan general leytenant Səməd bəy Mehmandarovun portreti vurulub. Yəni, Səməd bəy də bu ünvanda yaşayıb nə vaxtsa. Nazim Ağayev Bakıda doğulsa da, çörəkçi Asiyənin oğlu kimi hamı lənkəranlı sayır onu. Bu gün hamımıza doğma olan nəğmələrin səsi o evin daşlarına, divarlarına hopub.
Nazim Ağayev 1939-cu ilin yanvarın ikisində Bakıda dünyaya göz açıb. Atası əslən Cənubi Azərbaycandan olan Maşallah Neftçala Balıq zavodunda texnoloq işləyirmiş. Asiyənin atası İmaməli balıqçı olduğundan tanıyırmışlar bir-birlərini. Maşallah Asiyəyə vurulur, elçi göndərir,bir qədər sonra toyları olur. Evlənib Bakıda yaşayırlar.

Bakıda fabrik direktoru işləyən Maşallah ailəsini götürüb Lənkərana köçür. Nazimin daddığı ağrıların ilk acısı olur bu köçhaköç. Zamanın boz sifətini onda görür ilk dəfə. Müxtəlif məhəllələrdə kirayədə qaldıqlarından az qala bütün Lənkəran tanıyır bu şən, zarafatçıl, bir az da dəli-dolu, dəcəl oğlanı. Yeddillik təhsilini 5, orta təhsilini 3 saylı məktəbdə başa vurur. Bütün fənlərdən əla və yaxşı qiymətlər alsa da, meyli incəsənətdir. Səsindən, səhnə məharətindən başqa, gözəl əl qabiliyyəti də var. Çəkdiyi rəsmlər hətta müxtəlif müsabiqələrdə sərgilənir. Amma müğənnilik, xalq mahnılarına məhəbbət üstün gəlir bütün istəklərinə. Və taleyini əbədi bu sənətə bağlayır.
Ötən illərdən yadigar qalan, qatı kəsilmiş, yazıları güclə oxunan qəzetlərdən sətirlər: “Rayon pionerlər evində, mədəniyyət evində göstərilən tamaşalarda Nazim Ağayev səhnədə görünən kimi alqışlar qopur. “Göz həkimi”ndəki Həsənağası əvəzsizdir. Aktyor oyunuyla yanaşı Həsənağanın mahnısı tamaşaçıların zövqünü oxşayır və s.” Bakıda xalq teatrında həvəskar kimi çalışdığı dövrdə görkəmli rejissor Lütfi Məmmədbəyovun hazırladığı Altay Məmmədovun “Həmyerlilər” tamaşasında baş rolu ifa edir. Və bu rolun ifasına görə Nazim Ağayev respublika müsabiqəsinin I dərəcəli diplomuna layiq görülür. Müsabiqəyə teatr korifeyi Rza Təhmasib sədrlik edirmiş.
Sənədlərini Teatr İnstitutuna verir. Teatr İnstitutunun musiqili-komediya fakültəsinin ilk buraxılışı olur onların qrupu. Hələ tələbə ikən institutda müğənni kimi daha məşhur olan Nazim kurs tapşırıqlarının birində rolunu necə ifa edirsə, teatr nəhəngi Şəmsi Bədəlbəylinin diqqətini cəlb edir. Tələbə Nazimi teatrda işə götürür. Həmin illər Musiqili Komediya Teatrının intibah dövrüydü. SSRİ teatrları arasında öz yeri olan zamanıydı. Və teatrda Nəsibə Zeynalova vardı, Bəşir Səfəroğlu, Lütfəli Abdullayev, İmamverdi Bağırov, Məmmədsadıq Nuriyev... vardı. İlk dəfə “Məşədi İbad”da intilligent Həsən rolunda çıxır səhnəyə. O vaxta qədər bu rolun məşhur ifaçıları olmuşdu. Nazim də uğurla oynayır bu rolu. Tamaşaçı alqışları, ən başlıcası Şəmsi müəllimin diqqət və qayğısı onu başqa rolları hazırlamağa sövq edir. Fəqət ailə qurduğundan teatrda aldığı maaş onu təmin etmir. Müğənniliyə, toylara üstünlük verir. Ərizəsini yazıb teatrdan gedərkən Şəmsi müəllimin dediyi sözlər indi də yadındadır: “Nazim, nə vaxt teatra qayıtmaq istəsən, qapılar üzünə açıqdır. Sənin yerin vardır.”

Təəssüf ki, Nazim bir daha qayıtmır teatra. Onun aktyorluq məharətini duyub qiymətləndirən rejissorlar 5-6 filmdə əbədiləşdiriblər Nazim Ağayevi. “Bir cənub şəhərində” və “Yaramaz” da sürücülük edir. “ Kişi sözü”ndə icra başçısı, “Qarabağ şikəstəsi”ndə professordur. “Sahilsiz gecə”də alverçi, “Ən vacib müsahibə” də bufetçi Salehdir.
Bir kiçik film də var – “Balıqçı”. Rejissor Arif Qazıyev ekranlaşdırıb bu filmi.
Balıqçıyıq, balıqçı.
Ürəyimiz dənizdir.
Xəyalımız, eşqimiz
Sular kimi təmizdir.
Təbiətindəki şuxluğuna uyğun mahnı və bugünkü deyimlə desək, uğurlu klip. Mahnının yazılmasının maraqlı tarixçəsi varmış. Ötən əsrin yetmişinci illərinin ortalarında Lənkəran Dövlət Dram Teatrında Şəkər Aslanın “Sən kimsən, ata” pyesi tamaşaya qoyulurmuş. Musiqisini gözəl mahnılar müəllifi Oqtay Kazımi yazırmış. Bəstəkar mahnının ifası üçün Nazim Ağayevi nəzərdə tutubmuş. Filarmoniyanın qarşısında rastlaşırlar.
- Sənə mahnı yazmışam, gəl “ayaqüstü” məşq edək, - Oqtay Kazımi deyir.
- O nə mahnıdır? Ayaqüstü də məşq olar? – Nazim Ağayev soruşur.
“Ayaqüstü” məşq edirlər. İfa bəstəkarın ürəyinə yatır, mahnı müğənninin.

İllər sonra mahnı filmə çəkilir. Film Nazim Ağayevə hər izi, hər ləpiri, az qala qumları da tanış olan Xəzərin Kiçik bazar sahillərində lentə alınır. Tanış sahillər, balıqçıların tanış simaları, Məşədi Heybətin vətəgəsi. Həmin günün qəribə hadisəsi çəkiliş iştirakçılarının indi də xatirindədir. Balıqçılar iki dəfə ova çıxırlar. İkisində də əliboş qayıdırlar. Həmin ziyafətdə balıq olmur süfrədə.
Bu təsnifi neçənci dəfəydi eşidirdim?! Görən ovqatının hansı vaxtında lentə yazdırıb? Təsnifi dinlədikcə dinləmək istəyirsən. Xalq mahnılarının mahir ifaçısıdır, buna şübhə yoxdur. Amma “Çahargah” təsnifi bütün oxumalarını üstələyir. Şirin, yapışıqlı səsinin bütün imkanlarından istifadə edərək səs möcüzə göstərir sanki. Şirinliyi və rəng çalarlarıyla, əlvan xallarıyla. Bir də ki, “Çahargah” təsnifi kiçik dram əsərini xatırladır mənə. Süjeti, kompozisiyası olan lirik dram əsərini. Təsnifin əvvəlində Vahiddən seçdiyi qəzəli “Segah” üstə oxuyur:
Vahid, heç olmasa, dərd yarıdır
aləmdə yenə,
Bizə rəhm eyləsə aləmdə mindən
biri cananələrin.
Bir qəzəllik muğamda səs nələr etmir?! Düşündürür, haray çəkir, rəngdən rəngə düşür, duyğuları sığallayır. Təsnifi dinlədikcə Nazim Ağayevin sevgi dolu gənclik illəri gəlir gözlərimin önünə. Yəqin elə ülvi məhəbbətlə sevdiyindəndir ki, təsnif də son dərəcə uğurla alınıb. Seçdiyi bayatılara diqqət edək:
Bağçamızda gül-çiçək
Ay oraq gətir, gül biçək.
Mən səni çoxdan sevirəm,
Gəl bu sevdadan əl çək.
Nazim hələ gəncliyindən anasının qohumu olan göyçək Şərəbanını sevir. Amma Şərəbanı biganədir bu sevgiyə. Çünki atası Qüdrət kişinin zəhmi-zabitəsi qorxudur onu. Nazimsə oxuyur:
Narınca bax, narınca
Saxladım saralınca.
Məndə ürək qalmadı day
Səndən bir cavab alınca.
Nazim tələbədir artıq. Teatr İnstitutunda oxuyur. Şərəbanı da Lənkərandakı Pedaqoji Texnikuma daxil olub. Yetkinlik yaşlarındadır. Tətilə gələn tələbə oğlan illər uzunu sevdiyi qızdan razılıq alır nəhayət.
Mixək əkdim ləyəndə,
Ay mixək boynun əyəndə.
O günə qurban demişəm,
Yarım qapıdan girəndə.
Səsindəki nisgilə bir şirinlik qatılıb, adam dinlədikcə doymur.
(Maestro Emin Sabitoğlu bir dəfə Nazim Ağayevə söyləyib ki, evdən çıxırdım, sən “Mixək əkdim” oxumağa başladın. Elə ləzzətlə oxuyurdun, işə gecikdim, amma “Mixək əkməyini” axıradək dinlədim)

Nəhayət, Lənkəranın sayılıb-seçilən ağsaqqalları işə qarışır. Qüdrət kişi qızını Nazimə verir. Nazim bu ailəyə layiqli yeznə olur. İndi ailə qurmalarından 50 il keçir. Şərəbanı xanım böyük sevgini layiqincə qiymətləndirir. Bakıda yaşadığı illərdə Pedaqoji İnstitutda qiyabi təhsil alıb. 30 ildən artıq 132 saylı orta məktəbdə dərs deyib. Yaxın illərdə təqaüdə çıxmışdır. Balaları – Vüsal, Vüqar, Eltəkindən, gəlini Təranə və Aytəndən nəvələri Humay və Südabədən ayırmır ömür-gün yoldaşını. Deyərdim ki, bəlkə də ailənin ən şıltağı Şərəbanı xanım üçün elə Nazim müəllimin özüdür.
Nazim Ağayevin ifasında digər doyulmaz təsnifləri də var.
Lənkəran yolları üstü qovaqdı,
Küçələr hamısı ayna daraqdı
Bir gözəl sevmişəm, məndən
iraqdı.
Ay anam, bu yarım niyə gəlməz oldu,
Aşdıqca dağları görünməz oldu.

Mənim yarım gözəllərin xasıdır.
Əyninə geydiyi toy libasıdır,
Qulağıma gələn yarın səsidir.
Ay anam, bu yarım niyə gəlməz oldu,
Aşdıqca dağları görünməz oldu.
Tanıyanlar deyir ki, bunları da sevgilisinə həsr edib. Gözəl ifa tərzi, səs şirinliyi öz yerində. Sözlərdəki “s” və “t” samitlərinin yanaşı səslənməsindən yaranan ahəng duyğulara xoş ovqat gətirir.
Qəlb oxşayan, ruhu qidalandıran səsinin gözəlliyiylə kifayətlənmir heç vaxt. Xalq və bəstəkar mahnılarına avazına uyğun olaraq öz rənglərini, öz xallarını, öz güllərini vurur. Bir “Şur” dəstgahı var Azərbaycan radiosunun “Qızıl Fond”unda. Nə vaxt lentə alındığını dəqiq bilmirəm. Onu bilirəm ki, ötən əsrin 80-90-cı illərində tez-tez səsləndirirdilər radioda. Hər dəfə də ilk dəfə eşidirmişəm kimi heyranlıqla dinlərdim dəstgahı. Ölməz Fikrət Əmirovun “Şur” simfonik muğamıyla başlayır. Əbülfət Əliyev, Əlibaba Məmmədov, İslam Rzayev, Arif Babayevin səslərinin bütün imkanları açılır o muğamda. Dəstgah Nazim Ağayevin ifasıyla yekunlaşır.:
Ay aşıq, təriflə bizim gəlini,
Qaynına deyin bağlasın belini.
El-oba desin, bəy toyun mübarək.

Dinlədikcə düşünürsən: Bunu yalnız Nazim Ağayev oxumalıdır. Sadəcə oxumur, səsin şirinliyindən bal süzülür sanki. Və ya başqa bir təsnifdə oxuyur:
Dəryadan keçdim gəldim,
Suyundan içdim gəldim.
Gözəllərin içindən
Tək səni seçdim gəldim.
Hansı ovqatda olursan ol, bu təsnifi dinləsən, toy ovqatı, şənlik əhval-ruhiyyəsi yaranar qəlbində.
Xalq mahnılarının mahir ifaçısından olan, “Segah”a öz xallarını vurmaqla muğamlar sırasına öz adıyla bağlı “Həşim segahı”nı əlavə edən Həşim Kələntərli Bakıda da, Lənkəranda da çox yaxın olub Nazim Ağayevə. Ömrünün sonunadək “dayday” deyə, müraciət edib ona. Daydayın məsləhəti ilə vaxtilə onun oxuduğu unudulmuş el havalarına, xalq mahnılarına öz xallarını vurmaqla yenidən xalqa qaytarıb. Xüsusilə, “Ay lolo”, “Ləli qurbanın olum” daha uğurlu alınıb.
Filarmoniyada Ağası Məşədibəyovun ansamblında işlədiyi 8 il müddətində Azərbaycanın bütün rayonlarında, xarici ölkələrdən Polşada, İtaliyada, Almaniyada, Maltada, Misirdə, Vyetnamda... qastrol səfərlərində olur. O səfərlərin unudulmaz təəssüratı indi də yaşayır yaddaşımda.
Misirdə SSRİ dostluğuna həsr olunmuş konsertdə 15 respublikanın tanınmış incəsənət adamları konsert verir. Qazaxıstanın opera solisti Jenya İsakov, Ukraynadan Yuri Boqatikov və s. tanınmışlar iştirak edirlər həmin konsertdə. Dəstəyə SSRİ komsomolunun katibi Tyajelnikov başçılıq edir. Qahirənin 5 min nəfərlik konsert salonunda konsert olur. Proqramda hərəyə üç nömrə veribmişlər. Rusiya, Ukrayna, Moldova, Qazaxıstandan gələn musiqiçilər çıxış edirlər. Növbə Azərbaycana çatır. Azərbaycandan trio - tar, kaman, qoşa nağara gedibmiş. Özü də səsgücləndiricisiz. Nazim Ağayevin ifası dinləyicilərə necə xoş gəlirsə, alqışlardan müğənninin və trionun səsi eşildilməz olur.
Nazim Ağayev Azərbaycan dilində “Sənə qurban”la yanaşı, bir Livan mahnısı, bir də o vaxt dəbdə olan “Şələbiyyə” ərəb mahnısını oxuyur. Şirin, yapışıqlı səsiylə sanki möcüzə göstərir. Bütün salon ayaq üstə alqışlayır müğənnini. Konsertdən sonra Tyajelnikov müğənniyə yaxınlaşıb zarafatla deyir ki, Ağayev, səni burda saxlayacağıq, ərəblər səni yaman xoşladı. Ertəsi gün Tyajelnikov kollektivə bildirir ki, konserti alqışlarla bitirmək üçün təkrarən Nazim Ağayevi oxudaq. Həmin vaxt çoxları, xüsusən Yuri Boqatikov narazılıq etsə də, konserti trionun müşayiətiylə Nazim Ağayev yekunlaşdırır. Yenə kəsilmək bilməyən alqışlar salonu titrədir. Həmin səfərdən sonra Yusi Boqatikov “SSRİ xalq artisti” adı alır.
Nazim Ağayev heç bir təltifə layiq görülmür. Həyatında dəfələrlə üzləşib belə hallarla. Adı fəxri ada layiq görülənlərin siyahısına salınsa da həmin siyahı çatmayıb lazımi ünvanlara. Kiməsə sözün düzünü deməsi, kiminsə üzünə “ağ” olması baha başa gəlib ona. Sənət dostları, ümumiyyətlə, onu tanıyanlar söyləyirlər ki, hamının bildiyi, lakin dilə gətirmədiyi həqiqətləri yalnız Nazim söyləməlidir. Uzunömürlü mahnılar müəllifi, unudulmaz bəstəkar Ələkbər Tağıyevin söylədiklərini həmişə xatırlayır: “Nazim, yaxşı sənətkarsan. Amma heç bir siyasətin yoxdur. Düşündüyün dilindədir.”
Toylardan söz düşəndə gileyini də gizlətmir. “Əvvəllər toylarda mikrofon-zad yox idi. Odur ki, toy aparmaq hər oxuyanın işi deyildi. Vaxtilə toyxanalar ifaçıların meydan yeriydi.İfaçıya bir növ meydan verilərdi ki, məharətini göstərsin. Az qala səhərəcən davam edən muğamlı, təsnifli toy gecələrindən özümüz də zövq alardıq, dinləyənlər də. Bu gün toylarda fonoqramla oxuyurlar. Bayağı mahnıları xalqa fonoqramla elə “sırıyırlar”, adam məəttəl qalır” (Nazim Ağayev haqqında yazını yazdığım ərəfədə müğənni “Space” kanalının qonağı idi. Təəssüf ki, yarıdan baxdım. Söhbət toylardan gedirdi. Sevimli xalq artisti Yaşar Nuri verilişin aparıcısı idi. Yaşar Nuri dedi ki, biz çox zaman istirahət vaxtlarımızda “Ceyran” kafesinə yığışardıq. Orda Nazim Ağayevi toya çağırmaq ustə az qala dava düşərdi. Bəzən bir gecəyə beş-altı toy düşərdi. Hamı da deyərdi ki, mənim oğlumun və ya qızımın toyunu mütləq sən aparmalısan. Bu arzunu reallaşdırmaqdan ötrü toy yiyələri çox zaman toylarının vaxtını dəyişməli olurdular.)
Vaxtilə Moskvanın “Melodiya” firması əsasən xalq mahnıları yazılmış beş valını yüksək tirajla satışa çıxarır. Qısa müddətdə o vallardan biri də qalmır satışda. Sonralar da dəfə-dəfə valları buraxılıb. Amma özü onları satışda görməyib heç vaxt. Buraxılmağı ilə satılmağı bir olurmuş. Ötən illərin birində İtaliyaya gedirmiş. Hədiyyə aparmaq üçün vallarını axtarır. Tapılmır heç yerdə. Rəhmətlik Süleyman Ələsgərov evindəki vallardan ikisini Nazim Ağayevə verir.

Təkcə el havaları, xalq mahnılarıyla bitmir Nazim Ağayevin müğənnilik fəaliyyəti. Təsadüfi deyil ki, ilk dəfə Tofiq Quliyevin “Sən mənimsən, mən sənin” mahnısıyla çıxıb televiziyaya. Sonra Səid Rüstəmovun, Şəfiqə Axundovanın, Ələkbər Tağıyevin, Hacı Xanməmmədovun, Oqtay Kazıminin mahnılarını ifa edib. Süleyman Ələsgərovun “Vağzalı çalınır” mahnısını Şövkət xanım da, İslam Rzayev də özlərinə məxsus şövqlə oxuyublar. Günlərin birində şeirin müəllifi Tofiq Bayramla Nazim Ağayev toyda rastlaşırlar. Şair deyir ki, “Vağzalı çalınır” sözlərimə yazılan mahnılarından ən sevimlisidir. İstərdim bu mahnı sənin ifanda da səslənsin. Sənin ifanı ona görə sevirəm ki, səsinlə, ifanla sanki portret yaradırsan.
Teatr institutunda Soltan Dadaşovun kursunu bitirir. Bu gün xalq artistləri olan Şəfiqə Məmmədova və Səyavuş Aslanla kurs yoldaşı olublar. İnstitutda müxtəlif sənət korifeylərindən dərs alır. Həyatda dərs almadığı, fəqət özünə müəllim saydığı korifeylər də çoxdur. Rəşid Behbudovu, Gülağa Məmmədovu, Əbülfət Əliyevi heyranlıqla dinləyib. Həşim Kələntərliylə Xan Şuşinskini ustad sayıb özünə. Şövkət xanımla Zeynəb Xanlarovanın diqqətcilliyindən ürəkdolusu danışır. Əlibaba Məmmədovla, İslam Rzayevlə, Arif Babayevlə sənət yoldaşlığından başqa ailəvi yaxınlıq da birləşdirir onları.
Həyatda təəssüflə xatırladıqları da çoxdur. Azkonsertin dağılmasını isə musiqiçilərə diqqətsizliyin ən bariz nümunəsi sayır. Vaxtilə o, diplomlara, mükafatlara layiq görüləndə çoxları yox idi sənətdə. Amma onlar adlı-sanlı sənətçilərdir indi. Səsindəki səmimiyyət kimi həyatda da səmimi, saf insandır Nazim müəllim. Söhbətimiz zamanı təəssüflərdən, gileylərdən, etiraflardan da yan keçmir. Və onu da deyir ki, xalqın məhəbbətini bütün mükafatlardan üstün tutur. Sənətdə onu unudulmağa imkan verməyəcək iz qoyduğuna əmindir. Bu məqamda zümzüməsindən də qalmır.
Yarım gəlir asta-asta,
Əldə çiçək dəstə-dəstə.
Gəlib keçər məni görməz,
Gedim durum yolu üstə.
Canlı ifası daha gözəldir. Avazına uyğun elə xallar, elə bəzəklər vurur, ruhumuza dinclik gəlir. Bir az da özündən razılıq duyulur səsində: “Pis ömür yaşamamışam. Unudulmuş el havalarına, xalq mahnılarına yeni həyat verməklə Azərbaycan xalqına xidmət etmişəm.”
Yüz faizli bir həqiqət. Yüzlərlə el havasını, xalq mahnısını – xalqımızın əbədiyaşar incilərini xalqa çatdıran belə müğənnilərimiz çoxdurmu?


Sevda Əlibəyli

Yeni nazir müavini təyin olundu

Adil Qabil oğlu Kərimli Azərbaycan Respublikası mədəniyyət nazirinin birinci müavini vəzifəsindən azad edilib. Prezident İlham Əliyev bununla bağlı Sərəncam imzalayıb. Prezidentin digər Sərəncamı ilə Adil Kərimli Azərbaycanın mədəniyyət naziri təyin edilib.

Özbəkistanda “Şuşa günləri” silsilə tədbirləri keçiriləcək

Beynəlxalq Türk Mədəniyyəti və İrsi Fondunun təşəbbüsü, Özbəkistandakı Heydər Əliyev adına Azərbaycan Mədəniyyət Mərkəzi ilə birgə layihəsi əsasında aprelin 11-12-də Özbəkistanda "Şuşa günləri" silsilə tədbirləri keçiriləcək. Mədəniyyət Mərkəzindən verilən məlumata görə, tədbirin əsas məqsədi TÜRKSOY tərəfindən Şuşa şəhərinin Türk dünyasının Mədəniyyət paytaxtı elan edilməsi, habelə Azərbaycanın Qarabağ bölgəsinin, Şuşanın zəngin mədəniyyəti, incəsənəti, poeziyası, tanınmış şuşalılar, şəhərin turizm imkanlarını bütün dünyaya çatdırmaq və təbliğ etməkdir. Daşkənd şəhərində Heydər Əliyev adına Azərbaycan Mədəniyyət Mərkəzində baş tutacaq “Şuşa Günləri”i tədbirlərinin rəsmi açılış mərasimində Şuşanın mədəniyyəti, ədəbiyyatı, incəsənəti və tarixi ilə bağlı beynəlxalq konfrans, kitab təqdimatı, foto və nəşrlərdən ibarət sərgi, Qarabağa aid milli geyimlərdən ibarət moda nümayişi, bədi şeir kompazisiyaları və konsertlərin təşkili nəzərdə tutulub. “Şuşa Günləri”nin açılış mərasimində Azərbaycan Mədəniyyət Mərkəzinin foyesində “Azad və çiçəklənən Şuşa” adlı foto və nəşr sərgisi təqdim ediləcək, Azərbaycan Mədəniyyət Mərkəzinin böyük konfranslar zalında isə beynəlxalq konfrans öz işinə başlayacaqdır. Beynəlxalq konfransda Özbəkistanın dövlət və hökumət nümayəndələri, Beynəlxalq Türk Mədəniyyəti və İrsi Fondunun rəhbərliyi, Daşkənddəki Türk dövlətlərinin səfirləri, diplomatlar, Özbəkistanın tanınmış ictimaiyyət və mədəniyyət xadimləri, çoxsaylı mötəbər qonaqların iştirakı planlaşdırılır. Daha sonra azərbaycanlı rejissor Ülviyyə Heydərovanın müəllifi olduğu Xurşidbanu Natəvan haqqında sənədli filmin nümayişi nəzərdə tutulub. Tədbirin bədii hissəsində azərbaycanlı musiqiçilər Nisbət Sərdayeva, Rüstəm Müslümov, Elnur Salahovdan ibarət muğam triosunun Xurşidbanu Natəvanın qəzəllərindən ibarət muğam dəstgahları da təqdim ediləcəkdir. Bundan başqa, Azərbaycan Mədəniyyət Mərkəzinin “Azərbaycan qızları” Rəqs Ansamblı Şuşaya dair milli rəqslərimizi ifa edəcəklər. Bədii hissədə Özbəkistanın xalq artisti, “Yalla” Ansamblının bədii rəhbəri Fərrux Zakirovun və dünyaca məşhur “Özbəgim yoshlari” (Özbək gəncləri) musiqi qrupunun rəngarəng çıxışları gözlənilir. “Şuşa günləri”nin ikinci günündə isə Özbəkistan Turon kitabxanasında baş tutacaq, tədbirdə Beynəlxalq Türk Mədəniyyəti və İrsi Fondu, Özbəkistan Yazıçılar Birliyi, Özbəkistan-Azərbaycan Dostluq Cəmiyyətinin, Özbəkistan və Azərbaycan Parlamentinin deputatlarının iştirakı və çıxışları nəzərdə tutulub. Turon kitabxanasında “Şuşa günləri” tədbirləri çərçivəsində Özbəkistandakı Heydər Əliyev adına Azərbaycan Mədəniyyət Mərkəzinin layihəsi ilə özbək dilinə ilk dəfə olaraq tərcümə və çap olunan “Xurishidga yetar boshim” adlı kitabın təqdimat mərasimi və özbək tələbələr tərəfindən Xurşidbanu Natəvanın şeirlərindən ibarət ədəbi-bədi kompozisiya təqdim ediləcək. Özbəkistanda “Şuşa günləri”ndə baş tutan silsilə tədbirlər çərçivəsində Özbəkistan Dövlət Sənət və Mədəniyyət İnstitutunda da tədbir təşkil ediləcək. Dövlət rəsmilərinin də qatılacağı tədbirdə Azərbaycan və Türk dünyasının mədəniyyət paytaxtı Şuşaya dair çıxışlar və təqdimatlar planlaşdırılıb. Tədbirin bədii hissəsində Beynəlxalq Türk Mədəniyyəti və İrsi fondunun təşəbbüsü ilə yaradılmış yeddi türk xalqının nümayəndəsindən ibarət “Yeddi gözəl” çalğı alətləri ansamblının konserti və azərbaycanlı modelyer Gülnarə Xəlilovanın geyimlərindən ibarət Qarabağ bölgəsi, ələlxüsus da XVII əsrin sonu XIX əsrin əvvəllərində Şuşa şəhərində dəbdə olmuş qadın libaslarının moda sərgisi keçiriləcək. Qeyd edək ki, “Şuşa günləri” tədbirlərinin davamı olaraq Özbəkistandakı Heydər Əliyev adına Azərbaycan Mədəniyyət Mərkəzinin layihəsi ilə Azərbaycan mədəniyyəti, habelə Şuşaya dair zəngin kitab kolleksiyası Özbəkistanın aparıcı kitabxanalarına hədiyyə ediləcək və cari ilin iyun ayında Şuşa ilə tanışlıq, Şuşaya dair verilişlərin hazırlanması məqsədi ilə Özbəkistanın populyar telekanallarının təmsilçiləri və onların jurnalistlərinin mədəniyyət paytaxtımız Şuşaya, habelə işğaldan azad edilmiş bölgələrimizə Mediaturu təşkil ediləcək.

Laçın-Xankəndi yolunda bayram konserti qeyd edilib

Laçın-Xankəndi yolunda ekoaksiyanın iştirakçıları üçün bayram konserti keçirilir. Konsertdə tanınmış müğənnilər səhnə alıblar. Şuşa ərazisindən keçən Laçın-Xankəndi yolunun yaxınlığında quraşdırılan səhnədə müğənni Hissin ifasında onun repertuarından olan mahnılar səsləndirilib. Daha sonra Azərbaycanın Xalq artisti Röya Ayxan, Nuri Serinlendirici və Jane Shirokih çıxış ediblər. Onların ifaları aksiya iştirakçılarında və səhnə ətrafındakı insanlarda bayram əhvali-ruhiyyəsi yaradıb.

İlham Əliyev onu mədəniyyət nazirinin müavini təyin etdi

Prezident İlham Əliyevin sərəncamı ilə Səadət Vidadi qızı Yusifova mədəniyyət nazirinin müavini təyin olunub. Butov.az yeni təyin olunan nazir müavini haqqında məlumatları təqdim edir. S.Yusifova 1974-cü ildə anadan olub. 1998-ci ildə “Hər gün” qəzetində jurnalist kimi fəaliyyət göstərib. Hüquq üzrə fəlsəfə doktorudur. Səadət Yusifova Azərbaycan Respublikası Prezidentinin Administrasiyasının Hüquq mühafizə orqanları ilə iş şöbəsinin baş məsləhətçisi vəzifəsində də çalışıb. Bakı Dövlət Universitetinin Beynəlxalq hüquq kafedrasının müəllimi, Azərbaycan Hüquqşünaslari Konfederasiyasinin İdarə Heyətinin üzvüdür. S.Yusifova 2013-cü ildə dövlət qulluğunda səmərəli fəaliyyət göstərdiyinə görə medalla təltif olunub. O, Prezidentin 27 iyun 2013-cü il tarixli fərmanı ilə “Dövlət qulluğunda fərqlənməyə görə” medalı ilə təltif edilib. Azərbaycan Respublikası Prezidentinin Administrasiyasının Siyasi təhlil və informasiya təminatı şöbəsinin müdiri vəzifəsində çalışıb. Daha sonra Prezident Administrasiyasının Qeyri-hökumət təşkilatları ilə iş və kommunikasiya şöbəsinin müdir müavini vəzifəsinə təyin edilib.

Regional mədəniyyət idarələrinin yaradılmasıyla bağlı sərəncam imzalandı

Azərbaycanda yeni regional mədəniyyət idarələri yaradılıb. Prezident İlham Əliyevin müvafiq Sərəncamına əsasən, aşağıdakı regional mədəniyyət idarələri yaradılıb:
1.1. Abşeron–Xızı Regional Mədəniyyət İdarəsi;
1.2. Dağlıq Şirvan Regional Mədəniyyət İdarəsi;
1.3. Gəncə–Daşkəsən Regional Mədəniyyət İdarəsi;
1.4. Qarabağ Regional Mədəniyyət İdarəsi;
1.5. Qazax–Tovuz Regional Mədəniyyət İdarəsi;
1.6. Quba–Xaçmaz Regional Mədəniyyət İdarəsi;
1.7. Lənkəran–Astara Regional Mədəniyyət İdarəsi;
1.8. Mərkəzi Aran Regional Mədəniyyət İdarəsi;
1.9. Mil–Muğan Regional Mədəniyyət İdarəsi;
1.10. Şəki–Zaqatala Regional Mədəniyyət İdarəsi;
1.11. Şərqi Zəngəzur Regional Mədəniyyət İdarəsi;
1.12. Şirvan–Salyan Regional Mədəniyyət İdarəsi.

Tanınmış incəsənət xadimi vəfat etdi

Müğənni Zeynəb Dostəliyeva vəfat edib. Bu barədə onun yaxınları məlumat yayıb. Sənətçi bir neçə gün əvvəl qaraciyər və böyrək ağrıları ilə xəstəxanaya yerləşdirilmişdi.

Alimin şəxsiyyət nümunəsi

Tanınmış filoloq, görkəmli alim, əməkdar müəllim, professor Abbas Abbasov 50 ildir Bakı Dövlət Universitetində (BDU) çalışır, tam bir qərinə - 33 ildir ki, İngilis dili kafedrasının müdiri, nəşr olunmuş 40-dan çox monoqrafiya, dərslik, lüğət kitablarının və ölkə, beynəlxalq elmi nəşrlərdə dərc olunmuş 100-dən artıq elmi məqalənin müəllifidir. Ali təhsilimizin flaqmanı olan BDU-da elmi fəaliyyəti dövründə yüzlərlə gənc mütəxəssisin, tədqiqatçı alimin, ixtisaslı kadrların yetişdirilməsində böyük rolu, əməyi var.
O, öz sahəsi üzrə çox sayda “ilk”lərə imzasını yazıb. Onun "İngiliscə-rusca atalar sözləri və zərbi-məsəllər lüğəti" (490 səh.), "İngiliscə-rusca hüquq terminləri lüğəti" (435 səh.), "İngiliscə-Azərbaycanca texniki terminlər lüğəti" (400 səh.), "İngiliscə-rusca kimya terminləri lüğəti" (1000 səh.), "İngiliscə-rusca-Azərbaycanca riyaziyyat terminləri lüğəti", “Rusca-ingiliscə idman lüğəti”, “İngilis dili proqramı”, “Riyaziyyatçılar üçün ingilis dili dərsliyi”, “Hüquq fakültəsi üçün ingilis dili dərsliyi”, “Başlanğıclar üçün ingilis dili dərsliyi”, “Coğrafiya fakültəsi tələbələri üçün ingilis dili dərsliyi”, “Hüquq fakültəsi üçün ingilis dili dərsliyi”, “İngilis gülüşü” və digər kitabları illərlə çəkilən zəhmətin, yorulmaz axtarışlarının, müxtəlif sahələrə dair geniş elmi biliklərinin, zəngin dünyagörüşünün sübutudur. Onlarla monoqrafiyanın elmi redaktoru, rəyçisi, dissertasiya müdafiə şuralarının, komissiyaların üzvüdür. Obyektiv, ədalətli, hər kəsin uğuruna könüldən sevinən müəllimdir, əsl “tələbə adamı”dır.
Dilçilik elmimizin ağsaqqalı, AMEA-nın müxbir üzvü, professor Qəzənfər Paşayev “Azərbaycan müəllimi” qəzetinin 14 yanvar 2011-ci il tarixli nömrəsində Abbas müəllimə həsr etdiyi “Tanınmış pedaqoq və alimin uğurları” adlı məqaləsində yazdığı kimi, Abbas müəllim doktorluq dissertasiyası müdafiə etmədən professor adı alan, bu haqqı qazanan azsaylı alimlərimizdən biridir.
Müstəqilliyin təzə vaxtları Amerika səfiri Universitetdə görüş keçirirmiş, Abbas müəllim danışır, tərcüməçilik də edir...Səfir deyir mən heç inanmazdım ki, Azərbaycanda ingils dilini, hələ bir çox çətin ləhcələrini belə dərin, gen-bol bilib sərbəst danışan ola bilər.
Universitetin çoxminlik tələbələri, professor-müəllim ordusu arasında bu elm-təhsil ocağı ilə get-gəli olan, onunla ünsiyyəti olan hər kəsin yaddaşında Abbas müəllimin adının qarşısındakı təyinlər sırasında xarakterinə güzgü tutan Kişi Adam, Yaxşı İnsan sözləri də var. Onun haqqında bu sözləri uzun illər BDU-da birlikdə çalışdıqları mərhum akademikimiz, dilçilik elmimizin sonuncu patriarxı Tofiq Hacıyevdən, tətbiqi riyaziyyat elmimizin korifeyi akademik Məhəmməd Mehdiyevdən, telejurnalistikamızın ən böyük siması professor Qulu Məhərrəmlidən, həmkəndlisi-Şəhid Milli Qəhrəman Şükür Həmidovun atası, nəcib ziyalı Nəriman müəllimdən də eşitmişəm.

İnsan təkcə onu dünyaya gətirən Ata-Ananın deyil, həm də doğulduğu, havasını udduğu, göz açıb ilk gördüyü, ayaq açıb ilk yeridiyi, könül verib ilk sevdiyi, güc-qüvvət, ruh, enerji aldığı yerin, yurdun da övladıdır. Abbas müəllimin Alyanlı, Ziyarət dağları kimi əzəmətli boy-buxunu, ağayana yerişi, məğrur duruşu, ləngərli sözləri, müdrik söhbətləri, nüfuzedici baxışı da təsdiq edir; bu Kişi belə doğulub, yaşayıb, elə yaddaşlarda da belə qalacaq. Onu dəfələrlə xaricə dəvət ediblər, Abbas müəllim ondan da, çox vəzifələrdən də imtina edib. Elə doktorluğu da bürokratik, süni əngəllərə görə müdafiədən imtina edib.
Dəyərli dostum Abbas Abbasovu Qubadlı camaatı öz təşəbbüsü ilə mənim bildiyim qədər iki dəfə Milli Məclisə seçmək üçün razı salmağa çalışıblar, etiraz edib ki mənlik deyil. Tez-tez el məclislərində birlikdə oluruq, hər dəfə onun el-oba, böyük-kiçik, rəhbərlik yanında nə qədər layiqli nüfuz, xətir-hörmət sahibi olduğunu görür, sevinirəm.
1988-1993-cü illərdə bədbəxt, bədnam qonşularımızın dışarıdan fitnə-fəsadla üstümüzə qısqırdıldığı günlərdən Abbas müəllimin bir ayağı Qubadlıda idi. Vəzifəli, imkanlı adamları da səfərbər eliyirdi, silah-sursatla, dava-dərmanla, gərəkli əşyalarla gəlirdi. Səngərdə əldə silah dayanan yurd keşikçiləri ilə həmdərd, həmsöhbət olurdu, sözüynən, ağlıynan, məsləhətləriynən ruh verirdi, bu namərdliyin tarixindən danışırdı. O zamanlar sonu hələ görünməyən mətləbləri andırırdı.
Abbas müəllim neçə dəfə Universiteti atıb sıravi döyüşçü olmaq fikri ilə Qubadlıya gəlmək istəmişdi, ancaq baxırdı ki torpaqların ölüm-dirim məsələsi Bakıda həll olunur. Yığışırdılar dəstə-dəstə alim, ziyalı, ağsaqqal Prezident Aparatının, Müdafiə Nazirliyinin qarşısına, hökumət adamlarının kabinetinin qabağına, vəziyyəti izah edirdilər, silah-sursat, yardım tələb edirdilər, az qala əlbəyaxa davaya çıxırdılar. Ancaq nə fayda, plan, ssenari cızılmış, hökm verilib icraya yönəlmişdi...Və sonra özünün də çox sayda qardaşları, qohum-əqrəbası da daxil didərginlərin yerləşdirilməsinə, 28 il sürən ağır yaşamına dəstək vermək. Zatən o kişinin soyu dədə-babadan məkrli rus-erməni zülmündən əziyyət çəkib; SSRİ adlanan şər imperiyasında sovet hökuməti ən gec Alyanlı obalarında (Hat, Deştahad, Başarat, Armudluq kəndləri) bərqərar tutub.
30-cu illərdə sosializmin tam və qəti qələbəsinə mane olan yeganə məkan Alyanlı (türk tayfa adıdır), sonacan da müqavimət göstərən silaha sarılıb dağlara qalxan Alyanlı qaçaqları olmuşdu. Axır ki, M.Bağırov Stalindən gələn qəti göstərişin icrasını təmin etmək üçün əksəri erməni-rus millətindən olan NKVD və sərhəd qoşun dəstələri ilə Alyanlı ətrafı keçilməz meşə, dağ, kaha, qaya, obaları mühasirəyə alır, günlərlə sürən atışmalarda ən yaxın silahdaşları da daxil xeyli itkiyə məruz qalır, özü də ölümdən təsadüfən qurtulur, qaçaqları güc yolu ilə məhv edə bilmir, sonda fitnə-fəsadla aldadır, yalandan kişi sözü, vəd verib qaçaqları üzə çıxarandan dərhal sonra hamısını və Alyanlı obalarının yetkin kişi cinsindən olan bütün yetkin gənclərini camaatın gözü qabağında sorğu-sualsız, məhkəməsiz, hökmsüz güllələdir, sağ qalan arvad-uşaq hamını, Abbas müəllimin doğmaları da aralarında olmaqla Bərdədə bir düzəngaha köçürdür, indi A(Ə)lyanlı adlanan kəndin sakinləri o ellərin camaatının törəmələridir.
Abbas müəllimin atası II Dünya savaşında həlak olub, evin böyüyü kimi ağır külfətin ağırlığı onun çiyninə düşüb. Uşaqlıq dostu, həmkəndlisi, qohumu Başaratlı İnsan Əli - Şəmkir rayonunun prokuroru Əli Əliyev haqqında yazmışdım ki, onun I davada elədiyi yardımı Müdafiə Nazirliyi də Qubadlıya eləsəydi, bizim itkilərimiz bu qədər çox, erməninin ölüsü bir belə az olmazdı. Abbas müəllimin qan qohumu Müzəffər İbadov Başaratda kolxoz sədri, sovet sədri idi, dava başlayandan əli silah tutanları başına yığıb rayon mərkəzindən ən uzaq məsafədə yerləşən, Qaçaq Tavatın, Alyanlı qaçaqlarının zamanından qonşuluqdakı ermənilərlə məxsusi haqq-hesabı, qanlılığı olan Alyanlı obalarının müdafiəsini də üstünə götürmüşdü.
1992-ci il oktyabrın 12-də erməni yaraqlıları çoxdan qanına susadıqları Müzəffər kişini bir üzü Şuşaya baxan Topağac səmtində mühasirəyə alırlar, son gülləsinə qədər vurub qırır, ancaq özü də səngərdə gülləbaran olur. Və yaraqlılar buranı daimi nəzarətdə saxlayır, nəşinin götürülməsinə imkan vermirlər. Abbas müəllim uşaqlıqdan mal otarıb meyvələrini dərdiyi, hər qarışına bələd olduğu bu meşəliklərdən qan qohumu dostunun nəşini necə çıxarıb götürdüklərini mənə danışıb, hər dəfə bədənim titrəyib. Abbas müəllimi bu sərhəd səfərlərində vəfalı ömür-gün yoldaşı, BDU-nun baş müəllimi Roza xanım Abbasova da tək buraxmırdı, onunla birlikdə olurdu, ata-anasını itirən körpələri, qanına qəltan edilən gənclərimizi, başsız qalan ailələri görürdü, qayıdıb Bakıda yardımlar yığıb toplayırdı, təzədən qayıdıb yerinə, ehtiyacı olanlara çatdırırdı.
Kaş həyatdan vaxtsız köçən Roza müəllimə biləydi ki, Abbası ona nə qədər sadiq qalıb, onun kafedrada, elmi şurada müzakirə və təsdiqdən keçmiş monoqrafiyasını, yarımçıq qalan, bürokratik əngəllər və zamanın faciəli hadisələri üzündən müdafiə mərhələlərini tamamlayıb sona çatdıra bilmədiyi tədqiqatını Abbası bu son illərdə layiqincə, böyük zəhmət hesabına başa çatdırıb, təkmilləşdirib, tamamlayıb mükəmməl möhtəşəm bir tədqiqat əsərini -“Azərbaycan dilinin Qubadlı şivələri” monoqrafiyasını (təəssüf ki bizdə hələ də müdafiə mərhələlərini keçmədən hazır elmi nəticələri ortada olan tədqiqata görə elmi dərəcə vermə qaydası yoxdur) Roza xanımın əbədiyaşar xatirəsinə həm də sevgi abidəsi olaraq təkrar nəşr etdirib dilçilik elmimizə, cəmiyyətə, Zəngəzur camaatına ərməğan edib. Var ol, Karlı Kişi! Abbas müəllimin (və Roza xanımın) ailəsində onların adına layiq ləyaqətli diplomat, müəllim, alim övladları da bu Vətənin xidmətindədir.
2021-ci il oktyabrın 25-i Qubadlının yağı tapdağından qurtuluşunun 1-ci ili cənab Prezident, Ali Baş Komandan və Birinci vitse-prezidenti qarşılamaq üçün kiçik bir qrupla Qubadlıya gedirik, təbii ki, rayon ziyalıları adından ilk sözü də demək, xoş gəldin eləmək haqqı Abbas müəllimə verilir. Hər şey də əla olur.
Abbas müəllim belə Kişidir və bu Vətənin Abbas müəllim kimi qeyrətli kişi, alim, ziyalılara ehtiyacı çoxdur, çünki belə örnəklər çox azalıb. Doğum gününüz mübarək, bundan sonra da sizə sağlam, uzun, xeyirli ömür diləyirəm, əziz Abbas müəllim!

Hacı Nərimanoğlu,
“Zəngəzur” Cəmiyyətləri Birliyinin sədri

Avroviziya seçimləriylə bağlı ittihama cavab gəldi

“Avroviziya 2023” Azərbaycan nümayəndə heyəti ittihamlara cavab verib. Nümayəndə heyətinin mətbuat katibi İlahə Dadaşova seçim mərhələsinə qatılmış bəzi ifaçıların şəxsi sosial səhifələrində son iki gün ərzində yaydıqları iddialarla bağlı açıqlama verib. Açıqlamada deyilir: “Əvvəla qeyd etmək istərdim ki, bu iddialara cavab verməyimizin əsas məqsədi final mərhələsinə seçilən ifaçılara qarşı hörmətsizliyə biganə qalmamaqdır. Seçilmiş 5 iştirakçı təqdim etdiyi musiqi və ifası sayəsində bu mərhələyə çatıb. Tam yanlış olaraq artıq qalibin seçildiyi iddia edilsə də, bildiririk ki, final mərhələsi məhz bu günlərdə keçirilir və bu prosesin gedişatı barədə məlumatların tezliklə ictimaiyyətə açıqlanması nəzərdə tutulur. Seçim prosesinə mənfi təsir etməyəcək bütün məlumatları yaxın günlərdə paylaşacaq, finalçıların adlarını açıqlayacağıq. Bir az səbirli olmağınızı xahiş edirəm”. " “Avroviziya 2023” Azərbaycan nümayəndə heyətinin musiqi prodüseri Eldar Qasımov isə bildirib ki, builki Avroviziya təmsilçimiz hələ bəlli deyil: “Bu qərar verilməzdən öncə yerli və beynəlxalq musiqi aləmindən təcrübəli insanların rəyləri öyrəniləcək. Sağlam rəqabəti təmin etmək üçün bütün finalçıların mahnılarını bir neçə gün əvvəl eyni studiyada, eyni şəraitdə yazdırmışıq.”Nümayəndə heyətinin rəhbəri Vasif Məmmədovun sözlərinə görə, komanda üzvlərinin müsabiqəyə müraciət etmiş ifaçı və bəstəkarlarla tanışlığının seçim prosesinə heç bir təsiri yoxdur: “Eldar Qasımov və Ömər Əbdülkərimov illərdir musiqi sahəsində çalışırlar və onların bu sahədə həm dostları, həm yaxın həmkarları var. Bu, təbii bir haldır. Amma qeyd etməliyəm ki, Avroviziya heyətinin üzvlərindən heç biri müsabiqədə iştirak edən hər hansı ifaçının meneceri deyil və olmayıb. Böhtan xarakterli məlumatları yayanlara isə vaxtlarını və enerjilərini yaradıcılığa yönəldib, şöhrət qazanmağı arzu edirəm.”

Avroviziya seçimlərində haqsızlıq - Eldar Qasımov ittiham edildi

Bu il Böyük Britaniyada keçiriləcək Avroviziya mahnı müsabiqəsində Azərbaycanı təmsil etmək üçün nümayəndə seçimlərində haqsızlığa yol verildiyi iddia olunur. Seçimlərdə iştirak etmiş Rauf Kingsley ləqəbli ifaçı şəxsi instaqram hesabında bununla bağlı müraciət ünvanlayıb. Gənc müğənni iddia edir ki, münsiflər heyətinin üzvü Eldar Qasımov və onun meneceri Omar Abdulkarim müsabiqəyə qatılan sənətçilərin mahnılarını dəyərləndirməyib. Onun sözlərinə görə, müsabiqənin yekununda Omar Abdulkarimin meneceri olduğu "Mamagama" qrupu qalib seçilib. "Bir neçə gün əvvəl qrupu dağıdıb, xarici vətəndaş olan qrup üzvünü kənarlaşdırıb, bir gecə ilə qondarma qrup yaradaraq Avroviziyaya göndərməyi planlayıblar" - müğənni paylaşımında qeyd edib. İddiada adı hallanan "Mamagama" qrupunun üzvü Safael Mişiyev açıqlamasında müsabiqəyə hələ seçilmədiklərini, digər seçim iştirakçıları kimi gözlədiklərini bildirib: "Biz hələ heç yerə getməmişik, seçilməmişik, cavab gözləyirik. Kim seçiləcəksə, uğurlar olsun". S.Mişiyev təmsil etdiyi musiqi qrupunun dağıdılaraq, yenidən yaradılması ilə bağlı iddialara da cavab verib: "Roman xaricdə işləyir, işi atıb bura çox vaxt gələ bilmir. Qrup isə dağılmayıb". Müğənni Eldar Qasımov və Omar Abdulkarimlə əlaqə saxlamağa çalışsaq da, zənglərimizə cavab verilmədi. Seçimləri təşkil edən İctimai televiziyadan isə deyilənlərin yalnış olduğu, iddialar barədə rəsmi açıqlama veriləcəyi bildirilib. Qeyd edək ki, ötən il müsabiqədə Ukrayna qələbə qazansa da, müharibə səbəbindən yarışın Britaniyada keçirilməsinə qərar verilib. Mayın 9-u və 11-də Avroviziya mahnı müsabiqəsinin yarımfinal mərhələsi keçiriləcək. Mayın 13-də isə final baş tutacaq.